’Go, meki discipel!’ — Joe e doe dati?
1 Wan foe den moro prisiri sani di joe kan ondrofeni leki kownoekondre prékiman, de foe jepi wan sma foe teki na ini en soifri sabi foe na waarheid. Te wan sma e gro ini sabi nanga warderi safrisafri, dan joe ati sa prisiri èn de tangi srefsrefi a fesi foe Jehovah. Wi de sabisabi dati awinsi wi e prani èn e nati den waarheid siri, a de Jehovah di e meki a gro. Ma o span a de foe abi wan prati foe tjari wan reti-ati sma go tapoe a pasi foe libi! — 1 Korinte 3:6-9.
2 Joe de wan osofamiri-edeman? Efoe dati de so, joe e hori geregeld wan bijbelstudie nanga joe osofamiri? Disi na wan prenspari afersi srefsrefi. Osofamiri-edeman e tjari na fesi foe Jehovah na frantwortoe foe den osofamirman foe den ini na fasi foe libi èn foe tjari den (Deut. 6:4-7; Ef. 5:25-29; 1 Tim. 5:8). Doe spesroetoe joe frantwortoe foe meki discipel foe den.
3 Boiti joe osofamiri-bijbelstudie joe kan hori ooktoe ete wan studie nanga wan tra sma? Wan moroprenspari aksi kan de: Joe e si en leki na grani èn na frantwortoe foe joe foe leri wan tra sma ini a waarheid foedi joe e gi jesi na a gebod foe Jezus? (Matt. 28:19, 20) Wi abi na indruk dati foeroe moro prékiman ini wi kondre ben sa kan hori wan oso-bijbelstudie. Ini son kontren horidoro de seker fanowdoe foe kisi wan studie. A de fanowdoe foe tjari go-baka doronomo. Kande joe ben proeberi en, ma joe no ben man foe feni wan sma di de klari foe studeri. San joe kan doe?
A JEJEFASI FOE JOE DE PRENSPARI
4 Foe bigin joe kan aksi joesrefi: San na a jejefasi foe mi ini a tori foe bijbelstudie-wroko? Mi wani troetroe wan studie? Mi e si na pisi disi foe na diniwroko leki wan sani di de prenspari èn foe ferloesoe sma libi èn mi sabi boenboen dati a moro bigi pisi foe sma ini a grontapoe de dededede ini a pasa di den pasa Gado wet èn ini sondoe? — Ef. 2:1.
5 Prékiman èn pionier skrifi na Genootschap èn ferteri en tapoe sortoe fasi Jehovah ben jere a faja begi foe den di den ben aksi en foe jepi den foe feni sma di abi belangstelling èn na soema den ben sa kan hori wan bijbelstudie (Rom. 12:12; 1 Thes. 5:17). Joe ben doe disi ooktoe? Joe ben aksi joe hemel Tata foe kan abi na grani foe feni wan sma èn foe leri a sma di e soekoe opregti na waarheid? — Ez. 9:4.
6 Na ini na dienstjari 1986 dan ibri moen 447.298 bijbelstudie ben hori ini den Verenigde Staten. Disi de troetroe wan sani foe prijse. Ini na srefi pisten dati 9.021.009 bijbel, boekoe nanga brochure èn ooktoe 88 miljoen tijdschrift ben prati. Soboen den boekoe foe na Genootschap joe e feni ini wan lo oso pe bijbelstudie no e hori ete. A de krin soboen dati wan toemsi moi potentieel de foe opo moro osobijbelstudie, no wawan ini den Verenigde Staten, ma ooktoe ini wi kondre.
7 A ben sa kan de dati wi moe abi moro na jejefasi foe abi studie èn moe span wisrefi moro krakti foe opo studie ini na „Loekoe!”-brochure? Joe e teki nanga wan positief jejefasi prati na a diniwroko, ini na ferstan dati den engel e tanapoe na wi sé ini a wroko foedi den e tjari na pipel foe Jehovah go na den doro foe den sma di wani jere na „tego boen njoensoe”? (Openb. 14:6) Na bigi prisiri di joe sa kisi te joe jepi wan tra sma foe leri sabi a waarheid, sa meki den moeiti di joe e doe foe waka na baka Jezus komando ’go meki discipel èn leri den?’, kisi pai foeroe.