Kownoekondrebedinari ben teki na tjalansi
„San dan na Apóllos? Ija, san na Paulus? Dinari, di nanga jepi foe soema oenoe ben tron bribiman.” — 1 KORINTE 3:5.
1. (a) San tapoe a kontren foe kerki sma e degedege foe en, èn foe san-ede? (b) Sortoe grontapoe makti de ini kefar, èn san sa psa nanga en?
SMA e tjalansi na makti foe „dinari foe na Wortoe” ofoe bedinari foe na evangelium. Disi de moro-moro so, now di na politiek elementi foe na grontapoe disi e drai ensrefi tége fasi foe anbegi — èn ooktoe na „kristen” fasi foe anbegi — foe di sma e si en leki wan sani foe meki moni. Srefi sma di studeri komoto foe wan hé skoro foe leri Gado tori den no e si troetroe leki bedinari di bevoegtoe, èn ini naatsi pe a firi de tége fasi foe anbegi den e poti den na ondro kontraban. Ija, na grontapoe makti foe falsi fasi foe anbegi na ala sé den e kon a tapoe en, èn a de ini kefar foe wan fadon kon feti nanga en, di sa tjari na pori kon foe a makti disi. Na Gado di de na fonten foe na troe anbegi ben taki disi a fesi kaba èn a ben poti en égi ten foe na kon troe foe en profétitori. Na kefarlek bigi sani disi di o psa sa tjari wini gi ala mekisani di abi ferstan na ini na universum!
2. Ini a tori foe kerki san sa tan èn san no sa tan?
2 Tokoe den elementi di no moe abi noti foe doe nanga fasi foe anbegi no sa tan langa foe hori grontapoe na ondro den makti, ma na Mekiman foe na hemel nanga grontapoe di sa kisi reti sa tan! Ija, èn na troe fasi foe anbegi foe na Moro Hé Gado disi di no e dede sa tan! Foe dat’ede meki den miljardmiljard sma di e libi na grontapoe no wani sabi den sani disi, tokoe tapoe na momenti disi actief sma de di e poti a soifri anbegi foe Gado na grontapoe na ini den libi. Èn den wortoe di e kon now èn di owroe kaba hondrohondro jari de troe te now ete: „Den égifasi foe en di no de foe si foe sensi na meki foe na grontapoe de krin, foe di sma kan si den nanga jepi foe den sani di meki, ija. en tégo krakti èn gadofasi, sodati a no de foe pardon den.” — Romeini 1:20.
3, 4. (a) Sortoe bewijsi kan gi dati Jehovah abi bedinari na grontapoe? (b) Fa wi sabi taki den kerki bedinari foe Babylon a Bigiwan djonsrode sa de sondro wroko?
3 Di den wortoe dati na ini na fosi jarhondro foe wi Gewon Teri ben skrifi, Jehovah Gado ben abi en dinari ofoe bedinari tapoe grontapoe. Na apostel Paulus foe dat’ede ben kan skrifi: „San dan na Apóllos? Ija. san na Paulus? Dinari nanga jepi foe soema oenoe ben tron bribiman soleki Masra ben gi na ibriwan sma. Mi ben prani, Apóllos ben nati, ma Gado ben meki a gro.” — 1 Korinte 3:5-9.
4 Jehovah moe abi now ooktoe bedinari na grontapoe. Ma a no e gebroiki den bedinari foe kerki foe Babylon a Bigiwan, na grontapoe makti foe falsi anbegi. Te joe loekoe en boen dan heri esi den sa de sondro wroko. Dati sa psa te Babylon a Bigiwan srefi sa poeroe a pasi. Na ini Openbaring 16:19 disi e taki a fesi na a fasi disi: „Na foto den broko na ini dri pisi, èn den foto foe den naatsi ben fadon broko; èn Babylon a Bigiwan ben tjari kon na prakseri na fesi foe Gado, foe gi en na beker nanga win foe atibron foe en faja-ati foe dringi.”
