Trowstoe di komoto foe na Gado foe vréde
„Tan trowstoe makandra . . . nanga den wortoe disi.” — 1 THESSALONIKA 4:14.
1. Foe sortoe begi foe Paulus e kon na krin na belangstelling foe en gi vréde?
NA APOSTEL Paulus ben angri srefsrefi dati na kristen gemeente ben sa abi vréde. Foe dat’ede meki tinadri foe den brifi foe en, so leki den dati ben tan kibri na ini den santa Boekoe di Gado ben meki skrifi nanga en jeje, e bigin nanga wan begi dati den sma di a skrifi en brifi gi, ben sa kan prisiri ini vréde di komoto foe Gado. Ini a jongoe gemeente ini Thessalonika Paulus ben skrifi foe eksempre: „Meki no-ferdini-boenfasi nanga vréde kon de wan pisi foe oenoe.” Na a kaba foe na srefi brifi dati a e begi tranga foe a sani di e kon now: „Meki na Gado foe vréde santa oenoe dorodoro. èn meki na jeje èn na sili èn na skin foe oenoe, brada, tan kibri sondro mankeri ini nowan fasi, tapoe wan sondro fowtoe fasi na a denoja foe wi Masra Jezus kristus.” — 1 Thessalonika 1:1; 5:23.
2. (a) Sortoe brok’ede Paulus ben sori gi na gemeente? (b) Fa kristen owroeman ini a ten disi kan waka na baka na eksempre foe Paulus?
2 Paulus nanga en kompe no ben kibri densrefi ma ’ben wroko èn ben naki den skin’ a mindri den njoen bribiwan dati. Paulus ben taki: „Wi ben tron na ini oen mindri leki wan sma di abi switifasi, soleki te wan mama e dodoi en égi pikin di a e gi bobi. Foe di wi abi safoe lobifasi gi oenoe, meki no wawan nanga ala prisiri wi ben prati na boen njoensoe foe Gado gi oenoe, ma ooktoe wi égi sili, bika oenoe ben kon de wan sani di wi lobi.” Wi no kan tesi na ini den wortoe disi na waran brok’ede, na troetroe lobi di meki dipi roetoe èn di Paulus ben abi gi na gemeente dati? Ija, wi e feni a lobi disi baka na ini a sortoe foe lobi di kristen owroeman e sori ini a ten disi ini sowan 50.000 gemeente foe Jehovah Kotoigi na ini a heri grontapoe. — 1 Thessalonika 2:7-9; Johannes 13:34, 35; 15:12-14.
3. (a) Fa Timotéus ben kan de wan blesi gi na gemeente ini Thessalonika? (b) Nanga san disi e akroederi na ini a ten disi?
3 Na Tesiman, Satan, ben tjari benawtoe kon tapoe den kristen dati ini Thessalonika. Foe dat’ede meki Paulus ben seni Timotéus go na den ’meki den standvastig’ èn foe trowstoe den ini a belang foe den bribi. Timotéus ben drai go na Paulus baka na ini Athene nanga wan enthousiast bericht foe na getrowfasi nanga a lobi foe den. Den alamala ben kisi trowstoe srefsrefi di den ben kon sabi foe na bribi èn na soifri-retifasi foe makandra, èn den ben tan begi Gado foe poti a tapoe san ben mankeri (1 Thessalonika 3:1, 2, 5-7, 10). Ooktoe disi wi e feni na ini na disiten theokratis seti, foedi ooktoe now den opziener di e waka loekoe den gemeente e bow den, srefi drape pe lanti tapoe a wroko foe Johovah Kotoigi ofoe den e ferfolgoe den nanga bita-ati. — Jesaja 32:1, 2.
’Na en denoja’
4, 5. (a) Sortoe tranga begi Paulus e begi dja, èn foe san-ede disi moesoe de foe spesroetoe belang gi oenoe ini a ten disi? (b) Foe san-ede a ten foe wi wani taki foeroe spesroetoe?
