Poti joesrefi dati den kan gebroiki joe!
„A pipel foe joe sa pristeri densrefi nanga den heri ati . . . Joe abi joe, kompe foe jongoe man neleki dowdropoe.” — PSALM 110:3.
1, 2. San Jehovah Kotoigi e doe now ini akroederi nanga Psalm 110:3?
A KOWNOE foe Jehovah, Jezus Kristus e tiri now! Foe sensi 1914 a de klarklari foe opo doe wan sani èn a bigin kaba ’foe poti na en ondro na mindri foe en féjanti’ (Psalm 110:2). Wi e gi dek’ati na ala sma di wani doe wroko nanga den heri ati foe pristeri densrefi na ini den laatste dé disi, di e pramisi foeroe foe na seti foe sani disi, di de foe dede foe dini na kownoe èn meki den doe disj sondro draidrai.
2 Disi de now precies san Jehovah Kotoigi e doe. A nomroe foe den e gro nanga tranga wrokoman di ’e brenki’ leki dowdropoe. Na a momenti disi den wortoe di e kon now foe na Psalmsingiman di ben abi Jehovah jeje e kon troe: „A pipel foe joe e pristeri densrefi nanga den heri ati tapoe a dé foe joe sroedatimakti. Na ini a moifasi foe na santafasi foe na bere foe na débroko, joe abi joe mati foe jongoeman neleki dowdropoe” (Psalm 110:3). Fa disi de wan dé foe libi na ini!
3. Sortoe jeje ini a tori foe dienst alaten ben de foe si na mindri Jehovah dienstknegti? Bewijsi disi nanga jepi foe na bijbel.
3 Wan jejefasi foe offer joesrefi gi dienst, di joe de klarklari foe doe, de alaten foe si a mindri Jehovah loyaal pipel. Di na proféti Jesaja foe eksempre ben kisi na okasi foe Gado boskopoeman, a ben piki wantronwantron: „Dja mi de!” (Jesaja 6:8). Boen froekoe na ini na diniwroko foe Jezus na ini Galiléa a ben go na wantoe djoe di ben frede Gado èn a ben gi na kari: ’Oen kon, oen tron mi bakaman’. Den ben teki a kari disi sondro draidrai èn den ben libi a wroko foe den leki belastingman èn fisiman (Mattéus 4:18-22; Lukas 5:27, 28). Oemasma di de klarklari ben gi den ten, moeiti èn goedoe foe sorgoe gi den fanowdoe foe Jezus nanga en discipel (Markus 15:40, 41; Lukas 8:1-3). Ija, di okasi foe santa dienst ben sori ensrefi, dan ala den sma disi ben poti densrefi foe den gebroiki den.
Den ben pristeri densrefi nanga den heri ati
4. Fa Paulus nanga en kompe ben loekoe wan ’kari foe kon na Macedonië’?
4 Na kristen apostel Paulus ben poti ensrefi toe foe den gebroiki en ini a dienst leki wan prijse gi Jehovah. A wan séker okasi a ben kisi wan visioen foe wan man di ben begi tranga: „Kon abra na Macedonië èn jepi wi.” Na apostel ben go nanga en mati tapoe na kari disi? Ija, foe troe, bika wi e lési: „So esi now leki a ben si na visioen, wi ben soekoe wan okasi foe go na Macedonië, foe di wi ben konkloderi dati Gado ben kari wi foe meki na boen njoensoe bekenti na den.” Den ben poti densrefi foe gebroiki den, èn Jehovah ben poti wan kroon na tapoe na dienst foe den di doe nanga den heri ati, foe di a waka boen. — Tori foe den Apostel 16:8-40.
