Mi wani wan bijbelstudie!
1 Foeroe foe wi taki foe na angri di wi e angri foe abi wan bijbelstudie èn dati na wan boen sani. A bijbelstudie wroko e meki wi doro a marki foe wi foe meki njoen disipel (Mat. 28:19, 20). Èn tokoe foeroe foe wi pasa omeni moen, kande jari, sondro foe ondrofeni a spesroetoe prisiri di e kon foe a leri di wi e leri wan sma waarheid. San wi kan doe na a sani disi na ini november? Foe di wi e pristeri a Sabi-boekoe a moen disi, dan wi kan doe spesroetoe moeiti foe gebroiki en foe bigin njoen bijbelstudie.
2 Poti wán noso moro satra nanga sonde na wan sei: Wi e gi ala sma deki-ati foe poti pikinso ten na wan sei a moen disi, foe kan poti spesroetoe prakseri na tapoe fa foe bigin wan njoen bijbelstudie. Gemeente boekoestudieleider moesoe loekoe sortoe satra nanga sonde den sa gebroiki spesroetoe nanga disi na prakseri èn baka dati den kan orga den groepoe foe den meki moeiti makandra na ini a gobaka wroko.
3 Tjari den papira pe joe skrifi den gobaka foe joe kon nanga joe na den velddienst konmakandra disi. Dan go baka na ala den sma di sori belangstelling èn di teki poeblikâsi noso ben fisiti konmakandra. Go ibritron baka nanga a spesroetoe prakseri foe bigin wan studie.
4 Demo wan bijbelstudie: Na den velddienst konmakandra di seti spesroetoe gi dati, wan demo moesoe hori di sreka boen, foe sori fa foe bigin wan studie te joe e tjari wan gobaka. Joe ben sa kan taki: „Foeroe sma abi wan bijbel, ma den no abi a prakseri taki a abi den piki na tapoe den moro prenspari aksi di e opo ede kon na ini wi libi. [Sori den kapitel di de na ini a Sabi-boekoe, èn leisi den nen foe den kapitel 3, 5, 6, 8 nanga 9.] Efoe joe e gebroiki a bijbelstudie boekoe disi wan joeroe so na ini wan wiki, dan joe kan kisi wan fondamenti froestan foe sani foe bijbel na ini wan toe moen nomo. Efoe joe ben sa wani teki wan foe den tori disi, dan mi ben sa prisiri foe sori joe fa a programa disi e wroko.” Efoe a sma e draidrai foe go studeri foe di a abi foeroe sani foe doe, dan froeklari taki wi abi wan sjatoe programa toe. Sori en a brochure San Gado e aksi foe wi, èn aksi en foe studeri wán sjatoe lès wantron wan wiki so wan 15-30 miniti.
5 Efoe wi alamala e meki moeiti makandra foe bigin studie èn efoe wi begi Jehovah foe a blesi a moeiti di wi e meki, dan seiker wi sa feni njoen studie! (1 Joh. 5:14, 15) Efoe joe wani wan bijbelstudie, dan disi kan de na okasi gi joe foe bigin wan.