Go Doro fu Yepi den Sma Di Wani Sabi Moro fu di Den Kisi Kownukondre Nyunsu Nr. 36
1 Yu kaba prati den Kownukondre Nyunsu Nr. 36 di yu kisi? A traktaat disi e poti wan aksi di fiti taki ala sma prakseri fu en: „A Nyun Pisi Ten fu Dusun Yari—San a Tamara Sa Tyari Kon gi Yu?”. Di a yari 2000 ben e kon krosibei, dan den sani di sma ben e fruwakti taki a nyun pisi ten fu dusun yari ben o tyari kon ben difrenti srefisrefi. Kownukondre Nyunsu Nr. 36 e taki fu wan tu fu den sani dati di sma ben e fruwakti èn a e memre wi taki den situwâsi na grontapu no e gi wi no wan reide fu fruwakti wan bun sani. A wan enkri pisi ten fu dusun yari di o tyari vrede nanga seikerfasi kon — wan sani di moro furu sma e suku — na a Dusun Yari Tiri fu Krestes Yesus. Fu di wi e frutrow taki a Kownukondre fu en na wan tru sani, meki wi gi ibri sma di wi man a Kownukondre Nyunsu Nr. 36.
2 Den Sani Di Sma Du fu di Den Kisi Kownukondre Nyunsu: Wi prati Kownukondre Nyunsu wan tu leisi kaba na fesi èn disi ben gi wi furu deki-ati fu go doro nanga wi preikiwroko. A bijkantoro fu Kanada ben skrifi fu Kownukondre Nyunsu Nr. 35: „Preikiman nanga pionier na ini a veld ben horibaka fayafaya gi a spesrutu kotoigiwroko disi, èn den ben nyan bun fu furu ondrofenitori di ben gi den deki-ati.” Sondro tweifri yu ben sori wan srefi sortu faya di yu ben prati Kownukondre Nyunsu Nr. 36.
3 A dei di a kotoigiwroko fu a Kownukondre Nyunsu musu kaba na 17 november 2000. A gemeente fu unu wroko a heri gebied kaba di den kisi fu wroko? Efu dati no de so, dan a kan taki den owruman e aksi unu fu go doro nanga a kotoigiwroko te leki a kaba fu november.
4 Fa den sma na ini unu gebied du te nanga now, te unu e prati Kownukondre Nyunsu Nr. 36? Wan tu sma o poti den nen tapu a pisi fu a traktaat pe den kan skrifi a nen fu den èn den kan seni aksi a San Gado e aksi-brochure noso wan oso-bijbelstudie, noso wan brochure nanga wan oso-bijbelstudie. Ma a no de fu fruwakti taki furu fu den sma di sori biginbigin taki den wani sabi moro fu a pisi ten fu dusun yari, o du wan sani te leki wan Kotoigi fu Yehovah go baka na en. Wi musu go baka na ala den sma di sori taki den wani sabi moro. O ten ben o de wan bun ten fu du dati? Wi musu go baka so esi leki a kan.
5 Luku den ondrofenitori disi di ben kon fu di sma ben go baka pe den ben libi Kownukondre Nyunsu Nr. 35 na baka. Wan pionier na ini Ierland ben libi Kownukondre Nyunsu gi wan basi fu wan restaurant. A boskopu ben naki na ati fu na uma èn a ben aksi a sisa fu kon baka. A no ben kisi tu dei srefi di a sisa ben go baka, èn wan bijbelstudie ben bigin. Na ini Deinsikondre wan preikiman ben poti wan Kownukondre Nyunsu-traktaat na wan oso, ma no wan sma ben de na oso. A srefi dei dati, na uma di ben libi drape ben teki a pisi fu a traktaat pe sma kan skrifi den nen na tapu, èn seni en go na a bijkantoro. Den brada fu a bijkantoro ben seni a papira disi go na a gemeente di e wroko a kontren dati. Bifo a wiki ben tapu, dan tu sisa ben go na en. Wan studie ben seti, èn na uma ben fisiti en fosi konmakandra na a Kownukondre zaal!
6 San Yu Musu Taki te Yu Go Baka: A no de wan tumusi muilek sani fu go baka na sma di yu ben gi Kownukondre Nyunsu. Disi na wan pisi fu wi diniwroko di e gi wi prisiri. Te yu e go baka dan a o de wan koni sani fu tyari wan Kownukondre Nyunsu Nr. 36 na yu, fu di kande na ososma no abi di fu en moro. Kande yu kan pruberi den rai disi.
7 Baka di yu fruteri na ososma agen suma yu de, dan yu kan taki:
◼ „Mi ben libi wan traktaat gi yu di nen ’A Nyun Pisi Ten fu Dusun Yari—San a Tamara Sa Tyari Kon gi Yu?’ A no ben gi yu deki-ati fu leisi taki heri esi a Dusun Yari Tiri fu Krestes Yesus o tyari Paradijs situwâsi kon na grontapu? [Sori den prenki fu a Paradijs na ini Kownukondre Nyunsu Nr. 36.] Na a lasti bladzijde, yu e kisi deki-ati fu seni aksi a brochure di nen San Gado e aksi foe wi?” Sori a sma a brochure, drai go na les 5, leisi a fosi aksi nanga paragraaf 1 nanga 2, èn aksi na ososma fu gi piki. Leisi èn taki fu wan noso tu bijbeltekst. Efu a kan, dan luku wan tra aksi nanga wan tra paragraaf, dan seti sani fu go baka èn go doro nanga a takimakandra.
8 Fu di wi o pristeri a „San Gado e aksi”-brochure noso a „Sabi”-buku na ini november, dan yu kan taki:
◼ „Di mi ben kon na yu no so langa pasa, dan mi ben libi wan traktaat gi yu di nen ’A Nyun Pisi Ten fu Dusun Yari—San a Tamara Sa Tyari Kon gi Yu?’ Na ini a traktaat den e pristeri yu wan oso-bijbelstudie sondro taki yu abi fu pai gi dati. Mi kon baka fu sori yu a yepi sani di wi e gebroiki fu studeri nanga sma. [Sori a San Gado e aksi-brochure, èn go na a bakasei kafti fu en; noso sori a sma a Sabi-buku, èn go na bladzijde 188, 189.] A pisi ten fu Dusun Yari di Bijbel e taki fu en, o tyari situwâsi kon soleki fa yu si na a prenki disi. Fu doro den markitiki fu libi na ini a Paradijs, dan wi musu teki soifri sabi fu Gado. Grantangi meki mi sori yu syatu fa wi e studeri Bijbel nanga sma.”
9 A prati di wi ben prati Kownukondre Nyunsu Nr. 36, gi wi deki-ati fu du moro na ini a diniwroko èn disi meki taki sma kisi wan bigi kotoigi. Kande disi e meki taki furu sma na ini a gebied wani sabi moro. Efu wi e span anu makandra fu yepi sma di wani sabi moro, dan nanga yepi fu Yehovah, wi sa abi leki prisiri bakapisi taki wi feni moro sma di wi kan teki gersi skapu.—Mat. 10:11; Tori. 13:48, 49, 52.