Na benawtoe foe Jakob en na njoen verbontoe foe Gado
„Mi sa sroto seker wan njoen verbontoe nanga na oso foe Israël en nanga na oso foe Juda.” — Jer. 31:31.
1, 2. Sortoe rol Jakob nanga Rachel e pré ini na tori foe na naatsi Israël? (b) Sortoe pina di no ben abi hen speri ben taki na fesi gi Jakob?
JAKOB nanga Rachel ben lobi makandra toemsi. Jakob di ben kon de bekenti leki Israël, ben tron na papa foe na twarfoe-lo-naatsi Israël. Rachel, na oema di a ben lobi toemsi, ben tron na mama foe na lo Benjamin. Na lo Juda ben komoto foe na oema foe Jakob di a no ben lobi so meni, Lea. Na nen Jakob ben tron soboen na marki foe na heri naatsi, ala di Rachel ben de na marki foe den respeki mama ini Israël. Gi Jakob ben taki na fesi benawtoe, di te leki dati ten ben de sondro hen speri, en Rachel ben sa ondrofeni den sari bakapisi foe dati. Nanga na hen fesi, dati so wan benawtoe ben sa kon ini hen ten, meki santa jeje ben meki Jeremia, di ben libi ini Anathoth ini na gebied foe Benjamin, taki:
2 „Heloe! Bikasi na dé dati de bigi, sodati no wan trawan de leki hen (ini na historia na fesi), en a de na ten foe benawtoe gi Jakob. Ma srefi foe dati a sa kisi jepi.” — Jer. 30:7.
3. (a) Foe sortoe situatie Rachel ben sa kré sondro dati joe ben kan trowstoe hen? (b) Oten na ten foe benawtoe ben kon gi Jakob?
3 San na toemsi moeiliki ’ten disi foe benawtoe gi Jakob’ ben wani taki gi na agersi Rachel, ben taki na a fasi disi na fesi: „Ini Rama (wan foto ini na gebied foe Benjamin) wan sten de foe jere, wan sarikré en bita kré; Rachel e kré foe hen manpikin. A ben wégri foe den trowstoe hen foe hen manpikin, foedi den no de moro.” Disi no ben wani taki dati den ben dede, ma dati den ben kisi den en ben tjari den gwe leki katiboman komoto foe den égi kondre go na wan féjanti kondre. O ja! Baka di den Babylon winiman ben lontoe na foto Jeruzalem ini wan pisiten foe tina-aiti moen dan na foto Jeruzalem di ben didon ini na nordsé krosibé foe na grens mindri na gebied foe Juda nanga di foe Benjamin, ben broko krin krin, en den ben kisi na kownoe, den granman nanga den priester en na moro bigi pisi foe den wan di ben tan na libi ben tjari go na ini katibo ini Babylon. Na a mindri foe na di foe sébi moenkenki-moen (Tisjri) foe 607 bifo G.T. dan ooktoe den wawan-toe djoe di ben tan na baka ben libi na kondre, sodati na heri kondre foe na kownoekondre Juda, ben tan na baka sondro libisoema nanga osometi. Na toestand disi foe na kondre sondro dati wan soema ben libi na ini, ben sa tan sébi tenti jari langa soleki Gado ben komanderi.
4. Oten Jakob ben sa „kisi jepi” komoto foe na benawtoe disi di ben taki na fesi?
4 Fa dati ben de wan „ten foe benawtoe” gi Jakob! A no ben tan fri foe dati; a no ben kan lon komoto foe dati en pas baka den sébi tenti jari foe troe troe pori foe na kondre, Gado ben sa meki den trowstoe wortoe kon troe di a ben taki moro fara: „Ma srefi foe dati a sa kisi jepi” (Jer. 30:7). Fa na jepi disi ben sa tjari kon?
