Tan feti baka jejefasi marki
„Mi e frigiti den sani di de na mi baka èn mi e langa misrefi go a den sani di de a mi fesi, a so mi e feti baka na marki foe na prijs.” — Fil. 3:13, 14.
1, 2. O fara den sma di ini owroeten ben teki prati na wan strélon ben span densrefi èn foe san ede? (1 Kor. 9:24).
„WAN boen strélon-man e denki foe a momenti di na marki gi, soso foe go a fesi; a de poti en prakseri tapoe na laatste strépi èn a de reken dati en foetoe sa gi en na wini.” Na so fasi na fosi eeuw historia-skrifiman Lucianus e skrifi foe na bigi faja foe den sma di u teki prati na wan strélon. Ibri senwe nanga tité ben span foe doro na marki leki nomroe wán. Na prijs, nofotron wan kroon foe wiwiri, normaal ben wani taki gi na winiman dati en heri libi langa ai kisi „na moro hé prijse”, foe di ibriwan sma ben sabi dati na winiman no kibri „kostoe no moeiti” te leki a ben „wini na prijs”.
2 Aladi na apostel Paulus gebroiki na strélonman foe sori san de fanowdoe foe abi winimarki leki kristen, a ben gi den sma di e feti baka na marki foe tego libi, na dekati: „Lon so dati joe mag kisi (na prijs)” (1 Kor. 9:24). Paulus ben taki dati a „ben langa ensrefi” (soleki wan strélonman di skin ben beni go na fesi èn di ben span ensrefi nanga ala san a abi foe doro na laatste strépi) èn „a so a ben feti baka na marki foe na prijs foe a kari di Gado e meki kon” (Fil. 3:13, 14). Efoe wan kristen „strélonman” wani kisi na paiman, na prijs foe tego libi, dan nowan enkri tra sani moe tron na moro prenspari marki di en libi e drai lontoe en. Disi de ini joe libi so?
„Abi na jeje fasi disi”
3. Sortoe fasi lepi kristen moe sori akroederi Filippi 3:13?
3 Nanga a „frigiti foe den sani di ben de na en baka”, na apostel Paulus ben sori dati na paiman ben de na moro prenspari marki. A ben kari den „sani di ben de na en baka” wan „ipi doti”, „doti sani”, ofoe „koen-koen” (Beck; Authorized Version) Disi de krakti wortoe, spesroetoe efoe wi loekoe san Paulus ben libi na baka di a ben go teki prati na a strélon foe na libi. (Loekoe bladzijde 4). Di Paulus ben prakseri foe en égi eksempre, a ben taki nanga tranga: „Dan meki wi, someni foe wi di de lepi, abi na jeje fasi disi.” — Fil. 3:5-8, 15, 17.
4. Sortoe fosi marki sma moe doro: (a) di de geïnteresseerd èn no dopoe ete? (b) di dopoe pas?
4 Den sma di Paulus ben taki en wortoe gi, ben go teki prati kaba na a strélon èn den ben kisi kristen lepi. Ma fa a de efoe joe no ben dopoe èn soboen moe go teki prati ete na a strélon? Dan disi moe de na fosi marki di joe moe proberi foe doro, bikasi den sma di no e teki prati na a strélon, no sa kisi na prijs foe tego libi. Ma joe ben bigin pas foe teki prati na a strélon foe na libi, dan joe moe doe moeiti foe kisi kristen lepi leki na fosi marki. Disi wani taki dati joe moe feti foe teki na heri kristen waarheid èn joe moe sorgoe dati „na krakti foe si sani moe oefen foe si boen èn ogri”. — Hebr. 5:14; 6:1.
