De koni – Kobroyki san yu leri

¹ Moro furu sma e poti en leki wan marki gi den srefi fu libi wan koloku èn vrede libi. Dusundusun buku nanga artikel e gi ray fu na fasi fa fu meki yu trowlibi abi wan bun bakapisi, fu kweki pikin, fu meki sani waka bun na monisey, fu kisi wan bun gosontu èn tan hori dati, èn fu furu tra tori di abi fu du nanga na yepi fu sma fu den kisi koloku. Ala di wi kan feni wan pikinso praktis koni na ini grontapu publikâsi, dan toku morofuru sma de ala sani boyti koloku nanga tevrede. Fa dati du kon?

² Na piki wi kan feni na ini na beybri, na ini Odo 1:7, pe skrifi: „Na frede gi Gado de na bigin fu sabi. Koni nanga tranga leri — soso don sma wiswasi den.” Wan sma no kan fruwakti fu abi vrede nanga koloku efu a no e erken èn e lespeki na Fonten fu tru sabi nanga koni, Yehovah Gado.

³ Grontapu pôti na yeyefasi — e dede fu angri. A de wan spotu sani taki sma poti dati na tapu den srefi, fu di na a heri grontapu yeye nyan de fu kisi psamarki, èn sma kan teki dati na ini den sondro fu pay (Odo 1:20, 21; Openb. 22:17). Fu di sma na ini grontapu e trowe na koni fu Gado, meki den e tingatinga go na fesi na ini yeyedungru (Odo 1:22-23). Na a tra sey a de so taki wi, leki Yehovah pipri di e lespeki en wèti èn e hori en komando, kisi bun yeye nnyan èn de koloku (Yes. 65:13, 14). Na dati e kon ete taki na lobi, di de psamarki na ini Gado organisâsi, e meki den sabi wi leki Krestes tru disipri (Yoh. 13:35). Iya, na bradafasi fu Yehovah Kotoygi na a heri grontapu de na libilibi buweysi fu dati taki a hori fu den srefi na a leri fu beybri de na pasi fu koni.

⁴ Toku sonwan di moksi den srefi nanga Yehovah organisâsi, no e ondrofeni kande na koloku di den ben sa kan kisi. Den ben sa kan pori srefi na koloku fu trawan na ini den birti nanga den sani di den e taki èn e du. Fa disi ben sa kan psa? Soso fu di den no e kobroyki Gado koni na ini den libi. Kande den de na tapu gemeente konmakandra, kringkonmakandra, nanga distriktkongres. Den de kande skinskin nanga san den publikâsi fu na Genootschap e taki, ma fu na libifasi fu den èn na fasi fa den e demakandra nanga trawan, nanga so srefi den konpe kresten fu den, a no e sori taki den e kobroyki na waarheid di den leri. San de fanowdu na ini na kofal disi? Den sortu sma disi musu meki muyti ’fu say nanga na yeye na ini prakseri’, so taki den kan tyari trutru koloku na ini den eygi libi èn kan yepi trawan, nanga suma den abi demakandra, fu de koloku. — Gal. 6:7, 8.

SAN WI MUSU KOBROYKI

⁵ Efu wi srefi e kon loboso, e meki a tan na ay fu wi kon slap, èn e broko kindi gi Satan, na grontapu ofu wi onvolmaakti skin, dan wi sa lasi na prisiri di e kon fu wan krosibey matifasi nanga Yehovah. Moro leki oyti a de now fanowdu fu memre, taki wi e meki kobroyki fu den sani di wi e leri tapu wi gemeente konmakandra nanga kongres, èn so srefi nanga yepi fu tra seti fu na organisâsi. Na grontapu pe wi e libi na ini de wan kofarlek presi di e kenki doronomo. Wi musu de na ay fu si na ray di Yehovah e gi na wan lobifasi nanga yepi fu a „kotrow èn koni srafu”, leki nnyan na a reti ten — Mat. 24:45-47.

⁶ Na programa fu now gi wi spesrutu deykonmakandra e gi furu bun bodoy fu na fasi fa wi kan tanapu fasti leki wan ipi. Den e gi praktis bodoy fa wi kan feti teyge krakti di kan swaki wan sma, so leki situwâsi di kan meki yu lasi-ati, na grontapu yeye fu srefidensi èn sani di e meki yu lasi ten. Wi e meki kobroyki fu na bun ray fu frutrow dorodoro na tapu Yehovah nanga den pasi fu en, fu erken teyokrasiya makti èn fu saka wi srefi na ondro, fu abi sakafasi èn de sondro fu prakseri tumusi furu fu yu srefi, èn fu bay na ten puru gi teyokrasiya marki? (Mika 6:8; Ef. 5:15, 16; Hebr. 6:10; 13:17) Den osofamirimemre e yepi makandra fu seti den srefi akruderi wan kresten fasi fu libi? Na ray di wi e kisi fu na Beybri musu abi krakti tapu na sortu fu prisiri di wi e teki, wi gwenti èn wi ala dey waka. Efu wi no du fayafaya muyti fu kobroyki den sani di wi ben leri, dan pikinso ofu nowan yeye go na fesi sa de, èn dati sa abi wan takru krakti na tapu wi vrede fu yeye èn wi koloku. — Fil. 4:7-9; Yak. 1:22-25.

