Pristeri na boen njoensoe — Nanga traktaat èn strooibiljet
1 „Mi ben pasa wan oema di ben langa wan bijbel traktaat gi mi”, wan man ben skrifi go na a Genootschap. „A nen ben de: ’Libi na ini wan vrede njoen grontapoe’. Bifo mi ben leisi en mi ben firi sari, ma baka dati mi ben kisi so wan deki-ati èn korostoe firi.” A man ben wani sabi moro èn ben skrifi foe kisi bodoi, èn a ben froeklari: „Mi e loekoe nanga foeroe froewakti foe kisi na boekoe ’Joe kan libi foe têgo na ini wan paradijs a grontapoe’.”
2 Ija, na jeje lostoe foe njan foe foeroe sma di e prèise Jehovah ini na ten disi, ben wiki nanga jepi foe den traktaat èn nanga jepi foe na bijbel boskopoe di druk na bakasei foe den strooibiljet foe wi. Joe e gebroiki traktaat nanga strooibiljet na ini joe diniwroko? Foeroe sma e doe dati. Na ini Brooklyn wawan kaba moro leki 122 miljoen Vrede njoen grontapoe-traktaat (Bakratongo) druk, so srefi so wan 250 miljoen eksemplaar foe dri tra traktaat, dati wani taki Foe san-ede joe kan bribi ini na bijbel (Bakratongo), San Jehovah Kotoigi e bribi? (Bakratongo) èn Sortoe howpoe de gi lobiwan di dede? (Bakratongo) Na ini Sranan dan ini na pisiten foe pasa moro leki toe jari traktaat seni go na den gemeente. So srefi ibri jari den e seni moro leki 12 miljoen strooibiljet go na den gemeente na ini Verenigde Staten.
3 Noiti wi moesoe tjari dorai na a krakti foe na Wortoe foe Gado soleki disi e tjari kon a fesi ini na sjatoe boskopoe disi (Hebr. 4:12; teki gersi Sakaria 4:10; Jakobus 3:4, 5). Wan Kotoigi ben skrifi: „Mi leisi foeroe traktaat foe na Wachttorengenootschap èn te foe kaba mi kon na ini a waarheid.” A ben tjari kon a krin: „Na ini a grontapoe disi pe ala sani e go esi-esi foeroetron sma no wani gi foeroe ten na leisi, ma den traktaat langa netnofo foe abi wan prenspari boskopoe, ma no langa toemoesi baka taki sma e hari den srefi poeroe foe en sondro srefi foe loekoe na en.”
4 Foeroetron foe wantoe reide sma e kikbak foe teki boekoe foe wi. Ma foeroe sma no abi noti di e tapoe den foe teki soso wan traktaat. Wan kringopziener e froeklari taki a abi wan pikin plastic etui na en èn e meki den si na traktaat pe a e meki na ososma teki sortoe wan a wani. „Na traktaat di sma e teki moro leki den trawan,” a e skrifi, „na San Jehovah Kotoigi e bribi?”
NA A FOSI FISITI
5 Son preikiman e feni taki a gi foe wan traktaat ofoe strooibiljet na wan fasi foe e bigin takimakandra di abi boen bakapisi. Te joe e pristeri wan, dan na ososma di e sjen foe opo na doro kan tjari kande kon so fara foe tokoe a doe dati. A sori foe den konmakandraten na tapoe a strooibiljet kan opo na pasi gi wan takimakandra foe na wroko foe wi èn na marki foe dati.
6 Efoe a de krin taki na ososma abi en druk ofoe e frede, dan wan traktaat kan de joisti na sani di a abi fanowdoe. Wán oema ben kisi so wan trowstoe nanga jepi foe na traktaat foe na howpoe gi den dedesma taki a ben skrifi na Genootschap foe kisi moro bodoi. Te no wan sma de na oso, dan wan traktaat kan libi na baka gi na ososma na wan presi pe sma di e pasa no e si en.
NA GOBAKA
7 Te joe drai go baka na wan adres pe den ben sori pikinso belangstelling a fesi, joe ben sa kan taki: „Fa joe tan [kari na nen]. Mi feni en troetroe wan prisiri sani foe miti joe na oso. Di wi ben miti makandra foe na fosi leisi, dan a ben go na mi ati taki joe ben teki na ten foe taki foe na bijbel. Mi abi wantoe ekstra bodoi foe sani di mi denki taki kande a sa abi joe belangstelling. Den tanapoe na ini a traktaat disi, Libi na ini wan vrede njoen grontapoe. Kande joe kan memre taki wi ben taki a fesi foe na bijbel pramisi foe troe vrede di o tan gi na libismafamiri. Ma foedi foeroe sma e prakseri soso foe go na hemel te den leisi den pramisi disi, meki a boen foe si taki Psalm 37:29 e froeteri taki den blesi disi sa feni presi djaso na grontapoe. [Leisi den tekst èn meki na ososma si pe dati de foe feni na ini a traktaat.] Dati no de wan moi sani? [Taki foe difrenti paragraaf.] Moro bijbel tekst di e gi deki-ati de na ini a traktaat disi èn joe sa feni den netso moi. Wan tra leisi te mi e kon baka, wi kan leisi kande wantoe foe den sani net soleki fa wi doe now.”
8 Den traktaat nanga strooibiljet foe wi de troetroe presenti foe Jehovah. Meki a de so taki wi meki wan bekwaam gebroiki foe den warti jepisani disi, aladi wi e doe wan diniwroko di abi boen bakapisi foe na prèise foe en èn wi têgo blesi. — Odo 22:29.