Den di lobi Gado e teki wan bosroiti . . .
1. Sortoe warskow Jehovah Kotoigi e meki sma jere èn foe sanede?
Moro leki wan ondro jari kaba, Jehovah Gado nanga jepi foe en kotoigi ben meki sma jere na warskow dati na grontapoe disi ofoe na seti foe sani disi, no kan tan. Nanga firi gi sma na wi sé foe sortoe naatsi, lo, pipel ofoe tongo toe, dan lobi foe Gado e bewégi wi foe sori sma tapoe a pasi foe Gado leki na wan enkri loesoe gi den problema foe na libisma-famiri.
2. Sortoe sani ben go fowtoe ini na grontapoe?
2 San wi e si, now di wi kon ini den jari aiti-tenti, leki wan bakapisi foe na sani dati aparti soema nanga naatsi e poti na wan sé ofoe de tjalansi na pasi foe Gado èn e feti baka den égi libifasi foe égi-tiri ofoe wan égi onafhankelijk libi nanga waka? Alape sma ini frantwortoe positie e taki nanga koesoemi dati na grontapoe lasi a pasi di a de go èn de ini wan toestand foe broeja. Èn a no de wan froewondroe sani — someni sani ben go fowtoe. Tapoe kontren foe vervoer, communicatie, datra-wroko, wetenschap nanga technologie, difrenti sani di wan dé sma ben si leki owpoe ofoe wan bresi, ben pori den froewakti èn ben tjari srefi dede kon. Na disiten libisma-libimakandra e kisi ipi-ipi problema di gersi dati a no e kaba — kiri, bidrigi-fasi, ogri pori-libi, sociale broeja-libi, terroristische activiteit nanga tra skreki gevaar. Na disiten toneel a grontapoe foe libisma de troetroe wan froewondroe sani. Te joe loekoe en na a sé foe libisma, dan na tan na libi foe na disiten grontapoe-orde de now ini degedege. Ma omeni soema ini disi ten e loekoe san den toemsi ogri toestand disi wani taki ini na leti foe Gado Wortoe, na bijbel?
3. Tapoe na gron foe na kon troe foe sortoe bijbel profétitori meki Jehovah Kotoigi abi na overtoigi dati na kaba foe na seti foe sani de krosibé? San den profétitori disi e taki?
3 Jezus Kristus ben gi wan samengesteld marki foe na bosroiti foe na seti foe sani èn na ten di a ben sa bigin foe sori en kownoekondre-makti tapoe na grontapoe foe libisoema. Na profétis commentaar foe en foe wi ten wi e feni ini na tori foe kapitel 24 nanga 25 foe Matteus, kapitel 21 foe Lukas nanga kapitel 13 foe Markus. Akroederi nanga en prenspari profétitori, wi e feni skrifi foe santa jeje foe den laatste dé ini 2 Timoteus 3:1-5, Openbaring 6 nanga tra pisi foe proféti-tori ini den Hebrew nanga Griki Boekoe. Faja bijbelondrosoekoeman na wi mindri ben si ini na eeuw disi fa a moro bigi pisi foe den profétitori disi ben kon troe.
4. Sortoe toemsi moi bewijsi de „dati na eri mekisani e njan pina now”?
4 Na mindri ala pisi foe na bevolking èn tapoe ibri niveau foe na libimakandra e kon krin „dati na eri mekisani te nanga now e djeme makandra èn e njan pina makandra” (Rom. 8:22). Aladi wi e si tapoe na kontren foe datrawroko foeroe sani e go na fesi, tokoe wi e si dati siki foe a skin, na froestan nanga den firi e pina sma èn dati foeroe sma e soekoe foe brokosaka na ondro. Trowlibi e broko. Prati nanga brokotrow de so gewoon dati ini foeroe kondre a nomroe foe disi de net so é ofoe srefi moro é leki den nomroe foe den trow di trow. Na oso-famirilibi de so broeja, sodati foeroe e aksi densrefi efoe na wanfasi disi leki na fundamenti foe na libimakandra sa man oridoro ete moro langa. Foto e de ondro bigi moni paiman èn den de foe fadon panja. Den naatsi de ini bigi skreki èn e priti nanga politiek partij di e tjari pratifasi kon èn foe dorosé na gevaar de foe birtikondre di no e sori switifasi èn di e wani feti. Na grontapoe ini algemeen e kisi kwinsi foe wan economia moeilijkheid nanga moni moeilijkheid nanga mankeri foe energie, a doti foe sani nanga den gevaar foe gosontoe, overbevolking nanga angri na foeroe presi. Boiti dati, na spoekoe foe wan fetisani-stré de, di abi na gevaar foe pina di no kan bereken nanga nucleaire pori tapoe na libisma-famiri. Ja, na ati foe libisma e broko foe frede ede foe san sma e si e kon tapoe na grontapoe pe libisma e libi.
5. (a) San na moro bigi pisi foe na libisma-famiri e doe na mindri foe so wan broeja? (b) Te sma doe san, den kan pasa libilibi na bigi benawtoe di e kon èn foe sortoe eksempre e kon na krin dati foe tan na libi kan?
