Aksi boksoe

◼ A fiti foe gi wan bijdrage na sma di e gebroiki den oto foe tjari trawan?

Son wan foe wi de na ini situwâsi di e meki taki, a e didon na trawan foe wi kisi jepi foe fisiti den konmakandra èn foe abi wan prati na ini a preikiwroko doronomo. Foeroe brada nanga sisa e meki spesroetoe moeiti tapoe wan switifasi èn e gebroiki den ten, den oto èn tra sani di den abi na wan lobifasi, foe tjari wi. Ala di kande den moesoe sreka densrefi moro froekoe leki fa den ben sa wani èn den e tan moro lati foe drai go baka na oso, den e tjari sma nanga den heri ati.

Soleki fa a de nanga ibri tra fasi foe a kresten diniwroko foe wi, a gronprakseri di de foe feni na ini Galasiasma 6:5 e fiti: „Ibri sma sa tjari en eigi lai.” Foe dati ede, efoe wan sma e tjari wi doronomo, dan wi moesoe sori a warderi foe wi no soso nanga wortoe, ma so srefi, efoe wi man, nanga wan reidelijk bijdrage foe jepi tapoe den onkostoe di meki. — Mat. 7:12; 1 Kor. 10:24.

Srefi efoe a sma di e gebroiki en oto no aksi moni èn a no e sori leki a abi dati fanowdoe, sma e warderi ala ten na opregti pristeri di wi e pristeri wan bijdrage. Kande a sma di e rèi no wani teki noti; èn a no de foe taki, dati disi sa de wan bosroiti di en sa meki. Ma a e fiti taki joe pristeri foe gi wan sani. Efoe joe no man foe gi noti tapoe a momenti dati, joe kan hori dati na prakseri; joe kan poti wan sani moro tapoe a bijdrage a tra leisi te joe e rèi nanga en. — Luk. 6:38.

Na wan toemoesi lobi sani foe den wan di e gebroiki den oto foe tjari trawan di, efoe dati no ben pasa, no ben sa man foe fisiti den konmakandra noso no ben sa man abi wan prati na ini a diniwroko (Odo 3:27). So srefi, a de wan lobi sani toe foe den wan di e kisi winimarki foe den sortoe switifasi disi, foe sori den tangi, foe di den e gi wan bijdrage soleki a situwâsi foe den e gi pasi foe doe. — Kol. 3:15.