Tan waka go na fesi ini wan routine na wan ordefasi

¹ Na apostel Paulus ben abi wan spesroetoe lobi gi a gemeente na Filipi, di nanga jepi foe en, ben kon tron wan gemeente. Na ati foe en ben firi tangi, foe di den ben gi en sani na skin fasi tapoe wan switifasi èn a ben taki foe den leki wan boen eksempre. — 2 Kor. 8:1-6.

² Paulus ben skrifi a brifi gi den Filipisma, foe di a ben abi foeroe lobi gi den. A Hulp-boekoe, Pisi 2, bladzijde 375, e taki: „Na ini a heri brifi, a e gi a gemeente foe Filipi deki-ati foe tan waka na wan boen fasi — ala di den e soekoe foe abi wan moro bigi koni foe man si sani èn foe graboe hori a Wortoe foe libi fasti, foe meki a bribi nanga a howpoe ini a prijs di moesoe kon ete, kon moro tranga.” Den ben piki na wan switifasi, èn dati ben meki wan tranga banti foe lobi kon na mindri den nanga na apostel. Den wortoe foe Paulus wani taki wan spesroetoe sani gi wi ini a ten disi, èn den e gi wi boen reide foe prakseri boen foe a froemane foe en, spesroetoe den sani di skrifi na Filipisma 3:15-17.

³ Wan lepi fasi foe denki de prenspari: Na Filipisma 3:15, Paulus ben skrifi leki wan man di abi foeroe jari ondrofeni. A ben erken taki den Filipisma go na fesi na jeje fasi, èn a ben si den leki lepi kresten di abi wan joisti fasi foe denki. So langa a fasi foe denki foe den, ben sori a sakafasi nanga a warderi di Jesus ben sori, dan den ben sa go doro foe de „boen èn sondro fowtoe, pikin foe Gado sondro flaka . . . , e hori fasti na a wortoe foe libi” (Fil. 2:15, 16). Te wi e leisi den wortoe foe Paulus, dan wi moesoe si en leki Paulus e taki nanga wi. So boen, nanga faja wi wani foe abi a srefi fasi foe denki di Jesus ben abi èn foe sori warderi na wan sakafasi gi den grani di wi kisi. Wi e tan aksi Jehovah na ini begi foe jepi wi ini a tori disi nanga ini tra afersi. — Fil. 4:6, 7. 

⁴ So leki fa Filipisma 3:16 e sori, dan wi alamala moesoe meki moeiti foe go na fesi. Den wortoe „go na fesi” wani taki „boeweigi go na fesisei, kon moro boen”. Sma di e go na fesi, na sma di „wani sabi njoen idea, wani feni njoen sani noso njoen okasi”. Paulus ben wani meki den Filipisma froestan taki krestendom no e tan na wan presi èn den wan di e hori densrefi na a krestendom moesoe tan go na fesi. A klari di den de klariklari foe ondrosoekoe densrefi, foe erken taki den swaki, èn foe soekoe okasi foe doe moro noso foe doe san den ben e doe, kon moro boen, ben sa sori taki den abi wan jeje di e go na fesi. Ini a ten disi, na organisâsi foe Jehovah na grontapoe e tan go na fesi, ala ten e meki den aktiviteit kon moro foeroe èn e meki a froestan di den e froestan a wortoe foe Gado kon moro bigi. Ibriwan foe wi moesoe tan waka skinskin nanga na organisâsi, èn wi moesoe kisi wini foe den sani di a e seti gi wi èn wi moesoe abi wan prati doronomo ini a wroko foe en.

⁵ Go na fesi e aksi foe wi abi wan routine na wan ordefasi: Paulus ben go moro fara foe gi den brada foe en deki-ati, foe „go doro foe waka na ini a srefi routine na wan ordefasi” (Fil. 3:16). Foe de na wan ordefasi e aksi foe wi, taki wi e si sma noso sani na a joisti fasi, èn e si fa den abi foe doe nanga makandra èn tjari wisrefi na wan boen fasi. Den kresten ini Filipi ben abi wan joisti fasi foe si sani, èn den ben e tan krosibei foe makandra nanga na organisâsi foe Jehovah (Joh. 15:17; Fil. 2:1, 2). Paulus ben gi den tranga foe „tjari densrefi na wan fasi di warti a boen njoensoe” (Fil. 1:27). A fanowdoe foe de na wan ordefasi èn foe tjari wisrefi na wan boen fasi, de prenspari gi kresten ini a ten disi toe.