5. San ben psa na ini 539 bifo G.T. na ini Babylon, èn san de foe taki foe den bedinari nanga tra sma di e hori baka gi den kerki foe Babylon a bigiwan?
5 Fa a de nanga den sma di e tan anga loyaal na den kerki sistema di den bedinari foe Babylon a Bigiwan e dini leki sma di abi dati leki den wroko? We, loekoe pikinso san ben psa na ini na neti foe 539 bifo G.T. di kownoe Belsazar nanga den hé fisitiman foe en ben gafa den gado foe Babylon tapoe wan kefarlek bigi fesa di ben hori ala di den Meden nanga Persiasma ben lontoe den. Na a fosi presi den fesaman di ben njan èn dringi psa marki ben kisi na kroetoe foe jere di den ben si wan wondroe anoe-skrifi ben sori ensrefi na tapoe na skotoe foe na zaal èn den ben jere na uitleg foe Jehovah proféti Daniël. Moro fara na kownoe èn a de krin ooktoe den tra fesaman di ben gi grani na falsi gado ben dede foe na anoe foe den sma di kon feti nanga den ini a srefi neti di Babylon ben fadon (Daniël kap. 5). Net so wan srefi rampoe e wakti kerki bedinari foe Babylon a Bigiwan èn den sma di e tan getrow na a kerki sistema foe en.
A tranga fanowdoe foe bedinari foe Gado
6. (a) San Gado moe abi na ini den moeilek pisten disi gi na libismafamiri? (b) Oten den ten foe den heiden ben kon na wan kaba, èn san Jezus ben taki foe dati?
6 No wan sma tapoe wan redelek fasi kan taki dati a no de so dati wi e libi now na ini a moro moeilek pisten foe na libisma historia foe sensi na froedoe foe Noach ten di ben kon na heri grontapoe (2 Timóteus 3:15). Foe dat’meki a de now toemsi prenspari dati troe dinari de foe na Gado foe Noach. Net soleki Jehovah ben gi warskow na ini a ten foe Noach èn na ini a ten foe den sma tapoe na fesa foe Belsazar di ben njan èn dringi psa marki, na so séker A ben abi wan tranga fanowdoe boskopoe gi na libismafamiri di e libi sensi 1914, a jari di na Fosi Grontapoe feti ben bigin. Den dienstknegti foe Gado srefi so wan fotenti jari langa kaba ben sori na publiki tapoe na jari dati leki a jari pe den ten foe den heiden ben sa kon a wan kaba. Jezus ben taki foe disi: „Den heiden sa trapoe Jeruzalem, te leki den ten foe den heiden sa doro en marki.” — Lukas 21:24, Statenvertaling.
7. (a) Te nanga oten den no-djoe naatsi no ben e trapoe na grontapoe Jerusalem? (b) Jezus ben sori tapoe san di a ben sori dati den „heiden ben sa trapoe” Jeruzalem?
7 So wan 53 jari baka 1914, ofoe te na a siksi dé feti foe 1967, den no-djoe naatsi ben tan trapoe na grontapoe Jeruzalem. Ma a de krin dati Jezus no ben sori tapoe na djoe Jeruzalem foe now, ma na a sani di a foto dati te nanga 607 bifo G.T. ben de wan agersi fasi foe en, namkoe na Kownoekondre foe Jehovah Gado ini anoe foe en salfoe kownoe foe na kownoe oso foe David! — Lukas 1:32; 1 Kronieken 29:11.
8. Na soema Jehovah ben sa gi na kownoekondre foe David, èn foe san-ede libisma no ben sa kan gi te na kownoe ben sa go sidon na tapoe a troon soleki ben taki a fesi?