5. San Jehovah ben taki foe trowstoe Rachel, en fa a ben meki na pramisi foe hen kon troe?
5 Jehovah ben go moro dipi tapoe na tori disi, baka di a ben taki na fesi na lasi di Rachel ben sa lasi hen manpikin, a ben taki den wortoe disi moro fara: „Disi Jehovah ben taki: ’„Meki joe sten tapoe foe kré en joe ai foe watra-ai, bikasi wan paiman de foe na activiteit foe joe”, so Jehovah de taki, „en den (den manpikin foe joe) seker sa drai baka foe na kondre foe na féjanti”’” (Jer. 31:16). Na „kondre foe na féjanti” ben de Babylon (Micha 7:8-10). Soboen, na hori di Babylon ben hori den manpikin foe Rachel ben sa moe broko. Gado ben gi Rachel di ben sari toemsi na korostoe sekerfasi tapoe na punt disi: „’En wan howpoe de gi na ten di e kon gi joe, so Jehovah de taki, ’en den manpikin seker sa go baka na den égi gebied’” (Jer. 31:17). Foe sensi 537 bifo G.T. na drai baka go na den égi gebied, pe joe ben abi na ini Rama, ben feni presi en disi ben meki den féjanti naatsi di no ben bribi, froewondroe (Neh. 7:30; 11:31-33). Fa Jehovah ben meki den kon „boen baka” tapoe wan wondroe fasi, baka di ini 607 bifo G.T. so wan benawtoe nationaal „mankeri” ben pasa!
6. Fa Jehovah ben sa tjari wan kenki kon gi Sion ofoe Jeruzalem, di a ben dresi den „wipi” foe hen, sodati a no ben de moro langa wan oema di den ben jagi en di no wan man ben soekoe?
6 A ben taki foe disi: „’Bikasi mi sa meki na kon boen baka foe joe kon, en foe den wipi foe joe mi sa dresi joe’, so Jehovah de taki. „Bikasi wan oema di den ben jagi gwe den ben kari joe: „Dati de Sion, di no wan soema e soekoe.” Disi Jehovah ben taki: ’Loekoe mi e tjari kon makandra den katiboman foe den tenti foe Jakob, en mi sa poti wan ai tapoe den tabernakel foe den. En na foto (Sion ofoe Jeruzalem) sa bow kon boen baka troe troe tapoe na pikin bergi foe hen; en tapoe hen presi na libitoren sa didon ooktoe. En komoto foe hen seker tangi sa kon en na babari foe den di e lafoe.’” — Jer. 30:17-19.
7. Fa wi kan si foe den wortoe dati foe Jehovah ofoe na a ten foe den „wipi” wan kaba ben sa kon na a Wetferbontoe, ma fa na djoe pipel ben doe nanga na verbontoe?
7 Jehovah de wan „kolokoe Gado”, en a wani dati den soema di de ini wan verbontoe nanga hen, de ooktoe kolokoe. Hen de wan soema di e lafoe. Na pramisi foe hen, dati na djoe pipel ben sa lafoe ini na ten di e kon, ben sori dati a no ben meki wan kaba kon na a wetverbontoe, di na proféti Mozes ben opo doe wroko leki mindriman foe Hen nanga na naatsi Israël. Ma ai, fa den Israëlsoema foe den sé ben pasa den wetti foe na verbontoe dati! „Moro fara”, so Jehovah ben taki gi den, den bow den hé presi foe Baäl di de ini na lagiprési foe na manpikin foe Hinnom (na zuidsé foe na tempel foe Jeruzalem), foe meki den manpikin nanga oemapikin foe den (leki libisoema ofrandi), go ini na faja gi Molech, wan sani di mi no ben gi den komando en ooktoe disi no ben kon ini mi ati foe doe na tegoe sani disi, foe meki Juda (na kownoe kondre) sondoe.” — Jer. 32:35.
8. Baka sortoe ondrofeni di den Israëlsoema verdini den ben sa tron wan pipel gi Jehovah?
8 Foe den reden disi den Israëlsoema ben verdini hen dati moeilijkheid ben kon na den tapoe leki wan bigi winti, di no wan sani kan tanapoe na hen fesi. Ma baka di a taki disi na fesi, na sari-ati Jehovah ben go moro fara foe taki: „’Ini na ten dati (foe na kon boen baka foe Israël)’, so Jehovah taki, ’mi sa tron Gado gi ala den famiri foe Israël; en foe taki foe den sé, den sa tron mi pipel.’” Jer. 30:23 te nanga 31:1.