⁶ Wan routine, na wan bakapisi foe wan sani di sma e doe doronomo. So boen, a abi foeroe foe doe nanga a fasi fa sma gwenti foe doe sani. Efoe wi abi wan routine, dan dati kan gi wi wini, bikasi wi no abi foe stòp èn soekoe rai te wi e teki bosroiti foe den sani di wi sa doe tra leisi — wi abi wan model kaba di wi e waka na baka dati, foe di wi moesoe foe doe en, foe di wi gwenti en.

⁷ Wan theokrasia routine na wan ordefasi, abi na ini gwenti di gosontoe, di e gi wini, di komoto na Gado — nanga a marki foe bow wisrefi na jeje fasi, jepi trawan, èn, efoe a kan, doe moro ini a diniwroko foe Jehovah. Foe doro den marki disi èn abi boen bakapisi, e aksi foe joe foe abi wan routine èn tan hori joesrefi na dati, di abi na ini en toe persoonlijk studie, fisiti den konmakandra doronomo, èn abi wan prati na ini a preikiwroko.

⁸ Wan routine na wan ordefasi, abi prenspari sani na ini en toe: Wán prenspari sani na „soifri sabi èn a koni foe man si sani dorodoro” (Fil. 1:9). Persoonlijk studie e meki a bribi foe wi kon tranga, e tranga a warderi di wi abi gi a waarheid, èn e boeweigi wi foe doe toemoesi boen wroko. Ma tokoe, sonwan ben feni en moeilek foe tan hori a gwenti di den abi foe studeri. Wán foe den prenspari reide di den e gi, na taki den no abi nofo ten.

⁹ Wi no kan poti nofo krakti na tapoe ofoeroe wini e kon foe leisi bijbel ala dei. Den leri foe en „boen” na ala fasi (2 Tim. 3:16, 17). Fa wi kan feni ten gi bijbelstudie ini na aladei routine foe wi? Sonwan ben feni, taki den kan opo wan toe miniti moro froekoe ibri mamanten, te a prakseri foe den de krin. Trawan e feni taki a moro boen, te den e leisi wan toe miniti bifo den e go sribi na neti. Den wefi di de na oso na deiten, kande kan poti pikinso ten na wan sei te bakadina, bifo den trawan doro oso foe wroko noso skoro. Sonwan ben poti ini a gwenti di den abi foe leisi bijbel, a leisi foe a Verkondigers-boekoe (Preikiman-boekoe) ini na alawiki studie routine foe den.

¹⁰ Te wi e poti njoen gwenti, dan a mogelekhèit bigi taki den no sa kroederi nanga den fosi gwenti, di wi ben abi. Ini a ten di pasa, wi ben kan abi a gwenti foe meki sani di no de prenspari, teki foeroe foe wi ten. Foe tapoe nanga a patron dati, no makriki. No wan sma sa taigi wi nanga tranga, sortoe gwenti wi moesoe teki foe studeri; en so srefi wi no de froeplekti foe taigi sma san wi e doe ini a tori disi. A hori di wi e tan hori wi gwenti foe studeri, e anga foeroe foe a warderi di wi abi gi „den moro prenspari sani” èn a wani di wi wani foe bai „a joisti ten” foe kisi wini foe den. — Fil. 1:10; Ef. 5:16.

¹¹ Den kresten konmakandra e plèi wan prenspari ròl ini a go di wi e go na fesi na jeje fasi, èn den e gi wi leri nanga deki-ati di wi abi fanowdoe. Foe dati ede, fisiti den konmakandra na wan tra prenspari pisi foe a routine foe wi na wan ordefasi. Paulus ben poti krakti na tapoe o prenspari disi de. Fisiti den konmakandra, a no wan sani foe te joe wani èn oten joe wani. — Heb. 10:24, 25.