5. Sortoe aksi wi kan gebroiki foe si fa wi jejefasi de tapoe na tori foe na marki foe tego libi?
5 Foe den wortoe foe Paulus: „Dan meki wi, someni foe wi di de lepi, abi na jeje fasi disi”, e tjari kon na krin sosrefi toe dati srefi den sma di de lepi, moe ondrosoekoe a „jeje fasi” foe den, foe di son wan ben sa kan „firi tra fasi na jeje fasi” (Fil. 3:15). Sortoe sani foe eksempre joe ben libi na joe baka? Joe e si den ete leki fa Paulus ben si den? Ofoe e kon na krin dati den wroko foe goedoe nanga boen nen foe wan sma ini na grontapoe, e teki moro foe joe ten nanga prakseri? A no de wan sani foe taki dati wan kristen moe sorgoe gi den sani foe tan na libi foe ensrefi nanga en osofamiri. Paulus ben doe a moeiliki wroko foe meki tenti — wan heri kenki te joe loekoe na grani wroko di a ben doe a fesi. Ma now na „prijs” ben de na moro prenspari sani ini en libi, no en grontapoe wroko. Disi de sosrefi toe nanga joe? — Tori foe den apostel 18:3; 20:33, 34.
Oefen a dini foe Gado ini frede
6. Sortoe oefening akroederi 1 Timotheus 4:7, 10 de toemsi prenspari foe doro na marki foe tego libi?
6 Ini en rai gi Timoteus na apostel Paulus e poti prakseri tapoe wan égifasi di de toemsi prenspari gi ala sma di wani foe kisi na „prijs”. Aladi sondro degedege a ben prakseri na den jari foe tranga oefening ofoe training di atleet ben moe saka densrefi na ondro, a ben skrifi: „Oefen joesrefi nanga a dini foe Gado ini frede leki joe marki. . . . na foe disi ede wi e wroko tranga èn wi e span wisrefi.” — 1 Tim. 4:7, 10.
7. San na a dini foe Gado ini frede èn fa wi kan ondrosoekoe san wi bewégi foe ati de?
7 Dini ini frede foe Gado e sori tapoe wan persoonlek lobi foe Gado. A de san wi de ini wi ati èn no wi dorosé doe foe bribi e bepaal dati. Foe datede meki wi moe loekoe geregeld foe san ede wi e teki prati na santa dienst. Wi e doe disi foe na sani di trawan ben sa kan denki ede efoe wi no doe en? Wi e doe en foe meki wan gevaarlek bericht ini na ai foe sma? Wi e doe en eenvoudig foe di wi papa nanga mama e aksi dati foe wi? Ofoe wi e doe en foe di wi wani plisi Gado? Sontron wi alamala abi wan poesoe fanowdoe. Ibri persoonlek kwotum ofoe wan regeling foe na organisaatsi kan dini leki wan dekati, ma den sani di wi e doe, moe de troetroe „doe foe dini ini frede foe Gado”. — 2 Petr. 3:11.
8. San de moro fanowdoe foe a dini foe Gado ini frede gro, boiti bijbelstudi soso?
8 Wan sma kan meki dini ini frede foe Gado gro te a sorgoe dati nanga jepi foe égi nanga gemeente bijbelstudi „a de gi ensrefi njanjan nanga den wortoe foe na bribi” (1 Tim. 4:6). Ma moro de fanowdoe leki soso na lési foe bladzijde. Aksi joesrefi: San disi e taigi mi foe Jehovah? Sortoe krakti disi moe abi tapoe mi libi ofoe mi loekoe tapoe trawan? Mi sa gebroiki den sani di mi ben leri? Oten? Fa? So wan sortoe dipi prakseri foe sani de wan pisi foe na oefening foe na kisi foe dini ini frede foe Gado.
9. Sortoe ondrofenitori e sori dati alaten wi moe oefen nanga a dini foe Gado ini frede?
9 Wan atleet di e oefen, e loekoe alaten foe a doe en moro boen. Leki strélonman ini na kristen strélon wi moe loekoe boen, dati wi noiti si wi jeje gro leki sani di kon foe ensrefi so. Wan oema di foe sensi en jongoe jari ben go na den konmakandra foe Jehovah Kotoigi èn sosrefi toe ben teki prati alaten na a diniwroko ini na veld ben si dati moro ben de fanowdoe leki soso na routine dati, tapoe na kontren foe kristen activiteit, foe di bakaten a ben kon ini hoeroedoe. Baka di a ben kisi ensrefi baka, a ben taki: „Mi ben denki dati mi ben de wan jejefasi sma, ma bakaten mi ben ferstan dati mi ben doe ala sani leki wan prekti. Baka na jeje fadon foe mi mi ben bigin foe poti moro foeroe prakseri tapoe égi studi, ala di mi ben gebroiki san mi ben leri tapoe misrefi. Mi ben begi foe na jepi foe Jehovah. Leki wan bakapisi foe dati mi ben bigin foe gro ini jeje fasi èn foe a fosi tron ben bow wan égi matifasi nanga en.”