4 Na apostel Paulus e bosroiti na pisi disi foe en brifi nanga na tranga begi: „Meki na Masra meki oen kon gro, ija, meki oen de psamarki na ini den lobi gi makandra èn gi ala sma, soleki wi ooktoe lobi oenoe; foe meki oen ati standvastig, sondro fowtoe ini santafasi na fesi foe wi Gado èn Tata na a denoja foe wi Masra Jezus nanga ala den santawan.” — 1 Thessalonika 3:12, 13.
5 Paulus ben loekoe dja go na ini a fara ten di e kon, na a ten foe Jezus „denoja èn na bosroiti foe na seti foe sani”, te „na Manpikin foe libisma sa kon ini en glori èn ala engel nanga en”. Wi hemel Kownoe ben kon na ini 1914. Komoto foe en glori troon di no de foe si Jezus e kroetoe now den naatsi èn den pipel foe na grontapoe, èn a e prati poeroe foe den mindri den sakafasi sma di joe kan teki gersi nanga skapoe, sodati libilibi den sa tjari den psa na „bigi benawtoe” èn den sa kisi tégo libi tapoe wan paradijsgrontapoe. — Mattéus 24:3-21; 25:31-34, 41, 46.
Wet di de foe a boen foe wi
6. Wi moe poti jesi na sortoe fermane foe Paulus?
6 Joe de wan sma di e proeberi foe doro a marki foe tégo libi. Efoe dati de so, dan joe moe poti prakseri tapoe san Paulus e skrifi dja gi den Thessalonikasma: „Te foe kaba, oen brada, wi e aksi èn fermane oenoe na Masra Jezus dati, soleki oenoe ben kisi leri foe oenoe foe na fasi fa oen moesoe waka èn moesoe plisi Gado, soleki fa oenoe e doe dati kaba te joe loekoe en boen, oenoe tan doe en moro boen. Bikasi oenoe sabi den wèt di oenoe ben gi oenoe nanga jepi foe Masra Jezus” (1 Thessalonika 4:1, 2). San de wantoe foe den „wèt” di Paulus e poti krakti dja a tapoe?
7. (a) Sortoe prenspari „wèt” e gi dja? (b) Foe san-ede wi, di kisi Gado jeje, noiti moe meki na de di wi de na ai kon slap?
7 Na fosi wèt abi foe doe nanga wan boen moraal. Paulus e taki nanga bradikanti foe en mofo: „Disi Gado wani: na kon santa foe oenoe, dati oen tan farawe foe hoeroedoe; dati ibriwan foe oenoe sabi fa foe kisi na ini santafasi nanga respeki en égi patoe, no na ini gridi seks lostoe, soleki disi de ooktoe a geval na den naatsi di no sabi Gado.” Kolokoe dati wi ben leri „sabi” Gado nanga en Manpikin, Jezus Kristus èn wi e proeberi foe hori na tego libi stéfi. Fa a ben sa de wan sjen sani efoe oen ben meki den ben hari oenoe go baka ini na grontapoe swampoe foe hoeroedoe! Ma na wan sari sani foe taki dati sowan di jari langa ben horidoro na ini concentratiekampoe nanga straf’oso, ofoe di wan bigi pisi foe a libi foe den ben dini fajafaja leki zendeling, ben gi pasi dati a Tesiman bakaten ben kisi den di den ben meki a tan di den ben moe tan na ai na ini na tori foe moraliteit ben kon slap. Meki wi, di kisi Gado santa jeje, „no sari” a jeje dati noiti foe di wi e doe seks hoeroedoe! — 1 Thessalonika 4:3-8; Johannes 17:3; 1 Korinte 10:12, 13; Efese 4:30.
8, 9. (a) San na „brada lobi”? (b) Fa wi kan kweki sowan sortoe lobi, èn sortoe winimarki disi e tjari kon?
