Wi sa doe en agen? — Wan tra kari gi jepi-pionier
1 Wi sa doe en agen? Wi sa doe a jepi-pionierwroko na a ten foe a Memrefesa? Na inlegvel foe Wi Kownoekondre Dienst foe februari 1997 ben hari wi prakseri nanga na edeprakseri na ini fatoe letter: „Wi e soekoe — 600 jepi-pionier.” Wi ben abi a froetrow taki joe ben sa si a kari dati leki wan serjoesoe sani. Di a raport foe april 1997 ben poti makandra, wi ben breiti foe si taki 343 sma ben gi den nen gi a jepi-pionierwroko! Efoe wi e poti na a nomroe dati den 81 gewoon pionier nanga den 43 spesroetoe pionier di ben gi wan raport a moen dati, dan wi si taki pikinmoro 25,7 procent foe ala den preikiman ben de na ini a pionierwroko. Wi sa doe en agen a jari disi na a pisi ten foe a Memrefesa?
2 Wi e prèise ala sma na wan waran fasi di ben doe spesroetoe moeiti foe doe moro na ini a diniwroko a jari di pasa. A de krin, taki lobi gi Jehovah èn gi a sma na joe sei ben boeweigi ibriwan foe oenoe (Luk. 10:27; 2 Petr. 1:5-8). Preikiman na ini difrenti situwâsi na ini a libi ben seti sani so, taki den ben kan wroko leki jepi-pionier. Na ini wán gemeente na ini den Verenigde Staten foe Amerkankondre, 51 preikiman ben pionier makandra a srefi moen, èn na mindri den joe ben abi moro foeroe foe den owroeman, wan mama nanga wan oema-pikin di abi 15 moen, wan sisa di stòp wroko èn di ben feni wan afoe-ten wroko di ben meki taki a ben man pionier, èn wan moro owroe sisa di noiti ete no ben pionier. A kring-opziener ben skrifi: „Sma e doe kefalek foeroe moeiti na ini a preikiwroko now. . . . Disi abi krakti no tapoe a gebied wawan, ma so srefi den gemeente de fajafaja srefisrefi. Den brada nanga sisa e prisiri foe kon sabi makandra moro boen èn so srefi foe si den boen bakapisi na ini a diniwroko.”
3 A jari di pasa, jongoe sma ben de na ini so srefi. Wan preikiman na ini den Verenigde Staten foe Amerkankondre di abi 13 jari èn di no ben dopoe ete, ben wakti fajafaja tapoe a ten di a ben kan simboliseer a gi di a gi ensrefi abra na Jehovah. Baka di a teki dopoe na ini februari, a ben skrifi foe a wani di a ben wani foe de wan jepi-pionier na ini maart: „Wantewante mi ben gi mi formulier, foe di noti ben de di ben hori mi na baka moro. . . . Efoe oenoe no ben gi wi a lobi kari foe pionier, dan noiti wi no ben o ondrofeni someni moi sani. Mi e gi Jehovah tangi taki mi kisi a grani disi foe de na mindri den 100.000 di ben doe wan sani na tapoe a kari.” A poti leki marki foe doe en agen.
4 Kande joe ben de na mindri den 236 di ben abi wan prati na a jepi-pionierwroko na ini maart di pasa, noso den 343 na ini april, noso den 137 na ini mei. Joe sa doe en agen a jari disi? Efoe joe no ben man pionier a jari di pasa, joe kan doe en a jari disi? Wi ben kan kisi moro leki 461 sma, a nomroe foe sma di ben wroko leki jepi-pionier na ini april 1992? Dati ben de a moro bigi nomroe foe iniwan moen foe jepi-pionier na ini a bijkantoro kontren foe Suriname.