8 Jezus Kristus ben de a sma soema Jehovah Gado ben sa gi na kownoekondre foe en fosten tata David foe owroeten. Di Jezus ben tanapoe a fesi Pilatus, foe kroetoe en, a ben taki dati en kownoekondre no ben de foe a grontapoe disi, nanga san a ben méne dati a ben sa de foe hemel (Johannes 18:36). A ben de foe dat’ede wan logis sani dati a poti foe Jezus na ini a ten di boo kon a tapoe a troon na ini a kownoekondre ben sa feni presi na a kaba foe’ den ten foe den heiden. A go sidon foe en tapoe a troon ben sa de foe dat’ede wan sani di libisma ai no ben sa si èn foe dat’ede wi èn ooktoe den naatsi no ben si letterlek, dati a ben teki presi na ini 1914 tapoe a troon na ini na kownoekondre di Gado ben gi en tapoe wan reti fasi. Den naatsi dati séker no ben bribi dati a sani disi boo psa. Aladi Jehovah pipel foe sensi den jari 70 foe na jarhondro a fesi ben meki dati bekenti.
9. (a) San den naatsi ben doe sondro foe poti prakseri tapoe na Kownoekondreboskopoe? (b) San ben de fanowdoe, te joe loekoe na fasi fa den naatsi ben tjari densrefi na ini 1914?
9 Sondro foe poti prakseri na tapoe na kownoekondre boskopoe, den naatsi ben bigin feti na ini na herfst (bigi dréten) foe 1914. Soleki ben taki na ini Psalm 2:1-12, den ben sori dati den ben de féjanti foe Jezus, di ben wégri foe bosi na kownoe di ben poti pas na tapoe a troon leki wan marki foe a saka di den saka densrefi na ondro en èn foe na getrowfasi foe den. Foe dat’ede meki a ben de fanowdoe ini akroederi nanga Psalm 110:1, 2 pe tanapoe: „Den wortoe foe Jehovah gi mi Masra de so: ’Sidon na mi reti anoesé, te leki mi poti joe féjanti leki wan foetoebangi gi joe foetoe. Na tiki foe na tranga foe joe Jehovah sa seni komoto foe Sion, taki: „Go poti na joe ondro a mindri foe joe féjanti”.’”
10. (a) Na ondro sortoe omstandigheid Jezus ben bigin tiri na ini 1914? (b) Soema na den sma di e teki presi foe Jehovah na ini na di foe twenti jarhondro?
10 Baka di Jezus ben go sidon na a reti-anoesé foe Gado a ben kan go tiri a mindri foe en féanti, dan den djoe gensman ben sori a féjantifasi foe den gi den apostel foe Jezus (Tori foe den apostel 4:24-26). Na a srefi fasi na glori Jezus Kristus na a kaba foe den ten foe den heiden ben bigin foe tiri na ini 1914 na mindri foe en féjanti. Na ini na di foe twenti jarhondro disi den sma di ben meki Jehovah boskopoe bekenti, den troe bedinari foe na kownoekondre, de soboen netleki a ten di psa na mindri foe féjanti. Den barwrokoman disi de en kotoigi. — Jesaja 43:10-12.
Opo gi a bevoegtoe foe wi leki en bedinari
11. Soema ben tjalansi na bevoegtoe foe Jehovah Kotoigi leki kownoekondre-bedinari di Gado ben ordineer?
11 Den troe geordineerde kownoekondre bedinari foe Gado ben moe opo feti alaten gi na bevoegtoe foe den foe na diniwroko. Disi séker de so gi Jehovah Kotoigi na ini na di foe twenti jarhondro disi. Sma ben feti na bevoegtoe foe den leki officieel geordineerde bedinari foe Gado èn ben si dati leki a no abi waarde. Soema? Spesroetoe den sma di ben studeri komoto foe den theologis héskoro foe na kristenheid, di ben kisi wan papira foe ordinatie èn ben tron kerkileriman di den e pai. Den e si densrefi leki sma di kisi officieel leri èn di de bevoegtoe èn di de nofo bekwaam foe de pesroetoe professionele bedinari foe na Gado foe na bijbel.
12. Sortoe fosi jarhondro kristen di ben teki fesi sma ben tjalansi na bevoegtoe foe en, èn fa joe ben moesoe loekoe wan sma di ben tjari wan tra sortoe foe boen njoensoe?
