Feni Prisiri na ini Yu Santa Diniwroko
1 Den ben drai kon baka „nanga prisiri”. A Bijbel tori e fruteri wi fa den 70 disipel ben firi di den ben fruteri Yesus fa sani ben waka, baka wan langa preikiwaka. Den ben abi prisiri na ini den ati fu di den ben e du a wani fu Gado (Luk. 10:17). San kan yepi yu fu feni wan srefi sortu prisiri na ini santa diniwroko?
2 Wan Yoisti Fasi Fu Denki: Yehovah gi yu a grani fu yepi sma fu den kon sabi a bigi prakseri fu En. Fu di yu e preiki, meki yu kan yepi fu fri wan sma komoto na den lagi gwenti fu a grontapu disi èn na den keti fu falsi kerki. Yu kan gi sma a howpu fu libi na ini wan grontapu di de sondro a pratifasi, di de fu feni furu na ala sei na ini a ten disi. Prakseri fu a prisiri di Yehovah abi te yu man prani den siri fu waarheid na ini na ati fu wan sma di wani arki. Te yu e begi fu kisi a yeye fu Gado, dan yu musu frutrow taki a yeye disi sa yepi yu fu abi a froktu prisiri, ala di yu e du a diniwroko nanga yu heri ati.
3 Leri Di Yu Kan Gebroiki: Yesus ben hori wan konmakandra nanga den 70 disipel, pe a ben gi den leri. Yu kan teki a konmakandra disi gersi nanga wan disiten Diniwroko Konmakandra. A ben gi den leri so taki den ben kan du a diniwroko fu den nanga bun bakapisi (Luk. 10:1-16). Na ini a ten disi a Diniwroko Konmakandra e leri yu fa fu go na wan sma fu taki nanga en, fa fu bigin takimakandra nanga sma èn fa fu bigin èn hori wan oso-bijbelstudie. Te yu e du muiti fu kon sabi fa fu preiki moro bun, dan yu sa si taki yu no sa abi a firi so furu moro taki yu e fredefrede noso taki yu no sabi preiki bun, bika yu sa abi na overtoigi nanga a prisiri.
4 Poti Prakseri na a Ten Di E Kon: Yesus ben feni prisiri na ini en santa diniwroko, awansi a ben kisi so furu pina. Fu san ede? Bika a ben hori en ai doronomo na den blesi nanga den grani di ben de na en fesi (Hebr. 12:2). Yu kan du a srefi sani te yu poti yu prakseri nanga yu ati na a nen fu Yehovah èn na den blesi di sa kon na ini Gado en nyun grontapu. Disi sa gi yu moro prisiri èn sa meki taki yu e du a diniwroko fu yu nanga wan marki.
5 Te yu e du santa diniwroko gi Yehovah, dan yu abi a moro bigi grani di de fu feni na ini a ten disi. Fu dati ede, yu kan taki: „Mi prisiri fu du yu wani, o mi Gado.”—Ps. 40:8.