10. Fa wan ai nanga waarderi kan jepi wi foe kon moro krosbé na Jehovah?
10 Sosrefi toe wan ai foe waarderi de fanowdoe. Te foe eksempre joe prisiri foe a njan foe wan switi froktoe, joe ben sa kan prakseri: ’Fa wi abi wan gefarlek boen Tata foe gi so wan switi sani!’ Ofoe te joe e loekoe na den moi kloroe te son e dongo, dan foe froewondroe, joe ben sa kan bari taki: ’Fa wi Tata de wan kunstenaar!’ Meki a de wan ala dé gwenti foe si bewijsi foe Jehovah sorgoe. Disi sa jepi joe foe kon moro krosbé na en. — 1 Thess. 5:18; Jak. 4:8.
’Langa wisrefi’ — Wi no de volmaakti ete
11. Wan kristen, foedi a de jari ini na waarheid, kan go doe en moro safri?
11 Son sma ini na fosi eeuw kristen gemeente Filipi, foe di den ben de wan heri pisi ten kaba ini a pasi foe waarheid, ben bigin kande foe doe en safri-safri, ini na firi dati den ben doro wan jeje-fasi marki di e gi satisfaksi. Paulus ben poti prakseri tapoe en égi eksempre nanga den wortoe: „No dati mi (wan apostel èn moro leki 25 jari kaba wan kristen) ben kisi en (na hemel prijs) kaba ofoe ben kon de volmaakti kaba, ma mi e feti na en baka . . . Brada, mi no e denki foe misrefi dati mi ben graboe en kaba.” — Fil. 3:12, 13.
12. Foe san ede wan kristen moe tan doe moeiti foe weri na njoen égifasi?
12 Wan kristen noiti e tan tiri. Alaten „go na fesi” de fanowdoe ini na weri foe na njoen égifasi. Wi moe kakafoetoe gi swakifasi di ben sa meki den keur wi af (1 Tim. 4:15; 1 Kor. 9:27). Wán Kotoigi ben tjari kon na krin, dati foeroetron a ben de nanga bigimemre èn makriki ben lasi en balans nanga san trawan ben doe. Baka di a ben kisi rai, a ben ferstan dati na fasi disi ben kan tapoe en foe kisi tego libi. „Baka dati mi ben doe ala moeiti foe denki positief foe trawan. Baka di mi ben dwengi misrefi ini disi wan pisi ten, a ben kon de moro makriki”, a ben piki. „Efoe mi ben doro na marki foe njan mi niri, mi ben begi: ’Mi no wani de so Jehovah. Joe sabi dati a de wan moeiliki sani gi mi; jepi mi foe datede grantangi!’ A ben doe disi troetroe!” A ben poti leki marki foe wini wan spesroetoe swakifasi èn foe sori den froktoe foe Gado jeje moro foeroe. A ben kisi blesi foe dati èn srefi den ben feni en boen foe doe dienst leki wan zendeling-sisa. Den sortoe marki disi de foe joe ben kan feti na den baka? — Gal. 5:22-26.
13. Sortoe marki wan osofamiri ben doro èn san ben poesoe den?
13 Foe di wan kristen e ferstan dati „a no kon de volmaakti kaba” ofoe dati a no ben kisi na prijs foe tego libi ete, meki a de tan poti prakseri tapoe en fasi di a abi gi na diniwroko. Wan man nanga oema ini Amerkankondre ben ondrosoekoe den omstandigheden. Ini na ten dati (ini 1958) na oema ben de skoromisi èn na man ben kisi, leki vertegenwoordiger, $40 ini wan joeroe. „Ne wi bigin foe prakseri foe wan sma di ben wroko na a edekantoro foe Jehovah Kotoigi èn di ben libi wan bigi moni foe doe dienst drape sondro paiman, soso nanga na prakseri foe tjari na waarheid gi sma leki wi”, na oema ben taki. Nanga na eksempre disi di ben gi den tranga, na man nanga oema ben seri den oso èn den froisi, makandra nanga den toe pikin foe den, go na wan presi pe na fanowdoe foe Kownoekondre-prékiman ben de moro bigi. Ala toe ben de tevréde nanga wan eenvoudig wroko foe sorgoe gi den osofamiri. A heri libi foe den now ben foeroe nanga na jepi foe trawan, foe di heri esi den ben hori ibriwan aparti gemiddeld 15 bijbelstudi nanga geïnteresseerde sma. „Wi e koti wan bigi prisiri di moni no ben sa kan bai. Èn wi ben prisiri spesroetoe foe si wi pikin o gro ini na srefi lobi gi Jehovah”, na man ben taki. — Fil. 4:12, 13.
