Seti sani now foe fisiti na „Sma di Lobi Fri”-distriktkongres 1991
1 Te wi loekoe a fasi fa sani seti tide na ini grontapoe, dan a no de wan froewondroe sani taki na ini foeroe kondre sma e angri foe wan moro bigi fri leki san den abi now. Ma pe troetroe fri kan feni? Jesus Krestes ben taki: „Efoe oenoe e tan ini mi wortoe, oenoe de troetroe mi disipel, èn oenoe sa sabi na waarheid èn na waarheid sa meki oenoe kon fri” (Joh. 8:31, 32). Disi a no na sortoe fri di skotoe èn di sma howpoe foe kisi te den e trowe a wan politiek regeriman ofoe fasi foe regeri foe na boen foe wan trawan. A presi foe dati, dan a fri disi e wroko go doro te na a roetoe foe den libisma problema. Dati wani taki, Jesus ben e taki foe na fri foe a tai di wi tai na a katibo foe sondoe (Loekoe Johanes 8:24, 34-36). Te wan sma e tron wan troe disipel foe Krestes, dan disi e tjari wan krin kenki kon ini en libi, wan froeloesoe.
2 WAN DRIDEI KONGRES: Foe 9-11 augustus a fosi kongres foe den lo „Sma di Lobi Fri”-distriktkongres sa hori na ini Gakaba. A kongres sa bigin freida 10.20 joeroe mamanten èn a sa tapoe na sonde wan sani foe 4.00 joeroe bakadina. Tapoe ibri pisi foe a konmakandra den sa gi wi bodoi di den piki nanga sorgoe a mindri trawan, èn di de toemoesi prenspari gi wi jeje gesontoe. Difrenti tori sa poti krakti a tapoe fa sma kan kisi na fri di den e sori a tapoe na ini Rome sma 8:21. Span bodoi sa gi ini lezing, demonstrâsi, aksi-takimakandra nanga wan drama.
3 Abi a fasti bosroiti foe no misi no wan pisi foe na konmakandra. Disi sa aksi foe joe kande persoonlijk òfer èn fiti joe schema na dati. Sonwan sa moesoe seti spesroetoe sani nanga den basi. Foeroe e òfer srefi winimarki na monisei soso foe kan de tapoe ibri pisi foe a konmakandra. Jehovah seiker sa blesi den wan di e meki na afersi disi de wan tori foe opregti begi èn di e doe tranga moeiti foe de drape.—Luk. 13:24.
4 DE FROEKOE DRAPE: Sma sabi Jehovah Kotoigi leki sma di joe kan bow na den tapoe èn di e proeberi foe hori densrefi na a ten (Luk. 16:10). Disi de so srefi prenspari te wi e fisiti na distriktkongres. Doro ibri dei froekoe drape èn sidon tapoe joe presi bifo a programa bigin. Disi sa meki a de fanowdoe taki joe poti nofo ten gi sani di e aksi joe prakseri, so leki a parkeer foe joe oto, èn a feni foe sidon presi gi joe osofamiri.
5 Te wi e fisiti na distriktkongres dan dati e gi wi wan toemoesi moi okasi foe njan boen foe prisiri demakandra. Ma te wi sa fisiti mati lati a neti, dan dati kan hendri wi foe de biten a tra dei. Te wi e bigin mamanten lati èn dan wi moesoe hasti wisrefi, dan dati kan opo pasi gi foeroe broko-ede nanga froeferi sani. Foe kibri joe foe disi, a de boen foe poti wan reidelek ten foe go sribi. Te den hori densrefi tranga na wan fasti ten, dan dati e meki a okasi moro bigi taki alasma e kisi wan boen neti rostoe èn taki a tra dei den kan bigin biten. Na a fasi disi den e sorgoe taki den no e kon te a programa e hori kande kaba, san e poeroe na prakseri foe trawan èn kan stoor den wan di sidon kaba na den presi. Te joe e doro froekoe ala dei, joe kan njan boen foe a demakandra nanga joe brada nanga sisa. Kresten lobi nanga na hori di wi e hori den na prakseri, so toe respeki gi Jehovah nanga den jeje sani di a e gi, moesoe boeweigi wi foe doe moeiti foe de biten drape.