¹² Fa wi kan sori ordefasi te wi e meki plan gi na alawiki schema foe aktiviteit foe wi? Sonwan e seti spesroetoe ten foe sorgoe gi den persoonlijk afersi foe den èn baka dati den e kwinsi den konmakandra ini a ten di tan abra; ma, a moesoe de tra fasi. Den alawiki konmakandra foe wi, moesoe kon na a fosi presi, èn den tra sani di wi wani foe doe, wi moesoe doe te wi no abi konmakandra.

¹³ Foe man fisiti den konmakandra doronomo, e aksi foe wi foe meki boen plan nanga a wroko di na osofamiri e wroko makandra. Foe moende te kon miti freida, moro foeroe foe wi abi wan schema di lai nanga aktiviteit, di nofotron e meki dati wi no abi nofo ten abra. Disi wani taki, dati, efoe a kan, a bakadina njanjan moesoe foe de moro froekoe, so taki na osofamiri abi nofo ten foe njan, sreka densrefi, èn doro na a konmakandra bifo a bigin. Foe doro dati, dan den sma foe na osofamiri kan wroko makandra na difrenti fasi.

¹⁴ A de prenspari foe wroko doronomo ini a velddienst, efoe wi wani tan waka go na fesi ini wan routine na wan ordefasi. Wi alamala e si krinkrin a hebi frantiwortoe foe wi foe preiki a Kownoekondre boskopoe. Dati na san e meki wi de Jehovah Kotoigi (Jes. 43:10). Foe di a de a wroko di de a moro tranga fanowdoe wan èn a de a wroko di e gi wini moro leki ala tra wroko ini a ten disi, meki na no wan fasi wi kan si en leki wan sani di wi e doe te na okasi de, na tapoe a routine foe wi. Paulus ben froemane: „Meki wi tjari ala ten wan slakti-ofrandi foe prèise gi Gado, namkoe, a froktoe foe wi mofoboeba di e meki en nen bekènti na poebliki.” — Heb. 13:15.

¹⁵ Te wi e meki plan gi den aktiviteit foe wi gi ibri wiki, dan wi moesoe poti spesroetoe ten na wan sei gi a velddienst. Leki fa a sori, dan a gemeente seti konmakandra gi a velddienst difrenti tron ibri wiki, èn a de wan afersi foe bosroiti nomo gi sortoe wan foe den wi kan hori baka. A ben sa boen, foe soekoe foe teki prati na ala fasi foe a diniwroko, so leki doe na oso-foe-oso wroko nanga tijdschrift noso tra poeblikâsi, tjari gobaka, èn hori bijbelstudie. Wi kan meki plan na fesi srefi, foe gi okasi kotoigi, foe di wi e tjari poeblikâsi nanga wi èn foe di wi de na ai gi okasi foe bigin wan takimakandra. Foe di wi abi a gwenti foe wroko nanga trawan ini a velddienst, meki wi moesoe aksi fa a schema foe den de, so taki wi kan seti sani di sa fiti gi wi nanga gi den.

¹⁶ A routine foe wi foe preiki, moesoe tan, awinsi sma no wani arki wi na a presi pe wi e preiki. Wi sabi na fesi, taki soso wan toe sma sa handri na wan boen fasi (Mat. 13:15; 24:9). Esekièl ben kisi a komando foe preiki gi sma di ben ’opo densrefi kontrari Jehovah, di no ben sjen, èn di ati ben tranga’. Jehovah ben pramisi foe jepi Esekièl, foe di a ben e meki Esekièl en „fesi-ede nètso tranga leki a fesi-ede foe den”, dati wani taki, „leki wan diamanti, moro tranga leki fajaston” (Esek. 2:3, 4; 3:7-9). Dati meki, wan routine foe go ini a velddienst doronomo, e aksi foe wi foe hori doro.

