Wroko makandra nanga na Orgaman foe na heri universum
„Bika wi de kompewrokoman foe Gado. Oen soema de a gron foe Gado, di den e prani a tapoe, a oso foe Gado.” — 1 KORINTE 3:9.
1. Sortoe wortoe di moro leki siksitenti jari pasa kaba ben gebroiki ben foeroe den arkiman nanga faja, èn fa den wortoe disi ben wroko na tapoe serjoesoe Bijbelondrosoekoeman na ini a ten dati?
„NA ORGANISAATSI FOE GADO.” Moro leki siksitenti jari pasa kaba wan memre foe na groepoe foe skrifiman foe na Wachttoren Genootschap ben gebroiki den wortoe disi na a aladé bijbeltakmakandra na a Betheltafra. Na Bethelfamiri tapoe na edekantoro na ini Brooklyn, New York, ben kon foeroe nanga faja di den ben jere a ben taki den wortoe disi! Den aparti wortoe disi, „na organisaatsi foe Gado”, ben sa tjari na denki, wortoe nanga boekoe foe den bijbel ondrosoekoeman dati na ini a ten di boo kon. Den wortoe ben bradi a jeje loekoe foe den na ini a tori foe na heri mekisani èn a ben wroko na tapoe a fasi foe den na fesi foe na wondroe Orgaman foe hemel nanga grontapoe, Jehovah Gado.
2. Fa wi kan taki foe na wortoe „organisaatsi”, efoe wi loekoe na Griki wortoe pe a komoto?
2 Na ini a ten disi disi kan de wan sani di de vreemd, foe di Jehovah Kotoigi di abi bigi warderi gi na grani foe den foe wroko makandra nanga a Orgaman foe hemel nanga grontapoe, e gebroiki alaten na wortoe „organisaatsi” (1 Kor. 3:5-9). A wortoe „organisaatsi” komoto foe na Griki wortoe órganon, di e sori foe eksempre na tapoe wan wrokosani di sma e doe wroko. Na ini na Septuaginta-Vertaling a de kon wantoe lési èn den e gebroiki en foe sori na tapoe wan sani foe meki pokoe, soleki na harp foe David. A wortoe komoto foe érgon, wan zelfstandig naamwoortoe di wani taki „wroko”. Wan organisaatsi de soboen wan seti ofoe ordening foe sani di e bigin wroko foe meki wan sani doe kon so boen leki a kan, na ini na moro sjatoe ten di de èn nanga so pikinso moeiti leki a kan.
Fosten loekoe foe na wortoe organisaatsi
3. San ben taki na ini na Ingrisi uitgave foe maart 1883 foe a tijdschrift disi foe „wi organisaatsi”?
3 Ma, jari psa kaba, den bijbelondrosoekoeman ben feni en wan moeilek sani foe ferstan tapoe san na wortoe „Organisaatsi” ben abi foe doe. Na ini na Watch Tower foe maart 1883 foe eksempre den ben taki:
„Ma aladi a de gi natuurlek libisma wan sani di no de mogelek foe si wi organisaatsi, foe di a no kan ferstan den sani foe na jeje foe Gado, wi e fertrow a tapoe taki joe kan si dati na troe kerki orga toemsi boen èn de na moro boen seti di joe kan denki foe en foe meki a wroko doe . . .. Wi abi wan fertrow di no abi marki na ini wi Tiriman; èn na volmaakti organisaatsi disi di na grontapoe no kan si nanga ai e hari go na wan séker èn glori wini.”
4. Sortoe loekoe ben kon a krin ini a tori foe na orga foe sani na ini na Watch Tower foe 1 december 1894?
4 Ma na ini na Watch Tower foe 1 december 1894 den ben taki:
„Ma netleki fa na orga foe na kerki foe na njoen evangelium seti no ben de wan pisi foe na kotiwroko di ben e doe na ondro na owroe djoe seti, na so ooktoe na disiten kotiwroko, ofoe na kotiwroko di e feni presi na ini na evangelium seti, de aparti foe na wroko di sa feni presi na ini na njoen seti foe na millenium di e kon now krosbé . . .. A de krin dati na meki foe wan organisaatsi di de foe si foe den sortoe sma disi di tjari kon makandra no ben sa de ini akroederi nanga na jeje foe na plan foe Gado; èn efoe disi ben sa pasa tog, dan disi kande ben o sori a tapoe dati foe a sé foe na kerki wan lostoe de foe seti densrefi na a populair prakseri foe organisaatsi ofoe „ferbontoe”. (Loekoe Jesaja 8:12, Statenvertaling.) Na wroko na ini a ten disi no de organisaatsi, ma pratiwroko, net soleki a ben de na a troetroe djoe kotiwroko (Matt. 10:34-36). . .
