Fasi foe meki a Kownoekondre preikiwroko foe wi kon moro boen
1 A de fanowdoe foe doe a preikiwroko foe wi moro leki oiti bifo. Efoe sma sa tan na libi noso efoe sma sa dede, e anga foe a fasi fa den e piki tapoe a boen njoensoe (1 Petr. 4:5, 6, 17; Openb. 14:6, 7). Foe dati ede, alaten wi moesoe soekoe fasi foe meki a Kownoekondre preikiwroko foe wi kon moro boen. San na wan toe fasi foe kon moro boen?
2 Sreka joesrefi boen: Te joe e gebroiki a Wi Kownoekondre Dienst disi, dan teki wan pristeri di joe e firi taki a sa hari a prakseri foe moro foeroe sma ini joe gebied. A de prenspari foe fiti den sani di joe wani taki, na den sani di e pasa na ini joe birti. Noso kande joe wani foe sreka joe eigi pristeri, ala di joe e gebroiki idea nanga bijbeltekst di joesrefi ben feni taki den abi boen bakapisi. Joe sa abi wan inleiding fanowdoe, di e wiki a belangstelling foe sma. [Loekoe a Redeneren-boekoe (Taki-go-taki-kon-boekoe), bladzijde 9-15.] Kande joe e sreka joesrefi foe poti wan aksi di e meki sma denki dipi, noso foe aksi na ososma foe gi komentaar tapoe wan sani di ben de ini njoensoe èn di ben pasa ini a birti. Te joe e hori a pristeri foe joe na ede, dan sreka en nanga wan memre foe na osofamiri noso nanga wan tra preikiman di kan gi joe rai fa foe kon moro boen.
3 Takimakandra nanga sma: A marki foe wi na foe meki tra sma kon sabi wan prenspari boskopoe. Disi wi kan doe, foe di wi abi wan takimakandra di wani taki wan sani, nanga wi arkiman. Efoe na ososma e taki dati a no e agri noso efoe a abi en eigi fasi foe denki, dan arki boen san a abi foe taki. Den komentaar foe en, sa jepi joe foe gi piki di gron tapoe bijbel èn di e sori a howpoe di joe abi (1 Petr. 3:15). Efoe a fasi fa en e si sani, no e kroederi nanga bijbel, dan joe sa kan taki nanga takt: „Foeroe sma e firi na a srefi fasi fa joe e firi. Tokoe, djaso na wan tra fasi foe loekoe a tori.” Dan joe e leisi wan tekst di fiti, èn meki a sma gi komentaar na tapoe dati.
4 Abi wan schema di joe man kenki makriki: A no sa abi foeroe waarde efoe joe sreka joesrefi boen, ma joe no man taki nanga sma. Ini a ten disi, a de wan normaal sani foe feni wan toe ososma nomo na oso te wi e fisiti den. Efoe na so a de ini a gebied foe joe, dan proeberi foe kenki a schema foe joe, so taki joe kan wroko oso foe oso te moro foeroe sma de na oso. Kande joe e feni taki a moro boen ten foe go na sma, de na a kaba foe a wiki; trawan joe kan miti moro foeroe ini a wiki, ma na mofoneti. Ini wan toe kontren preikiman feni taki a e gi wini foe gi kotoigi tapoe den grontapoe fesadei, bika den e feni moro foeroe sma na oso. Na den okasi disi, moro foeroe sma e relaks èn kande den de moro klariklari foe taki makandra. A ben sa boen foe fiti joe inleiding na a situwâsi, èn meki den sani di joe e taki fiti nanga wan bijbeltekst.
5 Ondrosoekoe o boen a pristeri foe joe de: Baka ibri oso di joe wroko, aksi joesrefi: ’Mi ben doro na ati foe na ososma? Mi ben meki en taki fa en e denki èn mi ben poti prakseri tapoe san en ben taki? Mi ben gi piki nanga takt? Nanga a situwâsi ini prakseri, dan mi ben gebroiki a moro boen fasi gi a takimakandra?’ Ten na ten, a kan de wan jepi foe wroko nanga wan preikiman di abi foeroe ondrofeni noso nanga wan pionier èn arki heri boen na den pristeri foe en, nanga a marki foe meki joe eigi diniwroko kon moro boen.
6 Efoe joe e doe a wroko foe joe boen, dan joe sa man prati Kownoekondre waarheid di „sa froeloesoe joe nanga denwan di e arki joe”. — 1 Tim. 4:16; Odo 22:29.