Gebroiki traktaat foe kan abi boen bakapisi
1 A disiten organisâsi foe Jehovah abi wan historia foe gebroiki traktaat nanga boen bakapisi. A troetroe nen foe a wettelijk wroko-groepoe, Waktitoren, Bijbel nanga Traktaat Genootschap, e sori taki traktaat e prei wan prenspari rol ini a panja foe a boen njoensoe. Foe 1881 te leki 1918, a pipel foe Jehovah ben prati moro leki 300 miljoen traktaat. Foeroe foe den wan di, ini a pisi ten disi, ben tron wan pisi foe a fikapisi foe Krestes brada, ben kon sabi a waarheid foe a fosi leisi nanga jepi foe den traktaat disi.
2 Ini 1987 den ben poti krakti agen tapoe a gebroiki foe den pikin traktaat nanga jepi foe a tjari kon a doro foe fo kloroe traktaat di joe ben kan kisi sensi a ten dati. Na a „Tjariman foe leti” -distriktkongres foe 1992, den ben meki bekènti taki den traktaat disi ben o kon moro foeroe, nanga ete moro fo kloroe traktaat di e poti sma foe denki. Den traktaat disi na: Trowstoe gi den wan di lasi-ati, Njanboen foe a osofamiri libi, Soema troetroe e tiri grontapoe?, èn A grontapoe disi sa tan? Joe e gebroiki ala den aiti traktaat foe abi boen bakapisi ini joe diniwroko?
3 Joe sa abi boen bakapisi efoe joe e gebroiki den traktaat na wan boen fasi. Wi sa moesoe foe sabi dorodoro san skrifi ini ibriwan foe den traktaat. Foe eksempel, joe ben leisi den finifini foe sabi foe san ibriwan foe den traktaat e taki? Joe ben denki foe en na sortoe sma ibriwan foe den traktaat sa wiki a belangstelling? Efoe joe e kon sabi finifini san skrifi ini ibriwan foe den traktaat, dan disi sa bow joe froetrow foe gebroiki den ini na oso-foe-oso wroko so boen leki ini foeroe situwâsi pe joe kan gi okasi preiki.
4 A fasi foe gebroiki den ini a oso-foe-oso preikiwroko: Wan kringopziener ben skrifi: „Mi abi boen bakapisi foe di mi e bigin foeroe foe den takimakandra foe mi nanga jepi foe wan traktaat.” Joe ben proeberi foe bigin wan tori na a fasi disi? Foe san ede joe no e gebroiki traktaat leki wan fasi foe bigin nanga joe takimakandra? Nanga aiti traktaat, wi abi aiti inleiding di e poesoe a prakseri foe sma di wi kan teki wan na mindri. Ibri traktaat e gi wi na okasi foe bigin wan bijbelstudie na a fosi fisiti noso te wi e go baka.
5 Tra okasi de pe wi kan gebroiki den traktaat. Te joe e taki nanga wan sma na a doro, kande joe e kon sabi taki no so langa pasa, a sma ben lasi wan lobiwan foe en na ini dede, noso taki wan sma ini a famiri siki. Sma di e ondrofeni bigi sari-ati noso den sma di e proeberi foe kakafoetoe gi problema di no e loesoe esi-esi, foeroetron e kweki negatief firi èn den e lasi-ati. Fa a ben o de wan sori foe lobi foe prati a boskopoe, di e gi deki-ati, èn di wi e feni ini a traktaat Trowstoe gi den wan di lasi-ati! Kande joe ben kon sabi taki a sma en trow broko noso taki a lasi en wroko no so langa pasa. Den sortoe ondrofeni disi no switi èn den kan pori na osofamiri libi. Gebroiki den aksi na bladzijde 2 foe a traktaat Njanboen foe a osofamiri libi: „Foe san ede osofamiri ini a ten disi, e kisi someni foe doe nanga den sortoe serjoesoe problema disi? Fa wi kan njanboen foe a osofamiri libi?” Kande disi na den troetroe aksi di a sma abi moro foeroe na prakseri. Srefi efoe a no sori taki a sma abi wantewante belangstelling, a kan taki a sa leisi a traktaat bakaten. — Preik. 11:6.
