Pristeri di e wiki belangstelling
1 Ala ten wi moesoe abi wan waran belangstelling gi den sma di wi e miti ini velddienst. Efoe wi e aksi den fa den e denki foe son tori, wi e sori taki wi abi respeki gi a fasi fa den e si sani. A tori di wi e bigin taki èn den aksi di wi e poti, kan meki taki den o go denki moro dipi foe sani èn kan meki taki den wani leri moro foe Gado nanga san a abi ini prakseri gi libisma.
2 Ini september wi sa poti prakseri tapoe a troe foe a meki di sani meki, te wi e pristeri a boekoe Libi — Fa a doe kon? Nanga jepi foe evolutie noso foe di Gado meki sani? Teki ten foe joesrefi go loekoe a poeblikâsi disi baka èn teki spesroetoe penti foe san joe wani taki. Te joe e taki foe den bodoi di tanapoe ini a Meki sani-boekoe, naki en opo èn gi en na a ososma meki a loekoe. Sori go na spesroetoe tori nanga prenki. De fajafaja foe demo o warti a toemoesi moi boekoe disi de.
3 Baka te, na wan switifasi, joe taki soema joe de, joe kan taki:
◼ „Ini a njoen modoten grontapoe disi foe sabidensi, a de reidelek foe bribi taki wan Gado de di ben meki oenoe nanga a moi grontapoe na tapoe san wi e libi? [Gi okasi foe piki.] Te wi e denki foe a bigi di grontapoe bigi, den wondroe sani foe grontapoe èn na heri universum, wi e froewondroe foe na ordroefasi nanga a fasi fa a meki. Disi no e kotoigi taki wan Mekiman de? Loekoe fa bijbel e taki foe a tori disi. [Leisi Hebrewsma 3:4.] A no de foe taki dati ibri sani di bow ben abi wan sma di ben denki fa a ben o meki en èn wan sma di bow en. [Teki a Meki sani-boekoe èn drai go na a prenki tapoe bladzijde 114.] Na universum foe wi e foeroe wi nanga respeki srefisrefi! Joe denki taki a ben kan kon foe ensrefi?” Baka dati naki go na bladzijde 122 èn leisi a pisi di skrifi ondro a fowtow foe na oloisi. Joe kan gebroiki so srefi a prenki nanga a tekst di skrifi na ondro, tapoe bladzijde 127. Joe kan feni penti so srefi di kan jepi joe ini a Taki-go-taki-kon-boekoe, bladzijde 383-387.
4 Noso joe kan taki:
◼ „San joe denki de fanowdoe gi libisma famiri foe feni troe vrede nanga kolokoe tapoe a grontapoe disi? [Gi okasi foe piki.] Bijbel e taki dati wi moesoe frede Gado èn erken en leki a Mekiman foe hemel nanga grontapoe.” Leisi Openbaring 14:7, èn opo a Meki sani-boekoe na bladzijde 140 nanga 141. Kande joe kan leisi paragraaf 24 nanga 25 pe den e froeklari taki grontapoe ben meki foe libisma libi na tapoe. Efoe joe kan si foe a belangstelling foe a sma taki a wani taki go doro foe a tori disi, drai go na kapitel 19 èn froeklari fa wan grontapoe paradijs sa tron wan troe sani heri esi.
5 Efoe na ososma e sori taki a e tweifri efoe wan Mekiman de, joe kan taki:
◼ „Foeroe sma e firi a srefi, spesroetoe te joe e loeke ala den sani foe san sma e pina ini a grontapoe disi. Efi wan Gado de, foe san ede a e meki sma pina? Joe abi wan enkri reidelek froeklari?” A e anga foe a piki efoe joe kan go doro èn gebroiki kapitel 16 foe a Meki sani-boekoe foe kan taki go moro fara. Noso efoe a e arki ala di a abi pikinso belangstelling nomo, kande joe kan taki soso foe wan noso toe spesroetoe penti foe na artikel „Foe san ede boen sma moesoe pina?” ini A Waktitoren foe 15 september 1992. Joe kan feni moro jepi ini a tori disi ini a Taki-go-taki-kon-boekoe bladzijde 275, 276. Sontron a kan boen foe libi a traktaat Foe san ede joe kan froetrow ini bijbel.
6 Na marki foe wi no de foe wiki belangstelling gi a Kownoekondre boskopoe wawan, ma foe opo bijbelstudie so srefi. Fa wi e prisiri foe abi a boekoe disi nanga toemoesi moi prenki, di e froeklari a troe foe a meki di sani meki èn e gi grani na wi Bigi Mekiman! Meki a de so taki wi e gebroiki en boen foe wiki a belangstelling foe opregti-ati sma di wi e miti ini september.