Na moro moi okasi di jongoesma abi
„Na gi joesrefi na ini a dini foe Gado de boen foe ala sani, foe di a abi wan pramisi na ini en foe na disiten libi èn na libi di e kon. Den wortoe dati de foe fertrow èn de warti foe teki den.” — 1 TIMÓTEUS 4:8, 9.
1, 2. (a) San foeroe jongoesma e feni prenspari okasi, èn sortoe aksi e kon a fesi? (b) Foe san-ede den disiten jongoesma de opo-opo gi spesroetoe druk?
SAN de na moro moi okasi di a libi e gi joe? Na ini wan ondrosoekoe foe kon sabi san sma e prakseri èn di no so langa psa ben ori a mindri wan representatief groepoe foe jongoesma ben kon a krin dati a moro bigi pisi foe den ben si „a feni foe wan wroko di mi lobi” èn „foe abi en heri boen a monisé leki a moro prenspari marki foe den. Moro nanga moro bigi nomroe jongoesma wani sani waka boen gi den èn na ini son presi boen foeroe e meki den skrifi den nen foe de na universiteit (Hé skoro) na ini a feti di den e feti foe feni wan wroko di e pai boen. Foeroe foe den e ferwakti foe den sortoe okasi disi na skin fasi, sékerfasi, krakti nanga satisfaksi na ini a libi. Joe e prakseri leki wan jongoewan a srefi foe disi? Èn san joe leki bigisma èn spesroetoe papa nanga mama e feni troetroe foe den sortoe okasi disi? Den de na sroto foe kisi wan „boen libi”?
2 Efoe jongoesma ben abi oiti krakti nanga satisfaksi fanowdoe dan a de wel na ini den „laatste dé disi”, now di den ten „de moeilek foe pasa” (2 Timóteus 3:1-5). Den disiten jongoesma ben gro a mindri spanning di wan geslagti pasa kaba no ben sa kan de so srefi. Den esesi kenki na ini na libimakandra soleki na fadon na ini wan foe na osofamirilibi èn na moraal ben tjari bigi djoegoedjoegoe kon ini sma firi.
Na fanowdoe foe krakti nanga satisfaksi ini a libi
3, 4. Foe sortoe sani e kon a krin dati foeroe jongoesma e mankeri inisékrakti, èn foe san-ede winimarki na skinfasi no e gi na krakti dati?
3 Moro nanga moro jongoesma e si dati den mankeri inisé krakti foe man kakafoetoe tège na druk foe a libi. (Teki gersi nanga Efèse 3:16.) Na ini wan rapport no solanga psa kaba foe na Amerkan Instituut gi jeje gesontoe foe a pipel den kon na a bosroiti dati wan tapoe féfi jongoesma de nanga brokoskin na wan serjoesoefasi.a Foe 1961 te 1975 na cijfer foe sma di kiri densrefi na mindri jongoesma na ini den Verenigde Staten foe Amerkankondre ben kon moro leki toe tron! Na ini a kondre dati wawan ala jari pikinmoro 8.000 jongoesma e dede di e kiri densrefi aladi wan nomroe di de féfitenti tron moro bigi e proeberi foe kiri densrefi. Son makti e kari na problema wan pandemie (wan siki di e panja ensrefi esesi na mindri wan pipel.) Foe raport e kon ooktoe na krin dati wan boen bigi nomroe jongoewan den e teki poti na ini lawmanoso.b
4 A no de foe taki dati a no ala jongoesma de na ini omstandigheid di e pristeri mogelekheid na skinfasi. Ma efoe joe hori a prakseri dati den rapport di kari djonsro de abi foe doe tapoe wan bigi kondre pe mogelekheid na skinfasi de psa marki, dan a de krin dati den okasi dati wawan no kan jepi jongoesma ’foe poeroe sari foe den ati èn hori rampoe foe den skin farawe’ (Prékiman 11:9, 10). Wan sma di en ati e trobi en foe di a e degedege na ensrefi èn e las’ati èn di de onseker ofoe di abi den firi foe fowtoe, e kisi pikinso krakti nomo foe winimarki na skinfasi. Na bijbel e taki: „Joe sori taki joe las’ati tapoe na dé foe benawtoe? Na krakti foe joe sa de pikinso.” — Odo 24:10.
