Tan taki foe den sani di joe ben si èn jere
1 Srefi di den ben tapoe skreki gi den apostel foe fon den èn poti den na strafoe, den ben taigi den feanti: „Wi no man tapoe foe taki foe den sani di wi ben si èn jere” (Tori. 4:20). Den ben froestan a warti di den wroko nanga leri foe Jesus ben warti.
2 A boen njoensoe foe Jesus èn en Kownoekondre de prenspari gi sma ini a ten disi neleki fa a ben de dati ini owroeten. Dati ede, wi moesoe gebroiki ibri okasi wantewante foe taki foe sani di wi ben si èn jere foe Gado Wortoe. Ini den feistidei, foeroetron sma e firi moro foe taki foe relisi afersi, èn disi e opo moro okasi foe gi kotoigi.
3 Jongoewan, taki na skoro: Foeroe jongoe Kotoigi e gebroiki den okasi heri boen foe gi kotoigi na den skoro kompe nanga skoro meester foe den. Wan jongoe Kotoigi di e doe moeiti alaten foe tan na ai gi den tori foe takimakandra na mindri skoro kompe, ben meki boen gebroiki foe wan sani di ben pasa na skoro èn a ben go na den meester nanga skoro kompe nanga wan poeblikâsi di ben fiti. Na bakapisi? A ben prati 35 boekoe ini wan dei! Foe di foeroe sma e denki foe Jesus Krestes èn foe vrede na a pisi ten disi foe a jari, dan joe no denki taki a ben sa de wan boen sani foe meki den skoro kompe nanga skoro meester sabi fa Jesus, leki Kownoe di e tiri, kan loesoe den problema foe grontapoe? — Teki gersi Lukas 2:14.
4 Efoe na hori di joe e hori joesrefi foe no teki prati ini relisi gwenti di abi foe doe nanga Kresneti, e tron wan tori foe takimakandra, joe ben sa kan taki:
◼ „Mi no e teki prati ini Kresneti gwenti, bika den sortoe gwenti dati no e gi grani na Jesus, di de na wan enkri fasi fa wi kan kisi froeloesoe èn na wan enkri sma di sa tjari wan kaba kon na orlokoe èn problema na mindri den difrenti ras. [Taki foe noso leisi Tori. 4:12.] Jesus no de wan beibi moro, ma a de wan Kownoe di e tiri. A boekoe disi, A moro bigi man di oiti ben libi, e taki foe ala den sani di Jesus ben leri èn wondroe di a ben doe èn e sori fa a sa tjari wan kaba kon na a pina di libisma e pina.” Sori baka dati na prenki foe kapitel 133, èn leisi a di foe toe paragraaf na a tra bladzijde. Sori tapoe tra penti foe san joe denki taki a sma abi belangstelling. Efoe a sma e sori belangstelling di fiti, froeteri dan fa den kan kisi a boekoe.
5 Taki nanga wroko kompe: Wan brada ben panja 63 boekoe foe di a ben poti soso wan eksemplaar foe a Bigi man-boekoe tapoe en tafra. Na moi di a boekoe moi èn a titel, ben meki sma poti aksi foe en. Joe ben sa kan aksi wan wroko kompe: „Soema joe ben sa taki na a moro bigi man di oiti ben libi?” Dan taki moro fara: „A boekoe disi e taki finifini foe a heri libi foe Jesus, e taki foe ibri taki di a ben gi, e gi piki tapoe aksi di foeroe sma e aksi foe den wondroe di a ben doe, èn e gi tra toemoesi moi bodoi. A de wan boen overzicht foe san bijbel e leri foe Jesus èn e boeweisi sondro degedege taki Jesus Krestes ben de na moro bigi man di oiti ben libi.” Sori go baka dati, na san Napoleon ben taki foe Jesus so leki fa den e taki foe en ini a di foe dri paragraaf ini a inleiding foe a boekoe.
6 Den srefi sortoe okasi disi kan opo, te joe e gi kotoigi na birtisma noso famiri memre di no de na bribi. Begi dati Jehovah kan gi joe na deki-ati foe man taki fri èn na a joisti ten (Tori. 4:29, 31). Den sani di wi abi foe taki foe Jesus sa waran na ati foe sma di e denki boen èn di lobi regtfardikifasi. Sortoe moro boen ondrofeni wi kan abi, dan foe jepi wan skoro kompe, wan wroko kompe, wan birtisma, noso wan famiri memre foe kon na tapoe a pasi foe têgo libi? — Joh. 14:6.