Gebroiki den moen di e kon theokratis so boen leki a kan
1 Sma ben taki wan leisi, taki a tamara na foe den sma di e sreka densrefi na tapoe. Wi moesoe meki plan na fesi efoe wi wani gebroiki wi ten na so wan fasi taki disi e gi wi a firi taki wi e doe wan sani. Sortoe plan wi kan meki now foe sorgoe taki wi gebroiki wi ten theokratis so boen leki a kan?
2 Tapoe 30 maart wan bigi nomroe foe sma di abi belangstelling no so langa ete, ben fisiti na Memrefesa. A jeje go na fesi foe den e anga foe wan bigi pisi foe a jepi di den e kisi foe wi. A ben sa de wan blesi gi den efoe den ben sa de drape na a distriktkongres. Wi kan sori den tapoe den foeroe jeje wini èn wi kan jepi den nanga den sani di den moesoe seti foe rèis; kande wi kan kari den foe rèis nanga wi ofoe nanga trawan di abi presi na ini den oto.
3 Te joe e fisiti na kongres, a e gi joe ekstra okasi foe doe okasi preikiwroko. Leki wan pisi foe a sreka di wi e sreka wisrefi wi moesoe sorgoe foe abi wan ipi foe den lasti boekoe nanga tijdschrift na wi. Wi kan preiki gi sma di e wroko na oli pompoe, hotel nanga restorant, nanga so srefi gi den di e wroko pe den e lon taksi nanga bus. Disi na wan heri moi fasi foe miti nanga foeroe span ondrofenitori.
4 Jongoewan e tjari na dreiten nomonomo ini akroederi nanga fakansiten. A no de foe taki, dati wan pikinso gesontoe ontspaning na wan boen sani, ma wan pisi foe a fri ten disi ben sa kan gebroiki foe abi wan moro bigi prati na a kotoigiwroko so leki na jepi-pioniersdienst? Papa nanga mama kan bigin now foe jepi den pikin foe den foe meki plan. Kande pikin foe difrenti osofamiri kan pionier èn wroko makandra leki groepoe. Trawan di no abi na okasi foe doe disi, kan proeberi foe doe moro, spesroetoe na den mindri wiki velddienst-ten.
5 Foeroe sa abi wan ten fri foe den grontapoe wroko èn den sa rèis go na tra kontren. Te joe e meki plan foe fisiti den konmakandra foe na gemeente ini na presi dati èn e go ini na dienst nanga den preikiman di e libi drape, dan dati kan abi leki bakapisi taki wi e gi èn e kisi moi deki-ati. Kande joe e go na wan presi pe foeroe gebied de di e wroko wanwan tron nomo, so taki joe e abi na okasi foe preiki gi sma di pikinmoro noiti e jere a Kownoekondreboskopoe.
6 Foeroe jongoesma sa kaba nanga skoro. A penti de now san den o doe nanga den libi, sortoe marki den o poti foe miti ini den libi. Jongoewan di e meki plan foe na tamara foe den èn e doe disi nanga theokrasia marki na prakseri, seiker sa kisi blesi (1 Joh. 2:15-17). Na bosroiti foe teki na gewone pioniersdienst na joe tapoe kan sorgoe foe wan libi di e gi satisfaksi èn di e tjari foeroe spesroetoe grani nanga en.
7 Soboen moro foeroe foe wi sa abi ekstra ten di wi kan gebroiki. Meki wi handri na wan froestanfasi èn ‘bai na ten di de gi wisrefi’ (Ef. 5:15, 16). Te wi e meki plan foe abi foeroe foe doe na ini a dienst foe Jehovah, dan disi sa tjari gi wisrefi so boen leki gi trawan boen bakapisi di e tan.— 1 Tim. 4:15, 16.