9, 10. San Jehovah ben sa poti njoen baka ini na ati foe den Israëlsoema di ben tjari kon njoen baka na makandra, sodati den ben kan tan ini wan kolokoe matifasi nanga hen foe tégo en sortoe krakti disi ben sa abi?
9 Winsi fa na fositen historia foe den no ben de so wan switi wan, tog Gado ben sa handri nanga den tapoe na gron foe san den ben de now. A ben sa soekoe na tanboen foe den en a ben sa gi den na okasi foe kon ini wan kolokoe matifasi nanga hen te leki ten di no ben abi marki. A ben taki foe dati:
10 „Loekoe, mi e tjari den kon makandra foe ala den kondre pe mi ben drifi den go ini mi faja-ati, en ini mi hebi atibron, en ini mi bigi mandi, en mi wani tjari den kon baka ini disi presi, en meki den libi ini sekerfasi. En den sa tron seker na pipel foe mi, en misrefi sa tron na Gado foe den. En mi wani gi den wan ati en wan pasi, foe frede mi alaten, gi na boen foe den nanga den manpikin foe den. En mi wani sroto wan verbontoe nanga den di e tan foe ten di no abi marki, en mi no sa poeroe misrefi na den baka foe doe den boen, en na frede foe mi, mi sa poti ini na ati foe den, sodati den no sa drifi komoto foe mi. En mi wani abi toemsi bigi prisiri nanga den foe doe den boen, en mi wani prani den ini waarheidgetrouwheid ini na kondre disi, nanga mi heri ati en nanga mi heri sili.” — Jer. 32:37-43; ooktoe 31:27-30.
WAN MORO BETRE VERBONTOE
11, 12. (a) O langa Jeruzalem ben tan baka so wan boen njoen bigin en foe sainde wi no kan soekoe na fowtoe na Jehovah? (b) Na pori foe Jeruzalem ben poeroe na Wetverbontoe, en san Jehovah ben sori foedi a ben tjari hen pipel kon poti baka ini na kondre foe den?
11 Fa a doe kon, dati na Jeruzalem di ben bow kon boen baka en di ben kisi so wan boen njoen bigin, ben tan soso 606 jari ofoe te nanga na dréten foe 70 G.T.? Efoe wi loekoe den wortoe dja na fesi, pe Jehovah ben agri foe jepi hen pipel, dan wi no kan soekoe na fowtoe kwet-kweti na hen. A no ben de kwet-kweti fowtoe di ben meki na a sé foe hen, dati a ben de fanowdoe foe sroto wan njoen verbontoe. En tog a ben meki bekenti nanga mofo foe Jeremia, dati a ben sa sroto wan njoen en betre verbontoe. Boiti dati, na Israël na skinfasi ben kan njan boen foe dati leki na fosi wan!
12 Ini 1513 bifo G.T. Jehovah ben sroto wan Wetverbontoe nanga Israël nanga Mozes leki mindri-man. Dati ben de 906 jari bifo Jehovah ben gebroiki Nebukadnezar, na kownoe foe Babylon, foe pori Jeruzalem nanga hen tempel. Ma dati no ben meki na Wetverbontoe foe hen nanga Israël leki wan sani di no abi waarde. Soboen, Jehovah no ben abi ete wan verbontoe fanowdoe foe dresi na mankeri foe den djoe, foedi a ben sa verloesoe den komoto foe na kondre foe na fejanti Babylon en poti den baka ini na égi kondre foe den di Gado ben gi den. Foedi hen doe disi, a ben sori agen dati a ben de na Gado foe den en a ben gi den na djaranti dati den ben de ete na pipel foe hen en dati Sion ofoe Jeruzalem, no de moro langa leki „wan oema di den jagi gwe” en di no wan soema e soekoe moro langa.