6 ARKI BOEN: Arki wani taki poti prakseri troetroe nanga wi jeje so boen leki wi ati, nanga wi jesi èn wi froestan. Wi moesoe arki foe kan ‘jere a wortoe foe Jehovah’ (Jer. 2:4). Na ini Jesaja 55:2 Jehovah ben konmanderi Israèl: „ Arki mi boen.” ‘Arki boen’ den poeroe kon a krin leki ‘arki toemoesi boen, sondro foe meki wán wortoe lasi gowe’. Efoe na a ten foe a kongres wi e poti prakseri boen, wi sa doe moeiti foe ‘arki èn teki moro leri na ini wi’ (Odo 1:5). Arki èn leri tapoe wán distriktkongres e aksi, leki fa a gwenti de, moro moeiti nanga poti joe prakseri na wan leki te joe de na ini a kownoekondrezaal. Fa disi doe kon? Wi e sidon wan moro langa pisiten èn moro sani de di kan poeroe joe prakseri foe di wan moro bigi nomroe foe sma de drape. Efoe wi no arki boen, wi sa meki wisrefi lasi èn wi no sa njan boen dorodoro foe na goedoe jeje njanjan di den e gi (1 Petr. 2:2). San kan doe na disi? A de wan prisiri srefisrefi foe si taki foeroe foe den congres-fisitiman, kweki na boen gwenti foe skrifi san na takiman e taki te na programa e hori. Ala di sonwan foe den kongreslezing sa tjari kon na doro baka ten, tokoe disi no de so nanga trawan. Ala sma e kisi leki deki-ati foe poti leki marki gi densrefi foe skrifi sjatoe san a takiman e taki te a distriktkongres e hori, foe di disi de wan boen fasi foe poti prakseri na tapoe den sani di den e taki.
7 A skrifi foe den sani di a takiman e taki no abi foe de boen foeroe. Srefi jongoe pikin sa abi moro wini foe den lezing èn sa feni jepi foe den poti boen prakseri efoe den kisi skrifi papira nanga wan pen ofoe potlood, so taki den kan skrifi den ede penti di a takiman e behandel èn den moro prenspari bijbeltekst ofoe kande njoen prakseri. Owroeman e froestan taki a abi winimarki foe abi aantekeningen di orga netjes, te den e loekoe sjatoe na wan wartifasi na a kongresprograma tapoe a diniwrokokonmakandra. Den kan gebroiki so srefi foeroe foe den penti di behandel tapoe a kongres, te den e gi leri èn na a herder wroko foe den.
8 DE INI WÁNFASI INI SINGI NANGA BEGI: Na anbegi foe wi abi na ini a gi grani na Jehovah foe di wi e singi prèise singi gi en, neleki fa Jesus nanga den apostel foe en ben doe disi (Mark. 14:26). San Paulus e tjari kon a fesi na ini 1 Korente sma 14:15 foe na tori foe singi, wani gersi taki a e sori na tapoe taki a ben de wan doronomo pisi foe na kresten anbegi. (Loekoe so srefi Wi Kownoekondredienst foe maart 1991, blz. 9.) Distriktkongres e gi wi spesroetoe okasi foe prèise Jehovah makandra nanga foeroe brada nanga sisa nanga jepi foe singi so boen leki begi. Ma sonwan ben sori taki den mankeri respeki gi den prenspari pisi disi foe wi anbegi. Fa so? Foe di sondro taki a de fanowdoe, den e kon na inisei na a ten te a fosi singi e singi ofoe te den e begi. Na a kaba foe a programa sonwan e gowe libi den sidon presi te a singi e singi ofoe bifo a begi. Wanwan leisi wan boen reide kan de foe disi. Ma respeki nanga warderi di fiti e sori gi Jehovah tafra te sonwan e gowe libi a grani foe singi èn foe kon na wán ini begi, soso foe kan de pikinso moro esi na den oto ofoe foe kan njan moro froekoe?—Mat. 6:33.
