’Feti baka na marki’
„E frigiti den sani di de na mi baka èn mi e langa misrefi go a fesi na den sani di de didon na mi fesi, mi e feti baka na marki.” — FILIPPISMA 3:13, 14.
1, 2. (a) Fa Paulus foe Tarsus ben kisi wan wroko ini na diniwroko, èn a wroko disi ben de sortoe sani? (b) Fa a ben teki a wroko disi?
DI SAULUS foe Tarsus ben de a pasi foe go na Damaskus nanga na prakseri foe ferfolgoe kristensma wan faja ben koti komoto foe hemel lontoe en èn a ben jere wan sten e taki: „’Saul, Saul, foe san-ede joe e ferfolgoe mi?’ A ben taki ’Soema na joe, Masra?’ En ben taki: ’Mi na Jezus, di joe e ferfolgoe. Ma opo tanapoe èn go ini a foto, èn joe sa kisi foe jere san joe moe.’” — Tori foe den Apostel 9:3-6.
2 Foe san-ede meki Jezus ben meki Saulus foe Tarsus ondrofeni sowan sani? Jezus ben leg disi uit na a discipel Ananias: „A man disi [Paulus] de gi mi wan patoe di moe teki poeroe foe tjari mi nen, gi den naatsi èn gi kownoe, èn gi den manpikin foe Israël.” Ananias ben gi jesi, èn go, a poti anoe tapoe Saulus èn a ben taki: „Na Jezus di ben sori ensrefi na joe tapoe na pasi di joe ben waka kon, ben seni mi kon, sodati joe ben sa kan kisi joe ai baka èn kan kon foeroe nanga santa jeje” (Tori. 9:1, 5, 17). So esi leki a ben man foe si baka, den ben dopoe en èn a ben go sroiti ensrefi na a kristen gemeente ini Damaskus. Now di a ben de wan dopoe kristen bedinari dan a ben go wantronwantron nanga faja foe de bezig foe préki a mindri den djoe a boen njoensoe di e go foe Jezus, a Manpikin foe Gado. — Tori. 9:20-22.
3, 4. (a) Sortoe waarde Paulus ben si ini en diniwroko? (b) Na sortoe fasi na houding foe Paulus ben kenki foe di na gemeente Efese ben sori?
3 Na faja bedinari foe na evangelium disi, sma sabi moro boen leki na apostel Paulus. A ben taki alaten nanga foeroe warderi foe en diniwroko èn a noferdini boenfasi di a ben kisi. „Mi de grantangi na Kristus Jezus, mi Masra, di ben gi mi krakti foe di a ben feni mi getrow foe ben gi mi wan diniwroko, aladi fosten mi ben de wan gongosaman èn wan ferfolgoeman èn wan sma sondro sjen. Ma okoe ete wan sari-atifasi ben sori na mi, foe di mi no ben de nanga sabi èn ben e handri sondro bribi” (1 Tim. 1:12-14). Ija, a ben warderi na diniwroko srefsrefi. — Rom. 11:13; 2 Kor. 4:7.
4 Den sortoe wortoe disi foe na sé foe Paulus e meki kon boen na fesi dati na ini a ten foe a heri waka foe en a ben gi foeroe waarde na a diniwroko. A no ben kon na ini na toestand di na ini wan bepaalde momenti ben de na ini na gemeente na Efese. Jezus ben taki gi na gemeente dati: „Disi mi abi tege joe, dati joe ben libi na lobi di joe ben abi fosi” (Openb. 2:4). Na presi foe dati, Paulus ben hori a marki foe en na en fesi èn a ben tan nanga srefi a faja gi na diniwroko leki na a ten di a ben de na ini Damaskus, di a ben bigin pas ete nanga en dienst.
5. Fa wi kan gi trawan dek’ati baka di jari langa den ben dini Jehovah?
5 Baka di Paulus ben de tintin jari langa wan getrow kristen bedinari, a ben gebroiki en égi achtergrond nanga ondrofeni foe gi dekati na en kompe-bedinari na ini na gemeente foe Filippi, sodati den no ben kon weri. Joe no ben si dati sontron a de kefarlek moi foe jere fa wan sma ben leri sabi na waarheid èn ben tron wan bedinari? Joe e gi dekati na tra sma ooktoe na tapoe na fundamenti foe joe égi ondrofeni èn joe getrow dienst jari langa leki wan kristen bedinari?
