Fa fu du wi diniwroko moro bun—Te wan ososma e atibron

Fu san ede a prenspari: Furu sma di wi e miti na ini a preikiwroko abi bun maniri. Ma Yesus ben taki dati son sma ben o teige wi (Yoh. 17:14). Dati meki wi no musu skreki te wi miti wan ososma di e atibron nanga wi. Te a sani disi miti wi, dan wi musu hori na prakseri taki wi e du a wroko fu Yehovah èn taki wi musu tyari wisrefi na wan fasi di a feni bun (Rom. 12:17-21; 1 Petr. 3:15). Efu wi du dati, dan kande a situwâsi no o kon moro ogri. A kan meki tu taki na ososma nanga tra sma di si san pasa o wani arki te Yehovah Kotoigi go na den wan tra leisi.—2 Kor. 6:3.

Fa wi musu du dati:

No bruya, ma tan sori switifasi. Disi o meki taki a situwâsi no kon moro ogri. No denki taki na ososma abi en nanga yu (Preik. 7:9). A kan taki en ati e bron fu di a abi problema noso fu di yu no kon na wan bun ten na en oso. Efu a no lobi a boskopu fu wi, dan a kan de so fu di sma fruteri en takru sani fu wi.—2 Kor. 4:4.
Piki a sma na wan safri èn na wan switi fasi (Odo 15:1). Kande yu wiki en noso kande a ben e du wan wroko di yu kon na en oso. Aladi wi no e taigi sma sorry taki wi e du a wroko disi, toku wi kan taigi en sorry taki wi no kon na wan bun ten. Kande na ososma en ati e bron fu di sma fruteri en lei fu wi. Efu dati de so, dan wi ben kan taki: „Mi e frustan taki yu ati e bron. Ma mi denki taki a sani di sma taigi yu fu wi no tru. Kande mi kan fruteri yu fa sani de trutru.” A kan tu taki na ososma no e agri nanga wan fu den sani di wi e du, soleki taki wi e puru sma fu a gemeente noso taki wi no e teki brudu. Efu dati de so, dan wi ben kan taki: „Mi e frustan fa yu e denki. Tra sma e denki so tu. Mi kan sori yu san Bijbel e taki fu a tori disi?”
Efu a sma e atibron srefisrefi, dan kande a moro bun fu gowe sondro fu piki en. Efu a taigi yu dati Yehovah Kotoigi no musu kon na en oso moro, dan yu kan taigi en taki wi o hori dati na prakseri.

Pruberi fu du disi a mun disi:

Te yu e hori na Osofamiri Anbegi, dan oefen fa yu ben o piki wan ososma di e atibron.
Baka te yu komoto na a oso fu wan sma di ben atibron srefisrefi, dan taki nanga yu preikiwroko patna san yu ben kan du moro bun na ini a situwâsi dati.