Kibri joesrefi gi sma di wani abi wini foe wi boen-atifasi
1 A pipel foe Jehovah de bekènti foe den boen-atifasi èn a lobi di den lobi foe gi sani. Foeroetron wi e sori disi na wan skin fasi foe di wi e doe leki a Samariasma di ben lobi a sma na en sei, di Jesus ben taki foe en ini en agersitori di e naki sma ati (Luk. 10:29-37). Tokoe, sonwan di no de warti foe kisi jepi na skin fasi, kande e proeberi foe meki wan fowtoe gebroiki foe wi boen-atifasi. So boen, a lobi foe wi gi trawan moesoe de ini balansi nanga „soifri sabi nanga a koni foe man si sani krinkrin”. — Fil. 1:9.
2 Ini a gemeente: Foe eksempre, wan sma kan taki dati a no abi wroko noso en e gi tra reide meki a e aksi jepi. Sontron den sma disi no e meki moeiti foe soekoe wroko, ma wani nomo taki trawan moesoe gi den sani di den abi fanowdoe foe tan na libi. Foe den sortoe sma disi Paulus ben e taki: „Efoe wan sma no wani wroko, a no moesoe njan toe.” — 2 Tes. 3:10.
3 „Ten nanga sani di e pasa sondro foe sabi dati na fesi” e miti wi alamala, so boen, efoe wi abi sani na skin fasi fanowdoe, wi no abi „wi brede foe tide”, dan wi no moesoe broko wi ede toemoesi, bika Jehovah e sorgoe gi denwan di lobi en, èn di e doe en wani (Preik. 9:11; Mat. 6:11, 31, 32). Wan pôti sma kan feni en boen foe taki nanga wan foe den owroeman. Den owroeman sabi kande foe lanti programa di seti foe gi jepi, èn kande den man foe jepi foe klari den papira tori noso foe froestan den marki foe den programa disi. Awansi fa a no fa, den owroeman kan loekoe a situwâsi foe iniwan sma di e aksi jepi, èn sa loekoe san den kan doe. — Teki gersi 1 Timoteus 5:3-16.
4 Bedrigiman di e go foe a wan presi go na a trawan: A Genootschap e tan kisi foe jere, taki bedrigiman di e go foe a wan presi go na a trawan, ben kori sonwan ini den gemeente èn teki den moni nanga sani na skin fasi. Disi no moesoe froewondroe wi, foe di den Boekoe foe bijbel e warskow wi taki „ogrisma nanga bedrigiman sa kon takroe moro nanga moro, ala di den e kori trawan èn trawan sa kori den” (2 Tim. 3:13). Foeroetron den bedrigiman disi e taki, dati den tan fasi na wan presi, èn taki den abi moni fanowdoe gi transport nanga njanjan foe man go baka na oso. Ala di a e sori kande taki den de eerlijk, ini foeroe geval den a no Jehovah Kotoigi srefisrefi, ma den e doe leki den na wan.
5 Efoe wan freimde sma e aksi foe jepi, a sa de wan koni sani foe aksi wan foe den gemeente owroeman rai, di sa loekoe efoe a sma disi na wan brada foe wi. So leki fa a gwenti de, dan den moesoe bèl wan foe den owroeman foe a gemeente foe a sma dati, foe kon sabi efoe a sma abi wan boen nen. Troetroe brada nanga sisa di, sondro den ben sabi dati na fesi, de ini nowtoe, sa froestan taki na ondrosoekoe disi meki foe kibri ala sma di abi foe doe nanga disi. Na tra sei, wi sa kon sabi soema na den bedrigiman nanga jepi foe na finifini ondrosoekoe disi. A no de fanowdoe foe no froetrow ala sma di wi no sabi, tapoe wan fasi di no joisti, ma wi moesoe loekoe boen gi ogri bedrigiman. — Loekoe toe km 9/80, bladzijde 2 (Ingrisitongo).
6 Koni kownoe Salomo ben gi leki rai: „No tweifri foe gi boen na denwan di abi en fanowdoe, te a de ini joe makti foe doe dati” (Odo 3:27). Foe di wi abi koni foe si fa foe doe sani, wi kan go doro foe abi sari-atifasi, ala di wi e kibri wisrefi gi sma di wani abi wini foe wi boen-atifasi.