13, 14. Fa den Israëlsoema di ben tan na libi foe na fet’owroe foe den winiman, ben kon ini wan „sabana”-toestand, en pe den ben soekoe rostoe? (b) O bigi na lobi ben de di Jehovah ben sori gi Israël, en sortoe égifasi Jehovah ben sori di a ben hari den kon baka na hen?
13 Jehovah ben poti ini hen prakseri foe gi wan demonstratie di pasa ala trawan foe na lobi boen-ati-fasi foe hen gi na verbontoe-pipel foe hen. Foe datede a no ben gi pasi dati den ben slagti den krin krin nanga jepi foe na fet’owroe foe den winiman foe den. Soema ben sa tan na libi. Na libi ini wan féjanti kondre ini katibo ben sa wani taki a srefi gi den leki libi ini tenti ini wan sabana pe den no e feni troe troe rostoe, foedi den no de ini na égi kondre foe den, na kondre di Gado ben gi den. Te den ben go na hen nanga berouw ini so wan „sabana”-toestand, den ben sa feni boen-ati na hen, foedi a no ben broko hen verbontoe nanga den. Na kolokoe bakapisi a ben taki na fesi so:
14 „’Na pipel di abi soema na ini di tan na libi foe na fet’owroe ben feni boen-ati ini na sabana, di Israël ben komoto foe kisi hen rostoe (ini hen tatakondre Palestina).’ Foe farawe Jehovah ben kon sori hensrefi gi mi, taki: ’En nanga wan lobi foe ten di no abi marki, mi ben lobi joe. Foe dat-ede mi ben hari joe kon nanga lobi boen-ati-fasi. Ete mi sa bow joe baka, en troe troe joe sa bow kon boen baka, o wendje foe Israël. Joe sa prodo moi nanga joe dron en go na doro ini na dansi foe den di e lafoe. Joe sa prani froktoe-djari ete tapoe den bergi foe Samaria (di ben didon fositen ini na gebied foe na nordsé kownoe-kondre Israël). Den gronman sa prani troe troe en njan na froktoe. Bikasi wan dé de dati den post foe wakti ini na bergikondre Efraïm (na moro prenspari lo foe na nordsé kownoekondre Israël) sa bari troe troe: „Opo, en meki wi go na Sion (Jeruzalem), na Jehovah, wi Gado.”’” — Jer. 31:2-9.
15, 16. (a) Pe ala den twarfoe lo ben sa bigin njoen na aanbegi foe den gi Jehovah, leki fa na profétitori di wi kari dja? (b) San a ben sa sroto bakaten nanga na oso foe Israël en nanga sortoe bakapisi gi na pipel foe hen?
15 Ah, ja, ala lo foe zuidsé nanga nordsé foe Israël ben sa tjari kon baka na makandra en den ben sa kon de wan baka foe aanbegi Jehovah ini Sion! Disi ben wani taki dati Jakob (ala twarfoe lo foe Israël) ben sa kisi jepi komoto foe na „ten foe benawtoe” foe na lobi foe Gado di e tan te ten di no abi marki en na benawtoe foe Jakob ben doro hen hémarki nanga na pori foe Jeruzalem nanga Juda ini 607 bifo G.T. (Jer. 30:7). Ma srefi bifo na „benawtoe dati” ben kon, dan na lobi boen-ati-fasi foe Jehovah ben troesoe hen foe taki na fesi wan moro froewondroe sani dan soso na kon makandra baka foe hen katibo pipel:
16 „’Loekoe! Dé e kon’, so Jehovah e taki, ’en mi sa meki seker wan njoen verbontoe nanga na oso foe Israël en nanga na oso foe Juda; a no sa de leki na verbontoe di mi ben meki nanga den fositen papa foe den tapoe na dé dati mi ben teki den anoe foe tjari den komoto foe na kondre Egypte, „en na verbontoe dati foe mi densrefi ben broko, aladi misrefi ben abi den leki trowmasra ini goedoe”’ so Jehovah taki. ’Bikasi disi de na verbontoe di mi sa meki baka den dé dati nanga na oso foe Israël’, so Jehovah taki. ’Mi wani poti mi wet ini na inisé foe den, en ini na ati foe den mi sa skrifi den. En mi wani tron na Gado foe den en den sa tron na pipel foe mi.’ ’En den no sa leri ibriwan foe den na kompe foe den en leri ibriwan foe den hen brada, taki: „Sabi Jehovah!” bikasi den alamala sa sabi mi, foe na moro pikin wan go miti srefi na moro bigi wan na den mindri’, so Jehovah taki. ’Bikasi mi sa pardon den sondoe, en na sondoe foe den mi no sa memre moro.’” — Jer. 31:31-34.
