Foe den hei oso na ini den foto, te go na den toendra gransabana — Go na den sma

NO WAN alen noso snew noso pisipisi ijs di e fadon komoto na loktoe, noso wolfoe noso bergi lew noso kefalek gebied ben kan tapoe a fasti bosroiti foe den. Nanga wan bigi snelheid den ben rèi 3000 kilometer pasa abra wan opo grasi sabana, krasi liba, nanga dipi lagipresi, foe tjari prenspari post go na a West sei sjoro foe Amerkankondre. Soema na den?

Den ben de deki-ati jongoeman di ben de rèiman foe a pony express.a San ben wiki so wan tranga overtoigi na ini den jongoe man disi? Kande a ben de a tjalensi, a risikow, nanga a satisfaksi taki den ben kan tjari a post pasa go doro. Wan moi sani na taki ibriwan foe den rèiman ben tjari wan bijbel na ini en sadritas makandra nanga a prenspari post.

Moro leki wan hondro jari na baka, wan moro bigi fasti overtoigi, faja, nanga loyaalfasi de foe si na den moro leki 113.000 loyaal Kownoekondre preikiman na ini heri Kanada. San e boeweigi den? Lobi gi Gado èn gi den kompe e boeweigi den foe gi a Kownoekondre waarheid nanga jepi foe boekoe èn nanga jepi foe a wortoe foe den mofo. A waarheid disi di e gi libi de moro prenspari moro leki iniwan tra post di a pony express ben tjari. Ija, a de a warti Kownoekondre boskopoe foe a Santa bijbel, a srefi boekoe di ben de na ini den sadritas foe den rèiman foe a pony express. — Odo 2:21, 22; Jesaja 2:2-4; 61:2; Mateus 22:37-39; 24:14.

Lobi gi Jehovah èn gi sma e boeweigi den

Jehovah Kotoigi lobi foe taki foe a Kownoekondre nanga sma. Joe sa si taki den e doe dati na ini hei oso na ini foto, na ini farawe libimakandra na ini den toendra, opolanigron, na tapoe strati èn na tra poebliki presi, èn na a telefon. Foe san ede na ini den difrenti presi disi?

Ekonomia nanga demografis situwâsi di e dwengi sma foe kenki a fasi fa den e libi, de wan kefalek bigi tjalensi foe feni sma na oso. Na ini foeroe kefal, a masra nanga a wefi e wroko foe sorgoe gi den moro prenspari materia sani di de fanowdoe gi na osofamiri, èn nofotron disi abi leki bakapisi taki den no e poti prakseri tapoe den sani di de fanowdoe na jejefasi. Foe di den de na ondro den sortoe druk nanga stress disi, meki den abi wan switi boskopoe di e gi howpoe tranga fanowdoe. Nanga prisiri den Kotoigi foe Jehovah e doe wan sani na tapoe dati. Nanga koni foe man si sani krin èn nanga switifasi, den e meki okasi foe tjari a boen njoensoe gi ala sortoe sma na wan switi fasi èn na wan fasi di e hari sma prakseri. — 1 Timoteus 2:3, 4.

Na ini tra tongo: Di Jesus ben komanderi en bakaman foe ’go èn meki disipel’, a ben gi den pasi foe doe wan sani fosi èn foe abi wan fasti bosroiti foe tjari a boskopoe foe howpoe gi sma foe ala tongo (Mateus 28:19). Soleki fa a de nanga foeroe kondre, na so Kanada kon tron wan moksi patoe foe difrenti koeltoeroe nanga tongo, èn foeroe Kownoekondre preikiman fiti densrefi foe di den ben leri njoen tongo.

