Wiki belangstelling gi Gado kownoekondre foe vrede
1 Ini a moen februari wi sa pristeri a boekoe Joe kan libi foe têgo ini wan paradijs na grontapoe. Wi marki moesoe de foe jepi opregti sma foe kisi warderi gi Gado kownoekondre èn gi san a sa doe. Standpunt-aksi sa jepi wi foe doe disi.
2 Baka te wi gi odi na wan switifasi, wi kan taki wan sani leki disi:
◼ „Onfroewakti kenki ini tirimakti e pasa na heri grontapoe, èn foeroetron den e taki foe vrede leki a marki. Joe e denki taki oiti den sa tjari troetroe vrede kon? [Gi okasi foe piki.] Ala di foeroe sma e loekoe nanga howpoe taki libisma tiriman sa tjari vrede kon, loekoe fa Gado e pramisi foe tjari vrede kon so leki fa a skrifi na ini Psalm 46:9. [Leisi.] Sortoe kenki den doe foe Gado sa tjari kon na grontapoe? [Arki sa na ososma e piki, èn dan sori en a traktaat Libi ini wan vrede njoen grontapoe.] Joe kan si kaba na joe fesi, fa den sani sa de di e prenki djaso?” Loekoe a bodoi di skrifi na ondro a ondrotitel „Libi ini Gado njoen grontapoe”. Efoe a situwâsi e gi okasi foe dati, dan joe kan loekoe moro bodoi di teki foe a Taki-go-taki-kon-boekoe, bladzijde 244-249, ondro na aksi „San Gado kownoekondre sa doe?”. Wi kan tapoe a takimakandra nanga na aksi: „Joe e denki taki wan tiri foe Gado ben sa tjari den kenki disi?” Efoe na ososma e sori belangstelling, dan sani moesoe seti foe wan gobaka.
3 Noso wi ben kan taki:
◼ „Foeroe sma e sori taki den e broko den ede nanga den problema di e broeja sma èn di wi alamala abi foe doe nanga den ala dei. Joe e denki taki pikinso howpoe de foe kisi froeloesoe foe den problema disi? [Gi okasi foe piki.] Son sma kande e prakseri taki Gado no e broko en ede nanga a takroe situwâsi di wi de na ini. Ma loekoe san en e pramisi na Openbaring 21:3, 4.” Leisi den vers. Tapoe a momenti disi joe kan pristeri a Libi foe têgo-boekoe, wan njoen tijdschrift, noso a traktaat A grontapoe disi sa tan? Efoe joe e pristeri a traktaat, dan joe kan poti prakseri na tapoe a materiaal tapoe bladzijde 2 nanga 3 ondro na ondrotitel „A ten di e kon gi a grontapoe disi”. Efoe belangstelling de, dan joe kan bosroiti sortoe tra boekoe joe sa pristeri. Efoe joe e pristeri a brochure Gado troetroe e broko-ede nanga wi?, na aksi ben sa kan poti: „Foe san ede Gado gi pasi foe sma pina?” Sori a di foe siksi pisi foe a brochure, èn seti sani foe taki foe a tori disi na a tra fisiti.
4 Kande joe sa wani foe taki foe wan artikel foe wan foe den njoen tijdschrift, foe di joe e taki foe wan spesroetoe penti ini wan spesroetoe artikel.
Efoe na ososma e sori belangstelling, dan pristeri a tijdschrift, foe di joe e taki kande:
◼ „Na artikel disi e taki moro fini foe a tori disi. [Leisi wan noso toe lin, di joe ben teki kaba na fesi.] Na artikel e gi moro bodoi di sa de wan deki-ati gi joe nanga joe famiri. Foe di a gersi taki joe abi belangstelling gi a tori disi, wi ben sa prisiri foe libi a tijdschrift disi nanga a sisa tijdschrift gi joe na baka.” Baka disi, kari a bijdrage.
5 Ini a ten disi sma nofotron e broeja te den wani foe sabi pe den moesoe go, foe kisi piki tapoe den problema foe libisma. Wi abi a grani foe prati wan krin howpoe gi a ten di e kon, nanga den sma (Tori. 17:27). Foe dati ede, meki wi poti nanga faja a prakseri foe den sma tapoe Gado kownoekondre, a troe fonten foe vrede.