8 Na tra ’wèt’ foe Paulus di e kon abi foe doe nanga fil-a-del-fi-a, „brada lobi” (1 Thessalonika 4:9, 10). Disi de wan spesroetoe sori foe na lobi di abi en roetoe tapoe gronprakseri, aga-pe, di Paulus e rikomanderi waranwaran no wawan na ini kapitel 3 vers 6 nanga 12, ma ooktoe dja na ini vers 9. Fil-adel-fi-a de wan toemsi safoe lobifasi soleki disi, a de krin, ben de a mindri Jezus nanga Petrus, èn a mindri David nanga Jonathan (Johannes 21:15-17; 1 Samuël 20:17; 2 Samuël 1:2). Fil-a-del-fi-a e kan moksi nanga aga-pe foe bow wan krosbé matifasi soleki dati e de foe si foe eksempre ini na prisiri demakandra mindri makandra di foeroe kotoigi foe Jehovah makandra e njan boen foe en na ini a pionierdienst èn na ini tra theokratis activiteit.
9 Paulus e taki: ’Tan doe en moro boen.’ Wi kan meki na brada lobi disi kon moro bigi alaten. Na toemsi boen égifasi disi de spesroetoe pasamarki te owroeman èn dinari na ini a diniwroko e teki fesi fajafaja na a Kownoekondredienst. Efoe ala sma ini na gemeente abi foeroe foe doe ’foe soekoe na Kownoekondre fosi’ dan trobi di e kon foe libisma onvolmaaktifasi ede, toeka na mindri persoonlekheid èn tra problema no e de so prenspari. Meki wi hori wi ai alaten na tapoe a marki. — Matt. 6:20, 21, 33; 2 Korinte 4:18.
10. Fa wi leki kristen „kan waka tapoe fasi di fiti”?
10 Paulus e tjari na ini a tori disi ete wan ’wèt’ kon a fesi — dati wi moe poti en na wi fesi foe libi wan tiri libi, foe boemoei nanga wi égi afersi èn foe wroko nanga wi anoe. Te wi na sowan fasi ’e waka ini wi ala dé libi tapoe wan fasi di fiti’ èn sori lobi di abi en gron tapoe gronprakseri èn brada lobi, dan den sa sorgoe ini ala san wi abi fanowdoe. — 1 Thessalonika 4:11, 12; Johannes 13:35; Romeini 12:10-12.
Trowstoe nanga jepi foe na opobaka-howpoe
11. (a) Foe san-ede Paulus e tjari now na tori foe opobaka kon na fesi? (b) Sortoe krakti na rai di Paulus e gi moe abi tapoe wi?
11 Na apostel e poti moro fara oen prakseri na tapoe na toemsi moi opobaka-howpoe. Ma foe san-ede Paulus tjari a tori disi kon a fesi foe taki? A ben wani tranga en brada foe ferdrage na ferfolgoe di den ben sa kisi na ini a krosbé ten di boo kon. Den ben de fesi a kefar foe lasi den libi. A gersi dati na a ten dati wantoe ben go sribi na ini dede. Den kompe bribiman foe den ben abi trowstoe fanowdoe (1 Thessalonika 2:14-20). Foe di den ben e prakserl dati na denoja foe Kristus ben de leti na baka-oekoe foe kon, meki den ben aksi densrefi san ben sa psa nanga den sma di ben dede kaba. San Paulus ben skrifi now, no wawan de foe gi trowstoe na den sma di ben lasi lobi kristenwan na ini dede, ma a de ooktoe wan dek’ati foe horidoro te na a kon foe Jehovah „dé” Paulus rai moe jepi wi alamala foe sori balansfasi na jejefasi, aladi wi e go doro foe meki na boen njoensoe bekenti èn e wakti na troetroe kaba foe na seti foe sani disi. — 2 Thessalonika 1:6-10.