Ala di wi no abi na prakseri foe dat’ede dati wan organisaatsi di wi kan si foe sma di tjari kon makandra de wan pisi foe na plan foe Masra na ini na kotiwroko, netleki wi e ferwakti leki organisaatsi foe tan dja ete wan langaten, tokoe wi e denki taki a de en wani dati den sma di lobi Masra, nofotron e taki nanga makandra foe na gemeenschappelek howpoe nanga den prisiri foe den, ofoe den tesi foe den èn den sani di e meki den kon broeja, èn e taki nanga makandra foe den diri sani ini en wortoe.”
5. San ben taki na ini na boekoe The New Creation?
5 Soboen na ini a ten dati den no ben e loekoe na kristen gemeente leki wan organisaatsi. Ma den ben e feni en boen foe seti na gemeente ofoe ecclesia na wan ordefasi. Studie V foe a boekoe di ben kon na doro na ini 1904 The New Creation (Na njoen mekisani) ben abi leki nen na „Na organisaatsi foe na njoen mekisani” èn e bigin nanga den wortoe: „Netleki fa na njoen mekisani pas na a fosi opobaka sa doro en volmaaktifasi, na so ooktoe na organisaatsi foe en sa kon klari pas dan. Na tempelprenki e agersi disi: leki libiston wi e kisi a kari now, foe teki wan presi na ini na glori tempel.”
6. Leki fa a boekoe Thy Kingdom Come ben taki dan san ben de na „mama” foe den memre foe na „njoen mekisani”?
6 Na wan toemsi moi sani dati na boekoe di ben kon na doro na ini 1891 Thy Kingdom Come (Joe kownoekondre kon) ben taki foe den salfoewan foe „na njoen mekisani”: Foe a sé foe Jesaja 54:1-8, na apostel Paulus ben meki leti foe tapsé koni skijn a tapoe èn tjari en kon na tapoe na jeje Sion, wi mama ofoe a ferbontoe foe wi, di Sara e agersi. Na siri foe Abraham na skinfasi den ben trowe leki erfgenaam foe a pramisi, èn na troe siri, Kristus (di Isaäk nanga Rebekka e agersi, den ben teki leki na wan enkri siri foe na pramisi. — Gal. 4:22-24
7, 8. (a) Soema de na masra foe na „mama” foe na kristen gemeente, èn san Jesaja 54:1-8 e taki foe disi?
7 Na ferklari disi no ben abi noti foe doe nanga a Sionistis grontapoe organisaatsi, di Theodor Herzl ben opo na ini 1897. Na organisaatsi dati ben e hori ensrefi bezig nanga na Jeruzalem na ondrosé, dja na grontapoe, no nanga a „Jerusalem di de na tapsé, na „mama” foe na kristen gemeente (Gal. 4:26). Na boekoe Thy Kingdom Come no ben go moro fara tapoe a tori, dati na Masra-éginari foe na „mama” foe na kristen gemeente de Gado, di Abraham ben e agersi. Jehovah no ben trow nanga na ferbontoe foe Abraham ofoe nanga na njoen ferbontoe, ma nanga na „Jeruzalem di de na tapsé”, di a mama foe Isaäk, Sara e agersi. Neleki Sara na so na „Jeruzalem di de na tapsé”, de leki „mama” wan sani san de na libi èn di abi persoonlekheid.