5 Poti prakseri tapoe april nanga mei: A jari disi, a Memrefesa sa de tapoe satra 11 april, èn nanga dati april kon tron wan moen di de toemoesi boen foe doe moro foeroe na ini a diniwroko (2 Kor. 5:14, 15). Na ini den fosi 11 dei foe a moen, wi sa poti prakseri tapoe a gi di wi sa gi someni sma leki a kan di sori belangstelling wan kari foe kon na a Memrefesa. Efoe joe e meki plan foe go na ini a jepi-pionierwroko, dan grantangi gi joe formulier langa ten bifo a dei di joe wani bigin nanga dati. — 1 Kor. 14:40.
6 Foe di mei abi feifi heri weekend, dan preikiman di de na skoro noso di e doe wan foeroeten grontapoewroko, kan feni en moro makriki foe wroko leki pionier na ini a moen dati. Efoe joe poti tapoe joe schema foe wroko 10 joeroe na ini velddienst na ini ibriwan foe den feifi weekend, dan joe moesoe poti soso 10 tra joeroe na ini a moen tapoe joe schema, foe doro den 60 joeroe di de fanowdoe.
7 Na ini april nanga mei, wi sa pristeri aparti eksemplaar foe A Waktitoren nanga Ontwaakt! leki pristeri foe a moen. Disi moesoe gi srefi moro foe wi deki-ati foe doe moro èn foe wroko leki pionier. Foe san ede wi e taki dati? Den tijdschrift makriki foe pristeri èn a de wan prisiri foe wroko nanga den na ini a velddienst. Wi kan gebroiki den na ini ala fasi foe a diniwroko — te wi e wroko oso foe oso èn e wroko wenkri foe wenkri, èn so srefi te wi e taki nanga sma na strati, na parkeerpresi, na ini park èn na ini tra situwâsi. Èn san moro prenspari, na taki A Waktitoren nanga Ontwaakt! e hori den Kownoekondre waarheid hei. Den e hari a prakseri foe sma na a kontroe foe bijbel profeititori èn na so fasi den e boeweisi taki a Kownoekondre foe Gado e tiri. Den abi krakti tapoe a libi foe den leisiman toe, foe di den e handri na wan boen fasi nanga den sani di sma troetroe abi fanowdoe. Efoe wi e prakseri fa den warti tijdschrift disi abi krakti tapoe wi libi, dan dati sa boeweigi wi foe teki prati na ini a prati di wi sa prati den so foeroe leki wi man, na ini april nanga mei.
8 Te joe e sreka joesrefi gi a tijdschriftwroko disi di wi sa doe fajafaja, dan joe sa kisi wini te joe e loekoe den artikel disi sjatoe baka: „A Waktitoren nanga Ontwaakt! — Tijdschrift foe waarheid di e kon na a joisti ten” (A Waktitoren foe 1 januari 1994), „Gebroiki den tijdschrift foe wi na a moro boen fasi” (Wi Kownoekondre Dienst foe september 1995), nanga „Sreka joe eigi tijdschrift pristeri” (Wi Kownoekondre Dienst foe oktober 1996).
9 Owroeman e teki fesi: Foe man jepi den foeroe preikiman di ben wroko leki pionier a jari di pasa, dan den owroeman foe wán gemeente ben horibaka gi wán satra na ini a moen leki wan spesroetoe dei foe velddienst aktiviteit gi a heri gemeente. Sani ben seti foe kon makandra tapoe difrenti ten na ini a dei, so taki ala sma na ini a gemeente ben kan kisi na okasi foe abi wan prati na ini difrenti fasi foe a kotoigiwroko. Disi ben abi na ini foe wroko ini bisnis gebied, gi kotoigi tapoe strati, wroko oso foe oso, meki gobaka, skrifi brifi, èn gi kotoigi nanga jepi foe telefon. A bakapisi ben de toemoesi moi, foe di 117 preikiman ben abi wan prati na a preikiwroko a heri dei. Den ben wroko 521 joeroe na ini a diniwroko èn den ben prati 671 tijdschrift, brochure, nanga boekoe! A prisiri di den ben firi satra ben go doro te sonde, di den ben abi pikinmoro wan heimarki foe sma di ben kon na a poeblikitaki nanga a Waktitoren-studie.