5 Na mindri foe so wan broeja foeroe sma e de nanga mi-no-ke-fasi. Tra sma e drifi go makandra nanga na pori ipi nanga geest foe san de tapoe a momenti popu. Joe abi soema toe di de feanti foe Gado èn te foe loekoe en troetroe teki wan bosroiti kontra en regtvaardiki gronprakseri nanga universele soevereiniteit. San na grontapoe e sai, a de koti now — pori froktoe. Na faste ten foe Gado gi wan wantronwantron takroe kaba foe na grontapoe e kon krosibé. Reti-ati sma di e kon sabi na gevaar foe na gridi, lobi goedoe, lobi prisiri, sondro broko-ede libifasi foe libisma, e kisi tranga foe poti prakseri tapoe na warskow foe Gado bifo a de lati. Te den doe disi, dan na okasi de, dati den sa de a mindri den sma di abi na froewakti foe pasa libilibi na bigi benawtoe di e kon krosibé, akroederi nanga den doe foe Gado ini den ten di pasa. Fo-doesoen-dri-ondro jari pasa kaba, Gado ben tjari Noach nanga en oso-famiri libilibi pasa wan grontapoe froedoe. Ondro-ondro jari na baka a ben fri Lot nanga en toe oemapikin di Sodom nanga Gomorra ben kisi pori. Disi de eksempre di e meki wi si fa Gado ben sa kan doe nanga den sma di e teki tapoe wan boen fasi na tego boen njoensoe, di ben meki bekenti ini na eeuw disi èn di e handri nanga foeroe bribi akroederi nanga dati.
6. (a) Foe sanede meki sensi 1914 someni grontapoe-eloe ben de? (Openb. 12:7-12) (b) San sa pasa ini na ten foe na „bigi benawtoe” nanga na falsi religie èn baka dati nanga den grontapoe naatsi? (Openb. 18:9, 10, 21-24; 19:11-16).
6 Modern skrifiman e erken dati ini 1914 wan keerpunt ben de. Sensi na jari dati di ben wani taki so foeroe, na libisoema-famiri ben kon de ini wan broeja ten foe froewondroe kenki. San foeroe sma no e froestan, de, dati akroederi den bijbel profétitori a ten disi de wan pisiten foe eloe gi na libisma-famiri „foe di Didibri saka kon na ondro na joe, èn a abi bigi atibron, foe di a sabi dati a abi soso wan sjatoe pisi ten” (Openb. 12:7-12). Wan dé foe frantwortoe e kon esesi èn sa broko loesoe tapoe na libisma-lo disi ini san Jezus ben kari wan „bigi benawtoe”, pe Gado kroetoe e tjari kon tapoe Babylon na Bigiwan na grontapoe-makti foe falsi religie, di na kristenheid de na moro prenspari pisi foe en. Baka dati dan ala naatsi, di de kontra Gado kownoekondre, en grontapoetiri di e kon, sa de ini na feti foe na bigi dé foe Gado na Almaktiwan, di nen ini bijbel Armageddon, pe den sa ondrofeni wan tego lasi. — Openb. 16:14-16.
7. (a) San sa pasa baka Armageddon nanga na Didibri èn en jeje-krakti? (Openb. 20:1-3). (b) Ini sortoe ten di e kon, libisma sa prisiri densrefi, soleki den bijbel profétitori e sori? (Openb. 21:3, 4; Ps. 37:9-11, 29; Jes. 11:6-9; 33:24; 65:21-24)
7 Te foe kaba dan Didibri nanga en ogri jeje-krakti sa iti go ini na agersi peti di no abi gron foe no man doe noti moro, sodati na pasi e kon opo gi na grontapoe tiri foe Gado kownoekondre foe doesoen jari (Openb. 20:1-3; 21:3, 4). Fa wi de grantangi dati wi kisi sabi foe na fasi fa Gado sa poeroe ala ogri foe grontapoe! Wi no e loekoe nanga foeroe froewakti na a ten, dati Gado sa kon na mindri? Ja, èn nanga prisiri wi e bar’odi gi na tiri di Gado pramisi, den njoen hemel, èn wan krin grontapoe libimakandra, na njoen grontapoe! — 2 Petr. 3:13.