9 Meki wi loekoe boen taki wi e soekoe foe wisrefi abi en makriki na so wan fasi taki a grontapoe fasi foe denki foe „mi fosi” ofoe gadolowsoe gwenti so leki bigi ai nanga gridifasi no skotoe na jeje-go-na-fesi foe wi. Ini den lasti jari foeroe brada nanga sisa na ini Oostoe-Europa kondre ben kan prisiri now fosi foe singi èn begi nanga foeroe sma makandra na ini fri. Meki wi, neleki fa den ben de fajafaja foe ben kan singi èn begi nanga foeroe sma makandra, sori now a srefi jeje foe warderi gi santa sani èn meki wi noiti no si den okasi di wi abi foe singi nanga begi makandra, leki wan soso sani.
10 WI KRESTEN MANIRI: Wi kresten maniri nanga a fasi fa wi e weri wi krosi tapoe den kongres, gi wi leki Jehovah Kotoigi wan boen nen. Disi e kon foe di wi e teki wi anbegi foe Jehovah serjoesoe èn no e si a go na wan kongres leki soso wan prisiri waka. Te wi e kon na makandra gi so sortoe spesroetoe okasi, dan wi moesoe tan hori wi kresten wartifasi èn wan jeje fasi foe denki nanga firi èn wi moesoe tjari wisrefi leki bedinari.—1 Kor. 10:31-33.
11 Efoe wi no e doe disi, dan wi e kon na a kolokoe foe trawan èn wi e meki srefi njoenwan naki foetoe. Wi e sori taki wi e erken èn warderi srefi pikin sani di sma e doe gi wi? Wi moesoe sabi taki wi de mindri trawan èn sori taki wi e respeki den èn e hori den na prakseri. Ala sma moesoe froestan taki te a programa e hori, a de a ten foe arki, no foe waka lontoe ofoe foe taki.—Deut. 31:12.
12 Ete wan kontren pe wi kresten maniri kan gi Jehovah grani abi foe doe nanga a fasi fa wi de nanga den sma di e gi wi wan tanpresi na den oso. Wi sa wani de nanga sakafasi foe no meki no wan aanleiding de foe sma naki foetoe. Meki wi alamala doe moeiti, na a ten foe a kongres di e kon, foe tjari wisrefi na so wan fasi taki wi „kan moi na leri foe wi Froeloesoeman, Gado, ini ala sani”.—Tit. 2:10.
13 GI PAPA NANGA MAMA: Jongoe pikin nanga tini wi wani gi wan switi kon tapoe a „Sma di Lobi Fri”-distriktkongres èn wi e froewakti den drape. Na fri di a grontapoe e gi, kan tjari na dede foe den na jeje fasi, neleki fa Adam ben lasi na fri di a libismafamiri ben kisi na a bigin. Na organisâsi foe Jehovah di foeroe nanga lobi, jepi wi alamala foe taki-go-taki-kon foe disi na wan joisti fasi. Wi e feni en wan sani di e gi deki-ati foe si jongoewan di leri foe poti boen prakseri na tapoe ala kresten konmakandra èn di abi bigi belangstelling gi a kongresprograma (Ps. 18:12, 13). Ma foeroe e anga foe na eksempel nanga na ai di den papa nanga mama e ori na den tapoe. Foeroe jongoewan kisi boen skoro foe skrifi san a takiman e taki. Efoe joe leki papa nanga mama no leri joe pikin ete foe skrifi san a takiman e taki, foe san-ede dan joe no ben sa gebroiki a ten di tan abra te go miti a kongres, foe doe dati? Srefi heri jongoe pikin kan kisi a deki-ati foe skrifi bijbeltekst nanga sroto wortoe di abi foe doe nanga a tekst, di den e jere foe a takiman. Son papa nanga mama e meki mofo taki den sa loekoe den moro prenspari penti foe a programa foe a dei dati baka te den doro den tan presi ofoe te den e rèis go na oso.