10 Tapoe ibri diniwroko-konmakandra na ini april nanga mei, den moesoe memre a gemeente o ten en pe den sa hori velddienst konmakandra na ini a wiki di e kon, spesroetoe te wan toe tra sani ben seti di e difrenti foe a normaal schema. Gewoon pionier nanga preikiman di no e wroko leki jepi-pionier e kisi a deki-ati foe horibaka gi den seti disi, efoe a situwâsi foe den e gi pasi foe doe dati.
11 A dienstopziener moesoe kon makandra nanga a brada di e gi gebied, foe meki plan foe wroko den gebied di den no e wroko so foeroe. Moro prakseri kan poti tapoe sma di no de na oso èn foe gi kotoigi tapoe strati èn foe wroko wenkri foe wenkri. Wi moesoe bisteri nofo tijdschrift gi april nanga mei, foe di wi e froewakti taki na aktiviteit o kon moro foeroe na ini den moen dati.
12 Foeroe preikiman kan doro den markitiki: A fosi lin foe a formulier gi jepi-pionier e taki: „Foe di mi lobi Jehovah èn mi abi na angri foe jepi trawan foe leri foe En èn den lobi-ati sani di a abi na prakseri, mi ben sa wani foe abi wan moro bigi prati na ini a velddienst foe di mi wani gi mi nen foe wroko leki jepi-pionier.” A lobi di wi lobi Jehovah èn a wani di wi wani jepi trawan na jejefasi, na prenspari sani foe a gi di wi gi wisrefi abra na Gado (1 Tim. 4:8, 10). Foe doro den markitiki foe kan wroko leki jepi-pionier, dan wan sma moesoe dopoe kaba, moesoe abi wan boen nen na moreel sei, èn moesoe seti sani foe man doro 60 joeroe na ini a diniwroko na ini a moen. Ala di wi alamala e loekoe a situwâsi foe wi, wan toe foe wi di noiti no pionier ete, kan doe dati a jari disi na ini april noso mei?
13 Foeroe sma na ini a gemeente e kon froestan taki den toe ben kan wroko leki pionier, te de e si trawan di de na ini a srefi situwâsi leki den, e gi den nen foe pionier. Skoropikin, den wan di grani kaba, foeroeten grontapoe wrokoman, so srefi owroeman nanga dinari ini a diniwroko, doe a pionierwroko nanga boen bakapisi kaba. Wan oso-wefi di de wan mama foe toe pikin èn di abi wan foeroeten wroko, ben doro 60 joeroe, ben prati 108 tijdschrift, èn ben bigin 3 bijbelstudie na ini wán moen foe jepi-pionierwroko. Fa a ben doe dati? A ben gebroiki a pauze foe en na en wrokope foe gi kotoigi na ini wan gebied ini a birti, a ben gi kotoigi foe di a ben skrifi brifi, èn a ben gi kotoigi na parkeerpresi èn tapoe strati. A ben gebroiki a dei di a no ben de na wroko na wan boen fasi toe, foe di a ben go na velddienst nanga a gemeente. Ala di fosi a ben denki taki a jepi-pionierwroko ben de wan sani di a no ben man doe, tokoe nanga a deki-ati di a kisi foe trawan èn wan praktis schema, a ben man wini den problema.