6 Ini son gemeente den ben wroko a gebied foeroetron, èn foeroe sma abi son wan foe den boekoe foe wi kaba. Efoe wi e gebroiki den traktaat, wi sa abi wan okasi foe taki foe wan sani gi san na ososma abi belangstelling, èn kisi den so fara meki den taki san den e denki èn foe meki den go prakseri foe a Kownoekondre howpoe. Prani wan aksi ini den prakseri, foe san den kan go taki na wan tra ten. Tjari wan gobaka, èn kweki a belangstelling disi moro fara. Te foe kaba, wi sa man foe bigin studeri nanga den, ala di wi e gebroiki wan brochure noso wan boekoe di den abi kaba.
7 Gebroiki traktaat na okasi: Efoe wi e hori traktaat alaten pe den de makriki foe teki — ini wi empi-saka, koto noso broekoe-saka, ini wi portmoni noso velddienst-tas — wi kan gebroiki den na foeroe tra okasi, pe wi kan feni sma toe. Gebroiki den te joe e go wenkri, e rèis, noso e taki nanga famiri noso fisitiman. Den traktaat e gi wi na okasi foe gi sjatoe kotoigi. Wan traktaat na wan sani di no abi toemoesi foeroe foe leisi gi wan sma, ma a e taki foe den edepenti èn a de taktvol. Sma e teki en moro esi leki wan boekoe noso den tijdschrift, foe di a no abi so foeroe sani foe leisi.
8 De na ai foe pristeri den traktaat na okasi na skoro noso na a presi pe joe e wroko, na restaurant, na oli pompoe, èn so moro fara. Di wan sisa ben sreka sani foe tjari en granmama go na datra, a ben sorgoe taki a ben abi traktaat na en. Na a kantoro foe datra a ben bigin taki nanga wan mama di ben abi bere. Baka di a ben sori na oema a traktaat Libi ini wan vrede njoen grontapoe, a sisa ben aksi en: „Joe ben sa wani foe kweki joe pikin ini wan grontapoe neleki a wan di den e sori djaso?” A ben man foe go doro nanga a takimakandra disi foe di a ben tjari wan fisiti na a oema en oso. Disi ben meki taki ten na ten a ben man tjari wan toe gobaka.
9 Joe kan opo oso-bijbelstudie nanga jepi foe den traktaat: Wan kringopziener ben taki dati a gemeente di a ben fisiti ben bigin 64 oso-bijbelstudie ini a wiki dati, foe di den ben gebroiki traktaat di den ben taigi a ososma odi na a fositron di den ben miti.
10 Joe ben proeberi foe pristeri wan oso-bijbelstudie na fosi leisi di joe ben de na a doro? Efoe joe e gebroiki wan traktaat, joe kan demo sjatoe fa wan studie e hori. Wan sisa ben doe disi foe di a ben gebroiki a traktaat Libi ini wan vrede njoen grontapoe. Ala di a ben sori go na a prenki, a ben aksi na ososma efoe a ben denki taki a grontapoe foe wi oiti ben sa kon leki dati. Baka di a ososma ben piki, a sisa ben meki a leisi 2 Petrus 3:13 èn Jesaja 65:17, foe san den e taki finifini ini a traktaat. Na sisa foe wi ben taki dan: „Den pramisi disi no de wan dren èn den no de wan anansi tori, ma den e taki foe den na ini Gado Wortoe, bijbel.” Dan a ben sreka sani foe go doro nanga a takimakandra a tra wiki. Na a tra fisiti, na oema ben kisi piki na tapoe wan toe foe den aksi èn a boekoe Joe kan libi foe têgo ini wan paradijs na grontapoe ben libi na baka. Wan bijbelstudie ben de a bakapisi.
11 Joe de wan sma di dopoe njoen noso kande wan preikiman di no dopoe ete èn di e kisi ondrofeni ini joe diniwroko? Efoe a de so, kande joe wani soekoe den wan di abi moro ondrofeni èn aksi foe den idea fa foe gebroiki den traktaat ini na gebied foe joe gemeente. Wi abi foeroe eksempel ini bijbel foe den wan di e kisi deki-ati èn tiri foe den wan di lepi ini bribi. — Tori. 18:24-27; 1 Kor. 4:17.