WAN NJOEN MINDRIMAN DE FANOWDOE
17. Foe sainde wi moe abi te now ete belangstelling gi na njoen verbontoe en o langa pasa kaba na Wetverbontoe ben kon owroe, sodati ibri momenti a ben kan komoto na pasi?
17 Wi abi nownow belangstelling foe na njoen verbontoe dati? Disi moe de so, bikasi a abi krakti te now ete. Ma tapoe sortoe soema a abi krakti te now ete? Den miljoen miljoen djoe tapoe heri grontapoe no abi reti foe taki dati a abi krakti tapoe den. Den e bribi dati te now ete den de ondro na verbontoe di ben meki nanga den fositen papa foe den na a bergi Sinaï. Dati ben pasa moro leki 3490 jari pasa kaba! Moro leki 2580 jari Jehovah ben taki nanga mofo foe Jeremia hen pramisi foe wan njoen verbontoe. Efoe den djoe abi leti, foe sainde Gado ben wakti dan so langa foe meki na njoen verbontoe kisi krakti? Ja so wan 1900 jari kaba na djoe Wetverbontoe ben owroe, sodati a ben moe komoto na pasi foe meki presi gi wan njoen verbontoe. Disi ben pasa troe troe?
18. (a) San na pramisi foe Gado tapoe a tori foe wan njoen verbontoe ben sori foe na Wetverbontoe? (b) Fa na naatsi Israël ben kisi na Wet dati?
18 Tapoe na punt disi wan djoe studenti, di ben kisi leri ini Jeruzalem foe na barinen Fariséman Gamaliël, taki: „Te a de taki ’wan njoen verbontoe’, dan a taki dati na fositen wan kon owroe. We, san meki kon owroe en e owroe, de na pasi foe komoto na pasi” (Hebr. 8:13; 2 Kor. 3:14). Na djoe skrifiman ben skrifi den wortoe dati ini na jari 61 G.T. gi djoe-soema di ben teki na kristendom ini Jeruzalem. Ini wan brifi fesi disi gi kristen gemeente ini na Romein district Galatia a ben skrifi: „Sortoe prakseri na Wet e dini? A ben poti na tapoe (na a verbontoe nanga Abraham foe wan SIRI) foe tjari sondoe (foe soema) kon na krin te leki na Siri (foe Abraham) ben sa kon, di ben kisi na pramisi en a ben tjari kon abra nanga jepi foe engel ini anoe foe wan mindriman.” — Gal. 3:19.
19. Foedi na Wetverbontoe ben abi Mozes leki mindriman, san dati e bewijsi foe na njoen verbontoe, di ben sroto ooktoe mindri Gado nanga libisoema?
19 Na mindriman di no kari na nen ben de Mozes. We, efoe foe na sroto foe na owroe Wetverbontoe a ben de fanowdoe, dati a ben doe wroko leki mindriman na mindri Gado nanga onvolmaakti sondoe soema, dan foe na sroto foe na njoen verbontoe mindri Gado nanga libisoema wan mindriman seker de fanowdoe, winsi Jeremia 31:31-34 no e kari hen na nen. Ini na ten foe Jeremia Mozes ben dede langaten kaba. Foedi a ben doe wroko leki mindriman, dan na Wet foe na owroe verbontoe ben kon nen na „wet foe Mozes”. — Tori foe den Apostel 15:5.
