San yu gwenti fu du?
1 Kresten konmakandra na wan tranga fanowdu pisi fu wi anbegi fu Yehovah. Nanga reti na apostru Paulus e taki tranga gi wi fu no libi den konmakandra fu wi, „so leki fa son sma gwenti fu du”. — Hebr. 10:25.
2 Yu e prakseri so tu fu na demakandra nanga yu brada nanga yu sisa na den kresten konmakandra? San na yu gwenti ini na tori disi? Yu e fisiti doronomo ala konmakandra, nanga so srefi na gemeente bukustuka? Ofu yu e si taki yu gwenti fu dyonpo konmakandra? Yu e gi trawan deki-ati fu fisiti den konmakandra doronomo? Yu gi sma di ben de tapu na Memrefesa deki-ati fu go fisiti den konmakandra doronomo?
3 Awansi fa wi ala dey programa de, wi no kan si a ray fu Paulus leki wan pikin sani. Ala di a de wan frustan sani taki wan kresten fu siki ofu tra omstandigheid ede di a no kan kenki, ten na ten musu dyonpo konmakandra, seyker a no musu meki a de wan gwenti (Rome sma 2:21). Fu di wan kresten abi someni prekti di a musu du, pe yu abi na ini wantu teyokrasiya wroko, a musu de seyker fu den prenspari sani (Fil. 1:10). Konmakandra e fadon na ondro den moro prenspari sani gi wan kresten èn de fu a moro bigi belang gi wi yeye tanbun.
GI MAKANDRA DEKI-ATI
4 Di Paulus ben skrifi den Rome sma, a ben taki taki a ben angri fu si den. Fu san-ede? Fu kan prati wantu yeye presenti nanga den fu „meki den stanfaste” (Rome sma 1:11). A no ben de tevrede fu skrifi den soso wan brifi nanga bodoy di den ben kan leysi, ma a ben feni taki demakandra ben prenspari, iya, ben de fanowdu, bikasi a e taki moro fara: „So taki a mindri unu wan gi fu deki-ati na makandra kan de.” Ofu, so leki fa na futuwortu ini na Studiebeybri e tyari en kon na doro: „Fu kisi deki-ati a mindri unu makandra” (Rom. 10:12). Srefi Paulus, wan apostru, ben si na fanowdu fu a gi fu deki-ati nanga yepi fu kresten demakandra.
5 So srefi wi musu gi makandra deki-ati na tapu wi konmakandra fu sori lobi èn tumusi bun wroko. Wan switi lafu tapu wi fesi èn wan waran odi kan abi wan positief krakti na tapu trawan. Kommentaar di e bow trawan, programa pisi di sreka bun, si fa trawan e go na fesi na yeyefasi, èn soso kba fu de a mindri wi brada nanga sisa tapu den konmakandra, ala den sani disi kan gi deki-ati srefisrefi. Awinsi wi weri na a kba fu wan dey, dan leki fa a gwenti de wi sa si taki baka te wi fisiti na konmakandra wi sa firi moro bun. Kresten matifasi èn na lobi di wi brada nanga sisa e sori gi wi, sa gi wi deki-ati „[fu] lon nanga horidoro na streylon di de na wi fesi (Hebr. 12:1). A arki di wi e arki Gado Wortu bun kan sreka wi fu hori fasti sondro fu degedege na a publiki bekenti fu wi howpu. Trutru furu blesi e kon fu na fisiti fu den konmakandra.
6 Moro leki oyti a de now na ten fu hori faste na wi bribi èn gi trawan deki-ati fu sori lobi èn tumusi bun wroko. Wi musu du fayafaya muyti fu fisiti ala gemeente konmakandra. Wi no wani taki a tron wan gwenti gi wi fu libi den konmakandra fu wi. Nanga wan bun konsensi wi musu pruberi fu yepi trawan nanga so srefi den Avondmaal fisitiman, èn gi den deki-ati fu fisiti den konmakandra doronomo. Na a fasi disi wi sa sori wi lobi gi trawan èn wi warderi gi kresten konmakandra.