8 San de dan „na Jeruzalem di de na tapsé”? Meki wi go loekoe foe kon sabi dati fosi Jesaja 54:1-8 pikinso. Wan pisi foe en e taki:
„’Opo wan prisiri babari, joe oema di no e meki pikin! Kon bréti nanga prisiribabari èn njanpré, joe di no ben abi pen foe meki pikin, bikasi den manpikin foe na wan di de en wawan de moro foeroe leki den manpikin foe na oema di abi wan masra-éginari’, Jehovah ben taki. . . ’Bikasi joe toemsi boen Mekiman de joe masra-éginari, Jehovah foe den legre na en nen; en na Santawan foe Israël de joe Loesoeman. Na Gado foe na heri grontapoe den sa kari en. Bika Jehovah ben kari joe netleki joe ben de wan oema di den ben libi na wan sé krinkrin èn di ben de nanga sari na ati, èn leki wan oema foe a jongoeten di na a ten dati den ben trowe’, joe Gado ben taki. ’Foe wan pikin pisi ten mi ben libi joe krinkrin ma nanga bigi sari-ati mi sa tjari joe kon baka. Na ini wan froedoe foe atibron mi ben kibri mi fesi foe soso wan momenti gi joe, ma nanga lobi boen-atifasi te ten di no abi marki mi wani sori sari-ati gi joe, na Loesoeman foe joe, Jehovah ben taki.
9. (a) Nanga soema oefoe san Jehovah ben taki na ini Jesaja 54:1-8 tapoe wan trowstoe fasi? (b) Leki fa Galacia 4:25, 26 taki soema de na agersi „oema” di den ben taki nanga en na ini na prenki?
9 Jehovah no ben taki na a fosi presi nanga wan ferbontoe. A ben taki nanga wan naatsi, na pipel foe en di a ben verkisi èn di a ben teki poti na ini na Wetferbontoe foe Mozes. Te joe loekoe en na a sé foe Gado, dan na naatsi dati ben de wan „oema di ben de foe foeroe sma, èn di ben de leki wan wefi gi en. Akroederi a brifi foe Paulus gi den Galatiasma dan na agersi „oema” dati de wan prenki foe wan sani, ma a no e taki dati a e agersi wan ferbontoe ofoe kroederi. Joe no ben sa tan trowstoe wan ferbontoe. Na presi foe dati Paulus e meki wi si dati na agersi „oema” de wan libi sani, leki wan „mama” netleki na „masra-éginari” Jehovah de wan libi persoon di abi ferstan èn kan gi trowstoe. Te a e taki foe oema foe a fara ten di pasa na apostel e skrifi: „Na Hagar disi now [na oemafoetoeboi di na ini na presi foe en misi Sara ben meki Ismaël gi Abraham] ben wani taki Sinaï, wan bergi ini Arabië èn en [Hagar] e akroederi nanga na disiten Jeruzalem [di Paulus ben de na grontapoe], bika a de nanga en pikin na ini katibo [na a wetferbontoe foe Mozes]. Ma na Jeruzalem di de na tapsé de fri èn dati na wi mama.” — Gal. 4:25, 26.
Na Jeruzalem di de na ini Katibo
10, 11. (a) Sortoe prenspari sani di ben pasa pe den Israëlsma ben de na ini ben feni presi na a bergi Sinaï? (b) San ben pasa na ini 33 G.T. nanga na Wetferbontoe?
10 Hagar no de wan agersifasi ofoe prenki foe na wetferbontoe foe Mozes. Ooktoe na bergi Sinaï, di Hagar e akroederi nanga en, no e agersi na ferbontoe nanga en Tin Komando. A no de foe taki dati Gado no ben sroto wan ferbontoe nanga na bergi Sinaï, ma a ben tjari den Israëlsma, di a ben fri komoto foe katibo foe Egypte, kon na ini wan ferbontoematifasi nanga en na a presi dati, èn a ben behandel den leki wan fri naatsi. Disi ben pasa hondrohondro jari baka di Gado ben sroto wan unilateraal ferbontoe nanga Abraham, tapoe a gron foe san a ben pramisi en wan bakapikin di ben sa de wan manpikin.