12 Na ini na fosi jarhondro gewoon teri net so wansrefi situwasi ben de. Srefi na ini na Romein distrikt Galacia na skrifiman di ben abi Gado jeje èn di ben skrifi so wan afoe foe den boekoe foe den Kristen Griki Boekoe ben kisi foe doe nanga wan sani pe den ben tjalansi en bevoegtoe leki wan apostel foe Jezus Kristus, bika den ben degedege ini na joisti fasi foe san en ben leri leki kristendom. Disi ben dwengi en foe taigi den Galaciasma: „Ai ferwondroe mi dati oenoe e meki den poeroe oenoe so es’esi foe a ma di ben kari oenoe nanga Kristus no-ferdini boenfasi go na wan tra sortoe foe boen njoensoe. Ma no wan trawan de; soso joe abi séker sma di e meki moeilekheid gi oenoe èn di wani drai na boen njoensoe di e go foe Kristus. Ma awinsi ooktoe wi ofoe wan engel foe hemel ben sa meki bekenti wan sani leki boen njoensoe gi oenoe dorosé foe san wi ben meki bekenti gi oenoe, floekoe moe de na. Soleki wi e taki na tapsé kaba, den e taki now ooktoe agen: Soema a de ooktoe di leki wan sani di den e meki bekenti gi oenoe dorosé foe san joe ben teki, floekoe moe de na.” — Galacia 1:6-9.
13. Foe san-ede meki den Galaciasma no ben degedege na ini na makti di Paulus ben abi?
13 A de troe dati a skrifiman dati, na apostel Paulus no ben leri na kristenleri na a bigin foe persoonlek kontakti di a ben abi nanga Jezus Kristus ofoe den twarfoe apostel foe en. Bakaten Paulus ben pasa wan pisten nanga na apostel Petrus, ofoe Céfas (Johannes 1:42; Galacia 1:18, 19). Ma Paulus ben kan taki gi den kristen na ini Galacia di no ben de stanvastig leki wan verdediging di a ben de wan bevoegtoe bedinari foe na boen njoensoe di Gado ben gi en via Kristus: „Ija, di den ben leri sabi na no-ferdini boenfasi di ben gi na wi, Jakobus nanga Céfas nanga Johannes, den sma di ben gersi den de pilari, ben langa na reti-anoe foe teki prati makandra gi mi nanga Barnabas, sodati wi ben sa go na den naatsi, ma den na den sma di ben besnij” (Galacia 2:9). Den Galaciasma dati ben moe aksi densrefi soboen: Efoe Jezus apostel Petrus, Jakobus nanga Johannes ben erken Paulus leki wan sma di e meki na troe boen njoensoe bekenti, sortoe fundamenti wi abi dan foe feti a boskopoe foe en èn foe drai srefi foe poeroe foe en?
14. Foe san-ede a no de wan vreemde sani dati sma e tjalansi na status di Jehovah Kotoigi abi leki bedinari?
14 Ma san de foe taki foe Jehovah pipel na ini a ten disi? We, efoe wan sma leki Paulus ben de ferprekti foe opo taki gi en bevoegtoe leki bedinari foe Gado foe Kristus, dan foe san-ede wi leki dopoe Kotoigi foe Jehovah di gi densrefi abra ben sa moe ferwondroe dan te sma e feti na status foe wi èn wi sa moe opo feti gi a positsi foe wi leki kownoekondre bedinari? Netleki na ini a tori foe Paulus, dan sowan stré di sma e stré nanga wi no e bewijsi noti.
Srefi a positsi foe Jezus den ben tjalansi
15. Sortoe moro hé makti leki den apostel ben ondrofeni ooktoe dati den ben e tjalansi en leri-bevoegtoe, èn soema leki fa a ben taki ben gi en na bevoegtoe disi?
