Kownukondre Nyunsu Nr. 36

A Nyun Pisi Ten fu Dusun Yari—San a Tamara Sa Tyari Kon gi Yu?

A Nyun Pisi Ten fu Dusun Yari—A De a Bigin fu wan Nyun Yarihondro?

MINDRINETI 31 december 1999, a di fu tutenti yarihondro ben kon na wan kaba.a A ben de wan yarihondro di ben lai nanga bruya. Na ini a yarihondro dati so srefi, sabidensi ben bigin meki nyun wrokosani. Sma trutru ben go na fesi tu tapu a kontren fu datratori. Sma ben kon leri kefalek furu sani, èn na ekonomia na heri grontapu ben gro kefalek esi. Fu dati ede furu sma breiti nanga a nyun pisi ten fu dusun yari di den e si leki wan sani di sa tyari howpu nanga kenki kon. A sa de so taki orloku no sa de moro na ini a nyun pisi ten fu dusun yari? Sma no sa de pôti moro noso den no sa doti a kontren moro pe den e libi. Siki no sa de moro?

Furu sma howpu taki a sa de so. Ma o bigi a tyans de taki a nyun pisi ten fu dusun yari sa tyari kenki kon di sa tyari wini kon gi yu? A sa tyari kenki kon di sa meki taki a libi fu yu nanga yu osofamiri sa kan waka bun noso taki ogri no sa miti yu? Luku den takru bakapisi fu soso wan tu fu den problema nomo di e miti wi.

A Doti Di Sma E Doti Grontapu

„Na heri grontapu” den gudu kondre e „pori a kontren pe sma e libi, den e doti grontapu na ala sei, den e bruya den eko-sistema.” Efu sma e tan go so doro fu pori ala sani, dan „moro nanga moro a sa kon de wan hebi gi a kontren pe wi e libi”.—„Global Environment Outlook—2000”, United Nations Environment Programme.

A Siki Di Sma E Siki

„Sma e fruwakti taki na ini a yari 2020, seibi fu ibri tin sma na ini den pôti kondre sa dede fu siki ede di yu kan kisi fu tra sma. Nownow, moro mendri leki feifi fu ibri tin sma e dede fu siki ede di den kisi fu tra sma.”—„The Global Burden of Disease”, Harvard University Press, 1996.

Son sabiman e taki dati „na ini a yari 2010, a nomru fu sma di e libi na ini den 23 kondre pe a siki AIDS e naki den bun hebi, sa saka nanga siksitenti na siksi milyun”.—„Confronting AIDS: Evidence From the Developing World”, na so a Commissie fu Europa nanga a Grontapu Bangi e fruteri.

A Pôti Di Sma Pôti

„Pikinmoro 1,3 milyard sma e libi fu wan moni di no doro wán Amerkan dala wán dei ete; so wan 1 milyard sma no man bai den nyanyan-sani di den abi fanowdu.”—„Human Development Report 1999”, United Nations Development Programme.

Orloku

„A kan, taki na ogri di sma e du na ini [difrenti kondre] o tron moro ogri leki ini wan ten. Fu di sma fu den difrenti kulturu, lo nanga kerki no e agri nanga makandra, meki den e du den ogri disi. Na ini den tutenti na feifi yari di e kon, a sortu ogri disi di sma e du, sa de a sortu feti di sma sa si moro furu . . . ; na fu disi ede hondrohondro dusun sma o dede ibri yari.”—„New World Coming: American Security in the 21st Century”, Commissie fu Amerkankondre Di Musu Kibri a Kondre fu Ogri No Miti En/A Di fu Tutenti na Wan Yarihondro.

Fu dati ede na opo-opo nanga a prisiri di sma meki gi a nyun pisi ten fu dusun yari, abi leki bakapisi taki sma no e si taki dei fu dei, grontapu e kon moro doti, moro sma e siki, moro sma e kon pôti, èn orloku e kon moro ogri. A rutu fu den problema disi na bigi-ai, a frutrow di sma no e frutrow trawan, so srefi a prakseri di sma e prakseri den eigi bun nomo. Disi na eigifasi di sma no kan puru nomo nanga yepi fu ondrosuku di sabidensi du. Den no man puru en tu nanga yepi fu den nyun wrokosani di sabidensi meki noso nanga yepi fu politiek.

A Dusun Yari Tiri Di Sa Blesi a Libisma Famiri

Wan skrifiman fu owruten ben taki wan leisi: „A no de na a sma fu grontapu fu a bepaal en pasi. A no de na wan man di e waka srefi fu bepaal pe fu poti en futu na pasi” (Yeremia 10:23). Boiti taki libisma no abi a koni fu tiri grontapu, a no abi a reti fu du dati tu. Wi Mekiman, Yehovah Gado, en wawan abi a reti fu lusu den problema fu a libisma famiri, èn en sabi fa fu lusu den problema.—Romesma 11:33-36; Openbaring 4:1.