14 A de so taki a moro bigi pisi foe den papa nanga mama e froestan taki ala pikin abi a firi foe go prei. Den no abi ondrofeni ete ini a libi èn den a no bigisma ete. Foe dati-ede wi moesoe leri den oten den moesoe arki èn fa den moesoe tjari densrefi tapoe den konmakandra. Disi e aksi foe na sei foe papa nanga mama foe hori wan boen ai a den tapoe. Wantoe papa nanga mama ben de slak ini disi. Sontron a e pasa taki, ala di papa nanga mama e sori respeki di fiti gi Jehovah te den e begi, den pikin foe den e prei èn e poeroe trawan prakseri. Papa nanga mama moesoe sabi san den pikin foe den e doe, srefi na a ten foe a begi. Èn san den e doe te den opo gowe ala di a programa e hori? Efoe a programa e hori ofoe te a kaba, joe e libi den pikin foe joe sondro foe hori ai na den tapoe?—Odo 29:15.
15 Son pikin tjari densrefi na wan onborsoe nanga oproeroe fasi èn den no sori respeki srefi gi moro owroe brada nanga sisa, di nanga switi fasi ben wani poti den reti. A fasi disi taki joe no man taki nanga den èn so wan sortoe fasi foe tjari densrefi, di no fiti gi wan kresten, de foeroetron a bakapisi foe a gi di papa nanga mama e gi pasi foe sani doe èn a mankeri foe tranga leri na oso. Wan sani moesoe foe doe na a sani disi. Ala kresten papa nanga mama moesoe hori ai ala ten boen tapoe den pikin foe den, ala di „den e kweki den ini a tranga leri èn a serjoesoe froemane foe Jehovah.”—Ef. 6:4.
16 WI E WARDERI NA WROKO DI OENOE E WROKO DORODORO MAKANDRA NANGA WI: Wan heri ipi plan nanga wroko doe foe sorgoe taki nofo sidon presi, boekoe, njanjan nanga tra seti de gi iniwan sma di e fisiti a kongres. Wi e aksi ala oenoe fasi foe wroko makandra ini a tori foe a hori foe sidon presi. Hori grantangi na prakseri taki SIDON PRESI MAG HORI SOSO GI MEMRE FOE JOE EIGI OSOFAMIRI ÈN SMA DI E WAKA NANGA JOE NA INI A SREFI OTO. Grantangi, no hori sidon presi gi trawan. Son tron ekstra sidon presi e hori gi trawan foe soso, sondro taki a de spesroetoe gi wan sma. Disi a no wan fasi foe lobi èn a e kori den wan di e sori sma pe den moesoe sidon èn den wan di e soekoe wan sidon presi. Na ini akroederi nanga a bijbel rai, wi moesoe doe moeiti foe sori lobi firi gi wi brada èn wroko makandra krinkrin nanga a boen seti foe a hori foe sidon presi. No wan sma no abi reti na tapoe moro sidon presi leki a nomroe foe den memre foe en osofamiri nanga den sma di e waka nanga en na ini na oto.—2 Petr. 1:7.
17 Sma no mag foe hori sidon presi gi trawan te a tra dei. No wan sani di seti gi a kongres sa opo oiti bifo 7.00 joeroe mamanten gi trawan boiti gi den fri wani-wrokoman di abi wroko bifosi a ten dati. Sondro foe poeroe wan sma na ini, dan den wrokoman disi sa kon fosi foe bigin foe 7.00 joeroe mamanten, te den trawan e kisi pasi foe go na ini a konmakandra presi, foe kan hori presi gi sma. Brada di e sori sma pe den moesoe sidon sa de fosi a ten dati na den presi di den kisi foe hori ai a tapoe san e pasa, foe tapoe pasi te foe kaba gi sma foe no meki wan fowtoe gebroiki foe den rai di a Genootschap gi ini a tori foe a hori foe sidon presi gi trawan. Grantangi wroko dorodoro makandra nanga den brada di e sori sma pe den moesoe sidon, te den e doe den wroko foe na boen foe ala den sma di de drape.
