Kotoygi gi Yehovah èn no kon weri
„Poti ay bun na tapu a sma di ben frudrage so wan genstaki fu na sey fu sondari . . . , so taki unu no kon weri èn broko saka na ini unu sili.” — HEBREW SMA 12:3.
1, 2. Sortu buweysi di ben overtoygi en disipri Yeyses ben gi, taki a ben opo baka?
„MI SI Masra!” Nanga den fruwondru wortu disi, Mariya Magdalena ben tyari a nyunsu kon fu Yeyses opobaka (Yohanes 20:18). Gi Krestes disipri, di ben sari a fesi fu a dede fu en, dan disi ben marki na bigin fu fotenti dey di ben furu nanga span sani di ben o psa .
2 Yeyses no ben wani libi no wan tweyfri na ini na prakseri fu en disipri taki a ben e libi trutru. Fu dati-ede meki Lukas e taki: „[Yeyses] ben sori . . . nanga furu positief buweysi taki a ben e libi, fu di na ini a pisiten fu fotenti dey den si en” (Tori fu den Apostru 1:3). Iya, na wán okasi „a ben sori en srefi na moro leki feyfi hondro brada na a srefi ten.” (1 Korente sma 15:6). Fu tru, nowan degedege no de moro taki Yeyses ben e libi!
3. Sortu aksi di e go fu a Kownukondre Yeyses disipri ben aksi en, èn fu san-ede den fruwondru fu a piki fu en?
3 Yeyses disipri ben prakseri na a ten dati soso na wan grontapu „kownukondre fu Gado”, wan kownukondre di ben meki kon bun baka gi Israèl (Lukas 19:11; 24:21). Fu dati-ede den ben aksi Yeyses: „Masra, yu e meki na kownukondre fu Israèl kon bun baka na ini a ten disi?” A no de fu taki taki na piki fu en ben musu meki den fruwondru, bika a ben taki: „A no de na unu fu kon sabi den ten ofu pisiten di na Tta poti na ondro en makti, ma unu sa kisi krakti te santa yeye kon na unu tapu, èn unu sa de kotoygi fu mi na ini Yerusalen so bun na ini heri Yudeya nanga Samariya èn te na a moro farawe kontren fu grontapu” (Tori fu den Apostru 1:6-8). Fa disi ben poti wan tyalensi now gi den disipri! Èn fa disi ben de wan bigi frantiwortu! Fa den ben sa kan du so wan wroko? Na piki ben kon heri esi na tapu wan fruwondru fasi.
Teki na tyalensi
4. Fruteri san ben psa tapu na Penkstrifesa.
4 Lukas e fruteri: „Na a dey fu na Penkstrifesa den ben de alamala tapu na srefi presi èn komoto fu heymel yu ben abi wan slag so wan bbari leki di fu wan steyfi winti di e hari psa èn a ben furu na heri oso pe den ben sdon. Èn den ben kon si tongo leki faya di ben prati èn na tapu ibriwan fu den wán ben poti en srefi, èn den alamala ben kon furu nanga santa yeye èn ben bigin fu taki na ini difrenti tongo, so leki a yeye ben gi den fu taki.” So tranga na bbari ben de, taki a ben hari a prakseri fu bun furu dyu di ben de na ini Yerusalen fu na fesa ede. Den ben fruwondru fu yere ’sani fu den bigi wroko fu Gado na ini den eygi tongo’. — Tori fu den Apostru 2:1-11.
