Leri sabi na santa kibritori fu na gi di wan sma e gi en srefi na ini a dini fu Gado
„Krestes tu ben pina gi yu, èn libi wan model gi yu fu waka soyfri na ini en futumarki.” — 1 PETRUS 2:21.
1. San na Yehovah prakseri na ini a tori fu ’na santa kibritori fu na gi di wan sma e gi en srefi na ini a dini fu Gado’?
„NA SANTA kibritori fu a gi disi di wan sma e gi en srefi na ini a dini fu Gado” no de wan kibritori moro! (1 Timoteyus 3:16) Fa disi de wan difrenti nanga den kibritori fu na falsi relisi, so leki na raytori fu wan Driwanfasi, di e tan de wan kibritori! No wan sma kan frustan den. Na a tra sey, a de na ini na prakseri fu Yehovah taki na santa kibritori di kon na krin na ini a persoon fu Yeyses Krestes, musu meki bekenti so fara leki a kan. Yeyses srefi ben tron na eksenpre srefisrefi fu wan faya preykiman fu na kownukondre fu Gado. Wi kan leri furu fu en boskopu èn a fasi fu preyki leki fa wi sa si now.
2. Fu san-ede a dini di Yeyses ben dini ben poti a fesi na gi fu na lusuprèys? (Mateyus 20:28)
2 Meki wi dray go fu dati-ede na a penti pe „den ben tyari en [Yeyses] kon na krin na ini skin” (1 Timoteyus 3:16). Na ini Mateyus 20:28, wi e leysi taki Yeyses „no kon fu sma dini en, ma fu dini èn fu gi en sili leki wan frulusuprèys ini na presi fu furu sma”. Disi e poti en dini srefi a fesi na gi fu na lusuprèys. Fu san-ede? We, na ini Eden na sneki di ben abi triki ben tyalansi Yehovah reti soevereiniteit tapu na libismafamiri, san wani taki taki wan mankeri ben de na den sani di Gado meki èn taki no wan enkri libisma ondro tesi ben sa kan kibri en soyfri retifasi na fesi na Moro Heywan. (Teki gersi Yob 1:6-12; 2:1-10.) Na sondro fowtu diniwroko fu Yeyses leki wan volmaakti libisma, „na lasti Adam”, ben buweysi taki na spotuman Satan ben de wan hogri leyman (1 Korente sma 15:45). Boyti fu dati, Yeyses ben buweysi dorodoro taki a abi na koni fu dini leki Gado „Moro Prenspari Wrokoman èn Frulusuman” èn „sa krutu na grontapu pe libisma e libi na ini regtfardikifasi,” fu poti na soevereiniteit fu Yehovah reti. — Tori fu den Apostru 5:31; 17:31.
3. Fa Yeyses ben gi wan piki dorodoro tapu a tyalansi fu Satan?
3 Yeyses ben gi wan piki dorodoro tapu den spotu èn tyalansi fu Satan! Na ini na heri historiya no wan sma a grontapu dini Gado so nanga en heri ati, ala di spotu, strafu nanga kwinsi na skin èn yeyefasi ben de. Krestes ben musu horidoro leki a Manpikin fu Gado ondro ley nanga syen. Ala di a ben horidoro psa ala den sani disi, srefi te na wan takru-ati èn syen dede, a ben de stanfaste, sondro fu seki na ini loyaliteit a fesi fu en Tta. Na ini Filipi sma 2:8, 9 Paulus e skrifi taki fu di Yeyses gi yesi ’te na dede, iya, dede na wan pina-udu, meki Gado poti en ini wan moro hey posisi èn gi en na nen di de tapu ibri tra nen’. Yeyses ben puru Satan bere kon na doro leki wan takru-ati leyman!