5, 6. Na kisi foe sani na skinfasi sa gi joe na ini a ten di e kon wan „boen libi”? Gi eksempre foe disi.
5 Ma na kisi foe goedoe na skinfasi sa gi satisfaksi, èn a sa gi joe wan „boen libi”? Na goedoe kownoe Salomo ben piki: „Mi, ija mi, ben drai go na ala mi wroko di mi anoe ben doe èn na a tranga wroko di mi ben wroko tranga foe meki a doe kon, èn loekoe! ala sani ben de wan soso sani èn a feti na baka winti” (Prékiman 2:3-11). Aladi a ben feni pikinso prisiri ini san a ben doe, tokoe ete a ben abi wan firi dati a ben légi, wan sosofasi.
6 Foeroe sma e gafa now wan moro hé leri ieki wan foe den sroto foe wan „boen libi” foe tamara. Wan fosten granman foe wan foe den distrikt foe den Verenigde Staten ben kari so wan sortoe leri srefi „joe no kan tan sondro en foe abi krakti, satisfaksi na ini a libi èn tan a libi”. Dati de so troetroe? We, 846 sma di ben kaba foe studeri na wan barinen hé skoro ben poti na ini wan „klasserapport” fa a ben go nanga den baka tin jari di den ben kaba foe studeer. „Aladi na rapport ben foeroe nanga boen prisiriten di den ben abi, a so wan memre foe a groepoe ben taki, „tokoe ben de na ini, na loekoe foe sani na wan doengroefasi, bitafasi nanga sondro howpoefasi.” Baka 25 jari wan foe den studenti di ben kaba en studie „ben doro bepaalde marki na monisé”, ma a ben taki: „Ma den sani di no ben waka boen na ini na privé sé foe mi libi de moro foeroe leki den di ben waka boen. Foe den ala toe mi moesoe tan pi.” Disi na a moro boen sani di a libi abi foe gi?
A moro moi okasi
7. Gi sortoe carrière Timoteus ben kan span ensrefi, ma sortoe sani Paulus ben rikomanderi?
7 Na ini en brifi gi na kristen discipel Timóteus na apostel Paulus ben sori tapoe wan sani di de moro boen. Na jongoeman disi e kisi na wroko foe dini na ini Efese, wan foe den moro bigi bisnis presi na ini owroeten. Fa a ben moe si mogelekheid foe meki wan carrière! A ben kan feti a baka foe tron wan koopman di sani ben waka boen gi en ofoe a ben kan proeberi foe kisi barinen tapoe na skoro foe Tyrannus ofoe na ini na theater na ini a presi dati (1 Timóteus 1:3; Tori foe den Apostel 19:1, 9, 29), Timóteus a no de foe taki ben kan span ensrefi foe wan grontapoe wroko di ben pramisi foeroe ma Paulus ben skrifi: „Oefen joesrefi nanga a gi foe joesrefi na ini na dini foe Gado leki joe marki. Bika na oefen foe a skin de boen gi pikinso sani, ma a gi joesrefi ini a dini foe Gado de boen gi na disiten libi èn na libi di e kon.” Ija, gi joesrefi ini a dini foe Gado de „boen gi ala sani”. Disi no ben de soifri nomo speculatie bika Paulus ben taki moro fara: „Den wortoe dati de getrow èn warti foe joe teki.” Paulus ben sabi foe égi ondrofeni sortoe pasi ben tjari go na moro boen fasi foe libi. — 1 Timóteus 4:7-9; 2 Korinte 6:10.
8, 9. (a) San na a gi joesrefi na ini a dini foe Gado? (b) San na a moro moi okasi di wan sma abi, èn foe san-ede a e aksi moeiti foe kisi dati?