FOE DATEDE MEKI NA BOSROITI DISI BEN TEKI DATI
8. Leki loyaal borgroe foe Gado Kownoekondre, dan sortoe libifasi wi teki na faste bosroiti foe abi aladi wi e soekoe foe waka baka Jezus Kristus? (Mark. 1:38; Luk. 4:43; Joh. 6:15; 15:19; 17:16; 18:36)
8 Wi, Jehovah Kotoigi sa span wisrefi moro tranga foe ini na ten di Gado gi, no foe tan wawan foe préki fajafaja na boen njoensoe foe na Kownoekondre, ma so srefi toe foe meki bekenti nanga ala fri na kroetoe-boskopoe foe Gado. Wi sa tan gi wi eri getrow fasi na Gado Kownoekondre èn feti foe de loyaal borgroe foe en. Disi wi teki leki a faste bosroiti foe doe, foe di wi o waka baka na getrow libifasi foe Jezus Kristus, wi o ori wisrefi aparti foe na grontapoe, wi o sorgoe foe no go ini na trapoe foe en, wi o wégri foe go moksi wisrefi ini den trobi foe en èn no gi pasi foe dribi komoto kwet-kweti ini san wi de. Wansi nanga disi wi no e de populair èn wi e ari na ogri-ati foe na grontapoe kon na wi tapoe, tog wi de faste ini wi bosroiti foe meki na bijbel gronprakseri tjari wi, dati na soema di de wan mati foe na grontapoe, e meki ensrefi de wan feanti foe Gado. — Jak. 4:4.
9. (a) Nanga na gi foe sortoe bijbel warskow wi wani go doro? (b) San de ini na tori te wi wani ori faste na wi bosroiti foe meki den froktoe foe na Kownoekondre nanga den froktoe foe Gado jeje? (Mark. 13:10; Joh. 13:34, 35; Gal. 5:22, 23; Kol. 3:12-14)
9 Foe di wisrefi komoto foe Babylon na Bigiwan, meki wi sa go nanga krakti doro foe sma jere na bijbel warskow: „Komoto na en mindri, mi pipel, efoe joe no wani abi prati ini en sondoe, èn efoe joe no wani abi prati ini en tanteri” (Openb. 18:4). Ini na geest foe offer wisrefi, wi abi na faste bosroiti foe go doro foe jepi den foeroe soema, di kande sa teki na sé foe na waarheid ete, bifo na kroetoe foe Gado kon tapoe na grontapoe-makti foe falsi religie. Foe di na sjen fasi foe libi foe na kristenheid ben tjari doti kon tapoe na nen foe Gado, meki wi abi na faste bosroiti foe sori dati wi de troe discipel foe Jezus Kristus, foedi wi sa meki den froktoe foe a kownoekondre èn den froktoe foe na jeje èn na so fasi gi grani na wi hemel Tata, Jehovah. — Joh. 15:8.
10. (a) Sortoe bosroiti wi e teki tapoe a fasi fa wi e pristeri na waarheid, leki wan pisi foe wi tego dienst gi Gado? (Kol. 4:6; 1 Petr. 3:15) (b) Sortoe eksempre foe den apostel tapoe a tori foe taki fri èn sondro frede èn nanga dekati, èn so toe a respeki foe den gi émakti, wi abi na faste bosroiti foe waka na en baka?
10 Wansi san wi individuele omstandigheden sa de èn pe wi sa de, wi sa abi prisiri foe doe santa dienst gi Gado dé nanga neti. Sondro foe stop wi sa gebroiki ala okasi foe gi wan finifini kotoigi foe na nen foe Gado nanga en prakseri, foe di wi o pristeri na waarheid tapoe wan moi fasi èn wi o sorgoe dati „a taki foe wi de alaten switi, nanga sowtoe” (Kol. 4:6). Na a srefi ten wi sa proberi foe de nanga dekati foe di wi o taki na Wortoe foe Gado fri èn sondro frede, spesroetoe te wi moe kakafoetoe gi pramisi foe doe wi ogri, ferfolgoe nanga tra sortoe foe gens. Leki den apostel ’wi no kan stop foe taki foe den sani di wi ben si èn jere’ (Tori foe den Apostel 4:19, 20). Aladi wi e gi respeki di fiti na den émakti èn wi e gi caesar san de foe caesar, tog wi sa waka baka den apostel foe „arki Gado leki tiriman moro leki libisma” te stré kon pe wi anbegi nanga dienst gi Gado de ini na tori.
11. (a) Sortoe wroko wi abi a faste bosroiti foe tjari kon a wan kaba? (Matt. 24:14) (b) Na soema wi e loekoe foe tiri, èn wan troetroe fundamenti de foe froewakti en jepi? (Fil. 4:13)
11 Foe di wi o poti jeje sani na a fosi presi ini wi libi, meki wi abi na faste bosroiti foe meki kon na wan kaba na wroko di de ini na meki bekenti foe na boen njoensoe foe na Kownoekondre èn na meki sma jere na warskow foe Gado foe Gado Wortoe. Foe datede meki wi sa foertrow tapoe Jehovah nanga wi eri ati èn poti wi bribi alaten tapoe en tiri nanga sorgoe èn tra sori foe en lobi. Ini wi faja begi wi sa aksi wi hemel Tata ofoe na libifasi disi foe wi kan de switi èn boen ini den ai foe En di „kan doe foeroe moro pasa marki leki ala sani san wi aksi ofoe di wi kan prakseri” (Ef. 3:20). Dati en wani kan pasa èn disi sa abi leki bakapisi prisiri nanga bresi di no abi marki gi wi nanga ala tra sma di lobi Gado, now leki te tego alaten.