5. Te na sortu marki na profeytitori fu Yeyses na ini Tori fu den Apostru 1:8 ben kon tru esi-esi?
5 Petrus no ben lasi ten fu hori wan dynamis lezing pe sondro degedege a ben buweysi taki „Yeyses na Nasaret sma”, di den ben anga na wan postu, ben de na „Masra” di David ben taki fu en a fesi nanga den wortu disi: „Yehovah ben taygi mi Masra: ’Sdon na mi reti-anu sey, teleki mi poti yu feyanti leki wan futubangi gi yu futu.’” Den wortu disi di sutu den arkiman fu Petrus na ati ben meki den aksi: „Unu man, unu brada, san wi musu du?” Tapu disi Petrus ben gi den tranga: „Abi berow, èn meki ibriwan fu unu teki dopu na ini na nen fu Yeyses Krestes fu kisi pardon fu unu sondu.” San ben de na bakapisi! Dri dusun sma ben teki dopu. (Tori fu den Apostru 2:14-41). Na gi fu kotoygi ben gi kba na ini Yerusalen. Bakaten a ben panya go na ini heri Yudeya, dan na ini Samariya, èn te fu kba „te na a moro farawe kontren fu grontapu”. So esi na gro fu na kownukondre preyki ben waka, taki na ini wan sani fu 60 G.T. na apostru Paulus ben kan taki taki na bun nyunsu „ben preyki na ini na heri mekisani di de na ondro heymel”. — Kolose sma 1:23.
Gro fu na Kownukondre èn frufolgu
6, 7. (a) Fa a gro fu a Kownukondre nanga frufolgu ben go anu nanga anu ini na fosi yarihondro? (b) Sortu tranga fanowdu ben kon a mindri den kresten na Yerusalen, èn fa na fanowdu disi ben lusu?
6 No langa baka Penkstri fu 33 G.T. Yeyses disipri ben abi reyde fu memre den wortu fu en: „Wan srafu no moro bigi leki en meystri. Efu den frufolgu mi, den sa frufolgu unu so srefi” (Yohanes 15:20). Den dyu tiriman ati ben bron srefisrefi di ’na wortu fu Gado ben tan gro èn na nomru fu disipri na ini Yerusalen ben tan kon moro furu’. Tapu na gron fu falsi kragi den ben ston na disipri Stefanus kiri. Dati ben sori taki a ben de a marki pe furu ben wakti a tapu, bika „tapu a dey dati wan bigi frufolgu ben broko lusu kon tapu a gemeente di ben de na ini Yerusalen; den alamala boyti den apostru ben panya go na den kontren fu Yudeya nanga Samariya”. — Tori fu den Apostru 6:7; 7:58-60; 8:1.
7 Na frufolgu ben saka fu wan pisiten. Ma syatu a baka, Herodes Agrippa I ben meki den kiri na apostru Yakobus. Den ben poti Petrus na ini strafu-oso ma wan engel ben fri en. Bakaten den brada na ini Yerusalen ben kon de na ini mofina fasi, èn konpe bribiman fu tra presi ben musu seni yepi go gi den (Tori fu den Apostru 9:31; 12:1-11; 1 Korente sma 16:1-3). Na a ten fu wan fisiti fu na apostru Paulus na Yerusalen dan na tranga lobi gi kerki ben de krin fu si di wan ipi sma ben bari taki: „Puru so wan sma na grontapu, bika a no fiti fu a tan a libi!” (Tori fu den Apostru 22:22). Den kresten dati na ini Yerusalen nanga Yudeya seyker ben abi furu deki-ati fanowdu fu tan kotoygi kotrow fu na Kownukondre. Yeyses ben pramisi en disipri taki „na santa yeye, di na Tta sa seni na mi nen,” ben sa du wroko leki wan „yepiman” (Yohanes 14:26). Ma fa na Tta ben sa gi now na sortu fanowdu yepi ofu trowstu disi? Na piki ben kon afu nanga yepi fu na apostru Paulus.
Na brifi fu Paulus gi den Hebrew sma
8. (a) San ben meki Paulus skrifi en brifi gi den Hebrew sma? (b) Na sortu pisi fu en brifi wi e go poti wi prakseri èn fu san-ede?