18 Den e gi a rai foe sori taki joe e kroetoe sani boen te, joe e tjari sani foe joesrefi go na a kongres djari. Ini den ten di pasa, dan son sma ben tjari bigi ijsboksoe ofoe tra boen bigi sani di den no ben kan poti go na ondro a sidon presi foe den. Den ben poti den sani disi na a pasi pe sma moesoe waka ofoe na tapoe den stoeroe. Disi ben abi leki bakapisi taki trawan no ben abi sidon presi èn sontron a ben de kontrari den wet foe brandweer èn veiligheid. Ini den sortoe afersi dati wi moesoe hori trawan na prakseri.
19 NJANJAN DIENST: Neleki tapoe den kongres ini den ten di pasa, na so a jari disi wi sa meki gebroiki soso foe kongresbon. A prijs foe den difrenti sani sa poti akroederi den bòn di de, foe di a no skrifi tapoe den bòn omeni moni a de. Na ibri presi pe den e prati sani, ala den fanowdoe sani sa de foe feni baka. Fa a meki di den sani ben meki kon moro eenvoudig tapoe a kontren foe njanjan sani, ben sori taki den de wan toemoesi boen seti gi ibri-wan sma, foe lekti a wroko èn foe kan doe en moro esi!
20 Jehovah pipel seiker e warderi en troetroe foe kan konmakandra ala jari na ini toemoesi moi zaal foe njanboen foe a kefarlek moi jeje programa di sreka na fesi. Wi e warderi so srefi den foeroe wroko di den e doe gi wi èn den foeroe sani, di e meki sani makriki gi wi, di wi e kisi na den sortoe konmakandra disi. Nanga foeroe sorgoe makandra nanga boen bigi onkostoe, a Genootschap seti sani gi nofo sidon presi, a poti foe diridiri apparaat gi a geluid èn a sorgoe foe wan toemoesi boen njanjan seti èn dan ete wan toe tra sani e seti èn wroko e doe di e meki a fisiti foe a kongres de wan switi èn jeje kowroe-ati.
21 A meki gebroiki foe den njanjan seti tapoe den kongres de wan fasi foe jepi foe tapoe wan pisi foe den onkostoe. Moro fara den onkostoe e tapoe nanga jepi foe den friwani gi foe oenoe di e horibaka gi a wroko foe a Genootschap, di e doe na a heri grontapoe. Foe a makrikifasi meki ala presi na ini a zaal den sa poti bijdrage-boksoe di joe kan kon sabi makriki. Wi e warderi ala den bijdrage srefisrefi èn a Genootschap wani foe bigin taigi oenoe tangi a fesi, foe na boen-ati fasi nanga wánfasi fa oenoe e horibaka gi den kownoekondre afersi na a fasi disi. — Luk. 6:38.
22 KON NA A „SMA DI LOBI FRI”-DISTRIKTKONGRES! Te joe e fisiti a „Sma di Lobi Fri”-distriktkongres èn e poti boen prakseri na a programa, dan wi sa kisi moro warderi gi na kresten fri di e kon nanga jepi foe Krestes èn gi na joisti gebroiki foe kresten fri. Meki plan now foe de drape te a fosi singi e bigin èn foe fisiti ala konmakandra te nanga a lasti begi sonde bakadina.
[Faki]
Jepisani foe memre sani baka foe a kongres
TANPRESI: Na sekretarsi foe a gemeente moesoe sorgoe taki den sribipresi-aanvraagformulier gi spesroetoe omstandigheid moesoe seni wantewante go na a kongreskantoro di abi foe doe nanga den sani dati. Efoe a tanpresi di den gi joe akroederi den seti gi spesroetoe situwâsi, no e go doro, dan a man ofoe oema di ben sa teki joe na en oso nanga a afdeling Tanpresi foe a kongres, moesoe kon sabi disi so taki a kamra kan gi na wan tra sma.