11 Di Mozes, na mindriman, foe na wetferbontoe ben saka na bergi Sinaï, dan sowan brenki foe wan bovennatuurlek leti ben skijn foe en fesi, dati a ben moe tapoe en fesi nanga wan krosi efoe den Israëlsma ben wani loekoe na en (2 Kor. 3:12-16). Ma tapoe na bergi Sinaï Mozes no ben de langalanga na ini kontakti nanga Jehovah, bika Jehovah ben sroto na ferbontoe nanga den Israëlsma nanga jepi foe wan engel (Tori. 7:37, 38; Hebr. 2:2). Na a fasi dati na naatsi Israël ben kon na ondro na wetferbontoe. Ma hondrohondro jari a baka na ferbontoe dati ben poeroe a pasi foe di a ben spikri na a pina-oedoe foe Jezus na ini 33 G.T. — Kol 2:13, 14.
12. (a) Foe soema na grontapoe Jeruzalem ben de na „mama”? (b) Na ini sortoe katibo na grontapoe Jeruzalem ben de tin-na-négi hondro jari pasa kaba èn foe san-ede noiti a ben kon fri?
12 Paulus ben skrifi dati a bergi Sinaï ben e kroederi nanga na grontapoe Jeruzalem foe a ten dati. A no de foe taki dati na Jeruzalem no ben de wan ferbontoe, a ben de wan foto di ben abi barinen èn di ben abi djoesma na ini. Leki mamafoto a ben teki a presi foe na naatsi èn a ben de na agersi „mama” foe „pikin”, dati wani taki ala memre foe na djoe naatsi ofoe na naatsi Israël (Matt. 23:37). Na ini Jeruzalem a tempel foe Jehovah ben tanapoe, na Gado nanga soema den Israëlsma ben de na ini wan ferbontoe matifasi. Ma na djoe naatsi no ben abi na a ten dati wan onafhankelijk égi kownoekondre nanga wan bakapikin foe kownoe David tapoe a troon. Soboen den no ben de fri ma ben de ini katibo foe heiden politiek makti. Èn wan sani di ben de moro prenspari ben de, den ben de ini katibo ini a fasi foe dini Gado. Soso na pramisi Messias, Jezus Kristus ben kan fri den foe dati, netleki fa en ben kan fri den foe na katibo foe sondoe. Ma na Jeruzalem dati no ben teki Jezus leki Messias nanga kownoe èn soboen no ben kon fri noiti. Ma na presi foe dati a ben kisi pori ini 70 G.T. nanga anoe foe den Romeinsma èn den pikin foe en ben ondrofeni wan takroe kaba.
Na fri Jeruzalem
13. San Paulus ben taki foe na fri Jeruzalem èn ini sortoe fri den „pikin” foe en moe tanapoe faste?
13 Paulus ben teki na grontapoe Jeruzalem di ben de na ini katibo poti na abrasé foe „na Jeruzalem di de na tapsé”, di de „fri”. A ben teki wan pisi komoto foe Jesaja 54:1-8 èn ben skrifi:
”Ma na Jeruzalem di de na tapsé, de fri, èn dati de wi mama. Bika boekoe ben skrifi: ’De nanga prisiri, joe oema di no e meki pikin; opo kon na doro èn bari tranga, joe oema di no ben abi pen foe meki pikin, bika den pikin foe na oema di de en wawan de moro foeroe leki den foe na oema di abi wan man.’ Wi now, brada de pikin di de foe na pramisi, netleki Isaäk, Ma soleki na a ten dati na sma di ben gebore na a fasi foe na skin, ben go ferfolgoe na sma di ben gebore na a fasi foe na jeje, so ooktoe now. Ma ete, san Boekoe e taki? ’Jagi na oema-foetoeboi nanga en manpikin gwe, bika na manpikin ofoe na oema-foetoeboi no sa de kwetkweti erfgenaam nanga na manpikin foe na fri oema.’ Foe dat’ede brada, wi no de pikin foe wan oema-foetoeboi, ma foe na fri oema. Foe sowan fri Kristus ben meki wi kon fri. Tan tanapoe foe dat’ede faste èn no meki den poti baka wan srafoe tjatjari tapoe joe.” — Gal. 4:26-5:1.
