Aksi Boksu

◼ Fa zaalwaktiman kan yepi papa nanga mama, so taki den pikin fu den tyari densrefi na wan yoisti fasi na konmakandra?

Pikin-nengre moro furu lobi prei heri dei, den no gwenti fu tan sidon langa pisi ten. Baka a konmakandra, dan a hori di den pikin-nengre ben hori densrefi fu no opo, kan meki taki den wani lon baka tra pikin-nengre na ini a Kownukondre zaal noso na tra presi pe wi e kon makandra, na a parkeerpresi noso na tapu a futupasi. Ma na odo tru, di e taki: ’Wan pikin di den libi na ensrefi sa gi en mama syen.’—Odo 29:15.

Na wan sari sani fu taki dati wan tu fu den moro owru brada nanga sisa fu wi ben kisi mankeri bika pikin-nengre ben lon boks den èn ben meki den fadon na gron. Disi meki taki sma kisi pen sondro taki disi ben de fanowdu èn taki papa nanga mama èn a gemeente ben musu pai kostu ala di dati no ben abi fu pasa. Fu meki taki den pikin srefi no kisi mankeri èn fu meki taki dati no pasa nanga trawan tu, dan pikin-nengre no musu kisi pasi fu lon èn fu prei na inisei noso na dorosei fu a Kownukondre zaal.

Papa nanga mama abi a frantwortu leki fa Bijbel e sori, fu leri den pikin fu den taki den musu lespeki den presi di wi e gebroiki gi na anbegi (Preik. 5:1). Na den Kresten konmakandra fu wi, den bigi konmakandra nanga den kongres, zaalwaktiman noso dienst-yepiman e kisi a wroko fu luku taki „ala sani e waka na wan fasi di fiti” èn taki „sani seti bun” (1 Kor. 14:40; Kol. 2:5). Den musu tan na ai fosi a programa bigin, te a programa e hori èn baka te a programa kaba, ala di den e du dati na inisei èn na dorosei fu a konmakandra presi. Te wan pikin e lon noso e rigeri, dan a zaalwaktiman noso a dienst-yepiman kan stop a pikin na wan switi fasi èn a kan fruteri a pikin fu san ede den sortu sani dati no fiti. A musu fruteri a papa noso a mama na wan switi fasi tu fu a problema èn a musu sori den taki a de fanowdu dati den e hori a pikin na ai. A papa noso mama musu handri na wan fasi di fiti.

A no de fu taki dati son leisi den beibi nanga den nyofi pikin kan krei noso kan meki babari na den konmakandra. Zaalwaktiman, di e doro seiker 20 miniti fosi a programa e bigin, kan hori wan tu rei sturu na bakasei na ini a zaal, gi papa nanga mama di ben sa wani sidon drape nanga den yongu pikin fu den. Sma di no abi pikin musu wroko makandra fu di den e libi den presi disi gi den.

Efu wan pikin e meki babari, dan a papa noso a mama musu du wan sani. Efu a papa noso a mama no e du noti èn a babari e puru a prakseri fu sma, dan wan zaalwaktiman ben sa musu aksi a papa noso a mama na wan switi fasi fu tyari a pikin go na dorosei. Te wi e gi nyun sma di abi yongu pikin wan kari fu kon na den konmakandra, dan wi musu sidon nanga den èn wi musu aksi den efu wi kan yepi nanga den pikin te den e krei noso e meki babari.

A e meki wi prisiri te wi e si pikin-nengre fu difrenti yari na a Kownukondre zaal èn fu si fa den e tyari densrefi na wan bun fasi na ini na osofamiri fu Gado (1 Tim. 3:15). Te den e lespeki a presi di Yehovah seti pe wi e anbegi en, dan den e gi en grani èn ala sma na ini a gemeente sa warderi den.