12. Sortoe troetroe trowstoe wi kan abi te wan sma di wi lobi, dede, èn foe sortoe fonten wi e kisi dati?
12 Paulus e taki: „Oen brada, wi no wani foe oen tan don ini a tori foe den di go sribi ini dede, sodati oen no sari, leki den trawan di no abi howpoe” (1 Thessalonika 4:13). Fa wan sma kan kisi trowstoe nanga vréde foe jeje foe na opobaka howpoe! Sowan féfi jari na baka Paulus ben sa bigin en di foe toe brifi gi den kristen ini Korinte nanga den wortoe di e kon: „Meki no-ferdini boenfasi èn vréde kon de gi oenoe foe Gado, wi Tata èn Masra Jezus Kristus. Blesi moe de gi na Gado èn Tata foe wi Masra Jezus Kristus, na Tata foe den safoe sar’ati èn na Gado foe ala trowstoe, di e trowstoe oenoe ini ala wi benawtoe, sodati wi kan trowstoe den di de na ini wan benawtoe nanga jepi foe na trowtoe nanga san Gado ben trowstoe wi srefi.” — 2 Korinte 1:2-4.
13, 14. (a) Foe san-ede Paulus ben wani dati kristensma ben sa sabi san e psa na a ten foe dede? (b) San na bijbel e meki oen si na ini a tori foe den dedewan?
13 Na apostel no ben wani dati wi no ben sa sabi foe na toestand foe den dedewan. Te foe kaba wan bigi fadon komoto na bribi ben sa kon na mindri sokari kristensma, sodati den ben sa drai go na filosofie foe Babylon nanga grikisma. Den sortoe sma disi di fadon komoto na bribi ben sa teki na leri foe Plato, dati na sili no e dede èn now dati de wan fundamenti leri ini na heri grontapoemakti foe falsifasi foe bribi. Na sfeer foe kibri tori lontoe na „libi ini a ten di e kon”, ofoe dati sa de now ini hemel, na vagevuur ofoe wan presi pe joe e kisi skin-ati, no e gi troetroe trowstoe. Moro fara, na dede di a sili no sa dede de kontrari na leri foe na opobaka bika fa wan sma kan wiki kon baka na libi efoe a sili no e dede?
14 Paulus e skrifi dja „foe den di e sribi ini dede”. Ija, „sribi”. Wan sma di e sribi, no sabi not’noti èn no kan doe wroko. (Teki gersi Prékiman 9:5, 10.) Na wan bepaalde okasi na ini a diniwroko foe Jezus a ben taki dati Lazarus ben „go rostoe” èn dati en, Jezus, „ben sa wiki en komoto foe na sribi”. Den discipel foe Kristus no ben ferstan den wortoe disi, „Jezus ben taki krin gi den: ’Lazarus dede.’” Den sisa foe Lazarus Martha nanga Maria, ben kisi trowstoe foe na opobaka howpoe èn Jezus ben gi den moro trowstoe ete. Ma o tranga a bribi foe den ben moe kon tranga di Jezus ben wiki en mati, di ben dede fo dé kaba komoto foe na dede sribi! — Johannes 11:11-14, 21-25, 43-45.
15. (a) Fa na howpoe foe wi tapoe na opobaka o kon tranga? (b) Fa wi e kisi jepi foe kisi wi balansifasi baka te wan sma di wi lobi dede?
15 Na wondroe dati, makandra nanga den tra wroko di Jezus ben doe foe di a ben wiki dedesma, èn spesroetoe dati Jehovah ben wiki Jezus srefi, ala den sani disi di ben psa èn di ben abi wan boen fundamenti e tranga wi fertrow na ini na moi opobaka howpoe (Lukas 7:11-17; 8:49-56; 1 Korinte 15:3-8). A de troe dati dede e tjari sari nanga watra-ai kon èn a de moeilek foe kisi wi balansi te wan sma di wi lobi no de moro. Ma fa wi e kisi trowstoe nanga tranga foe na djaranti dati na Soeverein Masra Jehovah foe ’tego sa swari na dede èn séker sa figi den watra-ai poeroe foe ala fesi’! (Jesaja 25:8; Openbaring 21:4) Wan foe den moro boen dresi gi sari de foe tan abi foeroe foe doe na ini na dienst foe na Gado foe vréde èn foe tjari na Kownoekondrehowpoe di e waran na ati èn di wisrefi teki nanga foeroe tangi. — Tori 20:35.