8 Na so wan sani fu 61 G.T. Paulus ben de na ini strafu-oso na ini Rome, ma a ben sabi san ben e psa nanga en brada na ini Yerusalen. Ondro tiri fu Yehovah yeye, a ben skrifi fu dati-ede en brifi di ben de na a yoysti ten gi den Hebrew sma. A furu nanga broko-ede na wan lobi fasi gi en Hebrew brada nanga sisa. Paulus ben sabi san den ben abi fanowdu fu bow na bribi nanga frutrow fu den na ini Yehovah leki den Yepiman. Dan ’nanga horidoro den ben sa kan lon na streylon di ben de a den fesi’ èn kan taki nanga frutrow taki: „Yehovah na mi yepiman; mi no sa frede. San wan libisma kan du mi?” (Hebrew sma 12:1; 13:6) Na a pisi disi fu Paulus brifi gi den Hebrew sma (kapitri 11-13) wi wani poti wi prakseri now na tapu. Fu san-ede? Fu di na situwâsi pe den fositen kresten dati ben tanapu a fesi, de a srefi wan leki di Yehovah Kotoygi na ini na ten disi tanapu a fesi.
9. Sortu afersi di kresten na ini na fosi yarihondro ben miti, e miti disiten kresten so srefi èn fa wwan wi kan kakafutu gi dati?
9 Na ini na pisiten fu wi geslakti dan ipi-ipi sma ben teki na kownukondre boskopu na wan positief fasi fu di den ben gi den srefi abra na Yehovah èn teki dopu leki en kotoygi. Ma nanga a gro disi fu na tru anbegi dan hebi frufolgu kon tu, èn furu kresten ben lasi srefi den libi, so leki dati ben psa nanga Stefanus, Yakobus nanga tra kotrow fosi yarihondro kresten. Fu dati-ede meki a tori de now a srefi leki a ten dati: Suma sa man fu psa na tesi tapu na soyfri retifasi fu den na fesi fu gens di e kon moro nanga moro tapu na Kownukondre boskopu? Boyti fu dati, suma sa man fu psa na kofarlek bigi sani di o psa, te dyonsro na „bigi banawtu” di no abi en speri sa kon tapu na disiten geslakti? (Mateyus 24:21) Na piki de, na den sma di wani ’fu strey na tumusi bun strey fu na bribi’, den sma di ’de fasti na ini bribi’. Na den wan disi te fu kba sa kan taki: „Disi na a wini di wini na grontapu: na bribi fu wi” — 1 Timoteyus 6:12; 1 Petrus 5:9; 1 Yohanes 5:4.
Nyanbun fu kotrow eksenpre
10. (a) San na bribi? (b) San Gado ben feni fu den man nanga uma fu bribi na ini owruten?
10 San na bribi? Paulus e piki: „Bribi na a seyker fruwakti fu sani di sma e howpu a tapu, na krin sori fu trutru sani di no de fu si. Bika nanga yepi fu disi kotoygi ben gi na den man fu owruten” (Hebrew sma 11:1, 2). Dan Paulus e hori baka gi san a taki fu bribi fu di a e sori fa bribi de ini wroko. A e fruteri fu den heymarki ini den libi fu son „man fu owruten”, so srefi fu uma leki Sara nanga Rakab. Fa a de wan sani di e gi deki-ati fu leysi taki ’Gado no e syen gi den, fu den kari en a Gado fu den’! (Hebrew sma 11:16) Gado kan taki a srefi fu wi fu na bribi fu wi? Meki a de so taki na a kba fu ibri dey wi no gi en reyde fu syen gi wi.