Ma o ten? Fa? Bogobogo buweisi de taki wi doro a kaba fu „den lasti dei”. Opo yu Bijbel, grantangi, leisi 2 Timoteus 3:1-5. A e taki krin sortu fasi sma ben o abi na ini den „muilek ten” disi. Mateus 24:3-14 nanga Lukas 21:10, 11 e taki fu „den lasti dei” tu. Drape den e poti prakseri na den sani di pasa sensi 1914, soleki grontapufeti, pestsiki nanga a mankeri di nyanyan e mankeri na furu presi.

Dyonsro „den lasti dei” sa kon na wan kaba. Danièl 2:44 e taki: „A Gado fu hemel sa opo wan kownukondre di noiti no sa kisi pori. . . . A sa broko ala den kownukondre disi [fu grontapu] na pisipisi èn tyari wan kaba kon na den, èn ensrefi sa tan te ten di no skotu.” So bun, Bijbel ben taki na fesi taki Gado ben sa seti wan Kownukondre, noso tiri, fu tiri grontapu. Soleki fa Openbaring 20:4 e taki, dan a tiri disi e tiri dusun yari, so bun wan millennium! Luku soso wan tu fasi fa a libi sa kon moro bun gi a heri libisma famiri na ini a tumusi moi Dusun Yari Tiri disi:

Na Ekonomia. „Den sa bow oso trutru èn libi na ini, èn den sa prani droifidyari trutru èn nyan fu den froktu fu den. Den no sa bow èn wan tra sma go libi na ini; den no sa prani èn wan tra sma go nyan fu en.”—Yesaya 65:21, 22.

A Gosontu. „Na a ten dati den ai fu den breniwan sa kon opo, èn srefi den yesi fu den dofuwan sa kon opo. Na a ten dati a malengriwan sa kren neleki wan dia, èn a tongo fu a babaw-wan sa bari fu prisiri ede.” „Èn no wan sma di e libi drape sa taki: ’Mi siki.’”—Yesaya 33:24; 35:5, 6.

A Presi Pe Sma E Libi. Gado sa „pori den wan di e pori grontapu”.—Openbaring 11:18.

Fasi Fa Sma E Handri Nanga Makandra. „Sma no sa du no wan enkri ogri èn den no sa pori no wan enkri sani na tapu heri mi santa bergi; bika grontapu sa kon furu trutru nanga a sabi fu Yehovah.”—Yesaya 11:9.

Milyunmilyun sma e bribi ini den pramisi disi fu Bijbel, dati meki den e luku go na a tamara nanga frutrow. A bakapisi fu dati de taki den man kakafutu moro bun gi den hebi nanga den problema fu a libi. Fa Bijbel kan tron wan krakti di e tiri yu libi?

Sabi Di E Tyari Yu Go na Libi!

Sontron sabidensi nanga den sani di sabidensi e meki, kan fruwondru sma srefisrefi! Toku a koni fu libisma no meki taki moro furu sma man libi na so wan fasi taki ogri no sa miti den. A no meki tu taki den man libi koloku. Bijbel e taki na ini Yohanes 17:3 sortu sabi wawan kan du disi. Drape skrifi: „Disi wani taki têgo libi, fu den e teki sabi fu yu, a wan-enkri tru Gado èn fu en di yu seni kon, Yesus Krestes.”

A sabi dati de fu feni na ini Bijbel. Ala di furu sma e taki dati den abi den eigi fasi fa den e prakseri fu Bijbel, toku wan tu sma nomo ondrosuku Bijbel gi densrefi wan leisi kaba. Fa a de nanga yu? A tru taki sma musu du furu muiti fu leisi Bijbel. Ma a abi winimarki. Bijbel na a wan-enkri buku di ’Gado ben meki sma skrifi nanga yepi fu en santa yeye èn a bun fu gi leri, fu piri-ai gi sma, fu poti sani kon reti, fu gi trangaleri ini regtfardikifasi’.—2 Timoteus 3:16.

Dan fa yusrefi kan kon sabi Bijbel? Fu san ede yu no e teki a yepi di Yehovah Kotoigi e gi? Den e leri milyunmilyun sma na ini den eigi oso, sondro taki den sma disi abi fu pai gi dati. Fu man yepi yu nanga disi, dan den Kotoigi e gebroiki difrenti buku di e sori san Bijbel e skrifi, soleki a brochure San Gado e aksi foe wi? A e gi syatu piki tapu furu fu den sani di yu wani aksi kande fu Bijbel, soleki: Suma na Gado? San na a prakseri di Gado abi nanga grontapu? San na a Kownukondre fu Gado? Fa Bijbel kan meki na osofamiri libi fu yu kon moro bun?

Efu yu ben sa wani taki wan fu den Kotoigi fu Yehovah kon na yu oso, dan grantangi skrifi yu nen na tapu a pisi di de na ondrosei fu a papira disi. Den sa prisiri fu leri yu moro fu a tumusi moi Dusun Yari Tiri fu a Kownukondre fu Gado!

□ Mi ben sa wani kisi a brochure San Gado e aksi foe wi?

□ Grantangi kontakti mi fu kisi wan oso-bijbelstudie sondro fu pai gi dati

[Futuwortu]