Joe e memre disi ete?

Joe ben prisiri foe leisi den tijdschrift A Waktitoren foe den moen di pasa? Efoe dati de so, dan sondro degedege joe sa feni en wan moi sani foe memre san e kon now:

▫ Sortoe boeweisi di e overtoigi sma ben gi nanga jepi foe den difrenti fasi fa a santa jeje ben wroko ini a fosi jarihondro?

Den wroko disi ben gi boeweisi di sma ben kan si, taki Gado no ben gebroiki a 1500-jari-owroe gemeente foe Israèl moro langa leki en spesroetoe pipel, ma a feni di a ben feni sma boen ben rostoe now tapoe a njoen kresten gemeente, di a wan enkri Manpikin foe en ben opo. (Teki gersi Hebrewsma 2:2-4.) — 1/8, bladzijde 5.

▫ San e meki a kefarlek bigi gro kon di Jehovah Kotoigi e ondrofeni?

Ini a fosi presi, disi de foe di Gado e blesi a wroko. A de a wroko foe Gado. San Jehovah Kotoigi e leri sma ini na evangelium preikiwroko foe den, den e taki tapoe gron foe bijbel. Wan tra sroto di e sorgoe gi a boen bakapisi foe den, na a erken di den e erken Krestes Jesus dorodoro leki na Edeman di Gado poti, foe a kresten gemeente. — 1/9, bladzijde 15, 16.

▫ Foe san ede Jehovah ben sori David sari-ati ini a tori foe a bigi sondoe foe en nanga Batseiba?

Na a fosi presi foe a Kownoekondre froebontoe ede di Gado ben meki nanga David, ma so srefi foe David en eigi sari-atifasi nanga en opregti berow (1 Samuèl 24:4-7; 2 Samuèl 7:12; 12:13; Psalm 51:1, 2, 17). — 1/9, bladzijde 20, 21.

▫ Sortoe dri sortoe boeweisi den kresten Griki Boekoe e gi foe horibaka gi a de di Jesus de a Mesias?

A geslaktilin foe Jesus na a fosi wan foe den boeweisi (Mateus 1:1-16; Lukas 3:23-38). Wan tra boeweisi na profeititori di kon troe. Joe abi troetroe heri ipi profeititori, so leki a wan di wi e feni na Danièl 9:25, di e meki sma kon sabi Jesus leki a Mesias. A di foe dri sortoe boeweisi na a kotoigi di Gado srefi kotoigi foe dati; nanga en eigi sten a ben gi disi na dri okasi (Mateus 17:5; Lukas 3:21, 22; Johanes 12:28). — 1/10, bladzijde 9, 11.

▫ San Jesus ben wani taki di a ben taki, so leki skrifi na Mateus 24:37: „Neleki fa den dei foe Noa ben de, na so a denoja foe a Manpikin foe libisma sa de”?

Noa ben e bow na ark èn ben warskow den ogrisma wan toe tintenti jari bifo a Froedoe ben doro èn a kroektoe grontapoe seti dati ben pori. Na a srefi fasi, a denoja foe Krestes di sma no man si, sa teki wan pisi ten foe wan toe tintenti jari, ini a ten di a kotoigi e gi na heri grontapoe, bifo dati toe doro en heimarki ini wan bigi pori. — 1/10, bladzijde 15.

▫ San na wan toe prenspari sani gi wan boen osofamiri bijbel studie?

Joe moesoe bai ten gi a studie. Wi no moesoe gi pasi taki telefisi programa noso tra ontspanning e kon ini a presi foe dati. Go prakseri den spesroetoe sani di na osofamiri foe joe abi fanowdoe. Gebroiki aksi foe sabi san den e denki so taki joe de seiker taki den pikin e froestan san den e leri (Mateus 17:25). Hori a fasi fa a studie e doe na wan fasi taki sma no de spanspan. De nanga faja, èn meki ala sma teki prati na a studie. — 1/10, bladzijde 17.

▫ Ofoeroe wan kresten moesoe broko en ede taki pisi foe broedoe ben poti na ini njanjansani?

Kresten moesoe de na ai ini a tori foe no kon broeja soso foe di a kan taki disi de so noso foe di sma e takitaki foe en èn a de fanowdoe foe de redelijk srefi te wi e loekoe den etiket noso e aksi bodoi foe sraktiman. Ma te a de seiker taki na a kontren drape broedoe e gebroiki na ala sei — efoe a de ini njanjan noso foe dresi sma — kresten moesoe abi a fasti bosroiti foe gi jesi na a komando foe Gado foe tan farawe foe broedoe (Tori foe den Apostel 15:28, 29). — 1/10, bladzijde 30, 31.

▫ Fa a boekoe Odo e trowe leti na tapoe a dipi na jeje fasi foe den fasi foe gi leri di den ben gebroiki na Israèl?

A boekoe Odo e sori taki a marki ben de foe leri „denwan di no abi ondrofeni” den sortoe hei sani leki koni, tranga leri, froestan, inzicht, retidoe, konifasi, sabi èn a man di wan sma man denki — ala disi ini „frede gi Jehovah” (Odo 1:1-7; 2:1-14). — 1/11, bladzijde 9.

▫ Sortoe balansi fasi foe si a teki foe leri jongoe sma moesoe abi ini a ten disi?

Kresten moesoe si a teki foe leri leki wan fasi di den e gebroiki foe doro wan marki di wan sma e winsi. Ini den lasti dei disi, a marki foe den de foe dini Jehovah so boen èn so foeroe leki den man ini a foeroeten diniwroko efoe den kan doe dati. — 1/11, bladzijde 14.

▫ Foe san ede Jehovah ben aksi a nâsi Israèl foe pai di foe tin pisi?

Na a fosi presi, so taki den ben kan sori na wan krin fasi a warderi foe den gi a boen-ati foe Jehovah. Èn na a di foe toe presi, so taki den ben kan gi bijdrage foe sorgoe gi den Leifisma, di foe dati ede ben man poti den prakseri na tapoe den froeplekti foe den, di ben wani taki toe a leri di den ben leri sma a Wet. (Loekoe 2 Kroniki 17:7-9.) — 1/12, bladzijde 9.

▫ San na a di foe tin pisi di kresten e kisi a kari foe tjari kon? (Maleaki 3:10)

A di foe tin pisi e prenki a porsi foe san na foe wi di wi e tjari gi Jehovah, noso e gebroiki ini a dienst foe en. Disi na wan marki foe wi lobi gi en èn a froestan di wi e froestan taki wi na foe en. — 1/12, bladzijde 14.