11. Fa wi kan nyanbun na ini na ten disi fu na „worku fu kotoygi lontu wi”?
11 Baka di a fruteri fu den kotrow man nanga uma disi, dan Paulus e taki: „Fu dati-ede dan, fu di wi abi so wan bigi worku fu kotoygi lontu wi meki wi poti ibri hebi nanga sondu di e frekti wi makriki na wan sey èn lon nanga horidoro na streylon di poti na wi fesi” (Hebrew sma 12:1). Den kotrow kotoygi disi di de leki wan eksenpre — awinsi den e sribi na ini grebi — de na libi na ini wi prakseri? Yu sabi den nanga den ondrofeni fu den bun nofo fu kan taki iya? Disi na wan fu den furu bun bakapisi di e pay fu wan doronomo beybristudi, te wi e kobroyki ala sani leki wi ay, yesi, firi, tesi nanga so moro fara, fu ondrofeni den span ondrofenitori fu na „worku disi fu kotoygi.” Fu tru, te wi teki na kotrow eksenpre fu den na ati, dan disi sa yepi wi fu psa ibri mankeri fu bribi. Dan disi baka sa yepi wi fu kotoygi gi na waarheid fri èn sondro frede na ondro ala omstandigheid. — Rome sma 15:4.
No kon weri
12. (a) Fa Yeyses eksenpre kan yepi wi ’fu no kon weri èn broko saka na ini wi sili’? (b) San na wantu eksenpre na ini wi ten fu sma di e kon weri?
12 Na moro bigi eksenpre fu wi fu bribi na Yeyses. Paulus e gi na deki-ati: ’Meki nanga horidoro wi lon na streylon di poti na wi fesi, ala di wi e poti ay bunbun na tapu na moro Prenspari Wrokoman èn Sma di e meki wi bribi kon bun dorodoro, Yeyses. Iya, poti ay bun na tapu na Sma di ben frudrage so wan genstaki fu na sey fu sondari kontrari den eygi belang, so taki unu no kon weri èn broko saka na ini unu sili’ (Hebrew sma 12:1-3). O „bun” yu ben poti ay tapu Yeyses eksenpre? O „bunbun” yu ben hori ay na tapu en? (1 Petrus 2:21) Satan wani taki wi ’kon weri èn broko saka na ini wi sili’. A wani taki wi tapu nanga wi kotoygiwroko. Fa a e du disi? Sontron a de na gens di e kon langalanga fu na sey fu kerki nanga lanti, neleki fa a ben de na ini na fosi yarihondro. A yari di psa na Kownukondre preykiwroko ben skotu na ini so wan 40 kondre. Ma disi ben meki wi brada kon weri? Nôno! A kotrow wroko fu den ben abi leki bakapisi taki moro leki 17.000 sma na ini den kondre dati ben teki dopu na ini 1988. Fa disi musu de wan tranga gi ala den sma di e libi na ini kondre pe fri de te yu e teki dati luku nanga tra sani! Meki wi no kon weri noyti fu preyki na bun nyunsu fu na Kownukondre!
13. (a) San na wantu fu den fini sani di ben sa kan meki taki wi kon weri gi wi preykiwroko? (b) San ben de na ’prisiri di ben poti na Yeyses fesi’, èn fa wi kan kisi so wan srefi sortu prisiri yeyefasi?
13 Ma tra sani de di de moro fini èn di ben sa kan meki wi kon weri. Na mindri disi yu abi gens na ini wan prati osofamiri, skin-ati na frustan sey, problema fu a gosontu, druk fu na sey fu yu speri, lasi-ati fu di positief bakapisi no e kon na ini wi preykiwroko ofu kande wan firi fu a no abi fu pasensi e kon fu di na kba fu na disiten seti fu sani no kon ete. We, san ben yepi Yeyses fu frudrage skin-ati na frustan nanga skinsey ? A ben de „na prisiri di ben poti na en fesi” (Hebrew sma 12:2). Na prisiri fu meki en Ppa ati breyti, fu di a ben meki Yehovah kisi reti èn na fruwakti fu na bakaten koloku di a ben sa ondrofeni te a ben sa meki den tumusi moy blesi fu na Mesiyas Kownukondre kon gi na libisma famiri, ben hori baka gi Yeyses (Psalm 2:6-8; 40:9, 10; Odo 27:11). Wi ben sa kan hori ay moro bun tapu Yeyses na ini na prisiri yeyefasi disi? Èn no frigiti san Petrus e dyaranti wi na ini 1 Petrus 5:9: „Den srefi sani na ini na fasi fu pina e psa nanga a heri gemeenschap fu brada na ini na grontapu.” Efu wi sabi taki Yehovah e frustan wi, e firi na waran fu na bradafasi na a heri grontapu, èn e hori wi ay tapu den prisiri di e wakti wi na ondro na Kownukondre Tirimakti — dan ala dati sa yepi wi fu no kon weri ini a dini fu Yehovah na ini bribi, èn fu tan preyki ala di na kba de so krosibey.
