Pristeri a boen njoensoe — Foe di joe e pristeri oso-bijbelstudie
1 Na ini na inlegvel foe Wi Kownoekondredienst foe september 1991 den ben e memre wi na wi frantiwortoe foe prani nanga nati ala di wi de bezig nanga a meki foe disipel foe Krestes. Den ben sori na ini taki lobi gi sma di e piki boen tapoe a Kownoekondreboskopoe, moesoe gi wi reide foe wani hori bijbelstudie. Na pristeri foe oso-bijbelstudie sa jepi wi foe doe na ordroe di wi kisi foe meki disipel. — Mat. 28:19, 20.
2 A de boen foe si taki foeroe foe wi ben bigin foe gebroiki den toemoesi moi deki-ati, di den ben gi wi, ini na aladei libi. Den bericht e sori wi taki foeroe moro bijbelstudie e hori. Na nomroe foe bijbelstudie foe san den ben gi rapport ini Sranankondre ini 1991, ben didon moro hei leki a dienstjari 1990. Den sma di bigin fositron foe e hori bijbelstudie, seiker e prisiri foe a prati di den abi ini a wroko foe meki disipel. Ma fa moro sma ben sa kan abi prati na a pisi wroko disi foe wi diniwroko di e pai?
3 Gebroiki na pristeri foe a moen: December na wan toemoesi boen moen foe proeberi foe opo njoen bijbelstudie. Wi sa pristeri na Njoen -Grontapoe Vertaling foe den Santa Boekoe nanga a boekoe Bijbel — Gado wortoe noso di foe libisma? Wan boen fasi foe wiki na belangstelling foe na ososma, na foe gebroiki den rai na ini a Taki-go-taki-kon-boekoe.
4 Wi sa man foe poti a prakseri a tapoe a bijbel foe di wi e gebroiki den inleiding di den e rikomanderi na tapoe bladzijde 10 foe na Taki-go-taki-kon-boekoe. Den e kari feifi difrenti fasi fa wi kan poti a prakseri tapoe bijbel. Te wi e gi sma deki-ati foe soekoe bijbel piki tapoe den aksi foe a libi, dan disi kan opo a pasi gi wan bijbelstudie.
5 Ondro na edewortoe „Oso-bijbelstudie” na tapoe blz. 11 foe a Taki-go-taki-kon-boekoe toe rai tanapoe di ben sa kan de boen foe poti a prakseri tapoe a Gado Wortoe-boekoe. Ini ala toe a deki-ati e gi foe gebroiki a boekoe leki wan wrokosani foe abi wan sistema foe studeri. Efoe joe e gebroiki na wantewante fasi foe opo wan bijbelstudie joe kan waka baka na rai di tanapoe na ini Wi Kownoekondredienst foe oktober 1991.
6 Froetrow tapoe Jehovah: Foe kan abi kolokoe na ini a bijbelstudiewroko wi moesoe prakseri taki wi kan feni boen ini a pristeri foe osobijbelstudie soso nanga a jepi foe Jehovah. En e prei na moro prenspari ròl ini wi tranga moeiti foe jepi sma (1 Kor. 3:6). Foe dati-ede wi no moesoe begi nomo foe feni wan sma nanga soema wi kan studeri, ma so toe efoe den sma di wi feni èn di abi belangstelling, kan go na fesi (Joh. 16:23). Wi no moesoe frigiti taki wi na „kompewrokoman foe Gado”. — 1 Kor. 3:9.