14 Jesus ben gi den disipel foe en a djaranti: „Mi tjatjari safoe èn mi lai lekti” (Mat. 11:30). Dati ben de a nen foe wan artikel di e gi deki-ati, na ini A Waktitoren foe 1 augustus 1995. A e froeteri foe wan sisa di ben abi wan fasti grontapoewroko di ben poti foeroe druk na en tapoe. A ben denki taki a jepi-pionierwroko na wan sani di a no ben man doe srefisrefi? Nôno. Te joe e loekoe en boen, dan a ben man doe a jepi-pionierwroko ibri moen. Foe san ede? Foe di a ben firi taki a pionierwroko jepi en troetroe foe hori en balansi. A jepi di a ben jepi sma foe leri a waarheid foe bijbel èn a si di a ben si taki den kenki den libi so taki Gado kan feni den boen, ben de a moro bigi fonten foe prisiri na ini en druk libi. — Odo 10:22.
15 Ala den persoonlijk òfer nanga kenki di wan sma moesoe meki so taki a kan pionier, no de noti te wi e loekoe den blesi di wi e kisi. Wan sisa ben skrifi foe na ondrofeni di a ben abi nanga a jepi-pionierwroko: „A jepi mi foe no prakseri misrefi nomo èn foe poti moro prakseri tapoe a jepi di mi e jepi trawan. . . . Mi e rikomanderi en na ala sma, efoe den man doe en.”
16 Wan boen schema de fanowdoe: Na tapoe a lasti bladzijde foe na inlegvel disi, wi poti eksempre foe a schema ete wan tron di ben de na ini Wi Kownoekondre Dienst foe februari 1997. Kande wan foe den schema disi boen gi a situwâsi foe joe. Ala di joe e loekoe den baka, poti prakseri tapoe joe schema foe aktiviteit foe ibri moen. Sortoe sani lontoe na oso kan doe bifo joe e bigin nanga a pionierwroko, noso kan poti na wan sei te leki joe kaba? Joe kan teki ten foe prisiriten, ontspanning, noso joe kan poeroe tra sani di joe e doe na ini joe fri ten? Na presi foe loekoe na a totaal foe 60 joeroe di joe moesoe wroko, meki joe schema gi wán dei noso wán wiki. Soso toe joeroe wán dei noso 15 joeroe wán wiki de fanowdoe foe man wroko leki jepi-pionier. Loekoe den schema di gi leki eksempre, èn nanga wan potlood na ini joe anoe, loekoe sortoe sani joe kan seti gi wan persoonlijk velddienstschema di e wroko moro boen gi joe nanga joe osofamiri.
17 A moi fasi fa a gemeente ben horibaka gi a diniwroko a jari di pasa ben gi wan sisa di de wan gewoon pionier njoen krakti, èn a ben skrifi: „Mi e taigi oenoe foeroe tangi foe a lobi-ati deki-ati di oenoe ben gi foe doe spesroetoe moeiti foe horibaka gi a jepi-pionierwroko. . . . Den schema di oenoe gi leki eksempre jepi foeroe sma di noiti ete ben wroko leki pionier, foe si taki den ben man doe en. . . . Mi breiti so te foe de wan pisi foe na organisâsi foe Jehovah èn foe waka na baka a kolokoe lobi-ati fasi fa a getrow en koni srafoe e tiri wi.”
18 Odo 21:5 e gi wi a djaranti: „Den plan foe a sma di de fajafaja seiker sa abi winimarki.” Odo 16:3 e gi wi a deki-ati: „Lolo joe wroko na tapoe Jehovah srefi èn den plan foe joe sa poti steifi.” Ija, te wi e begi èn e poti Jehovah na ini den bosroiti di wi e teki èn te wi troetroe e froetrow tapoe en taki a kan jepi wi foe abi boen bakapisi, dan wi kan de positief nanga den plan di wi abi foe wroko leki jepi-pionier. Baka te wi de ini a jepi-pionierwroko wán noso toe moen èn wi e si o boen a schema foe wi e wroko, dan kande wi ben sa man poti wan marki na ini a boksoe tapoe a jepi-pionier formulier di e taki: „Vul in djaso efoe joe wani go doro foe wroko leki wan jepi-pionier so langa leki joe man.” Awansi fa a no fa, wi kan loekoe go na fesi foe doe a jepi-pionierwroko agen na ini augustus, te feifi heri weekend sa de. Ala di wi e doro a kaba foe a dienstjari na ini augustus, wi alamala sa doe moeiti foe abi wan prati na a diniwroko, someni leki wi kan.