¹⁷ Boen eksempre foe waka na baka: Moro foeroe foe wi e doe moro boen ini a velddienst, te wan sma de, di e teki fesi. Paulus nanga den kompe foe en ben gi wan boen eksempre, èn a ben gi trawan tranga foe waka baka en (Fil. 3:17). A routine foe en ben abi na ini toe, ala den sani di ben de fanowdoe foe tan hori ensrefi tranga na jeje fasi.

¹⁸ So srefi ini a ten disi, wi kisi blèsi nanga moi eksempre. Na Hebrewsma 13:7, Paulus ben gi tranga: „Hori den wan na prakseri di e teki fesi na oen mindri, . . . èn waka baka a bribi foe den, ala di oenoe e loekoe na a kaba foe a fasi fa den e tjari densrefi.” A no de foe taki, dati Krestes na wi Eksempre, ma wi kan waka na baka a bribi foe den wan di e teki fesi. Neleki Paulus, den owroeman moesoe sabi taki a de fanowdoe foe de boen eksempre gi trawan. Ala di den persoonlijk omstandigheid foe den kan de difrenti, tokoe ibriwan moesoe man foe sori taki a e tan abi wan routine na wan ordefasi, foe tan hori Kownoekondre afersi na a fosi presi. Srefi nanga froeplekti ini grontapoe noso froeplekti ini na osofamiri, den owroeman moesoe foe abi boen gwenti di seti gi persoonlijk studie, gi a fisiti foe den konmakandra, èn teki fesi ini a velddienst. Alamala ini a gemeente sa kisi deki-ati foe tan waka ini wan routine na wan ordefasi, te den owroeman e sori taki den e ’teki fesi ini na osofamiri foe den na wan boen fasi’. — 1 Tim. 3:4, 5. 

¹⁹ Marki gi a njoen dienstjari: A bigin foe wan njoen dienstjari na wan ten di fiti foe go prakseri fa a de nanga a persoonlijk routine foe wi. San a loekoe di wi e loekoe baka tapoe den aktiviteit foe wi ini a jari di pasa, e sori? Wi ben man hori na aktiviteit foe wi na a srefi fasi, noso kande kon moro boen? Kande wi ben doe wi persoonlijk studie moro finifini. Kande a fisiti di wi ben fisiti den konmakandra ben kon tron moro boen, noso kande wi ben doe moro ini a velddienst, foe di wi ben wroko leki jepipionier. Kande wi kan sori go na tapoe spesroetoe fasi foe kresten switifasi, di wi ben sori gi trawan na ini a gemeente noso gi wi osofamiri. Efoe na so a de, dan wi kan prisiri taki wi waka na wan fasi di e plisi Gado, èn wi abi boen reide foe „tan doe dati moro boen”. — 1 Tes. 4:1.

²⁰ San efoe a routine foe wi, ben kenki ala leisi noso ben de wan sani di wi ben doe wanwan leisi? Sortoe bakapisi dati ben abi tapoe a jejefasi foe wi? Wan sani ben tapoe a pasi gi wi foe go na fesi? Go na fesi e bigin nanga na aksi di wi e aksi Jehovah foe jepi wi (Fil. 4:6, 13). Taki nanga den trawan foe joe osofamiri foe den sani di joe moesoe doe, aksi den foe jepi joe foe tjari wan kenki kon ini den sani foe a routine foe joe. Efoe joe abi problema, dan aksi den owroeman foe jepi joe. Efoe wi e doe serjoesoe moeiti èn e doe wan sani na tapoe a tiri di Jehovah e gi, dan wi kan de seiker taki wi sa tan fara foe de ’inaktief noso foe no meki froktoe’. — 2 Petr. 1:5-8.

²¹ Foe waka ini wan routine na wan ordefasi, e tjari blèsi kon, èn a warti a moeiti di joe e meki. Te joe abi a fasti bosroiti foe waka go na fesi ini wan routine na wan ordefasi, dan „no doe joe wroko safrisafri. De faja ini jeje. Dini Jehovah leki srafoe”. (Rom. 12:11) — Foe wan moro finifini prakseri foe a tori disi, loekoe A Waktitoren foe 1 mei 1985, bladzijde 8-12.