5. San son sma ben taki foe na dienst di den fosten kristen ben doe?
5 Diniwroko nanga wi heri ati ben de wan marki foe na fosten kristendom. Na so den ben taki: „Na fosten kerki no ben tanapoe wawan a baka den zendeling; a ben de dorodoro zending. A no [abi na prakseri] dati a ben doe en égi pisi, te a ben pai den rekening èn nanga wan flaw belangstelling ben arki na den tori di den zendeling ben e ferteri foe den wroko di ben waka boen. Den pikin kerki disi ben de densrefi onigodo foe zendingsactiviteit. Ibriwan sma ben firi taki den ben kari en foe ferteri na boen Njoensoe” (The Preaching Value of Missions [Na préki-waarde foe zending posten], nanga lezing foe Helen Barrett Montgomery). Den bakaman foe Kristus ben de evangeliumprékiman fajafaja. „A tori foe na fosten kerki ini Tori foe den Apostel de na bewijsi taki den no ben teki na evangelium prékiwroko serjoesoe, ma ooktoe letterlek. Na evangeliumprékiwroko ben kon na tapoe na fosi presi” (The Idea of the Laity [Na ferstan foe den sma di de leek], foe na anoe foe David Haney). Èn sortoe bakapisi na wroko disi foe Jezus bakaman di ben e offer densrefi ben abi? „Heri esi den ben e waka kaba psa den Romeinpasi go na farawe foto nanga distrikt. Baka wan pisten dan na heri kownoekondre ben tron wan saibedi foe na njoen fasi foe bribi” (Imperial Rome [Na keizer kondre Rome] foe na anoe foe Mozes Hadas). Ija, na boen njoensoe ’ben préki na ini na heri mekisani di de na ondro hemel’ foe di na den fosten kristen kotoigi dati ben poti densrefi foe den gebroiki den. — Kolossesma 1:23; Mattéus 28:19, 20; Tori foe den Apostel 1:6-8.
6. Fa den disiten kotoigi foe Jehovah ben prakser alaten foe a kownoekondre prékiwroko?
6 Wan srefi geest de a mindri den disiten kotoigi foe Jehovah. Nanga leti den uitgave foe juli nanga 1 augustus 1881 foe na Watch Tower ben taki: „Joe e préki? Wi e bribi taki soso prékiman e tron wan pisi foe a pikin ipi . . . den no ben kari wi èn den no ben salfoe wi toe foe kisi grani nanga goedoe, ma foe offer wisrefi èn foe den offer wi èn préki na boen njoensoe.” Na srefi standpunt ben kon na krin jari baka dati. Na ini wan span congres di ben ori ini 1922 ini Cedar Point (Ohio, Amerkankondre), dan den sma di ben kon makandra èn di ben de voorstanders foe na kownoekondre ben kisi tranga na a fasi disi: „Go baka na a veld, o oen manpikin foe na moro Hé Gado! Weri oen fetisani! De nanga joe ferstan, de nanga ai, de actief, de nanga dek’ati. De getrow èn de troe kotoigi foe Masra. Go na fesi na ini na feti, te leki ibri pisi foe Babylon kisi pori. Meki a boskopoe bekenti na ala sé. Na grontapoe moe sabi dati Jehovah Gado de èn dati Jezus Kristus de na Kownoe foe den kownoe èn Masra foe den Masra. Disi de a dé foe den dé, Loekoe, wan kownoe e tiri! Oenoe de den publiki barwrokoman. Foe dat’ede: Préki, préki, préki, na Kownoe nanga en kownoekondre.” Foe na barwroko disi foe na kownoekondre Jehovah Kotoigi te now ete nanga prisiri èn nanga faja e poti densrefi foe kan doe en.
Den e gi piki na wan bigi fanowdoe
7. San foeroeten prékiman foe fosten ben ondrofeni, èn fa den ben prakseri foe a dienst foe den gi Jehovah?
7 Foeroe dienstknegti foe Jehovah ben poti densrefi foe kan gebroiki den na ini na foeroeten prékiwroko. Jari psa kaba sonwan ben e wroko leki kolporteur (now den e kari den pioniers) èn a libi foe den no ben makriki. „Ija”, wan owroe kotoigi ben taki: „Ini den fosten dé dati den kolporteur ben wroko den foto nanga den boitipresi. Sontron den ben kenki [boekoe] foe gronnjan, fowroe, sopo èn ala sortoe sani, di den ben kan gebroiki densrefi ofoe foe seri gi tra sma. Na ini wan gebied pe foeroe sma ben e libi den ben e sribi wawantron na gronman nanga sma di e kweki meti èn sontron den ben e sribi srefi na ini wan presi pe den e kibri drégrasi . . . den getrow man disi someni jari baka makandra ben go alaten doro, te leki na libimarki foe den bigin druk den.” Sonwan foe den ben jongoe di den ben bigin nanga na foeroeten dienst disi. A de troe taki na wroko foe den ben aksi foeroe foe den, ma den ben poti densrefi foe den gebroiki den èn den ben prisiri dati den ben kan doe so. Wan foe den ben taki en na a fasi disi: „Wi ben jongoe èn ben de kolokoe na ini na dienst disi, nanga prisiri foe kan gebroiki wi krakti foe dini Jah.”