⁷ Gi studi nanga wi srefi èn osofamiristudi a de fanowdu fu span anu krakti makandra. Na Index fu Waktitoren-buku kan tyari wi go na finifini bodoy fu na kobroyki fu beybri gronprakseri. Na Yongusma e aksi-buku de wan tumusi bun yepisani gi ppa nanga mma fu yepi den pikin fu kan kakafutu teyge na disiten dangra grontapu fu Satan. Te wi e ondrosuku den sortu materiaal disi, wi sa kisi na fasi fa Yehovah e si sani èn wi kan meki regtfardiki gronprakseri tyari wi. Efu wi no ben sa du disi, wi ben sa de leki wan sma di abi wan dresi gi wan siki, ma noyti e dringi en, awinsi a sabi taki a kan lekti na pen. Doronomo studi nanga wi srefi èn osofamiristudi sa meki wi bribi gro èn sa gi wi na krakti fu horidoro. Ini wan ten fu tesi wi bribi no sa broko kindi, san ben sa abi leki bakapisi taki wi drifi gwe. — Mat. 13:6; Luk. 8:13; Hebr. 2:1.

⁸ Owruman nanga dinari na ini na diniwroko musu gi wan eksenpre ini na abi fu na tiri tapu den osofamiri. Disi wani taki taki den e yepi den uma nanga pikin fu den fu kobroyki den sani di den e leri fu Gado Wortu èn nanga yepi fu na organisâsi, so taki den tan tranga na yeyefasi. Na a fasi disi a heri osofamiri kan sori wan kresten libifasi di de wan eksenpre èn de wan deki-ati gi trawan, na inisey èn so srefi na dorosey fu na gemeente. — Ef. 6:4; 1 Tim. 3:4, 12, 13.

DEN SMA DI MUSU KISI YEPI

⁹ A mindri den sma di e fisiti na Memrefesa ala yari, furu sma de di abi morofara deki-ati fanowdu fu kobroyki san den e leri èn moksi den srefi fayafaya fu du wroko nanga na organisâsi. Wi kan sori taki wi e hori den sma di abi belangstelling na wan lobifasi na prakseri fu di wi e leri den fa fu kobroyki beybri gronprakseri na ini den libi èn fa fu du den regtfardiki komando fu Gado. Wi musu sori taki wi e broko wi ede nanga den wan di e go na fesi fu tron wi brada nanga sisa na ini bribi.

¹⁰ Ibriwan sma di kon ongeregeld ofu inactief, musu kisi yepi fu si na fanowdu fu teki prati doronomo na den wroko makandra nanga na organisâsi. Den musu kisi na vrede nanga koloku baka di den ben abi na fesi, di den ben dini Yehovah nanga moro faya (Yoh. 13:17). Fu di wi e yepi den na wan switifasi fu wiki na warderi fu den baka gi na waarheid, èn ’a tyari fu wan srakti-ofrandi fu prèyse gi Gado’, meki den sa man fu kobroyki den sani di den e leri èn fu tan na tapu na pasi fu libi. — Hebr. 13:15; luku Wi Kownukondredienst fu yuni (gi Sranankondre yuli) 1979, blz. 7 nanga maart 1977, blz. 3 (Bakratongo).

¹¹ Ala den memre fu Gado pipri musu de skinskin nanga Yehovah organisâsi di e go esi-esi na fesi. Wi no kan gi pasi fu meki a de tevrede nanga wi srefi kori wi. Ala ten wi musu kibri wi yeyefasi, musu fu tan sabi den lasti bodoy di wi e kisi nanga yepi fu Gado organisâsi èn musu de gaw fu kobroyki den. Gi disi fayafaya muyti èn sontron ofrandi fu wi srefi de fanowdu. Ma Yehovah no e aksi wan sani fu wi di wi no man. En na wi Kriyaman, èn a sabi san de na moro bun sani gi wi. Meki fu dati-ede wi buweysi taki wi koni èn e go doro fu meki Yehovah leri wi èn fu kobroyki den sani di wi leri. Disi sa tyari prèyse gi en èn sa abi têgo winimarki leki bakapisi gi wi. — Yes. 48:17; 54:13.