Gi kotoygi fu na waarheid
1 Yeyses ben sori krin taki a ben kon na ini a grontapu fu gi kotoygi fu na waarheid. A ben fruklari: „Na fu disi meki mi koboru èn na fu disi meki mi kon na ini a grontapu, fu gi kotoygi fu na waarheid.” — Joh. 18:37.
2 Fu di Yeyses ben preyki fayafaya meki a ben gi Yehovah nen grani. So srefi a ben sori opregti lobi gi sma, fu di a ben sabi na sari yeye situwâsi fu den. Mateyus ben skrifi fu en wroko: „Èn Yeyses ben bigin wan reis fu waka lontu psa na ini ala den foto nanga dorpu, ala di a ben gi leri na ini den snoga fu den èn ben preyki na bun nyunsu fu na kownukondre . . . Di a ben si na ipi sma, a ben firi sari gi den, fu di den ben fufuru den èn dribi den go-kon leki skapu sondro herder” (Mat. 9:35, 36). Na gi di wi e gi wi srefi fu dini Gado èn so srefi wi lobi gi trawan musu buweygi wi fu preyki, netso leki fa dati ben de a tori nanga Yeyses.
NA MORO PRENSPARI WROKO DI WI KISI FU DU
3 Opregti lobi gi libisma èn gi Yehovah e buweygi wi fu kobroyki ibri okasi fu leri sma na waarheid di abi fu du nanga Yehovah èn en wondru wroko (Ps. 96:2, 3; 145:10-13). Na druk fu na libi fu aladey, den sorgu fu na libi, èn den heri-ipi sani di kan puru wi prakseri, poti tapu tran sani, makriki ben sa kan meki wi tapu nanga wi preykiwroko. Fu dati-ede wi no musu lasi a prakseri fu na tranga fanowdu fu a gi kotoygi fu na waarheid fu Gado nanga en Kownukondre. Wi no musu gi pasi taki sani e puru wi prakseri fu na moro prenspari frulusu wroko disi di wi kisi fu du (Mat. 24:14; 28:19, 20). Abi ala ten wroko fu du ini na dienst fu Yehovah na wan kibri gi wi, èn a kan gi wini di e tan na den wan di abi en fanowdu fu yere na boskopu fu na waarheid. — 1 Kor. 15:58.
4 Yu kan dini leki gewoon ofu yepi pionier? Fu san-ede yu no ben sa wani luku yu omstandigheid fu si efu yu kan bradi yu diniwroko na a fasi disi? Yu de nanga pensioen? Fu san-ede yu no ben sa kobroyki moro ten na a preyki? Furu yonguwan di de na skoro ete, de doronomo na ini na yepipionier wroko. Disi gi den kowru-ati na yeye èn na skinfasi èn gi den tumusi bigi prisiri.
5 Fu kan gi kotoygi fu na waarheid nanga bun bakapisi dan wi musu prati wi ten na wan soyfri fasi (Ef. 5:15, 16). Wan mun yepipionierwroko wani taki gemiddeld soso tu yuru preyki wan dey. Son sma e opo wan yuru moro fruku fu go na ini na diniwroko bifosi den go na skoro ofu wroko. Furu gemeente ben yepi den yepipionier fu di den seti sani gi na bakadina kotoygi wroko. Yu ben sa kan kisi deki-ati tu èn ben sa kan kisi bun ray fu di yu e taki nanga den wan di ben abi bun bakapisi na ini a seti fu wan schema gi na yepipionier wroko.
6 Ala ten Yehovah sori bunfasi gi en dienstknekti. Den wan di e dini en ini kotrowfasi kisi blesi psa marki. Te now ete Yehovah e gi en bunfasi na den wan di lobi en. A e teki nanga prisiri den sani di wi kan du ini a gi kotoygi fu na waarheid akruderi wi omstandigheid. — Hebr. 6:10.