8 San de na gi joesrefi disi na ini a dini foe Gado? A de wan persoonlek tai-hori na Gado, di e komoto foe wan ati di dipi warderi e boewégi foe den toemsi moi égifasi foe en. Aladi „a gi joesrefi na ini a dini foe Gado nanga frede” (Hebrewsma 12:8) moro foeroe wani taki wan respeki frede foe doe wan sani di no e plisi Gado, „a gi ensrefi na ini a dini foe Gado” de wan doe foe na ati di sa boewégi joe foe na lobi foe joe gi Gado foe libi tapoe wan fasi di e plisi Gado.c Na égifasi dati foe na ati e tjari go na „wan getrow demakandra nanga Gado”, wan persoonlek matifasi pe joe e firi dati a e feni joe boen èn e jepi joe (Job 29:4). Na okasi foe tesi na persoonlek matifasi disi nanga Gado, de moro warti leki ala tra sani di sma kande ben sa kan pristeri joe. — Teki gersi nanga Jeremia 9:23, 24.
9 Na matifasi disi nanga Gado e kon foe di joe abi papa nanga mama di e gi densrefi na ini na dini foe Gado ofoe foe di joe dopoe leki wan kristen? Nono, bika opregtifasi foe na ati moe kweki netleki tra kristen boenfasi (2 Petrus 1:5-8). Joe moe tron wan sma ’foe soema na ati e poesoe en’ „foe doe wroko foe gi joesrefi na ini na dini foe Gado”. (Teki gersi nanga Exodus 36:2; 2 Petrus 3:11; Kolosse 3:22.) Aladi Timóteus foe en jongoe jari kaba ben kweki na ini na pasi foe waarheid, tokoe a ben moesoe meki a gi ensrefi na ini a dini foe Gado gro. Ooktoe now a de fanowdoe foe doe foeroe moeiti, ma na gi joesrefi disi na ini a dini foe Gado sa sori taki a de „wan sani foe bigi wini” (1 Timóteus 6:6). Fa so?
Wan moro hé fasi foe libi
10, 11. Fa Timóteus libi ben kon tapoe wan moro hé presi nanga jepi foe a gi ensrefi ini a dini foe Gado?
10 Na ini Efese Timóteus ben feti na baka a gi foe ensrefi na ini na dini foe Gado a mindri foe sma di „ben e waka na ini na soso fasi foe a denki foe den” (Efese 4:17). San ben foeroe a denki foe den, no ben boen troetroe, ma ben de wan sososani. „Fa den e skrifi dja foe a tori!” Na bijbel leriman R.C.H. Lenski e taki roe Efese 4:17: „Sma nanga wan jeje foe denki èn wani doe sani, meki-sani di abi ferstan, di na ini a pisten foe a heri waka nanga libi foe den e meki wan jeje tjari den na ibri stap èn na a kaba go na noti èn di e meki den poti ede go na wan bigi rampoe!”
11 Timóteus ben kan si dati na fasi foe libi foe den Efesesma ben de wan soso-sani èn ben lagi wan sma. Foeroe sma ben anbegi na oemagado Artemis, ma na fanatiek anbegi foe den ben de tapoe wan popki di no ben abi libi. Na anbegi ben abi wilde bradjari fesa èn tempel hoeroedoe (Tori foe den Apostel 19:23-34). Na fasi foe libi foe Timóteus na a tra sé ben de tapoe wan moro hé presi leki na libifasi foe den naatsi, di ’ben kon de freemd foe na libi di de foe Gado èn di ben lasi ibri ferstan foe boen maniri nanga gwenti’ (Efese 2:6; 4:18, 19). A dini foe en foe Gado ini a libi foe wan „libi di de foe Gado”, ben meki na moro bigi Persoon na ini na universum tron en mati! Na okasi foe meki na banti disi nanga na libi Gado gro nanga jepi foe gi ensrefi na ini a dini foe Gado, de troetroe wan toemsi diri sani! Joe kan graboe na okasi dati?
12. San wan kristen jongoewan ben taki foe a bigi wini foe a gi foe joesrefi ini a dini foe Gado? Fa joe e denki foe dati?