Foe eksempre, wan trowpaar di de foeroeten dinari na ini Edmonton, Alberta, ben si taki a de fanowdoe na ini a foto foe den foe miti sma di ben taki Mandarijn-Sneisitongo. Ma a trowpaar ben moesoe bigin leri taki a tongo fosi, èn foe dati ede den ben meki kontakti nanga wan universiteit studenti di ben taki Mandarijntongo. A ben agri foe leri den a tongo èn na a srefi ten foe leri bijbel waarheid foe den. Dati ben de wan boen situwâsi! Na ini 24 moen, den toe loyaal Kownoekondre preikiman disi ben koni nofo foe man gi sma leri na ini Mandarijntongo. Na a srefi ten, a leriman/studenti foe den ben doro den markitiki foe de wan dopoe kresten.

Den srefi sortoe ondrofenitori disi de toe na ini tra foto te Kownoekondre preikiman, foe di lobi e boeweigi den, e leri tongo soleki Pôlsoe, Rosiatongo, nanga Vietnameisi.

Na tapoe pasi: Leki den rèiman foe a pony express foe a jarihondro di pasa, di ben rèi den wawan, na so Kownoekondre preikiman na ini a binnenland foe British Columbia e rèi den wawan na ini truck. Wan bigi pisi foe den ten den e gebroiki na den grontapoe wroko foe rèi bigi truck di e tjari oedoe na ini boesi kontren go na den sa-fabriki. A de fanowdoe foe abi dorodoro kontakti nanga den tra man di e rèi truck nanga jepi foe CB (citizens band)-radio, foe taki foe a fasi fa a verkeer de èn foe den kefar na tapoe den pasi.

Na wan konifasi den Kownoekondre preikiman disi e gebroiki den CB-radio foe den na wan aparti fasi. Den e bigin takimakandra nanga a CB foe di den e taki foe njoen njoensoe tori. Dan na wan konifasi den e taki foe bijbel. Na ini wan kefal wan kompe truck rèiman ben taki wan sani na tapoe san bijbel e taki foe a howpoe foe den dedewan (Johanes 5:28, 29; Tori foe den Apostel 24:15). A dede foe wan kompe rèiman na ini wan ongolokoe na tapoe wan highway ben gi en hebi broko-ede. Nanga tangi a ben teki wan bijbelstudie èn now joe kan jere en e meki a boen njoen bekènti gi kompe wrokoman nanga mati. Moro fara, gi a prisiri foe en, wan bijbelstudie ben bigin nanga a weduwe foe en mati di dede. Dati na wan bigi pai foe a teki di den ben teki fesi foe prati a boskopoe disi foe waarheid di e gi libi, na a aparti fasi disi!

Nanga opolani: Te Kownoekondre preikiman moesoe gi a warti boskopoe foe waarheid, dan fajafaja e go pe sma de, ’e go na ini dorpoe’ nanga jepi foe pikin opolani (Mateus 10:11, 12). Wan pisi ten pasa kaba, dan toe opolani groepoe, di ben abi faja foe meki a boen njoensoe bekènti èn tapoe den eigi kostoe, ben frei go na den sma di e libi panjapanja na a heri bigi presi foe a toendra gransabana. Ibriwan opolani groepoe ben frei so wan 3000 kilometer èn ben saka na tapoe 14 difrenti libimakandra, èn ben de 250 kilometer krosibei foe a poolcirkel. Den preikiman disi di no ben e kon weri ben tan go doro seibi heri dei langa foe miti den sma di ben de aparti foe tra sma foe di den ben de farawe.

Èn a ben warti foe doe dati? Prakseri nomo foe a positief krakti di a bijbel boskopoe ben abi na tapoe den libimakandra disi. Den dinari di ben fisiti den ben jepi foe satisferi wan prenspari jeje fanowdoe, di den ben froeklari a prakseri foe Jehovah gi wan paradijs grontapoe di sa kon heri esi na ini a ten di e kon (Mateus 5:3). Langa ten baka te den sma di ben tjari a boskopoe ben gowe, dan reti-atisma na ini den libimakandra ben sa man leisi den 542 bijbel nanga den boekoe gi bijbelstudie èn den 3000 tijdschrift di ben gi persoonlijk na den. — Teki gersi Tori foe den Apostel 12:24.

