’A babari fu den go tapu na heri grontapu’

NA INI Psalm 19 David e singi fu na glori fu den sani fu stof di Gado meki èn a e sori morofara fu en waran warderi gi Yehovah wet, fermane, komando, gebod, nanga krutubosroiti. Ooktu na apostel Paulus e sori warderi gi den sani disi. A ben teki na Psalm disi èn ben tyari en kon tapu na tumsi prenspari wroko fu tru kristen. Na so a ben taki fu den: „A babari fu den go tapu a heri grontapu pe sma e libi.” — Romeini 10:18.

Den „wortu” disi de now gi na heri libismafamiri tumsi prenspari, bika Yehovah krutu-bosroiti ibri momenti kan tyari kon na tapu na goddelowsu seti fu sani na grontapu (Zefanja 2:2, 3; 3:8). Libisma seiker mu kon sabi fu na bun nyunsu fu Yehovah Kownukondre. Pe yu e luku ooktoe now, alape yu sa si pratifasi, kruktudu, ogridu, hurudu èn osofamiri di panya. O ya, sma e taki fu vrede, ma den bigi grontapu makti e tan meki moro kefarlek fetisani, aladi moro kondre di abi kernfetisani e kon nomo. Den toestand na grontapu de wan krin kontru fu san Paulus ben skrifi fu en na ini 2 Timóteus 3:1-5 fu den „lasti dei”.

Suma sa kisi ferlusu fu na kefarlek situwâsi disi èn fa? Paulus e gi wan krin piki tapu disi te a e teki na profeititori na ini Yoël 2:32 e taki: „Ibriwan sma di e kari na nen fu Yehovah sa kisi ferlusu” (Romeini 10:13). Ma fa den folku fu grontapu ’kan kari na nen fu Yehovah?’ Furu sma no sabi srefi taki Yehovah na a nen fu Gado! Fa den sma disi kan kisi yepi? Paulus e piki taki preikiman mu seni go na den. — Romeini 10:14-16.

Koloku taki Yehovah seni en Kotoigi go fu ferteri den sma taki Gado Kownukondre de krosbei kaba èn taki na Kownukondre disi sa wani taki ferlusu gi den sma di leri sabi Gado nanga en Manpikin, Yesus Kristus, fu kisi tego libi (Yesaya 43:10, 12; Lukas 21:25, 26, 31; Yohannes 17:3). A bun nyunsu disi e meki bekenti ’tapu na heri grontapu’.

Milyunmilyun sma e poti prakseri tapu na preiki disi, soleki e kon na krin ini na totaal fu 9.201.071 sma na a heri grontapu di ben kon makandra tapu 1 april 1988 fu memre na dede fu Yesus. Na ini a yari dati na a heri grontapu wan heimarki fu 3.592.654 Kownukondrepreikiman ben de, aladi 239.268 nyun bedinari ben kisi dopu — wan gro fu 3.6 procent te yu sa teki disi gersi nanga a yari na fesi. Soleki wi sa skrifi moro fara na ini a tijdschrift disi, dan getrow zendeling ben yepi fu poti na fondamenti fu na gro disi fudi den ben teki a moro bigi pisi fu na wroko di ben du na a bigin a tapu den. Ma ini den yari di no psa so langa ete dan hondrohondro dusun Kotoigi ini na presi pe den e libi — den sma di ben poti bribi ini san den ben yere — ben meki na pionier yeye de ooktu wan pisi foe den, sodati aladei ’den ben meki na bun nyunsu fu bun sani bekenti’. Gemiddeld 455.561 Kotoigi ben gi rapport leki pionier, èn te yu bereken en abra na heri yari dan dati de wan gro fu 4.4 procent. Disi ben abi leki bakapisi taki ala nanga ala 785.521.697 yuru ben gi na a preikiwroko, moro leki na dobru fu na totaal nomru yuru soso siksi yari psa kaba.

Na tabel tapu den fo bladzijde fu na tijdschrift disi e sori finifini na bigi fun na preikiwroko disi. Wi e kari yu fu studeri na bericht disi fu na kristen activiteit na ini 1988 na ini na heri grontapu.

[Raportu na tapu bladzijde 4-7]

1988 DINIWROKO RAPORTU FU YEHOVAH KOTOIGI NA HERI GRONTAPU

(Luku a tijdschrift)