6. San ben de na achtergrond foe Paulus leki djoe?
6 Na ini en brifi gi den Filippisma Paulus ben kan taki foe en libi leki wan djoe di ben e doe en wroko. A ben taki: „Efoe wan tra sma e denki dati a abi réde foe poti fertrow na ini skin, dan mi moro ete: mi ben besnij na tapoe na dé foe aiti, foe na famiri foe Israël, foe na lo foe Benjamin, wan Hebrewsma gebore foe den Hebrewsma; foe a sé foe a Wet wan Fariséman; foe a sé foe abi faja, e ferfolgoe a gemeente; foe na sé foe na regtvaardikifasi di de nanga jepi foe na Wet, wan sma di ben sori ensrefi taki a de sondro fowtoe.” — Fil. 3:4-6.
7. Foe san-ede meki Paulus ben libi den sani dati na en baka, èn san a ben wini nanga dati?
7 Efoe Paulus nanga sowan achtergrond ben tan boewégi ensrefi a mindri djoesma, dan disi ben sa kan gi en foeroe winimarki na a sé foe goedoe. Ma a e go moro fara nanga den wortoe: „Ala sani di ben de wini gi mi, mi ben si leki lasi foe Kristus ede. Ija, foe na sé dati mi e si ala sani ooktoe troetroe leki lasi foe na toemsi moi waarde foe na sabi foe Kristus Jezus, wi Masra, ede. Foe en wani ede mi ben teki na lasi foe ala sani èn mi e loekoe den leki wan ipi doti, . . . foe kan sabi en èn na krakti foe en opobaka èn na teki prati na ini en pina, e saka wisrefi na a sortoe foe dede foe en, foe si efoe mi tapoe wan efoe tra fasi kan kon na ini na froekoe opobaka foe dede” (Fil. 3:7-11). Wan troetroe bribi ini Kristus Jezus èn den sorgoe di Jehovah Gado ben seti e kon na fesi na ini den wortoe disi. Joe de net leki Paulus, foe di joe no e meki na lostoe foe de wan sma ofoe wini na a sé foe goedoe basi joe?
Na joisti jejefasi
8. (a) San Paulus ben taki foe en marki di a ben poti na en fesi, baka di a ben doe wroko ini na diniwroko wan langa pisten kaba? (b) Fa den wortoe foe Paulus ini 1 Korintesma 9:24-27 kan abi foe doe nanga wi?
8 Paulus ben kan doe en moro safrisafri ini na feti foe en foe doro na marki, baka di a ben dini Gado tintin jari kaba? A ben skrifi gi den Filippisma: „Brada mi no e denki dati mi ben graboe en kaba, ma wan sani de faste na mi fesi: e frigiti den sani di de a mi baka èn mi e langa misrefi go na den sani na mi fesi, mi e feti baka a marki foe a prijs foe a kari foe tapsé, di Gado e meki kon nanga jepi foe Kristus Jezus” (Fil. 3:13, 14). A ben bow kaba wan boen nen ini na kristen diniwroko èn a ben ferdrage foeroe sani, ma di a ben skrifi den wortoe disi gi den Filippisma a ben de ini straf’oso ini Rome, ma tokoe ete en diniwroko no ben kon na wan kaba. Na prijs di Gado ben poti na den fosi jarhondro kristen gemeente a den fesi, namkoe „na kari foe tapsé di Gado e meki kon nanga jepi foe Kristus Jezus”, a ben kan kisi wawan efoe a ben tan reti baka na marki foe en. Disi de na joisti fasi foe loekoe sani di ala lepi kristensma moe abi ofoe den e howpoe now tapoe wan libi ini a ten di e kon na ini hemel ofoe tapoe grontapoe. Ibriwan foe wi e doe boen foe ondrosoekoe en égi positsi nanga denki foe si efoe a abi troetroe warderi gi na diniwroko di wi kisi na ini a tori foe a seti foe Gado.
