Sori sma fa den kan kisi wini fu den sani di yu e taki

AWANSI yu e taki nanga wán sma nomo noso nanga wan bigi grupu sma, toku a no de wan koni sani fu denki taki den arkiman fu yu sa wani sabi moro fu a tori, soso fu di yusrefi lobi a tori. A boskopu fu yu de prenspari, ma efu yu no man sori sma fa den kan gebroiki a tori bun, dan kande yu no sa man meki den tan arki yu.

Disi e pasa srefi nanga den sma di e arki wi na ini a Kownukondre zaal. Den kan arki te yu e fruteri wan agersitori noso wan ondrofenitori di den no ben yere ete. Ma a kan taki den no sa arki yu moro te yu e taki fu sani di den sabi kaba, spesrutu te yu no e go doro fu taki moro fini fu den tori disi. Yu musu yepi den fu si fu san ede den sani di yu e taki na trutru bun sani gi den èn fa den kan gebroiki a rai fu yu bun.

Bijbel e gi wi deki-ati fu prakseri fu sani di kan gi wi winimarki na ini wi libi (Odo 3:21). Yehovah ben gebroiki Yohanes a Dopuman fu yepi sma „kisi a koni fu den regtfardiki sma” (Luk. 1:17). Sma kan kisi a koni disi, te den abi a yoisti sortu frede gi Yehovah (Ps. 111:10). Den wan di e warderi en taki den kisi a koni disi, e kon sabi san den musu du fu meki sani waka bun na ini den libi now. Den e kisi yepi sosrefi fu grabu a trutru libi èn fu hori en steifi, èn dati na a têgo libi di e kon.​—1 Tim. 4:8; 6:19.

Taki sani na ini yu lezing di tra sma man gebroiki bun. Efu yu wani taki sma musu kisi wini fu den sani di yu e taki na ini yu lezing, dan yu musu prakseri bun fu den tori di yu sa taki, èn yu musu prakseri sosrefi suma na den sma di o arki yu. No si den arkiman leki wan grupu sma nomo. A grupu dati abi ala sortu sma na ini èn a abi osofamiri srefi na ini. Kande pikin-nengre de na ini a grupu, noso kande yonguwan, bigisma, nanga wan tu owru sma. Kande wan tu nyun sma de drape di wani sabi moro, èn sosrefi sma di bigin dini Yehovah fosi yu gebore srefi. Son sma di de drape kan de lepi sma na yeye fasi. Trawan baka kande e hori tranga ete na wan tu gwenti fu a grontapu. Aksi yusrefi: ’Fa a tori di mi sa taki, sa gi den arkiman wini? Fa mi kan yepi den fu frustan a tori?’ Kande yu wani poti prakseri na wán noso tu fu den grupu fu sma di wi kari dyaso. Ma toku yu no musu frigiti den tra sma di de na ini a grupu tu.

San yu kan du efu yu musu taki fu wan prenspari Bijbel leri? Fa yu kan meki den arkiman nyan bun fu a lezing fu yu, awansi den e bribi a leri disi kaba? Meki muiti fu tranga a bribi di den abi na ini a leri disi. Fa yu kan du dati? Fu di yu e taki-go-taki-kon nanga den fu den bijbeltekst di e horibaka gi a leri disi. Yu kan meki den kisi moro warderi tu gi a Bijbel leri dati. Disi yu kan du fu di yu e sori den fa a leri disi de soifri leki tra tru Bijbel tori èn fa a de soifri leki fa Yehovah srefi de. Gebroiki eksempre, efu a kan ondrofenitori di pasa trutru, fu sori fa sma kisi wini fu di den kon frustan a leri disi. Sori tu fa disi kenki a fasi fa den ben denki fu a tamara.

A no soso na a kaba fu yu lezing yu musu fruteri syatu fa den arkiman kan gebroiki den sani di yu taki. Na a bigin fu yu lezing kaba, ibriwan fu den arkiman musu firi taki „disi abi fu du nanga mi”. Te yu du dati, dan go doro fu sori den arkiman fa den kan gebroiki den sani di yu e taki. Du dati te yu e taki fu den moro prenspari penti na ini yu lezing èn du dati sosrefi na a kaba fu yu lezing.

Te yu e sori sma fa den kan gebroiki den sani di yu e fruteri den, dan sorgu taki a de soifri leki fa Bijbel gronprakseri e sori wi. San dati wani taki? Dati wani taki dati yu musu du en na wan lobi-ati fasi èn na wan fasi di e sori taki yu e frustan fa trawan e firi (1 Petr. 3:8; 1 Yoh. 4:8). Srefi di na apostel Paulus ben taki fu muilek problema na ini Tesalonika, toku a ben sorgu taki a ben poti krakti tapu den bun sani di den Kresten brada nanga sisa du drape fu di den go na fesi na yeye fasi. A taki tu dati a ben de seiker taki na ini a tori di a ben taki nanga den, den ben sa wani du san reti (1 Tes. 4:1-12). Dati na trutru wan moi eksempre di wi kan waka na baka!