20, 21. (a) Di Gado ben taki na fesi foe na njoen verbontoe, fa a ben sori dati a ben sa de moro hé leki na verbontoe na fesi? (b) San Gado ben sa meki den Israël verbontoeman tron efoe den ben (...)?
20 Foedi na njoen verbontoe ben de wan toemsi hé verbontoe, dan wan mindriman ben de fanowdoe di ben de moro hé leki Mozes. Meki wi poti prakseri now fa na Soema ini hemel di gi na njoen verbontoe ben sori dati a hé moro na verbontoe na fesi. A de taki foe na verbontoe leki wan verbontoe „di no de a srefi leki na verbontoe di mi ben sroto nanga den fositen papa foe den tapoe na dé dati mi ben teki den na anoe foe tjari den komoto foe Egypte, ’na verbontoe foe mi di densrefi ben broko, aladi mi ben abi den ini goedoe leki wan trowmasra’” (Jer. 31:32). Nanga jepi foe na verbontoe, di a ben sroto nanga den Israëlsoema baka di a ben tjari den komoto foe Egypte, Gado ben abi na prakseri foe meki den wan bigi sani. Foe datede meki a ben taigi den:
21 „Efoe oen sa jere mi sten soifri en sa hori troe troe na verbontoe foe mi, (San dan?), dan foe ala volkoe oen sa tron troe troe mi spesroetoe goedoe, bikasi na heri grontapoe na foe mi. En oenoe sa tron gi mi wan kownoekondre foe priester nanga wan santa naatsi.” — Ex. 19:5, 6.
22. (a) O sortoe rigeri so wan „kownoekondre foe priester” ben sa de, en gi sortoe sani a ben sa de boen? (b) Na „spesroetoe goedoe” foe soema na „santa naatsi” dati ben sa de, en ini sortoe matifasi a ben sa de nanga hen?
22 Den wortoe „wan kownoekondre foe priester” e sori troe troe tapoe wan rigeri, di boen srefi srefi foe sorgoe foe den fanowdoe foe na heri libisoema-famiri. Den priester foe hen e teki presi foe Gado en e dini hen, na Jepiman foe libisoema. Tapoe hensrefi, na „kownoekondre foe priester”, de wan „naatsi”, wan nationale groepoe di krin nofo foe joe kari den „santa” en di de boen nofo foe Gado gebroiki den. Gado ben teki na naatsi disi poeroe foe ala tra naatsi tapoe grontapoe. Na prakseri de foe a tron na „spesroetoe goedoe” foe Gado, soleki wan trow oema de na spesroetoe goedoe foe na man foe hen. Gado ben agersi den Israëlsoema di a ben pai fri ini owroeten srefi nanga wan nationale trow-oema nanga di a taki, dati a ben „abi den leki trow-masra ini goedoe”. Ma na presi foe a ben sori oemasoema sakafasi gi hen, foe di a ben hori na santa verbontoe foe hen, a no ben loekoe na wan ai na spesroetoe verplegti foe na spesroetoe matifasi disi (Jer. 3:1-3, 20). A ben verdini hen dati Gado ben tjari kon na wan kaba na trow foe hen nanga jepi foe wan brokotrow!
23. Na Wetverbontoe foe Mozes ben doro na marki foe hen, en san Gado ben doe nanga na toemsi boen rigeri gi libisoema?
23 Foe na bakaten historia foe na owroe verbontoe-pipel foe Jehovah Gado, wi sabi dati kenki di e tan no ben kon ini na situatie foe den. Dati na Wetverbontoe, di Mozes ben doe wroko gi leki wan mindriman, no ben sori na marki foe hen, soboen wi no kan stré. Foe dat-ede fa wi kan prisiri, dati Gado no ben weri foe seti sani gi na boen foe na „kownoekondre foe priester”! Foe na toemsi boen rigeri disi, a ben poti ini na presi foe na owroe verbontoe wan moro betre verbontoe.