9. Sortoe lepi jejefasi wi kan abi?
9 Paulus e meki wi si san de a lepi kristenfasi foe si sani di a e taki: „Meki dan someni foe wi di de lepi, abi na jejefasi disi, èn efoe na ini wan fasi joe e firi trafasi na jejefasi, dan Gado sa tjari na jejefasi di wi taki dja foe en kon a krin” (Fil. 3:15). Na lepi kristen jejefasi e meki sani waka boen. Disi wani taki dati wan sma moe go waka na ini den foetoemarki foe Kristus, di ben klari na grontapoe diniwroko di ben gi na en na wan boen. Jezus ben kan begi na en Tata: „Mi ben gi joe grani na grontapoe, foe di mi ben klari a wroko di joe ben gi mi foe doe. Foe dat’ede Tata, gl mi grani now na joe sé nanga na glori di mi ben abi na sé joe bifo grontapoe ben de.” — Joh. 17:4, 5.
10. San wi kan taki moro ete foe Kristus jejefasi di de wan eksempre ini a tori foe Jehovah dienst?
10 Efoe wi wani prisiri Jehovah Gado èn na a fasi dati wani kisi na prijs foe na tégo libi, dan wi moe abi na srefi jejefasi di Kristus Jezus ben sori. Foe di Paulus ben sabi disi, meki a ben begi: „Kibri na jejefasi dati na ini joe di ben de ooktoe na ini Kristus Jezus, di aladi a ben de ini na skin foe Gado, no ben go prakseri foe teki sani abra nanga tranga, namkoe foe de speri foe Gado, nono, ma a ben légi ensrefi èn ben teki na skin foe wan srafoe èn ben tron leki den libisma. Ma moro ete, di a ben de ini a fasi foe wan libisma, a ben saka ensrefi èn ben gi jesi, te na dede, ija, na dede na wan pina-oedoe. Joisti foe dat’ede meki Gado ben hé en go te na wan moro hé positsi èn ben gi en nanga en boen-ati na nen di de a tapoe foe ibri tra nen” (Fil. 2:5-9). Fa disi ben de wan toemsi moi jejefasi di Jezus ben abi! Wi kan waka na ini disi na en baka? Te nanga sakafasi wi wani doe a wani foe Gado, dan disi alaten e tjari blesi kon. Te wan sma e span ensrefi foe doe wan wroko di a kisi dan wan boen sani e kon foe dati.
11. San den sma moe doe di na jejefasi de tranga èn lepi?
11 Efoe wi e go kroetoe san Paulus ben skrifi, dan wantoe memre foe a gemeente ini Filippi ben moe doe moro moeiti foe kisi a lepi kristen jejefasi. Pauls ben teki fesi foe gi den dek’ati èn foe jepi den. Ini moro foeroe foe den disiten gemeente joe abi sma di de moro tranga ini na bribi èn sma di abi wan ofoe tra swakifasi. Den moro tranga wan, neleki Paulus moe gi den trawan dek’ati. Kristus Jezus ben doe foeroe foe tranga den sma di ben abi jeje nowtoe èn a ben gi nanga disi wan eksempre na kristen foe waka na en baka. „Ma wi, di tranga, moesoe tjari den swakifasi foe den di no de tranga èn no prisiri wisrefi. Meki ibriwan foe wi plisi en naaste ini na sani di de foe na boen foe na opbouw foe en. Meki now na Gado di e gi horidoro nanga trowstoe gi dati a mindri makandra oenoe abi na srefi jejefasi di Kristus ben abi, sodati na ini wánfasi nanga wán mofo oenoe kan gi grani na a Gado èn Tata foe wi Masra Jezus Kristus.” — Rom. 15:1, 2, 5, 6.
12. Fa wi moe si a prijs di Gado e gi leki paiman?
12 Foe den kan tranga na bribi foe den Romeinisma Paulus ben sori a tapoe dati ’na presenti di Gado e gi, de tégo libi nanga jepi foe Kristus Jezus, wi Masra’ (Rom. 6:23). Ooktoe Jezus ben taki na ini na ten foe en diniwroko foeroe foe tégo libi. A de wan toemsi moi paiman di Gado e pristeri en dienstknegti. Gado wani dati en dienstknegti hori den ai tapoe na prijs. Disi de réde foe boewégi den ati foe de getrow. Te wi e doe disi, dan wi e sori dati wi abi wan krakti bribi na ini en pramisi. A tapoe den kristen komakandra foe wi wi abi na okasi foe taki nofotron foe na paiman di Jehovah Gado e gi na getrow-wan.