14. Foe san-ede meki Isaäk „ben gebore na a fasi foe na jeje”?
14 Den kristensma na ini Galasia di den ben taki nanga den na a fasi dati ben de „pikin foe Gado” leki wan bakapisi foe na pramisi” (Gal. 4:28, Today’s English Version). Leki wan agersifasi foe disi, Isaäk ben kon gebore gi Abraham di ben abi wanhondro jari èn en owroe oema Sara di ben abi négitenti jari leki wan kontroe foe Jehovah pramisi na a getrow famiri-edeman dati. Ija. Isaäk ben gebore gi Abraham nanga jepi foe wan wondroe, kwetkweti no na a fasi „foe na skin” (Genesis 18:11-15). Soboen na gebortoe foe en ben moe pasa na a „fasi foe na jeje”. Ija, na jeje foe a Moro Bigi Abraham, Jehovah Gado séker ben de fanowdoe foe meki na krakti foe meki pikin foe na fri oema Sara èn foe Abraham kisi njoen libi (Rom. 4:19). A de wan moi sani foe si dati na „pramisi” srefi no ben owroe di Isaäk ben gebore na ini 1918 bifo G.T., bika dati ben pasa soso 25 jari baka di Abraham ben hari go na ini na pramisi kondre Kanaän na ini 1943 bifo G.T., a momenti di na „pramisi” ben kisi krakti.
15. O langa na Jeruzalem di ben de na tapsé ben de sondro pikin, èn oten den bakapikin foe en ben kon foeroe?
15 „Na Jeruzalem di de na tapsé” ben de moro langa ’en wawan’ leki Sara, sondro pikin te joe loekoe en boen. Te joe loekoe en fini dan „na Jeruzalem di de na tapsé” ben de ini a toestand dati sensi 1943 bifo G.T., di na pramisi di ben gi na Abraham ben kisi krakti, èn disi ben tan doro te leki Jezus ben kisi dopoe na ini 29 G.T. Na momenti dati na jeje foe a Moro Bigi jeje Abraham Jehovah ben wiki Jezus èn a ben kisi salfoe nanga en jeje. Nanga disi a ben tron na Kristus, ofoe salfoewan, na Messias. Ma „na Jeruzalem di de na tapsé” ben sa abi moro leki wán jeje pikin. Foe dat’ede meki nanga pinksteren 33 G.T., baka na opobaka foe Jezus, nanga na go foe en na hemel, sowan 120 foe en getrow discipel ben wiki nanga jepi foe na jeje foe na Moro Bigi Abraham. Den ben kisi salfoe na ten dati nanga a jeje dati foe tron jeje brada foe na Moro Bigi Isaäk, Jezus Kristus. Bakaten na a dé dati ete sowan 3000 djoe ben kisi dopoe leki Jezus discipel èn ben kisi salfoe nanga na santa jeje (Tori. 2:1-42). Na so tapoe a dé dati „na Jeruzalem di de na tapsé” ben tron na „mama” foe foeroe pikin.
16. Soema na „a Jerusalem di de na tapsé”?
16 Na apostel Paulus e tjari kon na krin dati na oema di den e taki nanga en na ini Jesaja 54:1-8, de a srefi wan leki na Jeruzalem di de na tapsé. Jehovah Gado de en Masra-éginari èn ooktoe en toemsi boen Mekiman. Te joe taki en na agersifasi dan a de en „oema” èn „wefi” ofoe wan organisaatsi di joe kan teki gersi nanga wan trow-oema na tapsé ini hemel. Netleki wan trowman na so a de a sma di e meki a kisi pikin, sodati a e meki na „troe siri” di a pramisi ben gi na ini a ten foe Abraham. — Gal. 3:16, 26-29.
17. Fa na „Jerusalem di de na tapsé” de na „mama” foe na fosi „siri” foe na Moro Bigi Abraham?
17 Foe kan tron na fosi „siri” foe na Moro Bigi Abraham, meki na wan enkri gebore Manpikin foe Gado ben komoto kon foe na hemel organisaatsi foe Jehovah di de leki wan trow-oema, Na a fasi dati a ben de gi a Manpikin foe Gado leki wan „mama”. Jezus Kristus no ben de na agersi manpikin foe na grontapoe Jeruzalem di ben de na grontapoe na ini en ten, bika na foto dati ben de nanga en „pikin” na ini katibo ofoe srafoe, èn Jezus noiti ben de ini katibo (Gal. 4:25). Na grontapoe Jeruzalem ben de na „mama” foe den djoe na skinfasi di ben trowe Jezus leki na pramisi „siri” foe no wawan na famiri-edeman Abraham, ma ooktoe foe a Moro Bigi Abraham, Jehovah Gado. — Matt. 23:37-39.