8. Gi sortoe dienst foeroe sma foe a pipel foe Jehovah ben poti densrefi foe den gebroiki den?
8 Jehovah pipel ben meki a boen njoensoe bekenti sondro frede na ini den jari di psa, awinsi bigi feti di no abi en speri, angriten, gronseki nanga tra sani di ben psa ben de, èn di ben de na „marki” foe Kristus „denoja” na ini kownoekondre makti sensi 1914 (Mattéus 24:3-14). Nanga prisiri foeroe sma ben poti densrefi foe den gebroiki den ini na foeroeten dienst èn fa a ben de wan kefarlek moi sani dati den ben doe disi.
9. (a) Sortoe aparti stap na ini na historia foe Jehovah Kotoigi ben poti tapoe 1 februari 1943? (b) Fa a ben de mogelek foe opo na Gileadskoro èn foe sorgoe gi na fanowdoe foe internationale gro foe na kownoekondre prékiwroko?
9 Tapoe 1 februari 1943 na di foe Toe Grontapoe Feti ben rigeri srefsrefi. Ma tapoe na kowroe winterdé dati wan aparti stap ben doe na ini a historia foe Jehovah Kotoigi tapoe na kownoekondre boerderij ini a birti foe South Lansing (New York, VS). Fotenti na négi man èn 51 oema — alamala pionier ben bigin dan na wan féfi moen cursusu tapoe Na Wachttoren-Bijbelskoro Gilead. Na leri disi sa ben meki den ben kan gebroiki den gi zendingwroko na ini tra kondre. Foe di den toestand foe na oorlog ben meki pikin moro a no ben de mogelek foe seni zendeling go na Europa nanga Azië, tokoe den fosi klas foe na Gileadskoro ben seni go na Cuba, Mexico, Costa Rica, Porto Rico, Canada nanga Alaska. A ben kon de mogelek foe sorgoe gi na fanowdoe foe internationale gro foe na kownoekondre prékiwroko, foe di pionier di e wroko tranga ben poti densrefi foe den ben kan gebroiki den.
Froktoe foe na Gileadskoro
10. Sortoe eksempre de foe kownoekondregro foe sensi zendeling di ben kisi leri na a Gileadskoro ben go na ini bepaalde kondre foe a fosi tron?
10 Na Gileadskoro, di de now na ini na Edekantoro foe Jehovah Kotoigi ini Brooklyn (New York, Amerkankondre), ben gi leri na moro leki siksi doesoen studenti na ini den 76 klas di te so fara ben studeri komoto. Na doeltreffendheid foe na skoro ben de wan sani di no wan sma ben kan taki a no de so. Di den fosi zendeling foe na fosi klas foe Gilead foe eksempre ben doro na ini 1945 na ini Brasjonkondre, dan soso 394 sma ini a kondre dati ben teki prati na a kownoekondreprékiwroko. Now moro leki 148.000 de. Di ini 1949 den fosiwan di ben studeri komoto foe Gilead ben kon na Japan dan soso 3 kownoekondreprékiman ben de drape di ben meki rapport ini na kondre dati na oostsé. Now moro leki 86.000 de!
11. Sortoe kownoekondregro ben kon na ini na heri grontapoe foe sensi na Gileadskoro ben opo na ini 1943?
11 Ma fa a de nanga na kownoekondre gro na a heri grontapoe. We, di na fosi klas foe na Gileadskoro ben kisi leri na ini 1943, dan na a heri grontapoe soso 126.329 kownoekondrebarwrokoman ben de fajafaja na ini 54 kondre. Now na nomroe foe prékiman foe na boen njoensoe ben doro wan hémarki foe 2.652.323 na ini 205 kondre. Na kefarlek bigi gro disi moro foeroe wi abi foe taki tangi na a toemsi boen wroko foe den wan di ben studeri komoto foe na Gileadskoro.
12. Fa Zacharia 8:23 e kon troe?
12 Na ini foeroe kondre pe den wan disi di ben studeri komoto foe na skoro ben seni go leki ’ambasadeur nanga boskopoeman di e doe wroko na ini na presi foe Kristus’, den ben miti nanga veld di ben lepi foe koti na njanjan (Mattéus 9:37, 38; 2 Korintesma 5:20). Foe soso wan anoe nomo foe sma na ini son kondre dan ini a ten disi hondrohondro, doesoendoesoen, ja tindoesoendoesoen sma ben sroiti densrefi na Jezus salfoe bakaman èn den ben taki: „Wi wani go nanga oenoe, bika wi ben jere taki Gado de nanga oenoe” (Zacharia 8:23). Èn foe meki na kownoekondre barwroko go na fesi na a heri grontapoe, dan na „bigi ipi” disi di e gro dé foe dé ben poti densrefi foe den gebroiki den. — Openbaring 7:9.