12 Foeroe sma e anbegi now seks, prisiri, goedoe nanga wan hé leri, èn dati den e doe net so nanga faja leki den Efesesma foe owtoeten ben e anbegi Artemis (Mattéus 6:24; Efese 5:3-5; Filippi 3:19). A libi foe den sma di e feti na baka a gi densrefi na ini a dini foe Gado, de foe wan moro hé kwaliteit, „efoe mi e loekoe den jongoe sma di mi ben lolo nanga den bifo mi ben bigin stoederi na bijbel”, wan twenti na fo jari kristen e ferteri, „dan mi e si dati afoe foe den de na ini straf’oso, a moro bigi pisi foe den e gebroiki drugs, èn foeroe foe den oemapikin abi wan pikin sondro den trow. A libi foe den de leki wan brokobroko ston-ipi. Difrenti foe den dede kaba srefi. Mi de so tangi dati mi kan loekoe tapoe na libi foe mi baka èn kan de nanga big’ede tapoe san mi e si. Tra kristen jongoesma e agri nanga dati nanga den heri ati.
13. Foe san-ede meki joe libi sa wani taki moro efoe joe waka na baka na komando foe 2 Timóteus 4:5?
13 Den sma di e sori dati den e gi densrefi na ini na dini foe Gado, abi na goedoe foe na diniwroko (2 Korinte 4:1, 7; 2 Timóteus 4:5). Dati e gi den wan troetroe marki na ini na libi èn a de wan troetroe tjalansi. Na presi dati den meki wan tv ofoe filmtori di libisma ben meki tjari den kon na ini wan agersi spanten, kristensma di abi wan prati na a diniwroko e fisiti troetroe sma na den oso foe jepi den. Den e kisi ooktoe foe doe nanga troetroe problema. Fa a prisiri foe den bigi te a no de foe taki efoe den e si fa sma di ben abi wan hoeroedoe, ogridoe libi sondro ferwakti, e gi jesi na a bijbelleri èn e libi den fosten takroe gwenti, e kisi lespeki foe densrefi èn e go dini Jehovah. No wan tra wroko wani taki wan sani so foeroe ofoe e tjari someni boen di e tan kon!
Tevrédefasi èn wan soifri konsensi
14, 15. Fa na gi joesrefi na ini a dini foe Gado nanga tevrédenfasi na ini a tori foe moni e meki wan moro betre libi kon?
14 Sondro degedege a de wan sani di e tjari bigi wini, na gi joesrefi ini a dini foe Gado makandra nanga na de tevréde nanga san wan sma abi. . . .Te wi abi foe dat’ede njanjan nanga krosi, wi moe de tevréde nanga dati. Ma den di teki a bosroiti foe kon goedoe . . . ben boro densrefi na alape nanga foeroe pen” (1 Timóteus 6:6-10). Na ini 1981 wan ondrosoekoe di Psychology Today ben meki ben sori dati jongoesma „e denki foeroe moro” na moni leki iniwan tra libimarkigroepoe di de. Afoe foe a groepoe foe sma di den ben aksi sani èn di ben broko den ede moro gi moni (a mindri soema joe ben abi goedoe nanga pótiwan), ben kragi foe „sorgoe nanga spanning alaten”.
15 Wan jongoe man na ini Japan ben man ’foe wroko ensrefi psa marki’, ma disi ben pasa nanga a takroe bakapisi foe en gesontoe. Bakaten nanga jepi foe wan bijbelstudie a ben meki a gi ensrefi na ini a dini foe Gado gro. „Te mi e loekoe baka na a ten di a kon goedoe ben de a moro prenspari marki na ini mi libi, dan na libi foe mi foe a ten dati mi no kan teki gersi nanga na kolokoe di mi abi sensi mi bigin foe feti na baka wan tra marki ini libi”, a ben taki. „Troetroe noti de di kan kon a sé na tevrédefasi nanga satisfaksi di wan sma e ondrofeni te a gi en libi na ini a dini foe wi Gran Mekiman.”d — Odo 10:22; Prékiman 5:10-12.
