Jepi trawan nanga na gemeente boekoestudie
1 Den fosi kristen ben e konmakandra ini oso foe anbegi Jehovah (Rom. 16:3, 5; Filem. 1, 2). Now ini foeroe kondre, spesroetoe drape pe wi brada e ondrofeni moeilekheid, komakandra e hori ini den oso foe brada. Ini disi ten sosrefi toe foeroe gemeente boekoestudie e hori ini den oso foe brada, èn na seti disi abi te now ete na blesi foe Jehovah.
2 Nanga jepi foe na gemeente boekoestudie owroeman kan poti moro foeroe prakseri na den jeje gro foe ibri aparti sma — wan sani di no de so makriki tapoe moro bigi komakandra. Na studieleider e doe spesroetoe moeiti gi ibri wan sma foe en groepoe foe leri sabi den boen; a herder prakseri foe en na a fosi presi e go na den èn en e sorgoe gi den jeje fanowdoe foe den (Odo 27:23). A de proberi foe wroko makandra nanga den ini na velddienst èn wawantron fisiti den ini den oso.
3 Ini algemeen na studie-adres de ini na birti foe den sma di e fisiti na studie. Foe na rede dati meki gewoonlek a de na centraal punt foe pe den kan go ini na velddienst. Disi e gi joe okasi foe wroko makandra nanga difrenti sma ini joe groepoe èn na so fasi joe kan si fa den e waka miti den sma na den doro. Direkt baka na boekoestudie, de wan boen ten foe meki mofo foe wroko makandra.
SORI PERSOONLEK BELANGSTELLING
4 Joe e feni dati wan osofamirisfeer de tapoe joe boekoestudie? Efoe ibriwan sma e sori persoonlek belangstelling gi tra memre foe na groepoe, dan den sortoe firi dati foe wanfasi e kon moro foeroe (Gal. 6:10). Joe e si foe eksempre te son sma no de tapoe na komakandra èn joe e meki den sabi taki joe ben misi den? Efoe wan osofamirman no de na tafra foe njan, dan tra sma ini na osofamiri sa si disi wantronwantron. Den alamala ben sa broko den ede foe dati. Sowan geest ini wan boekoestudiegroepoe e meki den brada nanga sisa kon moro krosbé foe makandra èn e gi den tranga foe no djompo no wan „njanjan”. Efoe joe e sori persoonlek belangstelling gi ibri sma ini na groepoe, joe sa meki na osofamiri-geest disi gro.
5 Joe kan prakseri moro fasi ete foe sori persoonlek belangstelling gi trawan. Wan fasi ben sa de foe no wawan doe spesroetoe moeiti foe taki trawan odi na komakandra ma foe tjari den kon toe ini wan takimakandra. Sowan foe den kande e sjensjen pikinso, ma den e loekoe na wan sma di den kan taki nanga en èn den ben kan de grantangi foe disi efoe wan sma taki nanga en. Moro foeroe sani kan doe ete. Kande na boekoestudieleider foe joe abi wan toe spesroetoe rai. Foe san-ede joe no ben kan aksi en pikinso foe dat dati?
6 Fa joe kan gi jepi efoe wan tra memre foe joe boekoestudie-groepoe lasi ati ofoe a gersi taki a abi wan problema? Na rai „foe taki èn gi tranga na den sili di lasi ati” ben sa de séker tapoe en presi dja (1 Thess. 5:14). Efoe wan sma e siki, dan a de gi foeroe dek’ati te mati kon loekoe èn presteri en jepi! Nofotron a de so dati soso a sabi dati wan sma ben misi joe èn lobi joe de soso a wan sani di de fanowdoe. Na boekoe-studieleider spesroetoe moe poti prakseri tapoe den marki foe na lasi di wan sma e lasi ati neleki wan papa èn a moe de esi foe gi na fanowdoe jepi.
SORTOE BIJDRAGE JOE KAN GI?
7 Foeroe moro fasi de pe joe kan horibaka gi na seti foe na boekoestudie. Joe boen eksempre de wan foe den fasi disi. Efoe foe eksempre joe e weri krosi neleki te joe e go na a Kownoekondre-komakandrapresi, dan joe e sori respeki. Joe de wan positief eksempre gi den sma di e fadon go ini na weri foe sportkrosi. Joe e meki a de wan gwenti foe de biten sodati joe no e stoor a komakandra?
8 A de krin dati na studie e abi moro libi efoe ibriwan sma sreka ensrefi boen na fesi, kande poti wan strepi ondro den piki èn dan gi kommentaar nanga égi wortoe. Na loekoe na fesi foe den bijbeltekst èn gi foe kommentaar na tapoe, kan de wan moi bijdrage na a komakandra. Son sma e feni sosrefi toe na ten foe go loekoe tra materiaal di e ondersteun belangrijk punt èn den e ferteri den prakseri disi gi na groepoe. Disi wi e feni boen srefsrefi. Ala den sani disi e meki na gemeente boekoestudie e gi kowroeati na jejefasi èn e bow na bribi foe ala sma di de drape.
9 Den sma di geregeld e de na a boekoestudie, abi na overtoigi taki disi de wan seti di abi Jehovah blesi. A de wan presi pe wan sma kan kisi persoonlek jepi èn a kan sorgoe dati tra sma kisi kowroeati na jejefasi. Efoe joe no e de geregeld na den komakandra disi, foe san-ede joe no sa tjari den fanowdoe kenki kon, sodati joe kan njan boen foe den toemsi moi komakandra disi foe Jehovah nanga en organisaatsi ben sreka gi joe?