4. Fu san-ede Yeyses ben kan taygi Pilatus taki a ben kon na grontapu fu kotoygi gi na waarheid?
4 Fu dati-ede meki Yeyses na a kba fu soso wantu yari fu faya preykiwroko ben kan gi kotoygi fri èn sondro frede na fesi Pontiyus Pilatus: „Yu srefi e taki taki mi na wan kownu. Na fu disi mi koboru èn na fu disi mi kon na grontapu, fu gi kotoygi fu na waarheid. Ibriwan sma di de na a sey fu waarheid, e arki mi sten” (Yohanes 18:37). Na ini a meki bekenti fu na Kownukondrewaarheid fu Gado na ini heri Palestina Yeyses ben sori taki a no abi en speri ini a gi di a ben gi en srefi na ini a dini fu Gado. A ben skoro en disipri fu de so srefi faya preykiman. Fa na eksenpre fu en e gi unu now deki-ati fu waka na ini en futumarki!
Leri fu na Eksenpre fu wi
5. San wi kan leri fu na gi di wan sma e gi en srefi na ini a dini fu Gado, fu di a e hori ay soyfri na tapu Yeyses?
5 Nanga na gi di wi e gi wi srefi na ini a dini fu Gado èn na ini a du fu en wani, dan wi tu kan buweysi taki Ddibri na wan leyman. Sortu tesi wi e ondrofeni tu, no wan fu den sa kon oyti na a bakafutu fu den skin-ati nanga na afrontu di Yeyses ben frudrage. Meki fu dati-ede wi leri fu na Eksenpre fu wi. Meki wi waka na streylon nanga horidoro so leki Hebrew sma 12:1, 2 e gi wi deki-ati, „ala di wi e poti ay bun tapu na Moro Prenspari Wrokoman èn Sma di e meki wi bribi kon de volmaakti, Yeyses”. Tra fasi leki Adam, di ben misi di a ben kisi tesi ini na tori fu na gi di a ben musu gi en srefi na ini a dini fu Gado, dan Yeyses ben tron na wan enkri libisma na grontapu di na wan volmaakti fasi ben kakafutu gi ala tesi. Te na dede a ben buweysi taki a de „loyaal, sondro fowtu, sondro flaka, aparti fu den sondari” (Hebrew sma 7:26). Fu en sondro fowtu soyfri retifasi ede a ben kan taygi en feyanti: „Suma fu unu e overtoygi mi fu sondu?” Yeyses ben slenger na tyalansi fu Satan go baka na ini en fesi nanga den wortu: „Na tiriman fu grontapu . . . no abi makti tapu mi.” Èn en lasti takimakandra nanga en disipri, leti bifo sma ben tori en èn kisi en, a ben bosroyti nanga den wortu: „Hori deki-ati! Mi wini grontapu.” — Yohanes 8:46; 14:30; 16:33.
6. (a) Fu san-ede Yeyses sabi sortu kowru-ati a libismafamiri abi fanowdu? (b) O fara Yeyses ben sori frede ini a dini fu Gado?
6 Ala di Yeyses ben de dya na grontapu ini libisma skin, dan a ben ondrofeni san a wani taki fu de wan libisma, „di ben de pikin moro lagi leki engel” (Hebrew sma 2:7). A ben kon sabi den swakifasi fu libisma èn de fu dati-ede srekasreka fu dini leki Kownu nanga Krutuman fu a libismafamiri ini na ten fu dusun yari. Na Manpikin disi fu Gado, di ben taki: „Kon na mi, unu alamala di e naki unu skin èn di abi hebi lay, mi sa gi unu kowru-ati”, sabi sortu kowru-ati na libisma famiri abi fanowdu (Mateyus 11:28). Hebrew sma 5:7-9 e fruteri wi: „Ini den dey fu en libisma skin Krestes nanga tranga bbari èn watra-ay seni, tranga begi èn so srefi faya begi go na a sma di ben kan frulusu en fu dede, èn den ben yere en fu en frede di a ben abi na ini a dini fu Gado. Ala di a ben de wan Manpikin, toku a leri ini den sani di a ben nyan pina fu den fu gi yesi; baka di a ben tyari kon de volmaakti [na ini a gi fu yesi], a tron gi ala sma di e gi en yesi, na sani fu têgo frulusu.” Yeyses no ben draydray, ala di a ben musu horidoro te srefi na a penti taki a ben musu ondrofeni na maka fu a dede leki libisma, fu di na Sneki di sma no wani si na ay ben gi en wan’ soro na en bakafutu’ (Genesis 3:15). Meki ala ten neleki Yeyses unu sori frede na ini a dini fu Gado, srefi te na dede efu dati de fanowdu, ini na frutrow taki Yehovah Gado sa yere wi tranga begi èn sa gi wi frulusu.
