Libi nanga gesontoe froestan èn nanga regtfardikifasi
1 Wi e libi ini wan grontapoe di abi krakti tapoe sma foe meki den kon gadolowsoe. Den markitiki foe a sistema disi e pori moro nanga moro (2 Tim. 3:3). Leki kresten, wi moesoe teki sei foe san boen èn wi moesoe froestan foe san ede wi moesoe tan doe so. Ma sortoe bodoi nanga tiri de foe kisi? Baka sortoe markitiki wi moesoe waka? „Libi nanga gesontoe froestan èn nanga regtfardikifasi” na a thema di e gi deki-ati, di den teki gi wi spesroetoe deikonmakandra foe a dienstjari 1993. — Tit. 2:12.
2 Nanga jepi foe lezing, demonstrâsi nanga ondrofenitori, wi sa leri fa wi kan tranga wisrefi foe kakafoetoe gi gadolowsoefasi èn foe no go baka grontapoe lostoe. Wi sa si so srefi fa a kan, foe libi nanga gesontoe froestan èn regtfardikifasi mindri a takroe sistema disi. Den sa taki foe sani di sreka foe jepi wi foe kibri den jeje krakti foe wi (1 Petr. 4:7). Spesroetoe papa nanga mama èn jongoe sma sa wani foe poti prakseri na den lezing èn den takimakandra na a bakadina programa. Den disi sa poti krakti tapoe a kisi foe a koni èn ondrofeni foe Gado èn foe wroko makandra foe bow wan kolokoe theokratis tamara.
3 Ala di wan gadolowsoe grontapoe e lontoe wi, dan Gado Wortoe e gi wi rai san na a moro boen pasi foe waka. Den sa taki foe den boen di wi sa feni te wi e waka baka bijbel rai ini a lezing „Boboi den blesi foe joe na mindri wan grontapoe di de sondro prisiri”. Te wi e sreka na fesi foe de drape, wi wani hori na prakseri taki foe poti doronomo prakseri na a programa èn foe doe den rai di gi, sa jepi wi foe abi moro boen bakapisi ini wi diniwroko gi Jehovah. — Fil. 3:15, 16.