14. San de wan toe persoonlijk marki di foeroe sma ben feti na den baka?
14 A no de foe taki, dati a no ibri osofamiri kan doe so wan stap. Ma moro nanga moro osofamiri ben tjari kenki kon foe abi wan moro bigi prati na a prékiwroko, ala di foeroe osofamirman kande srefi ben tron jepi- ofoe gewoon pionier. Ini na dienstjari 1981, dan ibri moen gemiddeld 151.180 sma ben teki prati na a pionierwroko — wan hémarki di noiti ete wi ben doro èn di ben de pikinmoro 10 procent moro leki na jari a fesi! Foeroe sma ben poti Bethel- ofoe zendingsdienst leki marki. Now di ini Mexico èn ini na Bontoerepubliek Doisrikondre wan njoen Gileadcursus ben bigin toe, dan foeroe moro sma ben man foe poti njoen èn moro hé marki ini den persoonlek libi foe doro. Dan trawan baka ben wroko tranga foe kweki wan dipi lobi foe Jehovah na den pikin. Man di ben gi densrefi abra ben poti na wroko foe wan dinari ini na diniwroko, wan owroeman ofoe srefi wan opziener di e waka loekoe gemeente leki marki, foe di den e kweki den fanowdoe jeje fasi. — 1 Tim. 3:1-13.
15. Fa kristen trow-oema kan jepi den man foe den foe poti na marki foe tego libi tapoe a fosi presi?
15 Kristen trow-oema di e poti na „prijs” tapoe na fosi presi, de wan bigi jepi. „Mi no sa frigiti noiti san mi oema ben taki di mi ben lési gi en dati 3 foe den man di mi ben bel foe gi mi wroko abra di wi ben froisi, ben tron djonsro de miljonairs”, na Kotoigi ben ferteri di wi ben kari ini paragraaf 13. „A ben taki: ’Moni kan de tide èn lasi gwe tamara. San wi e doe foe jepi sma na jeje fasi, abi waarde di e tan.’ A ben gi mi tranga alaten foe mi no fadon go ini wan sani pe mi ben sa ferdini bigi moni. Nanga jepi foe en, wi ben kan go ini na kringdienst, di den pikin foe wi ben tron bigisma.” Ja, oemasma di e jepi den masra foe den na jeje fasi, kan jepi den foe kisi „boen wani foe Jehovah”. — Odo 18:22.
Omstandigheden e kenki
16. (a) San na apostel ben bedoel di a ben taigi na gemeente Filippi: „Oen ben mankeri na okasi”? (b) Fa wi sabi dati Jehovah no de wan sma di no de noiti tevréde nanga den moeite foe en dienstknekti?
16 Na fosi eeuw gemeente Filipi alaten ben de toemsi royaal gi Paulus, ma ini wan bepaalde pisi ten den no ben gi noti na skin fasi. Fa disi ben doe kon? „Oen ben mankeri na okasi”, Paulus ben skrifi (Fil. 4:10). Kande moeiliki ten, omstandigheden di ben kenki ofoe foe di den no ben sabi pe Paulus ben de, ben tapoe den foe doe na sani di a ati foe den ben poesoe den. Wi omstandigheden kan tapoe wi sosrefi toe ini san wi kan doe. Jehovah e ferstan disi. Leki wan eksempre foe disi, Jehovah ben teki ondro na Wet foe Mozes den sani leki srakti-ofrandi di wan sma ben man foe gi, wansi a ben de soso 8 beker blom! (Lev. 5:5-11). Gado ben aksi soso dati den ofrandi ben de foe na moro boen kwaliteit. — Ex. 23:19; Hebr. 13:15, 16.
