Jepi moro njoen prékiman
1 Jehovah pipel e gro na a heri grontapoe ini nomroe. Foe 1984 te 1985 wi ben abi 134.909 prékiman moro ini a dienst. Na wán kondre baka a trawan e tan lever rapport foe njoen hémarki. Foeroe sma e go na fesi ini na waarheid. Soema kan jepi ala den njoenwan disi foe go doro foe kon lepi? — Hebr. 6:1.
2 Foe jepi trawan dan wisrefi moe ben lepi. Wi moesoe „sori na glori foe Jehovah netleki spikri” (2 Kor. 3:10). Wi no e doe disi wawan nanga na fasi fa wi e libi, ma ooktoe nanga na fasi fa wi e meki den waarheid bekenti di wi ben leri foe Jehovah prakseri. Foe dat’ede wi moe de bekwaam bedinari. — 2 Kor. 3:5.
JOE DE KLARI FOE JEPI?
3 Joe abi boen studie gwenti, sodati joe kan kisi sabi di joe kan prati nanga trawan? Den sreka foe joe tapoe den komakandra de ooktoe wan jepi foe sreka joe tapoe na toemsi moi wroko disi. Ten na ten a de so dati wi alamala e feni en boen te wi e kisi jepi foe trawan. Di Jezus ben seni en discipel toe-na-toe gwe, den ben man foe gi makandra dekati èn foe jepi te den ben e wroko den gebied èn ben e taki nanga sma. — Luk. 10:1.
4 Njoen prékiman e warderi jepi di e gi nanga switifasi. Soso a sabi foe abi wan sma na joe di efoe a de fanowdoe kan jepi den na a takmakandra, e gi den fertrow. Gewoonlek a sma di ben studeer nanga a njoen sma e jepi en foe meki wan bigin nanga a velddienst. Papa nanga mama moe gi den pikin foe den leri. Ma tra sma kan gi jepi toe; na Bijbel e gi wi dek’ati foe dat’ede foe jepi makandra (Odo 27:17; Gal. 6:6). Kande joe sabi wan sma ini joe gemeente studie groepoe di ben sa de nanga prisiri foe kisi a kari ten na ten foe go nanga joe ini na dienst.
5 Foe kan jepi tra sma ini na gemeente Paulus ben komanderi Titus ’foe tan taki san fiti’. Di a ben go moro fara tapoe disi a ben ferklari moro fara sortoe rol „den grani man” èn den „grani oema” kan doe ini na bow foe na gemeente (Tit. 2:1-4). Spesroetoe njoenwan nanga jongoewan abi jepi fanowdoe foe seti den libi so dati den kan plisi Gado. Foe di den e bow den, meki den sa kisi a bekwaamheid foe leri trawan na ini na waarheid. Netleki na fosi jarhondro na so brada nanga sisa now moe teki na bijbelwroko foe den foe de eksempre èn jepi jongoe nanga njoenwan ini na gemeente.
JEPI JOE PIKIN
6 Papa nanga mama kan doe foeroe foe jepi den pikin foe den foe go na fesi. A de troetroe wan ondrofeni di e gi satisfaksi foe jepi den nanga a fosi oefenlezing èn moro fara foe si fa den e meki den égi oefenlezing èn e kisi na bekwaamheid foe gi komoto foe den ati èn nanga ferstan tapoe wan frifasi kommentaar. Joe e jepi joe pikin a tapoe sowan fasi? Den ben kan go moro na fesi te joe sa gi den leri nanga den sortoe marki dati na ini prakseri? Prakseri na prisiri di joe ben sa ondrofeni efoe joe si dati joe manpikin èn oemapikin e kisi moro warderi gi na waarheid, e kisi moro faja èn e kon moro bekwaam foe prati na boen njoensoe nanga trawan.
7 Ala sma na ini na gemeente foe Jehovah pipel moe wroko makandra foe kan jepi ibriwan sma foe go na fesi na ini na diniwroko. Sonwan de bekwaam foe de leriman, aladi trawan tapoe difrenti fasi kan gi jepi. (Teki gersi 1 Korinte 12:27, 28) Kande joe de wan sma di sma kan si nanga warderi foe di joe e gi dek’ati èn e jepi moro njoen prékiman.