Fu san-ede Yehovah e gi tranga leri
14. Sortu wini kan kon fu tesi nanga skin-ati di kande wi kisi fu frudrage?
14 Paulus e trowe leti now tapu na reyde fu san-ede wi musu man fu frudrage tesi nanga pina. A e sori wi taki wi musu luku den sortu sani disi leki wan fasi fu tranga leri. Paulus e rideneri: „Mi manpikin, no si na tranga leri di e kon fu Yehovah leki wan soso sani èn no broko saka te a e poti yu a pasi, bika a sma di Yehovah e lobi, a e gi en tranga leri” (Hebrew sma 12:5, 6). Srefi Yeyses „leri fu gi yesi ini den sani di a ben nyan pina fu den” (Hebrew sma 5:8). Gi wi a de seyker tu fanowdu fu leri fu gi yesi. Luku pikinso sortu bun bakapisi a abi efu wi e meki tranga leri seti wi libi. Paulus e taki fu disi: „Gi den di kon oefen nanga dati, [a e tyari] wan froktu fu vrede kon, dati wani taki regtfardikifasi.” Fa disi e gi deki-ati! — Hebrew sma 12:11.
15. Fa wi kan teki na ray fu Paulus ’fu tan meki reti futupasi gi wi futu’?
15 Efi wi e teki „na tranga leri di e kon fu Yehovah” na a fasi disi, dan wi sa teki na positief ray fu Paulus na ati: „Fu dati-ede poti den anu di anga èn den swaki kindi kon reti, èn tan meki reti futupasi gi yu futu” (Hebrew sma 12:12, 13). Sontron a de makriki fu drifi komoto fu na ’smara pasi di e go na libi’ (Mateyus 7:14). Na apostru Petrus nanga trawan na ini Antiyogiya na wan bepaalde okasi ben meki wan fowtu ini disi. Fu san-ede? Fu di „den no ben waka reti akruderi na waarheid fu na bun nyunsu” (Galasiya sma 2:14). Na ini na ten disi wi musu tan arki na wi Gran Leriman, Yehovah Gado. Wi musu kobroyki dorodoro den yepisani di wi e kisi fu na „kotrow èn koni srafu”. Disi sa dyaranti wi fu wan ’reti pasi gi wi futu.’ — Mateyus 24:45-47; Yesaya 30:20, 21.
16. (a) Fa wan „vergif rutu” ben kan gro na ini wan gemeente? (b) Fu san-ede Paulus e tay hurudu na wan mankeri fu warderi gi santa sani, en fa wi kan kibri wi srefi gi den sortu kofar dati?
16 Paulus e warskow wi moro fara, taki wi musu luku bun taki den no puru na no wan sma na no-frudini bunfasi fu Gado; taki no wan vergif rutu gro èn tyari bruya kon èn taki furu sma kon doti nanga dati’ (Hebrew sma 12:15). Bigin fu e knoru, no e de tevrede, e feni fowtu na a fasi fa sani e du na ini na gemeente kan de leki wan „vergif rutu” di kan panya en srefi esi-esi èn kan vergif den gosontu prakseri fu trawan ini na gemeente. Wi kan kaka futu gi den sortu negatief prakseri disi te wi e luku den bun furu blesi di a waarheid ben tyari kon na ini wi libi (Psalm 40:5). Wan tra kofar de ini hurudu firi ofu wan ’mankeri fu warderi gi santa sani, so leki Esau’ (Hebrew sma 12:16). Paulus e tay den tu kofar disi na makandra, fu di a wan makriki kan tyari yu go na ini a trawan. No wan kresten abi fu broko-kindi gi den sortu gridi lostu disi efu a poti Petrus wortu na ini en libi: „Kaka yu srefi [gi Ddibri], fasti na ini bribi.” — 1 Petrus 5:9.