Den bréti dati den ben poti densrefi foe den gebroiki den
13. (a) San wan sisa di de zendeling èn di ben poti ensrefi foe den gebroiki en foe doe moro dienst gi Jehovah, taki? (b) Sortoe aksi moesoe abi na prakseri foe wi?
13 Jehovah sa blesi den sma troetroe di nanga den heri ati sori dati den de klari èn di e sori na jeje foe offer densrefi, èn den de foe troe nanga prisiri dati den ben poti densrefi foe gebroiki den foe doe moro wroko foe na grani foe Gado. Wan sisa di de zendeling ben skrifi foe eksempre: „Mi ben libi mi wroko, ben bron mi boto na mi baka (wan odo na ini Bakratongo) èn ini september 1930 let mindri wan bigi economia depressie, mi ben bigin troetroe [leki pionierster] foe waka na strélon foe na libi. Alaten wi ben bréti sote taki mi ben doe dati . . . a ben wani taki ibri dé mi ben mag tesi na boen fasi foe Jehovah èn ben mag singi en prijse sodati mi abi na vréde foe mi prakseri foe kan tanapoe na fesi ala sani san kan sori densrefi ete” (Psalm 34:8). Joe kan poti joesrefi foe den gebroiki joe ini a kari foe na pionier- noso zendingwroko?
14. San wan brada foe na Tiri Skin ben taki foe na foeroetendienst? (b) Sortoe aksi di e meki joe go prakseri sani ben tjari kon nanga disi a fesi?
14 Wan foe den fosi Gileadzendeling ini Japan ben skrifi baka en fosi 21 jari ini na foeroetendienst ini 1960: „A ben de jari di ben foeroe nanga prisiri nanga ondrofeni, di hondro gewoon libismalibi no ben sa nofo foe ben de dati!” Now, sowan 24 jari baka dati, now di a brada disi de wan pisi foe na Tiri Skin foe Jehovah Kotoigi, dan en prisiri de te now ete bigi.
15. (a) San son sma ben taki baka foeroe jari foe Betheldienst? (b) Sortoe aksi di e meki joe go prakseri sani ben tjari kon nanga disi a fesi?
15 Baka foeroe jari di a ben dini na a Ede-kantoro foe na Wachttoren Genootschap wan brada di no ben trow ben taki: „Mi no e firi sari foe na pasi di mi ben teki waka na a ten dati, di mi ben kon de wan bigisma pas ete . . . Na prisiri foe si dati den miljoenmiljoen tijdschrift nanga tra boekoe di abi na boskopoe foe na Wortoe foe Gado, e doro te na den oekoe foe na grontapoe, de tapoe densrefi wan toemsi moi paiman.” Wan sisa di sensi den jari 20 ben dini na Brooklyn-Bethel e taki wan dé: „Wortoe na de nofo foe tjari na satisfaksi nanga na firi kon na fesi di mi e ondrofeni”. A baka foeroe jari di a ben de na ini Behteldienst, wan brada ben taki: „Mi ben prisiri srefsrefi ini wan kolokoe blesi libifasi di e pai.” Joe toe ben sa kan poti joesrefi foe den kan gebroiki joe gi prisiri dienst tapoe Bethel?
Teki na kari nanga bribi na ini Jehovah
16. San toe owroe brada ben taki foe na teki foe toewijzing di ben komoto foe Jehovah organisaatsi?
16 Wan owroe brada di e dini now na ini Papoea Nieuw-Guinea ben skrifi wan dé: „Den [jari disi foe na foeroeten dienst], ben de den moro boen wan, den moro kolokoe jari . . . a ben de foe troe wan koni sani dati na a ten dati wi ben poti prakseri na tapoe na pramisi foe Masra na ini Mattéus 6:33. Fa a ben de wan sani di ben abi waarde foe waka baka na tiri foe Masra soleki fa disi e kon na krin nanga jepi foe en organisaatsi!” Wan brada foe Engeland, di sensi den jari 20 de wan foeroeten dinari ini India, nanga leti ben taki: „Na heri grontapoe de now ete betrekkelek pikin. Na ini ibri kondre joe abi [dienstknegti foe Jehovah] èn alape den abi na srefi lobi. Wan sma es’esi e teki gwenti foe den toestand ini wan tra kondre. A de soso wan afersi foe kenki joe memre foe doe en èn moro fara foe soekoe Jehovah jeje foe kan wini den moeilekheid. A rai foe mi de: Teki alaten wan toewijzing foe Jehovah organisaatsi èn nanga prisiri joe moe teki en foe meki a waka boen.”
