Fa foe bigin foe taki foe a boen njoensoe
1 Joe feni taki joe fosi wortoe na den doro nofotron de den moro hebi pisi foe joe pristeri foe a boen njoensoe? Tokoe wi wani sote taki sma arki na boskopoe foe na bijbel di e wini libi! (Joh. 17:3; 1 Tim. 4:16) Foe kan doro a marki disi, wi moe gebroiki fasi foe bigin wan takmakandra di sa wiki na belangstelling gi na njoen tori foe Takmakandra.
2 Soleki ben taki a fesi ini Wi Kownoekondredienst foe oktober, kringopziener e taki now te den e fisiti den gemeente, tapoe den velddienstkomakandra foe punt ini na njoen boekoe Tak-go-tak-kon na anoe foe den Boekoe. Tapoe dridewroko- nanga fodewrokomamanten den loekoe fasi foe bigin wan takmakandra di fiti na gebied. Tapoe den bladzijde 9-15 foe na Tak-go-tak-kon-boekoe sowan fotenti difrenti fasi foe bigin wan taki de di ben sa kan tjari kon ini verband nanga difrenti tori foe takmakandra. Joe e gebroiki den warti bodoi disi?
3 Kande joe no e feni en so hebi foe gebroiki na di foe dri fasi foe bigin na blz. 10 ondro na tori „BIJBEL/GADO”. Joe ben sa kan taki nomo: „Mi bréti foe miti joe na oso. Mi wani meki sma leki misrefi si wan prakseri di e gi dek’ati di komoto foe na bijbel. Joe ben aksi joesrefi kande san na ten di de na wi fesi sa tjari kon gi joe?” Baka te joe arki na piki foe na ososma, dan a de leki wan natuurlek sani te joe e taki moro fara foe Openbaring 1:1 nanga Openbaring 21:3, 4. Efoe joe e feni en moro betre foe no bigin taki so gaw ete foe na bijbel ini joe pristeri, kande joe sa wani tré a fosi rai ondro „TEN DI DE NA WI FESI/SÉKERFASI” tapoe bladzijde 14, nanga san joe e tjari na bigin foe a takmakandra kon na na hémarki ini den toe tekst ini Openbaring. Foedi joe e loekoe ete wantron den tra bigin di den ben presenteri, kande joe sa kisi moro idea di sa kan gebroiki na wan fasi di e wroko boen ini joe gebied.
4 Te wi e gebroiki na pisi disi ini wi Tak-go-tak-kon-boekoe heri boen, dan a no sa de so moeiliki foe feni den bigin wortoe foe taki. Disi sa tjari wi foe abi moro foeroe takmakandra na ini san wi kan sori tranga tapoe wi Kownoekondrethema foe wi diniwroko. Meki a de so taki wi alamala sori opregti belangstelling gi na tamara foe trawan foe di wi e gebroiki fasi foe bigin wan takmakandra nanga sma di e hari den kon.