12 A gemeente boekoestudieleider kan de spesroetoe wan jepi foe sreka sani taki trawan, e asisteri joe foe gebroiki den traktaat na wan boen fasi. Wan papa nanga mama abi a frantiwortoe foe jepi den pikin foe go na fesi ini a preikiwroko. Papa nanga mama foe wan jongoe kotoigi ben oefen en foe pristeri a traktaat Libi ini wan vrede njoen grontapoe. Ala di a ben de nanga en mama na wan bijbelstudie, a ben pristeri wan traktaat na a masra foe na oema di ben abi belangstelling. A man ben froewondroe taki wan jongoe sma ben abi so wan tranga relisi overtoigi. A ben prisiri dorodoro foe ben kan leisi a traktaat. Ibri leisi te a jongoe oemapikin ben go baka nanga en mama na a man disi, a ben taki foe wan bijbel tekst noso bijbel tori di a ben sreka spesroetoe gi en. A man e leisi den tijdschrift now doronomo, ben sori belangstelling gi a Openbaring boekoe, èn ben fisiti wan toe konmakandra. Ala disi ben de a bakapisi foe a sorgoe di papa nanga mama ben gi na den frantiwortoe foe leri den oemapikin foe meki boen gebroiki foe den traktaat.
13 Gebroiki den njoen traktaat foe wi na wan fasi di abi boen bakapisi: Te joe e gebroiki a traktaat A grontapoe disi sa tan?, joe kan taki soema na joe èn bigin nanga a takimakandra ala di joe e taki: „Morgoe. Wi e taki nanga sma foe a kwaliteit foe a libi ini a ten disi. Joe e denki taki a kwaliteit foe a libi sa kon moro boen, noso a sa tan go moro nanga moro na baka? [Gi okasi foe a sma gi piki] Son sma e denki taki den sani di e pasa now ini grontapoe, na wan kontroe foe bijbel profeititori èn taki a kaba foe grontapoe de krosibei. San joe e denki?” Baka te na ososma gi piki, pristeri a traktaat èn poti prakseri tapoe den dri aksi ini a di foe toe paragraaf. Dan taki akroederi a fasi fa den sani skrifi ini a traktaat, foe sori fa wan grontapoe ben kon na wan kaba na fesi èn taki grontapoe foe now sa kaba so srefi toe. Te joe e kaba a fisiti, seti sani gi wan tra fisiti foe loekoe den bijbel boeweisi taki a kaba foe grontapoe de krosibei.
14 Foeroetron wi man prati a kownoekondre boskopoe sjatoe nomo nanga trawan, so leki na wroko noso skoro. Na a presi pe joe e wroko, den kan abi wan takimakandra foe njoensoe di e go foe a fasi fa sma e tiri. Joe kan agri taki awinsi sortoe moeiti den tiriman e meki èn kande moeiti di den doe nanga wan boen ati, tokoe a grontapoe ben pina serjoesoe ini heri historia. Sori go, baka dati, na a lasti paragraaf na bladzijde 2 foe a traktaat Soema troetroe e tiri grontapoe? Leisi den dri aksi di e poesoe na prakseri. Efoe ten no de gi wan sjatoe takimakandra, gi den sma a traktaat èn sreka sani foe go taki wan tra leisi foe den aksi disi noso na wan tra presi.
15 Leki aparti sma noso famiri, teki ten foe loekoe fa joe kan pristeri ibriwan foe den difrenti traktaat disi. Hori oefen ten. Fa joe kan gebroiki den traktaat makandra nanga den tra boekoe di wi sa pristeri a moen dati ini velddienst? Sortoe afspraak joe ben abi, pe joe moesoe go ete, so taki joe kan teki wan toe traktaat nanga joe? Joe sa miti nanga wan sma a wiki disi, di kan njanboen foe a boskopoe di a traktaat disi e pristeri?
16 Tranga lobi gi Jehovah nanga broko-ede nanga sma, sa poesoe wi foe doe ala san wi kan foe meki a boen njoensoe bekènti. Efoe wi e gebroiki traktaat doronomo, dan dati sa jepi wi foe doe so. Wan jongoe boi, di ben de seibi jari, ben wani foe jepi en birtisma foe doro a njoen seti foe sani, èn foe dati ede a ben gi en wan traktaat èn wan bijbelstudie ben bigin. A sori so makriki! Ma wi e warderi den makriki fasi disi foe bigin wan tori nanga sma te wi de ini velddienst? Wan tra leisi te wi e libi wan traktaat na baka na wan sma, a kan taki wi toe kan bigin wan bijbelstudie. Efoe wi e gebroiki den traktaat na wan konifasi ini a preiki foe a boen njoensoe foe a Kownoekondre, wi kan de seiker taki wi sa abi boen bakapisi.