„Tan du disi”—A Memrefesa o hori tapu 5 april
1. Fu san ede a Memrefesa de so prenspari?
1 „Tan du disi fu memre mi” (Luk. 22:19). Nanga den wortu dati Yesus taigi den bakaman fu en fu memre a dede fu en di de leki wan srakti-ofrandi. Fu di a lusu-paiman meki taki wi kisi furu wini, meki nowan tra dei de so prenspari gi Kresten leki a Memrefesa di e hori ala yari. Heri esi wi o hori a Memrefesa na tapu 5 april. Fa wi kan sori taki wi de nanga tangi gi san Yehovah du?—Kol. 3:15.
2. Fa wi kan sori taki wi abi warderi gi a Memrefesa te wi e studeri èn e denki dipi?
2 Wi musu sreka wisrefi: Nofo tron wi e sreka wisrefi gi sani di prenspari gi wi. Wi kan sreka wi ati gi a Memrefesa te wi o studeri leki osofamiri den sani di ben pasa na den lasti dei di Yesus ben de na grontapu èn te wi o denki dipi fu den sani dati (Esra 7:10). Wan tu fu den Bijbeltekst yu kan feni na tapu a kalender èn na ini Ondrosuku den Buku fu Bijbel ala dei. Moro tekst èn sosrefi den kapitel fu a Moro bigi man-buku di e taki fu den tori dati yu kan feni na ini A Waktitoren fu 1 februari 2011 bladzijde 23, 24.
3. Fa wi kan sori taki wi abi warderi gi a Memrefesa te wi e du moro na ini a preikiwroko?
3 Preiki: Wi kan sori tu taki wi abi warderi gi a Memrefesa te wi e du moro na ini a preikiwroko (Luk. 6:45). Tapu satra 17 maart, wi o bigin nanga wan spesrutu kotoigiwroko na heri grontapu fu kari sma kon na a Memrefesa. Yu kan seti sani so taki yu du moro na ini a preikiwroko? Kande yu kan go na ini a yepi-pionierwroko. Kande yu kan taki fu a tori dati na a Osofamiri Anbegi di unu o hori.
4. Sortu wini wi o kisi te wi e go na a Memrefesa?
4 Wi e kisi furu wini te wi e go na a Memrefesa di e hori ibri yari. Wi e kisi moro prisiri èn wi e kisi moro lobi gi Gado te wi e prakseri fa Yehovah sorgu na wan lobi-ati fasi taki en wan-enkri Manpikin pai a lusu-paiman gi wi (Yoh. 3:16; 1 Yoh. 4:9, 10). Disi e naki wi ati fu no libi gi wisrefi moro (2 Kor. 5:14, 15). A e meki taki wi wani prèise Yehovah tu nanga wi heri ati (Ps. 102:19-21). Iya, den futuboi fu Yehovah di de nanga tangi e angri fu de na a Memrefesa tapu 5 april fu „meki sma sabi fu a dede fu Masra”.—1 Kor. 11:26.