17. San de den troetroe mijlpaal ini na strélon pe wi e feti baka na laatste marki, na prijs foe tego libi?
17 Ma wi e gi troetroe na moro boen sani di wi abi na Jehovah? Ibri dé wi e hori na toemsi bigi paiman foe tego libi na prakseri? (Teki gersi Hebr. 12:1, 2) Wi kan kisi jepi ini disi boen foeroe efoe wi e proberi foe doro jeje marki te wi de na pasi. Den disi e tron mijlpalen tapoe na pasi foe lon. Fa a de nanga kristen lepi — a opregti teki foe na heri kristen waarheid, sondro foe degedege foe ibri njoen prakseri ofoe foe feti disi ofoe foe stré nanga disi? Èn joe ben leri foe teki ala dé bosroiti tapoe na gron foe bijbel gronprakseri? Efoe ja, dan joe ben pasa wan mijlpaal. Den froktoe foe na jeje ben ankra dipi ini den égifasi foe joe? Na diniwroko ini na veld de net so prenspari gi joe leki fa a ben de gi wi eksempre, Jezus Kristus? Èn fa a de nanga den réde foe san ede joe e doe sani? Na a dini foe Gado ini frede e poesoe joe troetroe? Wansi Timoteus ben de wan owroeman ini na kristen gemeente, tokoe a ben kisi na rai dati a ben moe oefen nanga a dini foe Gado ini frede leki marki na en fesi. Wi e doro wantoe foe den marki disi èn wi e proberi foe doro wantoe trawan, ala di wi e hori na toemsi bigi prijs foe tego libi na wi fesi? Wi kan taki troetroe dati wi „e langa wisrefi” go na den sani disi?
18. Sortoe paiman wi e kisi now te wi e meki a dini foe Gado ini frede gro?
18 Den moeiti disi e tjari foeroe paiman kon. Paulus ben taki foe datede foe a dini foe Gado ini frede dati „a abi wan pramisi ini en foe a disten libi . . .” (1 Tim. 4:8). A ben taki sjatoe foe na satisfaksi di wi kan abi now kaba wansi moeilijkheid de: „Wi sabi sari, ma tokoe wi prisiri no de foe tapoe . . . Wi e blesi trawan nanga foeroe goedoe. Wi de sondro moni, ma foe troe wi abi ala sani san a de warti foe abi.” — 2 Kor. 6:10, Phillips.
19. Foe san ede meki ibriwan foe wi moe poti prakseri na a fasi fa wi e lon foe feti baka na marki foe tego libi?
19 Dan heri esi wi sa doro wi laatste marki — ’na libi ini a ten di e kon’. Paulus ben kan taki ala di a ben e wakti en hemel paiman: „Mi abi na prakseri dati na pina foe disiten . . . no wani taki noti te wi teki en gersi nanga na glori di sa kon na krin gi wi” (Rom. 8:18). Ja, ala moeiti ini na strélon no sa wani taki noti te wi teki den gersi nanga den blesi foe na libi, ofoe ini hemel ofoe na grontapoe. Soboen, tan poti joe ai tapoe jejefasi marki. Lon tranga foe wini. Lon neleki joe libi e anga foe en. A de anga foe en troetroe toe! — Ps. 37:3, 4, 11, 29.
□ San de na moro prenspari marki di wan kristen moe proberi foe doro, èn nanga sortoe „jeje fasi” wi moe proberi foe doro na marki disi?
□ Fa wi e oefen wisrefi nanga a dini foe Gado ini frede leki wi marki?
□ San de wantoe marki di wi moe proberi fosi foe meki kon troe foe kan doro na marki foe tego libi te foe kaba?
□ Jehovah noiti de tevréde nanga wi moeiti ini en santa dienst?
[Prenki na tapoe bladzijde 218]
Joe abi marki tapoe wi kristen pasi di wi moe doe èn di e waka a fesi na marki foe tego libi di wi wani doro te foe kaba
Frede foe Gado
Lepi
Dopoe
Moro foeroe dienst
Moro froktoe foe a santa jeje