Wroko makandra nanga na Bigi Orgaman
18. Foe san-ede meki na grontapoe Jeruzalem na ini den dé foe kownoe Salomo ben de na sani di ben abi na belangstelling foe sma?
18 Jezus Kristus di ben abi na hemel organisaatsi foe Gado leki „mama” ben moro bigi èn moro koni leki kownoe Salomo, na barinen manpikin foe David èn tiriman na ini owroeten. Na glori nanga koni foe Salomo ben hari na prakseri foe den no-Israël naatsi, soleki Jezus ben tjari kon na fesi di a ben taki: „Na koningin foe zuidsé sa kisi opobaka na ini na kroetoe nanga na geslagti disi èn a sa kroetoe en, bika a ben komoto foe den oekoe foe na grontapoe, foe jere na koni foe Salomo. Ma loekoe! moro leki Salomo de dja” (Matt. 12:42; Luk. 11:31). Salomo ben sori na aparti koni disi foe eksempre nanga na fasi fa a ben seti afersi foe en tiri. Na koni nanga san a ben orga ala sani, ben meki den sma ferwondroe.
19. San ben ferwondroe na koningin foe Scheba so di a ben si na tiri foe kownoe Salomo?
19 Foe dat’ede meki wi e lési na ini 1 Kownoe 10:4, 5: „Di now na koningin foe Scheba ben si ala na koni foe Salomo, èn ooktoe na oso di a ben bow, èn na njanjan foe en tafra èn na sidon foe en dinari èn na tafra diniwroko foe en knegti èn den krosi foe den èn en dringi èn en bron-ofrandi di a ben tjari alaten na ini na oso foe Jehovah, meki no wan jeje ben de moro na ini en” (NW; Rotherham; Young; Revised Standard; Septuaginta. Loekoe toe 2 Kronieken 9:4). Na koningin foe Scheba ben abi ala réde foe den de ondro na indruk foe na fasi tapoe san Salomo ben seti ala sani na ini en kownoe-oso. Èn foe di Salomo ben seti ala sani so boen èn ala sani ben e go so wan orde fasi meki a ben de ini akroederi nanga na Gado foe orde. — 1 Kor. 14:33.
20. (a) San Jehovah ben gi Salomo leki wan piki tapoe en begi? (b) San Jezus Kristus, di ben de „moro leki Salomo” e doe, èn san en bakaman e doe?
20 Jehovah ben jere na sakafasi begi foe Salomo èn a ben gi en „wan koni nanga ferstandiki ati” (1 Kon. 3:5-14). Na Bigi Orgaman foe na heri universum ben gi Salomo na koni foe orga den sani na so wan fasi dati ala sani ben moe waka na tapoe wan boen èn orde fasi. Na kownoe foe na ferbontoe pipel foe Jehovah, soboen ben de ferprekti foe wroko makandra nanga na Orgaman di ben de Gado foe ala san meki na ini hemel nanga na grontapoe. Na glori Jezus Kristus, di „de Moro leki Salomo”, de so ferstandiki foe doe disi toe. Foe dat’ede meki den getrow bakaman foe en na grontapoe moe doe disi toe, èn den e doe dati ooktoe.
Fa joe ben sa piki?
◻ San joe ben sa taki na wortoe „organisaatsi” de?
◻ Foe soema na grontapoe Jeruzalem ben de na „mama”, èn foe sortoe katibo a no ben kon fri foe en noiti?
◻ San na „a Jeruzalem di de na tapsé”, èn soema de en „pikin”?
◻ Fa Salomo ben gebroiki a koni di Gado ben gi en, èn san a Moro Bigi Salomo nanga en bakaman e doe?