Suku den wan di warti fu yere a bun nyunsu
1. Fa wi e sori warderi gi a grani di wi abi fu du a diniwroko?
1 Na a ten fu Yesus en diniwroko, a ben du furu muiti fu fruteri safri-ati sma a bun nyunsu di e gi trowstu (Yes. 61:1, 2). Na ini a ten disi, wi de leki boskopuman di e teki presi gi Krestes. Wi abi a moi grani fu teki na eksempre fu en, fu di wi e tan suku den wan di warti fu yere a bun nyunsu èn wi e du dati finifini na ini a kontren fu wi.—Mat. 10:11; 2 Kor. 5:20.
2. Fa Paulus ben fiti ensrefi, èn san ben de a bakapisi?
2 Fiti yusrefi: Na apostel Paulus ben abi a gwenti fu go fosi na a snoga fu preiki gi den Dyu nanga den sma di teki a Dyu bribi (Tori. 14:1). Di a ben de na Filipi, dan en nanga Silas ben go suku sma na wan presi pe ’den ben denki taki sma ben gwenti begi’. Drape den bigin gi kotoigi na wan grupu umasma. Syatu baka dati, wan fu den uma dati di nen Lidia, teki a tru bribi.—Tori. 16:12-15.
3. Boiti taki wi e preiki oso fu oso, sortu tra okasi wi abi fu preiki?
3 Boiti a kontren pe yu e preiki oso fu oso, yu kan preiki sosrefi gi sma di de na presi pe den e wakti bus, pe den e go koiri, na kantoro, na den uku fu strati pe furu sma de, na ini bisnis kontren, èn na presi pe furu wenkri de. Kande yu kan skrifi brifi noso bèl den sma di e libi na presi pe yu no kan miti den so makriki. Te yu e poti prakseri na san yu e si èn te yu e fiti yusrefi na den difrenti situwâsi na ini yu kontren, dan yu sa abi „furu fu du na ini a wroko fu Masra”.—1 Kor. 15:58.
4. Sortu tra sani wi kan du efu a gemeente fu wi no abi nofo kontren?
4 Furu preikiman ben abi na okasi fu du moro na ini a diniwroko, fu di den go dini na wan tra gemeente na ini den eigi kondre noso na tra kondre. Trawan leri wan tra tongo fu man preiki gi sma di kon libi na ini a kondre fu den.
5. Fa wi musu si a ten di wi e libi na ini, èn san wi musu bosroiti fu du?
5 Wi alamala musu hori na prakseri taki a gron fu san Yesus ben taki, na grontapu (Mat. 9:37; 13:38). Fu di a kaba fu na ogri grontapu disi de heri krosibei, meki ibriwan fu wi musu poti seryusu prakseri na wi eigi situwâsi, den sani di wi man du, èn na den okasi di wi abi fu du moro na ini wi diniwroko. Yehovah e gi wi a dyaranti taki efu wi e poti Kownukondre afersi na a fosi presi, dan a o blesi a tranga muiti di wi e meki fu du moro na ini a diniwroko.—Mat. 6:33; 28:20.