Volgorde foe na opobaka
16, 17. (a) Fa na „laste féanti” sa poeroe a pasi? (b) Sortoe volgorde foe na opobaka Paulus e tjari kon now a fesi?
16 Wi e bribi tranga dati Kristus, di den ben wiki leki „na fosiwan” foe den dedewan èn now de na a reti anoe foe Gado na hemel e meki Jehovah glori Kownoekondreprakseri kontroe dorodoro (Hebrewsma 6:17, 18; 10:12, 13). Soleki Paulus e taki ini wan tra brifi: „En (Jezus Kristus) moe tiri leki kownoe te leki Gado poti ala en féanti na ondro en foetoe. Leki laste féanti dan dede sa poeroe a pasi.” Fa dati sa psa? Foe wan pisi dati sa psa nanga jepi foe na opobaka foe den dedewan èn na poeroe foe den bakapisi foe na dede foe Adam. Na apostel leti fosi ben taki en na a fasi disi: „Foe di na dede de nanga jepi foe wan sma, na so ooktoe na opobaka foe den dedewan de nanga jepi foe wan sma. Bika netleki fa alamala e dede na ini Adam, na so ooktoe, alamala sa kon na libi na ini Kristus. Ma ibri wan sma sa de ini en égi rangorde: Kristus na fosiwan, baka dati den di de foe Kristus, na ini a ten foe en de-noja” (1 Korinte 15:20-26). Paulus e sori moro fara na a volgorde disi foe na opobaka na ini en fosi brifi gi den Thessalonikasma nanga den wortoe:
17 „Efoe wi e bribi dati Jezus dede èn opobaka, na so Gado sa tjari den dedewan kon nanga en nanga jepi foe Jezus. Bika disi wi e taigi oenoe nanga Jehovah wortoe, dati wi, den libiwan di e tan na libi te na de-noja foe Masra, no sa go na fesi foe den wan di sribi; bika Masra srefi sa saka komoto foe hemel nanga wan komanderi kari, nanga wan sten foe wan aartsengel èn nanga trompeti foe Gado, èn den di ben dede ini wanfasi nanga Kristus sa opobaka fosi.” — 1 Thessalonika 4:14-16.
18. Oten den salfoewan di ben e sribi na ini dede kisi opobaka?
18 Baka 1914, na ini a ten foe Jezus „de-noja” ini Kownoekondremakti, a e gi leki na aartsengel a hemel komando dati den „di de ini wanfasi nanga Kristus” moesoe kon makandra. Foe sofara di den salfoewan disi „e sribi na ini dede”, dan leki nanga wan trompeti babari den e kisi kari foe go ini a jeje opobaka foe den a ini hemel. Na Wachttoren wan boen langa ten kaba e taki dati na opobaka disi foe dede ben bigin gi den salfoe kristen na ini a jari 1918.