„Trutru sani di no de fu si”
17. Teki den sani di e furu wan sma nanga respeki èn di ben psa na a bergi Sinayi gersi nanga den sani di kresten abi na den fesi ini na ten disi.
17 Na bribi fu wi e anga srefisrefi fu „trutru sani di no de fu si” (Hebrew sma 11:1). Fu son wan fu den trutru sani disi di no de fu si Paulus e taki fu den moro fara na ini Hebrew sma 12:18-27. A e fruteri fu den bigi sani di e furu yu nanga respeki èn di psa na a bergi Sinayi di Gado langalanga ben taki nanga Israèl èn di Moses ben taki: „Mi e frede èn e beyfi.” Na apostru e taki moro fara: „Ma unu kon na wan bergi Siyon èn wan foto fu na libi Gado, na heymel Yerusalen, èn miriyade engel, na ini algemene konmakandra.” Ini a tori fu den Israèl sma fu owruten, na a bergi Sinayi, dan Gado sten ben seki na grontapu, Paulus ben taki, ma now A gi na pramisi èn taki: „Ete wantron no wwan mi wani tyari na grontapu kon na ini buweygi ma so srefi na heymel.” Ala di den wortu disi ini na fosi presi taki gi salfu kresten, dan so srefi na „bigi ipi” fu tra sma di yu kan teki gersi nanga skapu kan teki den na ati (Openbaring 7:9). Yu e warderi dorodoro san Paulus e taki dya? Wi e tanapu a fesi wan konmakandra fu tindusundusun engel. A no de fu taki, taki wi e tanapu so srefi na fesi Yehovah. Na en reti-anusey Yeyses Krestes de. Iya, wi de na ini wan posisi di e furu wi nanga moro respeki èn wi e tanapu na ondro wan moro bigi frantiwortu leki den Hebrew sma dati ini owruten na a bergi Sinayi! Èn go prakseri, taki na seki na ini a feti fu Armagedon di e kon sa meki na disiten ogri heymel nanga grontapu lasi gwe. Nownow seyker a no de a ten fu „aksi fu kisi pardon” fu no arki èn gi yesi na a Wortu fu Gado!
18. Fa wwan wi kan tan kotoygi gi Yehovah èn no kon weri?
18 So bun wi e libi trutru na ini na ten fu na heri libisma historiya di e furu wi nanga moro furu respeki leki ini wan ten. Leki Kotoygi fu Yehovah den seni wi go na a moro farawe kontren fu grontapu fu preyki na bun nyunsu fu Gado kownukondre di opo. Fu du dati wi musu abi wan bribi di no kan seki, wan bribi di no kan weri, wan bribi di e yepi wi fu teki na tranga leri fu Yehovah. Efu wi abi so wan bribi, dan den sa feni wi na mindri den sma di „e tan abi no frudini bunfasi, so taki wi kan du santa diniwroko gi Gado na wan fasi di e plisi en, nanga frede èn respeki ini a dini fu Gado” (Hebrew sma 12:28). Iya, èn wi sa go doro fu kotoygi gi Yehovah èn no kon weri.
San yu ben sa piki?
◻ Fu san-ede na brifi fu Paulus gi den Hebrew sma de wan bun sani gi wi?
◻ Na fesi sortu sani kresten e kon tanapu ini na ten disi?
◻ Fa wi kan nyanbun fu na tori fu kotrow kotoygi fu owruten?
◻ Fu san-ede Yehovah e gi tranga leri na den sma di a lobi?
◻ San na a sroto fu tan kotoygi sondro fu kon weri?