Yu man preiki mofoneti?
1. O ten na apostel Paulus ben e preiki oso fu oso, soleki fa wan buku e sori?
1 Soleki fa wan buku e taki, dan na apostel Paulus ben gwenti preiki oso fu oso „fu fo yuru bakadina te go miti bun lati neti” (Daily Life in Bible Times). Wi no sabi seiker efu Paulus ben gwenti preiki trutru na a ten dati, ma wi sabi taki Paulus ben de klariklari fu „du ala sani fu a bun nyunsu ede” (1 Kor. 9:19-23). Disi wani taki dati a ben seti sani fu go oso fu oso na wan ten te a ben o man taki nanga moro sma.
2. Fu san ede a bun fu preiki na mofoneti?
2 Na ini furu kondre, preikiman gwenti go oso fu oso na mamanten yuru, mindri wiki. Ma a de so ete taki disi na a moro bun ten fu miti sma na ini yu kontren? Wan pionier e taki fu a kontren pe a e preiki: „Pikinmoro nowan sma de na oso na mamanten. Ma furu sma de na oso na mofoneti.” A kan de moro bun fu preiki na mofoneti, spesrutu te wi wani preiki a bun nyunsu gi mansma. Nofo tron ososma no abi furu fu du na mofoneti èn den o wani taki nanga wi. Efu a bun, dan den owruman musu seti sani fu hori preikiwroko konmakandra na mofoneti.
3. Fa wi kan sori taki wi de nanga koni te wi e preiki na mofoneti?
3 De nanga koni: Te wi e preiki na mofoneti, a de prenspari fu de nanga koni. Fu eksempre, efu yu go na wan oso èn yu si taki na ososma no man arki yu a momenti dati, kande fu di a e nyan, dan a moro bun fu aksi en fu kon moro lati. Efu a dungru, dan tanapu pe na ososma kan si yu, taigi en wantewante suma na yu, èn fu san ede yu kon drape. A bun sosrefi taki tu sma e wroko makandra noso taki a grupu e wakti krosibei. Sorgu taki yu e wroko na strati pe nofo leti de èn pe yu no o de yu wawan. No go tumusi lati na sma te den e bigin seti sani fu go sribi (2 Kor. 6:3). Efu a no de wan koni sani fu preiki na ini wan birti te dungru fadon, dan preiki lati bakadina drape.—Odo 22:3.
4. Sortu blesi wi o kisi te wi e preiki na mofoneti?
4 Den blesi di wi o kisi: A preikiwroko e gi wi moro prisiri te wi e miti sma fu taki nanga den. O moro wi man preiki gi sma, o moro okasi wi o abi fu yepi trawan fu ’kisi frulusu èn fu kon sabi a tru leri finifini’ (1 Tim. 2:3, 4). Yu man seti sani so taki yu kan preiki na mofoneti?