Nanga telefon: Doesoendoesoen sma di e libi na ini foto e libi na ini hei oso di abi kefalek koni veiligheid sistema. Tokoe Kownoekondre preikiman di de loyaal e go doro nanga faja èn nanga koni. Fa den man go pe den sma disi de? Ala di wi e froekisi foe miti persoonlijk nanga den sma, tokoe nofotron den e gebroiki na intercom foe na oso nanga boen bakapisi. Te disi no man, dan den e meki den finga e doe a wroko foe di den e bel sma nanga telefon.

Wan mamanten wan owroe oema ben teki a telefon foe en. Baka di a preikiman ben gi wan switi èn sjatoe odi, dan a ben aksi na oema efoe a e denki taki wan ten ben sa de te sma ben sa man waka veilig na strati teneti. Bijbeltekst ben leisi foe gi en a djaranti taki vrede ben sa de pasa marki na ini a ten di e kon (Psalm 37:10, 11; Danièl 2:44; Mateus 6:9, 10). A ben agri foe taki baka nanga telefon a wiki na baka na a srefi ten, foe taki foe san ede wi kan bribi den pramisi foe Gado. Baka wan moen di den ben studeri bijbel nanga jepi foe telefon, ben leisi den paragraaf foe wan bijbelstudie boekoe èn ben poti boen aksi, dan a Kownoekondre preikiman ben kisi prèise foe na oema taki a ben man kon nanga foeroe difrenti lezing ibri wiki. A ten ben doro foe taigi en fa a studieboekoe de èn foe aksi en efoe a wani wan gi ensrefi. Sani ben seti baka dati foe miti densrefi persoonlijk. Ija, Jehovah Kotoigi sori a lobi di den abi gi sma, èn sma e doe wan sani na tapoe èn e erken taki Jehovah de nanga den kresten preikiman disi. — Teki gersi 1 Korentesma 14:25.

Nanga boekoe: Kownoekondre preikiman na ini a distrikt Quebec di e taki moro foeroe Fransitongo e go toe pe den sma de. Wan bedinari di e rèis ben taki: „Foeroe jari langa den brada ben abi a prakseri taki den no e gro bika foe a tranga gens foe a kerki. Ma nanga a wroko di den brada ben doe sondro foe kon weri èn a go di den ben go ibri tron baka, meki bijbel di moro foeroe sma no ben sabi èn di soso wan moro pikin groepoe nomo ben e leisi, de foe feni now na ini moro foeroe foe den oso.”

Moi bakapisi de ala di njoen preikiman e kon foe ala pisi foe a libimakandra foe Quebec, so srefi na mindri den datra. Disi de so nanga wan datra. En wefi, di de wan Kownoekondre preikiman, ben e taki ibritron baka foe a bijbel howpoe nanga en. Wan gemeente owroeman di ben de na ai, ben doe wan sani foe kari a datra disi kon na a gemeente konmakandra na a ten di wi ben e studeri a brochure Hoe kan bloed uw leven redden? (Fa broedoe kan kibri joe libi?) A ben kon èn ben abi wan prati srefi. Foe di a kwaliteit nanga den dipi jeje takimakandra ben naki en, meki a ben teki en eigi persoonlijk bijbelstudie. Now en toe na wan Kownoekondre preikiman.

Wan boen gebroiki foe den tijdschrift plèi wan prenspari ròl foe meki sma abi belangstelling gi bijbel. Wi no sabi noiti sortoe artikel sa abi krakti na tapoe sma èn hari en kon na a waarheid. Wan Kownoekondre preikiman ben pristeri wan eksemplaar foe Ontwaakt! gi wan birtisma di no ben wani arki a boskopoe, ma di ben abi belangstelling gi insekt tori. A fowtow na ini na Ontwaakt! foe 22 november 1992 nanga na artikel „De ziekte van Chagas — Een kus van de dood” ben hari en belangstelling. Foe di a sani di a ben leisi ben naki en ati, meki a ben aksi moro tijdschrift. Wan bijbelstudie ben bigin, èn na ini siksi moen a ben e gi tra sma kotoigi.