19 Jesus ben taki na fesi: „A sma di e sori bribi na ini mi, a sma dati sa doe so srefi den wroko di mi e doe; èn a sa doe wroko di bigi moro leki den disi” (Joh. 14:12). A de wan prisiri grani gi wi foe dini leki kompe wrokoman foe Gado te a profeititori disi sa abi en bigi kontroe. Now na a ten foe preiki a boen njoensoe nanga moro faja leki oiti bifo, èn wi moesoe bai a joisti ten foe doe a wroko disi (1 Kor. 3:9; Kol. 4:5). Wan toemoesi boen fasi fa wi kan doe wi pisi leki Kownoekondre preikiman, na foe di wi abi wan prati na a jepi-pionierwroko so foeroe leki wi man. Wi e wakti fajafaja foe si o bigi a prèisesingi foe den jepi-pionier sa de na a ten foe a Memrefesa disi (Ps. 27:6). Efoe wi e denki foe den bakapisi foe a jari di pasa, dan wi e aksi wisrefi: „Wi sa doe en agen?” Wi de seiker taki wi sa doe dati!
[Prenspari pisi na tapoe bladzijde 3]
Joe kan wroko leki jepi-pionier?
„Awinsi fa joe persoonlijk situwâsi de, efoe joe dopoe kaba, efoe joe abi wan boen nen na moreel sei èn kan seti sani foe doro a marki foe 60 joeroe wán moen na ini a diniwroko èn joe e bribi taki joe ben kan dini wán noso moro moen leki jepi-pionier, dan den gemeente owroeman sa prisiri foe loekoe na aanvraag foe joe gi a grani disi foe dini.” — Georganiseerd om onze bediening te volbrengen (Orga foe doe wi diniwroko), bladzijde 116.
[Faki na tapoe bladzijde 6]
Schema gi jepi-pionier
Eksempre fa foe poti 15 joeroe foe velddienst ibri wiki na tapoe schema
Den mamanten — Moende te go miti satra
Joe kan poti iniwan tra dei na ini a presi foe sonde
Dei Ten Joeroe
Moende Mamanten 2 1⁄2
Toedewroko Mamanten 2 1⁄2
Dridewroko Mamanten 2 1⁄2
Fodewroko Mamanten 2 1⁄2
Freida Mamanten 2 1⁄2
Satra Mamanten 2 1⁄2
Totaal joeroe: 15
Toe heri dei
Joe kan teki iniwan foe den toe dei na ini a wiki
Dei Ten Joeroe
Dridewroko Heri dei 7 1⁄2
Satra Heri dei 7 1⁄2
Totaal joeroe: 15
Toe mofoneti nanga a weekend
Joe kan teki iniwan foe den toe dei na mofoneti na ini a wiki
Dei Ten Joeroe
Moende Mofoneti 1 1⁄2
Dridewroko Mofoneti 1 1⁄2
Satra Heri dei 8
Sonde Afoe dei 4
Totaal joeroe: 15
Dei na mofoneti na ini a wiki nanga satra
Joe kan kenki sonde nanga iniwan tra dei
Dei Ten Joeroe
Moende Bakadina 2
Toedewroko Bakadina 2
Dridewroko Bakadina 2
Fodewroko Bakadina 2
Freida Bakadina 2
Satra Heri dei 5
Totaal joeroe: 15
Mi persoonlijk velddienst schema
Poti omeni joeroe joe o wroko gi ibri pisi ten
Dei Ten Joeroe
Moende
Toedewroko
Dridewroko
Fodewroko
Freida
Satra
Sonde
Totaal joeroe: 15