Poti na ini joe libi san joe ben leri
1 Mozes, wan man foe bribi èn wan sma di ben doe a wani foe Gado, ben taki: „Den wortoe disi foe mi joe moe poti a tapoe joe ati” (Deut. 11:18). Foe san-ede a dek’ati disi ben gi? Israël ben moe gi jesi na Jehovah, ben moe lobi èn dini en (Deut. 11:8, 13). A no ben nofo foe ben sabi nomo den komando. Nanga den heri ati den ben moesoe poti den „wortoe disi” na ini den libi. Disi ben sa tjari foeroe blesi kon leki bakapisi.
2 A moro bigi Mozes, Jezus, e tjari na ini a ten foe wi na jeje Israël nanga na „bigi ipi” foe getrow anbegiman. Ooktoe wi moe poti den sani di wi ben leri na ini wi libi. Jezus ben taki: „Ibri sma di e jere den wortoe disi foe mi èn di e doe den, den sa teki gersi nanga wan koniman” (Matt. 7:24). Wi ’e jere’ den wortoe disi te wi e lési na bijbel nanga den boekoe foe na Genootschap èn te wi e fisiti gemeente komakandra, kringkomakandra nanga districtskomakandra. Wi e poti den sani di wi ben leri na ini wi libi?
FERMANE DI WI BEN KISI NO SO LANGA PSA KABA
3 Na ini den lo kringkomakandra di psa krakti ben poti na tapoe na fanowdoe foe soekoe na glori foe Gado èn foe waka na wan fasi di fiti te wi loekoe a ten. Den ben memre wi dati na grontapoe di lontoe wi èn di fadon go dipi na moreel sé wi no moe wani si en wroko na ai di de foe a doengroe. Joe ben poti na rai ini joe libi di ben abi foe doe nanga video-cassette, boekoe, tijdschrift nanga tv-programma di no fiti èn di kan njan joe jejefasi na ondro? San wi kan taki foe na warskow di abi foe doe nanga degedege prisiri demakandra èn a gebroiki foe sopi psa marki? Den ben warskow wi foe na trapoe foe gridifasi èn ooktoe foe na kefar foe waka sondro foe denki na baka den disiten modo di kan pori oenoe èn doti oenoe. Fermane ben gi di switi foe a fasi fa bigisma èn pikinnengre kan poti boen prakseri na tapoe a programma na tapoe districtskomakandra na presi foe hori heri takmakandra di e poeroe a prakseri foe tra sma. Joe sa teki na rai disi nanga joe heri ati èn poti en ini joe libi?
4 Tapoe kringkomakandra nanga wi gemeente komakandra wi ben leri foe fasi foe meki a prati foe wi na a velddienst kon moro bigi èn foe meki na doeltreffendheid foe wi leki bedinari foe na boen njoensoe kon moro boen. Tapoe wi laatste kringkomakandra krakti ben poti na tapoe na pionierdienst. Den ben aksi wi: „Joe kan meki presi gi na pionierdienst?” Joe ben go denki serjoesoe foe a pionierdienst? Joe ben gi trawan dek’ati foe go na ini a pionierwroko?
5 Na ini 1985 Wi Kownoekondredienst ben taki foe foeroe fasi fa wi ben sa kan meki wi diniwroko kon moro boen. Den ben rikomanderi sani ini a tori foe fasi fa wi kan go baka na belangstelling di wi ben feni, fa wi kan préki na ini bisnisgebied, fa wi kan pristeri abonnement tapoe go-baka èn san den sma kan doe foe sreka wan pristeri foe a bijbel. Ija, na ini Wi Kownoekondredienst foe juli 1985 wan heri pristeri ben skrifi di jongoe prékiman ben sa kan gebroiki. Sani ben taki foe jepi prékiman di lasi ati ofoe di mankeri overtoigi te den tanapoe na wan sma doro. Joe ben poti den sani di joe ben leri na ini joe libi?
6 Na ini juni wi sa pristeri baka na Troe vréde-boekoe. Proberi foe doe den sani di joe ben leri na ini april nanga mei foe a fasi fa joe kan pristeri a boekoe. Gebroiki na Tak-go-tak-kon-boekoe. Te joe sa doe disi, dan joe sa sreka moro boen ’foe leri ala sani san Jezus ben komanderi’. — Matt. 28:20.
JEPI JOE OSOFAMIRI
7 Di Mozes ben taki nanga Israël a ben taki: „Joe moe leri den toe a joe manpikin” (Deut. 11:19). Oenoe leki papa nanga mama ben poti den sani di oenoe ben leri na ini oen libi foe meki discipel foe den pikin foe oenoe? Wi Kownoekondredienst foe juli 1985 ben poti na aksi: „Joe heri osofamiri e teki prati na a velddienst na tapoe na fosi sonde foe a moen? . . . San oen kan taki foe a marki foe jepi memre foe a osofamiri foe leri na tori foe takmakandra ofoe wan njoen tijdschriftpristeri?” Joe osofamiri e doe disi?
8 A no de foe taki dati na poti na ini joe libi foe den sani di wi e leri sa abi foeroe blesi leki bakapisi. Jezus ben taki: „Efoe oen sabi den sani disi, kolokoe oen de efoe oen doe den.” — Joh. 13:17.