DOPOE: Sma di o teki dopoe moesoe proeberi foe sidon tapoe den presi na ini a faki di poti spesroetoe gi den, bifo a konmakandra e bigin satra mamanten. Ibriwan sma di poti na en ede foe teki dopoe, moesoe tjari bescheiden swen krosi nanga wan wasidoekoe kon. Baka a dopoe lezing nanga a begi foe a takiman, dan a fesiman foe a konmakandra sa gi sjatoe rai na den sma di o teki dopoe èn baka dati a sa kari wan singi. Te a lasti pisi foe a singi e bigin, dan den brada di e sori sma pe den moesoe sidon sa tjari den sma di o teki dopoe go na a dopoe presi ofoe na den wagi di sa tjari den go drape, ala di den tra sma di de drape e singi a singi te na a kaba. Foe di a dopoe leki wan simbôl foe a gi di wan sma e gi ensrefi abra na Jehovah, de wan krosibei èn persoonlijk afersi a mindri a sma srefi nanga Jehovah, meki seti no de gi wan sokari patna-dopoe, pe toe ofoe moro sma di o teki dopoe e brasa makandra ofoe e hori makandra, te den e kisi dopoe.
A KARTA FOE KON SABI DEN PIONIER: Ala gewoon nanga spesroetoe pionier, so srefi den opziener di e rèis èn den memre foe a Bethelfamiri, moesoe tjari a Waktitoren ID- nanga toewijzing karta foe den (S-202-0) kon na a kongres. Den wan di na a ten foe a kongres de siksi moen ofoe moro langa ini a pionierwroko, kan kisi kongresbon soso te den sori den Waktitoren ID-karta. Behandel foe dati-ede a karta net so boen leki moni; joe no kan kisi trawan na a kongres. Pionier sa kisi wan toe boekoe foe soso di kon kande a doro, ofoe tra lektuur nanga boekoe di kon a doro foe a bijdrage foe den pionier na a lektuur afdeling te den e sori a Waktitoren ID-karta foe den.
FRIWANIDIENST: A jepi foe friwani wrokoman de fanowdoe foe meki wan distriktkongres waka switi. Awasi joe no man wroko a heri kongres, tokoe wi sa warderi den wroko foe joe. Efoe joe kan jepi, go dan te joe doro na a kongres na a afdeling Friwani wrokoman. Den pikin di moro jongoe leki 16 jari kan doe wan sani toe foe meki a kongres waka boen, ma den moesoe wroko makandra nanga den papa ofoe mama ofoe wan tra frantiwortoe bigisma.
LAPELKARTA: Weri grantangi te joe de na a kongres a lapelkarta di meki spesroetoe èn weri en sosrefi te joe e rèis go èn e rèis komoto foe a kongres. Foeroetron disi e meki taki wi man gi boen kotoigi te wi e rèis. Joe moesoe kisi den lapelkarta na joe gemeente foe di den no de foe kisi tapoe a kongres.
WAN WORTOE FOE WARSKOW: Awasi pe joe e poti joe oto, sroto en ala ten èn noiti no libi wan sani didon na ini di sma ai kan si. Kibri den goedoe foe joe efoe a kan na ini a baki na bakasei foe a wagi èn sroto en. De so srefi na ai gi foefoeroeman èn sma di e foefoeroe moni poeroe na sma saka, di ala ten e kon pe bigi konmakandra e hori. Disi wani taki toe taki joe no moesoe libi no wan warti sani a baka tapoe joe sidon presi na a kongres sondro foe hori ai na en tapoe. Grantangi de forsektiki.
[Faki na tapoe bladzijde 5]
Gakaba Sranantongo 9-11 augustus
Tweede Rijweg Bakratongo 23-25 augustus
Latour Sranantongo 30, 31 augustus, 1 september
Tweede Rijweg Ingrisitongo 6-8 september