Naki kofu na wan koni fasi
1. San 1 Korentesma 9:26 abi fu du nanga a diniwroko?
1 Na apostel Paulus ben skrifi: „Mi no e lon bruyabruya. Mi e naki kofu na so wan fasi taki mi no e naki winti” (1 Kor. 9:26). Nanga den wortu disi Paulus ben sori taki a ben e du ala san a man fu dini Yehovah moro bun. Ma fu taki en leti, den wortu disi abi fu du tu nanga a diniwroko. Wi wani naki „kofu”, noso meki muiti na wan koni fasi fu kan abi bun bakapisi. Fa wi kan du dati?
2. Fa wi kan teki na eksempre fu Paulus nanga tra preikiman fu a fosi yarihondro te wi e luku o ten èn pe wi o preiki?
2 Go na presi pe sma de: Paulus nanga tra preikiman fu a fosi yarihondro ben e preiki na presi pe den ben fruwakti fu miti sma (Tori 5:42; 16:13; 17:17). Sobun efu furu sma na ini wi kontren de na oso na mofoneti, dan dati na a moro bun ten fu go oso fu oso. A de so taki fruku mamanten noso mofoneti furu sma de na den presi pe bus e lai, fu di den e go na wroko noso den e go baka na oso? O ten furu sma de na den presi pe furu wenkri de? Te wi e du stratiwroko na den yuru dati, dan wi kan miti moro sma.
3. Fa wi kan naki kofu na wan koni fasi te wi e wroko a kontren fu wi?
3 Wroko a kontren na wan koni fasi: Wi musu naki kofu na wan koni fasi tu te a abi fu du nanga a fasi fa wi e wroko a kontren fu wi. Fu eksempre, no tyari wan bun bigi grupu sma go na ini a srefi kontren, fu di yu o lasi furu ten. Boiti dati, yu o abi fu du furu muiti fu meki a grupu wroko na wan orga fasi èn fu sorgu taki den abi nofo oso fu wroko. Na presi fu du dati, a ben o moro bun fu prati a grupu. Boiti dati, te wi e wroko na boitipresi, wi o man wroko a kontren moro gaw èn wi o abi moro okasi fu taki nanga sma efu den grupu na ini den wagi no bigi tumusi. Wi kan aksi wan kontren gi wisrefi di de krosibei fu wi oso, so taki a no e teki so furu ten fu go na a kontren pe a grupu e wroko?
4. San o yepi wi fu de bun „fisiman di e fanga libisma”?
4 Yesus ben agersi preikiman nanga „fisiman di e fanga libisma” (Mark. 1:17). Fisiman no e trowe den fisinèt nomo na ini a watra, ma den wani fanga fisi. Fu dati ede, bun fisiman e go na wan yuru èn na wan presi pe den e fruwakti fu fanga fisi. Te den doro drape den e bigin fisi wantewante. Iya, den e du muiti na wan koni fasi. Meki wi de fayafaya tu na ini wi diniwroko.—Hebr. 6:11.