16. San den sma e koti di no ’hori wan boen konsensi’?
16 Paulus ben feti a baka Timóteus foe ’hori wan boen konsensi’. Fa? Wan sani de, foe di a ben moe handri nanga oemasma na ini „ala krinfasi” (1 Timóteus 1:19; 5:2). Ma na krinfasi pikinmoro komoto na ini na libi foe foeroe jongoe sma, foe di den konsensi ben bron, (1 Timóteus 4:2). Ma hoeroedoe no e gi inisé vréde nanga satisfaksi. Ini wan studie den ben loekoe den seksueel instelling nanga a waka nanga libi foe wantoe hondrohondro pikin di de foe tron bigisma. Foe den wan di moro foeroetron ben kenki patna, na rapport ben skrifi: „Den e bribi dati pikinso nomo den e tjari densrefi boen èn na wan tevrédefasi.” Pikinmoro afoe foe den ben piki: „Na a fasi fa mi e libi now, moro foeroe foe den koni foe mi e lasi.”
17. Foe san-ede ’lobi foe wan boen konsensi’ e jepi wi foe kisi foeroe satisfaksi foe na libi?
17 Efoe wan paar baka wan pisten e feti na baka wan krin trowlibi, dan den sa abi wini te den sori „lobi komoto foe wan krin ati èn foe wan boen konsensi” (1 Timóteus 1:5). Na ini 1984 ben tanapoe foe lési na ini na Journal of Marriage and the Family, dati foe wan studie foe 3091 trowpaar no solanga psa kaba ben kon na krin dati wan broiki de a mindri seks bifo wan sma trow èn no so foeroe satisfaksi na ini na trowlibi gi ala toe patna”. Ma fa a de tra fasi nanga den sma di abi wan krin libi! „A de so wan switi firi foe kan loekoe na baka èn foe sabi dati mi ben krin”, wan jongoe kristen oema ben ferteri di abi now wan kolokoe trowlibi sébi jari kaba. Ija, wan soifri konsensi de wan bigi paiman gi jongoesma di „e tron wan eksempre na ini krinfasi”. — 1 Timóteus 4:12.
Inisé krakti
18, 19. (a) Nanga sortoe vorm foe druk Timóteus ben abi foe doe? (b) Fa Gado ben jepi en?
18 Sondro degedege a de so, dati ini Efese ala sortoe druk kon tapoe Timoteus. Den kori foe na hoeroedoe foto pe sani ben e waka boen nanga na krakti di ben poti na tapoe ’prisiri nanga pré’ ben kan tjari druk kon foe dorosé. Timóteus ferlégifasi di a ben abi kande èn ooktoe „en foeroe siki di a ben siki” ben tjari séker inisé spanning kon (1 Timóteus 5:23). Ma Paulus ben memre en dati „Gado no ben gi oenoe wan jeje foe frede, ma foe krakti èn foe lobi èn foe gesontoe ferstan”. — 2 Timóteus 1:7.
19 Omeni foe den sma foe joe libimarki e angri foe kisi so wan sortoe krakti! Wan jongoe oema ben man foe broko krinkrin nanga a libi foe hoeroedoe nanga drugmisbruik. „Dati mi ben man wawan nanga Jehovah jepi”, a ben taki. „Sontron a e psa dati mi e kisi den owroe firi dati, ma dan mi e bigin foe begi — wantewante. A krakti foe wini den problema disi, de moro span leki ala sani san oiti ini mi libi mi ben doro!” Sondro degedege, Gado kan ’gi joe krakti’ èn gi joe na inisé tranga foe kakafoetoe gi sortoe druk toe èn foe teki bosroiti nanga joe ferstan. — 2 Timóteus 4:17.
20, 21. (a) Kari wantoe winimarki foe a gi joesrefi na ini a dini foe Gado? (b) San wi sa taki foe en na ini na artikel di e kon?