Wi diniwroko awasi moeilekheid de
13. Fa den Santa Boekoe e jepi wi foe kisi na joisti jejefasi?
13 Na abi foe na joisti loekoe ofoe na joisti jejefasi, sa de foe bigi waarde ini a doe foe diniwroko na ini den laatste dé disi. Awasi wantoe foe wi lasi den fosi lobi meki wi de nanga faste bosroiti dati disi noiti kon wi abra. Den Santa Boekoe srefi de wan jepi na ini disi (Rom. 15:4). Nanga na studie foe wi foe den Santa Boekoe wi e kisi howpoe. Joe de Jehovah grantangi srefsrefi foe den Santa Boekoe, pe someni sani skrifi na ini foe getrow dienstknegti foe Jehovah soleki na apostel Paulus?
14. Fa Paulus ben kibri en positief instelling aladi a ben ondrofeni moeilekheid?
14 San wi ben sa doe efoe wi persoonlek ben moe ondrofeni den sani di Paulus e taki foe den ini 2 Korintesma 11:23-28? Foe san-ede Paulus no ben weri? Foe di a ben abi na marki di a ben poti na en fesi a prakseri. Den sortoe sani disi kan doe kon wi abra. Tokoe wi moe tan feti na baka marki di wi poti na wi fesi foe na prijs ede di Gado e poti a wi fesi. Di Paulus ben skrifi gi den Filippisma dan na joisti denki foe en ben kon a fesi ini en wortoe, dati foe na réde foe na verdediging foe na boen njoensoe a ben de ini doengro-osoboei (Fil. 1:7, 16). A ben ferstan foe san-ede a ben de drape. Dati de prenspari te wi e ondrofeni sowan tesi. Boiti foe dati, wi sabi dati Jehovah kan gebroiki oenoe foe gi wan kotoigi foe prijse en.
15. (a) Foe san-ede meki na gemeente ini Filippi ben abi dek’ati fanowdoe, èn san Paulus ben ferteri den foe bow den op? (b) Fa na gemeente foe Rome ben doe tapoe na de foe Paulus na straf’oso?
15 Den Filippisma ben ondrofeni tesi di ben kroederi nanga den moeilekheid di Paulus ben abi foe doe nanga den na ini Rome. A ben skrifi foe den: „Bika oenoe abi na srefi feti leki oenoe ben si na ini mi geval èn di oenoe e jere now foe en ini mi geval” (Fil. 1:30). Na ondro den omstandigheden disi Paulus ben kan skrifi wan brifi gi den foe gi den dek’ati. A ben taki dati na boen njoensoe ben kon de bekenti a mindri na pretoriaanse lijfwacht. A de krin dati na kristen boskopoe ben sa go srefi te na a oso foe na keizer, bikasi wantoe sma drape ben tron kristensma di ben gi den libi abra na Gado. Na gemeente ini Rome ben teki tapoe wan boenfasi na situwasi. Den no ben firi brokosaka, las’ati noso ben frede foe di Paulus ben de ini doengro-oso. Ma presi foe dati den ben de druk bezig nanga a wroko di Jehovah ben wani moe psa èn den ben sori moro dek’ati srefi foe taki a wortoe foe Gado sondro frede. — Fil. 1:12-14; 4:22.
16. San wi moe doe spesroetoe efoe gens opo ede kon?
16 Te gens e opo ede, dan ai tjari foeroe winimarki kon efoe na wánfasi foe na kristen gemeente e tan. Paulus e poti krakti tapoe wánfasi nanga wán ini denki (Fil. 1:27-2:4). Te den sortoe ten dati sori densrefi, dan a de fanowdoe dati nanga wortoe foe bribi wi gi makandra dek’ati, sodati wi no kan weri foe feti baka na marki na wi fesi. Dan a tori de foe kibri wan lobi-ati, sakafasi jejefasi èn foe doe san boen gi makandra èn foe abi wan opo ai gi den afersi foe makandra. — Teki gersi nanga Filippisma 2:19-21.
Wini moeilekheid
17. Foe san-ede meki wi no moesoe poti a marki foe wi di wi e feti na en baka na wan sé te problema di abi foe doe nanga gesontoe kon?
