Go baka na den sma di ben abi belangstelling gi a Kownoekondre njoensoe
1 Na ini den lasti wiki wi ben prisiri nanga a grani di wi abi foe prati a Kownoekondre njoensoe nr. 35, di abi a titel „Wan ten sa kon pe ala sma sa lobi makandra?” Na ala presi den preikiman e doe moeiti foe miti, sma di warti en, nanga na eksemplaar disi foe a Kownoekondre njoensoe, so foeroe leki den man (Mat. 10:11). Ala di a kotoigiwroko moesoe kaba tapoe sonde 16 november, tokoe efoe moro gebied de ete di moesoe wroko, dan den owroeman kan aksi joe foe tan prati a Kownoekondre njoensoe nr. 35 so langa leki a gemeente abi den traktaat ete.
2 Na eksemplaar disi foe a Kownoekondre njoensoe wiki a belangstelling foe foeroe sma. Den e si taki moro foeroe libisma no abi natuurlijk firi foe lobi moro èn foe dati ede den e aksi densrefi fa a tamara sa tan (2 Tim. 3:3). Wi wani go baka na den sma pe wi wiki belangstelling.
3 Kownoekondre njoensoe abi boen bakapisi: Na ini a kotoigiwroko foe a Kownoekondre njoensoe foe a jari 1995. Wan oema di ben kisi wan eksemplaar ben kon na wan konmakandra na a Kownoekondre zaal bika a ben wani leri moro foe den sani di Jehovah Kotoigi e bribi. Na a konmakandra dati wantewante a ben teki wan bijbelstudie èn na baka dati pikinmoro noiti a ben misi wan konmakandra. No langa na baka, a ben skrifi go na a kerki pe a ben de fosi foe tapoe nanga a de di a ben de wan memre foe a kerki!
4 Na a momenti disi, hondrohondro sma na ini a gebied leisi a boskopoe na ini a Kownoekondre njoensoe nr. 35 kaba. Ma fa den ben handri na tapoe dati? Srefi efoe den sani di den ben leisi ben abi wan boen krakti na den tapoe, tokoe moro foeroe foe den no sa doe wan sani teleki wan foe den Jehovah Kotoigi go fisiti den baka. Joe e meki plan foe go baka? Te wi e broko wi ede na wan lobi fasi gi a sma na wi sei, dan dati moesoe boeweigi wi foe doe dati. Wi moesoe fisiti ala sma baka di abi belangstelling gi a Kownoekondre njoensoe.
5 San joe sa taki te joe go baka? Joe ben sa kan taki wan toe sani foe a fiti di a boskopoe na ini a Kownoekondre njoensoe e fiti a ten foe wi èn dan poti wan aksi di e poti sma na prakseri. Arki heri boen te na ososma e taki fa a e firi so taki joe kan sabi san a e denki. Poti prakseri dan na tapoe wan boen penti na ini a San Gado e aksi-brochure, di ben de na ini a Kownoekondre njoensoe. Efoe a sma e handri na wan boen fasi, dan proeberi foe bigin wan bijbelstudie wantewante.
6 Djaso na wan toe pristeri di joe ben sa kan proeberi te joe e go baka na den sma di ben abi belangstelling gi a „Kownoekondre njoensoe” nr. 35:
◼ „Kande joe e memre a traktaat nanga bodoi di mi ben libi gi joe no so langa pasa. A boskopoe foe en e taki foe wan prenspari penti di e prati libisma na ini a ten disi—a lobi di sma no lobi makandra.” Poti prakseri na tapoe den boeweisi di gi na tapoe bladzijde 2 foe a Kownoekondre njoensoe na ondro na edeprakseri „Lobi gi sma na wi sei kon kowroe”. Aksi baka dati, „Joe denki taki a ben de a prakseri foe Gado taki libisma moesoe libi na a fasi disi?” Gi okasi foe piki. Go na lès 5 na ini a San Gado e aksi-brochure, èn proeberi foe bigin wan bijbelstudie.
◼ „Di wi ben miti a fosi leisi, mi ben libi wan traktaat gi joe nanga a tori ’Wan ten sa kon pe ala sma sa lobi makandra?’ Joe denki taki so wan grontapoe kan de?” Gi okasi foe piki. Go na lès 6 na ini a San Gado e aksi-brochure, èn leisi paragraaf 6. Dan leisi a pramisi foe Gado na ini Mika 4:3, 4. Efoe a gersi taki na ososma abi belangstelling, pristeri a brochure èn wan studie.
◼ „Di mi ben fisiti joe a lasti leisi, mi ben libi wan traktaat gi joe di abi a titel ’Wan ten sa kon pe ala sma sa lobi makandra?’ A ben abi wan pristeri na ini gi wan fri oso-bijbelstudie. Mi kon baka foe sori joe a sani di wi e gebroiki foe studeri. [Sori a Sabi-boekoe.] A boekoe disi e froeklari finifini oten ala sma sa lobi makandra, èn a e gi piki na tapoe tra aksi di kande joe e aksi joesrefi: Foe san ede wi e kon owroe èn dede? Foe san ede Gado e gi pasi meki pina de? San e pasa nanga den lobiwan foe wi di dede? Aksi baka dati: „Mi mag sori joe fa wi e studeri en?” Te na ososma no wani, dan aksi en efoe a ben sa wani leisi a boekoe ensrefi. Efoe a wani, dan gi en wan eksemplaar èn aksi a bijdrage foe a boekoe. Meki plan foe go baka.
7 Te wi kaba wroko a heri gebied finifini nanga a Kownoekondre njoensoe nr. 35, dan wi kan pristeri a Sabi-boekoe na ini a pisi foe a moen di tan abra. Na tapoe a lasti bladzijde foe Wi Kownoekondre Dienst foe december 1995; maart, juni, nanga november 1996; nanga juni 1997, joe kan feni nofo fasi fa foe pristeri a boekoe disi.
8 A spesroetoe wroko disi foe prati Kownoekondre njoensoe moesoe boeweigi wi alamala foe doe moro moeiti na ini a preikiwroko. Nanga a jepi foe Jehovah wi kan abi a froetrow taki seiker a kotoigiwroko disi sa abi boen bakapisi, so taki sma kan si a prakseri foe Gado taki a heri libisma famiri moesoe lobi makandra. Meki Jehovah tan blesi den fajafaja moeiti di wi e doe te wi e go baka na den sma di ben abi belangstelling gi a Kownoekondre njoensoe.