19. Oten èn fa den wan di tan abra „sa hari go na ini wolkoe”, èn nanga sortoe marki?
19 Ma fa a de nanga den salfoe kristen di tan abra na grontapoe, èn di e de now ini nomroe wan groepoe di e kon moro pikinso foe moro mendri leki tindoesoensma? Ooktoe den moe tan getrow te na a kaba foe den libi na grontapoe. Netleki na ini a ten foe Kristus denoja na ini den mindri, dan Paulus e skrifi: „Baka dati dan wi, den libiwan, di e tan abra, moe hari go nakandra nanga den na ini wolkoe go miti Masra ini na loktoe; èn na sofasi wi sa de alaten nanga Masra” (1 Thessalonika 4:17; teki gersi nanga Openbaring 1:10). Na sofasi na a joisti ten dan ala 144.000 e kisi opobaka foe dini makandra nanga a Lam, Jezus Kristus, tapoe na hemel bergi Sion leki priester èn kownoe. „Disi na a fosi opobaka” (Openbaring 14:1, 4; 20:4, 5). Ma san de ini a ten di e kon gi den miljardmiljard sma foe na libisma-famiri di de now na ini den grebi?
20, 21. (a) San de na fesi e kon gi den miljardmiljard sma foe na libisma-famiri di de na ini den grebi? (b) Sortoe groepoe noiti sa komoto foe grontapoe foe di den no dede, èn foe san-ede? (c) Sortoe prisiri ferwakti aparti memre foe na groepoe disi abi efoe den mag foe dede?
20 Ala di Paulus no e taki spesroetoe foe den na ini en fosi brifi gi den Thessalonikasma, tokoe Openbaring 20:12 e djaranti wi dati „den dedewan, den bigiwan èn den pikinwan” sa kisi opobaka tanapoe na fesi na kroetoestoeroe foe Gado (Loekoe ooktoe Johannes 5:28, 29.) Ma ini a ten disi „wan bigi ipi” di de foe miljoenmiljoen sma, tjari kon makandra kaba na fesi a troon dati. Leki groepoe den sa psa libilibi na „bigi benawtoe” di de foe kon. Na Lam e tjari den go a sabana èn na „fonten foe watra foe libi”, sodati noiti den abi foe gwe libi na grontapoe foe di den o dede. Ma foe a libi jari ofoe sani di o psa di joe no kan si a fesi, meki wan nomroe foe den kande sa dede na ini a ten foe na „de-noja” foe Masra (Openbaring 7:9, 14, 17; Prékiman 9:11). San e psa nanga den?
21 Na prisiri howpoe foe wan grontapoe opobaka e wakti ala den „tra skapoe” disi (Johannes 10:16). A bribi èn den wroko foe den netleki di foe Abraham foe owroeten, tjari den kon kaba na ini wan toestand foe matifasi. Netleki den man nanga oema di e frede Gado èn di Hebrewsma kapitel 11 e taki foe den, na so den disiten „tra skapoe” ben ferdrage tesi. Na wan logis sani dati den ooktoe sa kisi wan „moro betre opobaka” sondro degedege, biten na ini a pisten di e bigin baka Armageddon (Hebrewsma 11:35; Jakobus 2:23). Ija, ibriwan sma di ini bribi ben gi densrefi njanjan ’nanga Jezus meti èn dringi en broedoe’, sa abi wan prati na ini na kon troe foe en pramisi: „En abi tego libi, èn mi sa wike en na tapoe a laste dé”. — Johannes 6:54; Romeini 5:18, 21; 6:23.
22. Fa wi kan trowstoe makandra?
22 Baka di Paulus ben taki foe na moi opobaka howpoe, a ben fermane wi nanga den wortoe: „Tan trowstoe makandra nanga den wortoe disi” (1 Thessalonika 4:18). Moro fara a e taki foe prenspari afersi di abi foe doe nanga a „de-noja” foe oen Masra Jezus (1 Thessalonika 5:23). San na den afersi disi? Loekoe na artikel „Vréde foe Gado Oten?”
Leki wan samenvatting foe loekoe san wi ben leri
◻ Sortoe begi Paulus e begi foe na boen foe kristen?
◻ Sortoe „wèt” na apostel e gi foe na boen foe wi?
◻ Fa a Wortoe foe Gado e trowstoe wi ini a tori foe den dedewan?
◻ Sortoe volgorde foe na opobaka Paulus e ferteri foe en?