17 Wan krosbé kompewrokoman foe na apostel Paulus ben de Epafroditus. Foe na wroko foe Masra ede a ben kon krosé foe dede, ma no wan sani ben kon na krin dati den problema foe en gesontoe ben meki a ben frigiti na marki di ben de na en fesi (Fil. 2:25-30). Na ini 2 Korintesma 12:7 Paulus ben taki foe en égi feti nanga wan „maka na ini na skin” nanga san kande a ben poti prakseri na tapoe na problema nanga en ai. A ben begi efoe na „maka” dati ben kan teki poeroe foe en, ma Gado no ben jere a begi foe en. Dati Paulus ben hori na marki foe en na en fesi, ben jepi en wans fa a no fa foe tan feti baka na marki disi, awansi siki na skinfasi ben de. Aladi a ben abi swakifasi, tokoe a ben feni nanga jepi foe Kristus wan loesoe. — 2 Kor. 12:9.
18. Fa Paulus ben sori ini a tori foe goedoe wan joisti balansfasi?
18 Ini na brifi gi den Filippisma (4:11-13) wan sani e taki ooktoe foe den fanowdoe sani foe tan a libi. Te wan kristen e pina, dan disi kan de wan tesi gi en: a sa kon weri foe feti baka na marki foe en, ofoe a sa sori dati a abi wan lepi fasi foe loekoe sani foe di a o doe wan sani nanga na problema sondro foe libi na diniwroko a wan sé? (Teki gersi nanga Tori foe den Apostel 18:1-4.) Efoe Paulus ben abi now pikinso sani ofoe ben prisiri na ini foeroe sani en diniwroko ben e kon na a fosi presi. Te a ben abi foeroe sani, a no ben gebroiki na okasi foe gi foeroe ten na a feti baka prisiri, ma a ben tan feti baka na marki, a kisi foe na prijs.
19. San wi e kisi leki rai ini Filippisma 4:6, 7 te wi abi jepi fanowdoe? Nanga sortoe bakapisi?
19 Paulus no ben ferteri foe ibri sortoe ondrofeni di wan kristen kan kisi ini en libi. Ma te sani poesoe ede kon, di ben sa kan de wan problema gi na diniwroko, dan wi leki lepi kristen moe go ini begi na Jehovah — na fasi foe doe di Filippisma 4:6, 7 e rikomanderi. Dan Jehovah sa gi wi vréde foe wi ferstan, jepi wi foe denki krin èn gi wi jepi ini na wini foe problema aladi wi e tan en getrow bedinari. Begi e jepi wi, foe hori wi bribi èn foe tan feti a baka na marki di wi poti na wi fesi.
20. (a) Fa den eksempre foe den getrow owroe brada nanga sisa ini a waarheid e gi wi dek’ati? (b) San wi moe doe? Èn foe san-ede?
20 Foeroe sma ini a ten disi de nanga na kristen gemeente, e dini Jehovah kaba tintin jari. De alamala ben moe psa tesi aladi den ben e doe den diniwroko. Ma Jehovah ben jepi den, èn foe dat’ede meki den e tan feti baka na marki nanga na prijs na den fesi. Wi de Jehovah tangi dati na ini a ten disi net leki na ini na fosi jarhondro, brada nanga sisa de di de eksempre oe horidoro èn di de getrow, nanga den ai tapoe na prijs, e tan teki prati na a kownoekondrewroko. Den wan di de pas ete na tapoe „A Pasi”, kan kisi wini te den loekoe na tori di e go foe na apostel Paulus ofoe foe den getrow apostel foe na disiten gemeente foe si fa den ben doe nanga den problema foe den (Tori. 9:2; Hebr. 13:7). Meki ibriwan foe wi graboe ibri okasi foe gi makandra dek’ati, sodati wi kan hori doro getrow ini a dienst di wi ben teki na wi tapoe èn nanga a srefi denki tan feti na baka na marki di Jehovah ben poti na wi fesi. Te wi e doe disi, dan wi abi na ferwakti foe dini Jehovah Gado foe tégo ini prisiri èn wánfasi nanga getrow kompe. — Fil. 3:13-16.
Punt foe hori a prakseri
◻ San ben de a persoonlek achtergrond foe Paulus, èn fa a ben meki gebroiki foe disi foe gi en brada nanga sisa dek’ati?
◻ Fa den eksempre foe Kristus Jezus nanga Paulus e meki wi si san de na lepi kristen jejefasi?
◻ Fa wi kan sori dati wi abi wánfasi te gens opo ede kon?
◻ Foe san-ede meki wi moe tar foe wi? feti baka na marki foe wi?
[Prenki na tapoe bladzijde 12]
Kristus Jezus ben doe foeroe foe tranga den sma di ben abi jeje nowtoe