20 Soboen gi joesrefi na ini na dini foe Gado e tjari boen foeroe winimarki gi joe. Joe „fasi foe libi nanga waka” e kisi wan marki di de psa den marki foe den sma di soso e feti baka mogelekheden na skin-fasi (2 Timóteus 3:10). Soleki wan kristen jongoe oema di ben libi wan studiebeurs èn go tron wan foeroeten prékiman ben bari taki: „Mi abi na moro boen wroko di wan sma ben sa kan winsi bika mi e tjari a boen njoensoe gi tra sma èn jepi den foe leri sabi wi foeroe-nanga-lobi Tata! Èn den winimarki di e kon a tapoe ete — mi égi persoonlekheid di e kon moro boen — :mi égi srefi di e kon moro boen — de moro bigi leki san wan sma ben kan pristeri toe. Èn efoe joe poti a tapoe foe dati na paiman foe tégo libi na ini wan paradijs, sondro sari, èn joe aksi joesrefi dan: Wan sma ben sa kan winsi oiti wan moro betre libi?
21 Kande na aksi e kon na joe: ’Fa mi kan meki a gi misrefi na ini a dini foe Gado gro? Na piki joe e feni na ini na tra artikel di e kon.
[Foetoewortoe]
a Wan ipi sabiman tapoe na kontren foe na gro èn na fasi foe libi èn waka foe jongoesma di e kon bigi e si na brokoskinfasi disi leki wan gron di na wan prenspari fasi e sorgoe taki tranga tiniproblema soleki draitiki nanga problema na skoro, a gebroiki foe drug èn sopi pasa marki, seksuele jajolibi, oribere, lowe komoto foe oso èn kiri densrefi”, na so na skrifiman Kathleen McCoy e taki ini Coping with Teenage Depression.
b Nanga aladi na ini Amerkankondre na nomroe foe teki sma foe ala libimarkigroepoe foe wan pisten foe tinadri jari saka, na nomroe dati ini na libimarkigroepoe foe 15-24 jari kren nanga 19 procent, èn ini a groepoe ondro 15 jari nanga 158 procent!
c Na sondro dwengi firi foe na ati [gi Gado]”, na so na Lexicon foe Edward Robenson ben ferklari na fosi, Griki wortoe eu-se-bei’a. J.A.H. Tittman e taki ini en Remarks on the Synonyms of the New Testament moro ete: „[A gi foe ensrefi na ini a dini foe Gado] de wan sori foe na lespeki gi a Gado di e kron a krin ini doe, . . . ma [a gi joesrefi ini a dini foe Gado nanga frede] e sori tapoe wan fasi foe denki di e frede èn wai pasi gi awasi gi sortoe sani, di de kontrari san boen . . . [a gi foe ensrefi ini a dini foe Gado] de na sani di e meki sma abi tranga vroomfasi ini na libi.”
d Lési a tori foe a libi foe Shozo Mima, „Mi ben feni wan sani di de moro betre leki goedoe”, ini na tijdschrift foe 22 november 1978, foe Ontwaakt! na sisa tijdschrift foe Na Wachttoren.
Joe kan memre disi ete?
◻ Foe san-ede meki mogelekheden na skinfasi abi waarde di skotoe?
◻ San na a moro moi okasi di wan sma abi?
◻ San a gi joesrefi na ini a dini foe Gado e doe gi wan sma, sodati a e kisi jepi foe kisi foeroe satisfaksi foe na libi?
[Prenki na tapoe bladzijde 2]
San sa meki joe de troetroe kolokoe?
[Prenki na tapoe bladzijde 4]
Na training foe Timoteus na ini a gi ensrefi na ini a dini foe Gado ben poti en libi hé tapoe di foe den hoeroedoe Efesema
[Faki na tapu bladzijde 5]
„Mi ben prisiri di den ben taigi mi: „Meki wi go na a oso foe Jehovah.” Den foetoe foe oenoe ben sori taki den ben de na inisé foe joe doro, o Jeruzalem. Jeruzalem de wan presi di ben bow leki wan foto di ben tjari kon na wan ini wanfasi. Pe den lo ben opo go, den lo foe Jah, leki wan fermane foe Israël, foe tjari tangi gi na nen foe Jehovah.” — Psalm 122:1-4.