17. (a) Sortoe okasi gemeente prékiman abi foe dini Jehovah moro boen noso moro foeroe? (b) San Paulus ben oe di a ben kon ferstan dati „wan bigi doro di e tjari joe go na wroko” ben opo gi en?
17 Leki gemeente prékiman nanga wan osofamiri èn difrenti ferprekti foe a bijbel kande joe sa aksi joesrefi: ’Omeni mi kan doe?’ Dati no wan sma kan taigi joe, ma joe kan teki Jehovah èn aksi en efoe a kan gebroiki joe so bigi leki a kan na ini en santa dienst. Kande joe kan meki na omeni ten di joe e gebroiki geregeld na ini na velddienst kon moro bigi. Efoe joe no abi wan osobijbelstudie ete na wan sma di abi belangstelling, dan kande joe kan sorgoe dati joe kisi so wan studie. Èn wi alamala kan meki na kwaliteit foe wi dienst gi Jehovah kon moro boen, efoe wi poti na rai foe en wortoe nanga en organisaatsi ini wi libi. Joe de wan owroeman di den poti, dan na jeje jepi foe joe wan dé ben sa kan de tranga fanowdoe na ini wan tra gemeente. Efoe joe osofamiri e froisi go na wan gebied pe na fanowdoe de troetroe bigi, dan joe, joe oema nanga joe pikin kan ondrofeni kande moro prisiri na ini a feni èn a jepi foe sma di gersi skapoe. Baka wan pisten kande joe sa kisi na prisiri foe jepi foe opo wan njoen gemeente, noso kande foeroe moro blesi de ete gi joe na joe fesi di e psa den ferwakti foe joe krinkrin. Di na apostel Paulus ben kon ferstan foe wan „bigi doro di e tjari en go na activiteit”, dan nanga ala prisiri a ben wani meki en dienst kon moro bigi leki wan grani gi Jehovah (1 Korintesma 16:9; 2 Korintesma 2:12; Kolossesma 4:2-4). Joe e prakseri na a srefi fasi foe disi toe?
18. (a) Sortoe rai joe e kisi te wan doro foe doe moro kristen activiteit kon opo gi joe? (b) San sa de na bakapisi efoe joe poti joesrefi foe den gebroiki joe?
18 San joe ben sa doe foe dat’ede te joe ben sa kisi na okasi foe doe wan dienstgrani foe gi Jehovah bigi nen? Joe ben sa kibri joesrefi, noso joe ben sa sori na jeje foe offer joesrefi? Natuurlek joe moe teri den kostoe (Lukas 14:27-30). Ma te wan doro e opo gi joe foe doe moro foeroe kristen wroko, begi Jehovah dan. Aksi na ini den begi disi spesroetoe sani èn soekoe en (Psalm 37:5; Filipisma 4:6, 7). Efoe en santa jeje e poesoe joe foe teki wan bepaalde grani, saka joesrefi dan na a tiri dati èn handri nanga bribi ini joe hemel Tata. Foe troe joe sa kisi blesi te joe teki wan pasi foe waka pe joe e offer joesrefi foe meki den kownoekondre-afersi kon na fesi èn hori na ini prakseri taki „na blesi foe Jehovah na dati e meki wan sma kon goedoe, èn a no e poti wan sari a tapoe” (Odo 10:22; Maleachi 3:10). Ija, foe troe, efoe joe poti joesrefi foe den gebroiki joe, dan joe sa kisi toemsi bigi biesi di joe no ben ferwakti!
San joe ben sa piki?
◻ San Jehovah Kotoigi e doe now ini akroederi nanga Psalm 110:3?
◻ Sortoe waarde Jehovah disiten dienstknegti e gi na a kownoekondreprékiwroko?
◻ Sortoe kownoekondregro na a heri grontapoe ben de foe sensi na Gileadskoro ben opo foe sensi 1943
◻ Sortoe okasi de gi moro boen èn moro dienst gi Jehovah?
◻ Fa joe moe doe efoe wan doro opo gi joe foe doe moro foeroe kownoekondredienst?
[Prenki na tapoe bladzijde 6]
Di Paulus ben kisi na kari foe Macedonia, dan en nanga en kompe ben gi densrefi foe doe dienst foe Jehovah kisi grani
[Prenki na tapoe bladzijde 8]
Na fosi klas foe na Gileadskoro, juli 1943. Den pionier disi di e wroko tranga ben gi densrefi foe doe moro kownoekondre dienst