15 Den ben tjalansi srefi na positsi foe Masra Jezus Kristus èn a ben ondrofeni dati en égi pipel no ben de klari foe erken en leki wan bevoegtoe bedinari foe Gado. Wi e lési foe eksempre: „Di now na [wiwirikampoe]fesa ben psa afoe kaba, Jezus ben go na a tempel èn a ben go leri sma. Den djoe ben ferwondroe dan èn ben taki: ’Fa a man disi kan abi so bigi koni, aladi a no ben studeri tapoe den skoro?’” Jezus ben taki wantewante tapoe den wortoe disi: „San mi e leri no de foe mi, ma de foe en di ben seni mi. Efoe wan sma wani foe doe en wani, dan a sa sabi foe a leri disi ofoe a komoto foe Gado ofoe dati mi e taki foe misrefi. Wan sma di e taki foe ensrefi e soekoe en égi glori; wan sma na a tra sé di e soekoe na glori foe a sma di ben seni en kon de troe, èn onregtvaardikifasi no de na ini en.” — Johannes 7:14-18.
16. Foe san-ede meki den kerki-leriman foe na djoe bribi ben prakseri dati den ben abi bewijsi foe degedege na ini na leri-bekwaamheid foe Jezus?
16 Den kerki leriman foe na djoe bribi ben si Jezus Kristus leki soso wan Galiléasma. Den no ben prakseri dati en, foe di a no ben kisi leri na wan ofoe tra skoro, èn spesroetoe no tapoe wan theologis héskoro, no ben kan lési. Te joe loekoe en leti Jezus ben sori kaba dati a ben kan lési a tekst foe den Hebrew Boekoe (Lukas 4:16-21). Ma san den djoe foe Judéa nanga Jeruzalem no ben kan teki, ben de dati na fosten temreman disi no ben de wan theoloog èn a no ben de wan sma foe den meester foe wet, Fariséman, èn Sadducéman foe na naatsi foe den. Foe san-ede dan na ini publiki a ben moe taki dati a sabi san den Hebrew Boekoe ben taki èn fa den kon troe èn foe san-ede a ben taki nanga someni makti? Dati ben de a sani foe san-ede den djoe dati na jejefasi ben kon dofoe foe jere na sten foe na waarheid foe Gado. Den ben abi toemsi bigi fasi foe teki san wan sma ben abi foe taki di no ben studeri komoto foe wan theologis héskoro.
„Den kisi leri foe Jehovah”
17. Den djoe kerkileriman ben loekoe psa sortoe Leriman foe na tori foe Jezus Kristus èn sortoe studenti Jezus ben de?
17 Den djoe disi di ben abi grontapoe koni ben loekoe psa na Sma di ben gi Jezus Kristus leri troetroe. Ija, a koni foe Jezus leki leriman ben komoto foe „na Moro Bigi Leriman foe ala sma”, Jehovah Gado! (Job 36:22, Today’s English Version). Di Jezus ben sori na tapoe Gado na ini a positsi disi, a ben taki: „Te oenoe ben opo na Manpikin foe libisma kaba poti a hé, dan oen sa sabi dati mi de a sma, èn dati mi no e doe noti foe misrefi, ma den sani disi mi e taki soleki na Tata e leri mi” (Johannes 8:28). Soboen Jezus ben bewijsi dati a ben de a moro boen studenti foe na universele skoro foe na Moro bigi Leriman di de. Disi ben de leki wan grani gi na Sma di ben gi en leri. A no de wan ferwondroe sani dati den Nazarethsma ben taki foe den fosten fotoman: „Pe a man disi kisi na koni dan nanga den krakti wroko disi?” — Matteus 13:54.
18. (a) Sortoe leriman wi abi fanowdoe? (b) San Jezus ben taki foe na Moro Bigi Leriman èn den sma di ben kisi leri foe en?