San yu wani du nanga yu lezing? Yu wani gi den arkiman deki-ati fu du moro na ini a preikiwroko èn na ini a wroko fu leri trawan a bun nyunsu? Dan meki den kisi faya gi a wroko disi èn meki den warderi en. Ma te yu e du disi, dan hori na prakseri taki a no ala sma man du a srefi na ini a wroko disi, èn Bijbel e taki fu disi tu (Mat. 13:23). No meki yu brada firi brokosaka, fu di yu e sori den soso tapu den fowtu fu den. Hebrewsma 10:24 e gi wi deki-ati fu „tranga makandra fu sori lobi èn fu du bun wroko”. Efu wi e tranga wi arkiman fu sori lobi, dan den sa du a wroko fu den nanga lobi. Na presi fu yu taki leki wan basi fu sori taki ala sma musu du a srefi sani, dan yu musu sabi taki Yehovah wani taki wi e gi trawan deki-ati fu „gi yesi nanga yepi fu bribi” (Rom. 16:26). Nanga disi na prakseri wi wani tranga wi eigi bribi èn sosrefi di fu wi brada.

Yepi trawan fu si fa den kan gebroiki den sani di yu e taki. Te yu e preiki gi tra sma, dan sorgu taki yu e sori den taki den kan kisi furu wini fu a bun nyunsu. Efu yu wani du dati, dan yu musu prakseri fu san den sma e denki di e libi na ini a kontren fu yu. Fa yu kan kon sabi dati? Arki a nyunsu tapu radio nanga telefisi. Luku a nyunsu na tapu a fosi bladzijde fu a koranti. Sosrefi, te yu e taki nanga tra sma, dan pruberi fu meki den sma dati taki tu, èn arki bun te den e taki. Kande yu o si taki den e feti nanga hebi problema di den musu lusu wantewante. A problema dati kan de taki den lasi den wroko, den musu pai yuru-oso, den siki, wan famiriman fu den dede, noso den kisi fu du nanga ogridu. A kan tu taki wan basi no du reti na den, taki den broko trow, taki den abi problema fu kweki den yongu pikin, èn so moro fara. Yu denki taki Bijbel kan yepi den? Dati de so srefisrefi.

Te yu o bigin taki nanga wan sma, dan kande yu sa abi wan tori na prakseri kaba fu san yu wani taki. Ma efu yu e si taki a sma abi wan tra tori di a wani taki fu en wantewante, dan efu a kan, no draidrai fu taki a tori dati nanga en. Efu yu no man taki fu a tori na a momenti dati, dan taigi a sma taki yu wani kon baka fu sori en wan tu sani di kan yepi en. A no de fu taki dati wi no wani ’bumui nanga sani di a no wi tori’, ma na a tra sei wi breiti fu gi trawan bun rai fu Bijbel di den kan gebroiki na ini den libi (2 Tes. 3:11). Fu tru, a sani di trutru o naki na ati fu sma na te den e kisi rai fu Bijbel di den kan gebroiki na ini den eigi libi.

Efu sma no man si fa a boskopu fu wi abi fu du nanga den, dan den kan tapu a takimakandra wantewante. Srefi efu den e meki wi taki go doro, toku efu wi no e sori den fa den kan gebroiki a tori di wi e taki nanga den, dan a boskopu fu wi no sa abi furu krakti tapu den libi. Ma sani sa waka heri tra fasi, efu wi e sori sma krin fa den kan gebroiki a boskopu fu wi na ini den eigi libi. Efu wi e du dati, dan a takimakandra di wi ben abi nanga den, kan meki taki den e tyari kenki kon na ini den libi.

Te yu e hori bijbelstudie, dan go doro fu sori den studenti fa den kan gebroiki den sani di den e leri (Odo 4:7). Yepi den studenti fu frustan den rai di komoto fu Bijbel, èn yepi den sosrefi fu frustan den gronprakseri nanga eksempre di e sori den fa den musu waka na tapu den pasi fu Yehovah. Poti krakti tapu den winimarki di den sa kisi te den e du dati (Yes. 48:17, 18). Disi sa gi den studenti deki-ati fu tyari kenki kon na ini den libi te dati de fanowdu. Meki den leri fu lobi Yehovah èn meki den kisi a firi fu wani plisi en. Yepi den fu teki den rai fu Gado èn fu du san en Wortu e taki, ma gi den deki-ati fu du dati nanga den heri ati.