Na poebliki presi: A wet foe Kanada e gi pasi foe taki fri na poebliki presi soleki na opolanigron. Te sma na a Halifax Internationaal Opolanigron e wakti foe gowe noso e kon foe tra presi, dan Kownoekondre preikiman na wan konifasi e go miti sma di e rèis èn e bigin taki nanga den. Den e gebroiki prenspari aksi di e fiti, foe tjari a takimakandra go na tapoe bijbel. Foe di den e tjari den pikin bijbel nanga poeblikâsi meki den kan doe wan sani na tapoe a jeje fanowdoe foe den sma. Chirurg, sabidensiman, afkati, piloot, kerki tiriman, skowtoe, taximan, ingenieur, sma di e gi leri na skoro, sroedati, nanga politikman foe dorosei kondre de na mindri den sma di jere a Kownoekondre boskopoe na a fasi disi èn tjari siri foe waarheid go na farawe presi foe gro. — Kolosesma 1:6.

Wan froekoe mamanten na a opolanigron, wan man ben teki den Waktitoren nanga Ontwaakt! tijdschrift. Na wan rustig nanga safri fasi a ben taki: „Nôno, a no moesoe de den Jehovah Kotoigi!” Foe san ede a ben piki na so wan fasi? A man ben de wan fajafaja Moslim di didjonsrode ben begi na ini a kapèl foe na opolanigron. A ben begi Gado foe sori en koni, inzicht, nanga waarheid. Na idea taki den Jehovah Kotoigi ben de wan wantewante piki na tapoe a begi foe en ben froewondroe en srefisrefi.

Ija, den deki-ati Kownoekondre preikiman na ini Kanada no e meki noti tapoe den foe pristeri a warti boskopoe foe a Kownoekondre. Den no e meki freimde tongo, takroe pasi, farawe dorpoe, èn den oso na ini foto di abi kefalek koni veiligheid sistema hei, e meki den e drai gowe. Den abi a fasti bosroiti foe gi a boskopoe foe Gado di e gi libi, na reti-atisma di e soekoe a waarheid. Makandra nanga den kompewrokoman di de wan bradafasi na heri grontapoe èn sondro foe prakseri densrefi wawan, den e gi jesi na a komando foe Jesus foe ’go èn meki disipel’. — Mateus 28:19.

[Foetoewortoe]

[Faki na tapoe bladzijde 27]

Kownoekondre preikiman di abi boen bakapisi e gebroiki a telefon

Son sma taki: „Hallo, mi nen na [gi joe nen]. Mi ben e taki sjatoe nanga sma na ini joe gebow foe a fasi fa vrede ben sa kan kon. Joe denki taki oiti vrede sa de na heri grontapoe? [Gi okasi foe piki.] Foe meki joe de korostoe, mi no e doe wan ondrosoekoe noso e seri wan sani. Na presi foe dati, mi e prati a prakseri foe den Santa Boekoe foe bijbel taki Gado sa tjari vrede troetroe.” Dan a takimakandra ben sa kan go doro nanga wan sjatoe takimakandra di abi en gron tapoe bijbel.

Tra sma taki: „Koeneti. Mi nen na [gi joe nen]. Mi na wan friwani-wrokoman na ini joe kontren. Mi ben aksi a denki foe ibri sma di e libi na ini joe gebow. Foeroe sma e broko den ede nanga den persoonlijk veiligheid foe den te den e prakseri na ogri di e doe nanga tranga èn na ogridoe di e kon moro foeroe na ini wi kontren. Disi na wan sani nanga san joe e broko joe ede? [Gi okasi foe piki.] Joe denki taki oiti wan ten sa de pe a heri grontapoe sa firi veilig?” Gi okasi foe piki, èn go doro nanga wan bijbel boskopoe.