18 Foe ferstan na bijbel, wi wani abi na moro boen leriman di de, èn so wan leriman wi abi ooktoe. Na leriman dati de na inspirator foe na boekoe dati di no wan tra boekoe kan pasa. Jezus ben taki gi den sma di na ini a ten di a ben de na grontapoe ben de wan pisi foe na grontapoe orginsaatsi di wi kan si foe a Leriman dati: „No wan sma kan kon na mi, efoe na Tata di ben seni mi, no hari en kon; èn mi sa wiki en tapoe na laatste dé. Na ini den proféti den ben skrifi: ’Èn den alamala sa kisi leri foe Jehovah.’ Ibri sma di ben jere èn ben leri en foe na Tata, e kon na mi” (Johannes 6:44, 45). Jezus ben teki drape wan pisi foe Jesaja 54:13, pe tanapoe: „Èn ala joe manpikin sa de sma di kisi leri foe Jehovah, èn na vréde foe joe manpikin sa de psa marki.”
19. Den „manpikin” foe soema ben sa kisi leri foe Jehovah?
19 Ma wi e aksi: Ma den „manpikin” foe soema ben sa de „sma di kisi leri foe Jehovah”? Na proféti pramisi disi ben gi na wan agersi oema, wan mama foe a ten di boo kon foe bepaalde manpikin ofoe pikin. Disi de na „oema” di den e taki nanga en na ini Jesaja 54:1 pe tanapoe: „’Opo wan prisiri-babari, joe oema di no ben meki pikin! De nanga prisiri nanga prisiri-babari èn brétifasi, joe di no ben sabi pen foe meki pikin, bika den manpikin foe na wan di de en wawan de moro foeroe leki den manpikin foe na oema di abi wan masra-éginari’, Jehovah ben taki.”
20. San kristensma di gi densrefi abra na Jehovah moe tan doe te joe e loekoe 2 Korinte 13:5 èn fa disi abi foe doe nanga na bevoegtoe èn bekwaamheid foe den leki kownoekondre-bedinari?
20 Foe di Jehovah de wan sma di e taki nanga na „oema” disi èn di ben sa de na Leriman foe en „manpikin”, dan a moe de na agersi Masra foe en èn na oema moe de wan oema di joe teki gersi nanga na hemel organisaatsi. Den „manpikin” ofoe pikin de studenti foe na „moro bigi leriman foe ala sma”. A no de foe taki dati a de wan tranga fanowdoe sani dati den manpikin dati, den salfoe bakaman foe Jezus nanga den kompe foe den, „na bigi ipi”, moe poti alaten nomo na leri di Jehovah gi ini den libi (Openbaring 7:9). Dati de séker wan fasi foe poti prakseri tapoe na fermane foe Paulus: „Tan tesi efoe joe de na ini na bribi tan bewijsi dati den feni joe boen” (2 Korinte 13:5). Efoe dopoe kristen di gi densrefi abra e tan doe disi èn e bewijsi dati den de faja studenti foe na moro bigi leriman, dan seker den sa abi na fanowdoe koni foe de Jehovah bevoegtoe kownoekondre bedinari. Wi sa go loekoe now fa bedinari foe Gado e bewijsi dati den abi na bevoegtoe nanga koni foe doe dati.
San joe ben sa taki?
◻ Fa joe kan bewijsi dati Jehovah abi bedinari na grontapoe?
◻ San na Jeruzalem di „den heiden ben sa trapoe” e agersi?
◻ San Jezus ben moe doe foe di den naatsi no e loekoe a kownoekondre na wan ai?
◻ Foe san-ede a no de wan freemde sani dati na status foe Jehovah Kotoigi leki bedinari foe na evangelie sma e tjalansi en?
◻ San den djoe kerki leriman ben loekoe psa di den ben tjalansi na koni foe Jezus foe leri sma?
[Prenki na tapoe bladzijde 2]
Netleki fa Jehovah ben gebroiki Daniël foe meki en kroetoe bekenti na sma tapoe a fesa foe Belsazar di ben e njan èn dringi pasa marki, na so en bedinari e meki now wan tranga fanowdoe boskopoe bekenti