’Libi gi regtfardikifasi’
7. Sortu model Yeyses libi gi wi a baka akruderi 1 Petrus 2:21-24, èn fa en libifasi musu abi krakti tapu wi?
7 Ini a ten di Yeyses ben de na ini libisma skin, a ben tyari na santa kibritori fu na gi di wan sma musu gi en srefi na ini a dini fu Gado kon a krin na wan loyaalfasi. Wi e leysi na ini 1 Petrus 2:21-24: „Krestes tu ben nyan pina gi unu, èn libi gi unu wan model so taki unu kan waka soyfri na ini en futumarki. A no ben du sondu, èn so tu bidrigifasi no ben feni na ini en mofo. Te den ben skenpi en a no ben skenpi baka. Te a ben nyanpina, a no ben go tapu skreki gi sma, ma a ben tan frutrow tapu na Sma di e krutu regtfardiki. En srefi ben tyari na ini en eygi skin wi sondu na a postu, so taki a ben sa kba nanga sondu gi wi èn wi ben sa libi gi regtfardikifasi.” Te wi e go denki fu Yeyses libifasi, dan wi e kisi deki-ati fu feti baka a gi di wi e gi wi srefi na ini a dini fu Gado, fu kibri wi soyfri retifasi èn neleki en fu libi gi regtfardikifasi.
8. Fa wi kan libi neleki Yeyses gi regtfardikifasi?
8 Yeyses trutru ben libi gi regtfardikifasi. Na ini Psalm 45:7 den ben taki na fesi fu en: „Yu lobi regtfardikifasi èn yu no wani si ogri na ay.” Na apostru Paulus, di ben tyari den wortu disi kon tapu Yeyses, ben taki na ini Hebrew sma 1:9: „Yu ben lobi regtfardikifasi èn ogri yu no ben wani si na ay.” Ini a leti fu na frustan di wi kon frustan na santa kibritori fu na gi disi di wan sma e gi en srefi na ini a dini fu Gado, meki neleki Yeyses wi lobi ala ten regtfardikifasi èn no wani si ogri na ay. Fu na sey fu kresten moraal, di ini na ten disi de ondro so hebi aanval fu Satan grontapu, èn ini ala bumuy di wi e bumuy nanga sma inisey èn dorosey fu Gado organisâsi, meki wi teki na fasti bosroyti fu libi gi regtfardikifasi, fu di wi e hori den yoysti gronprakseri fu Yehovah hey. Èn meki ala ten wi nyan fu a Wortu fu Gado fu kisi na inzicht, di de fanowdu na ini a dini fu Gado fu kakafutu gi Ddibri nanga en ogri plan!
9. San ben meki a faya fu Yeyses na ini en diniwroko kon moro bigi, èn san disi ben wani taki ini na tori fu den falsi herder fu relisi?
9 Ete wan sani ben de di ben gi Yeyses faya na ini en diniwroko. San ben de dati? Na ini Mateyus 9:36, wi e leysi: „Di a ben si den ipi sma a ben abi sari nanga den, fu di den ben fufuru èn drifi den go-kon leki skapu sondro herder.” Fu dati-ede „[Yeyses] ben bigin fu leri den furu sani” (Markus 6:34). A ben de fu dati-ede fanowdu taki na ogri nanga kruktudu fu den falsi kerki fesiman ben puru kon na doro. Akruderi Mateyus 15:7-9, dan Yeyses ben taygi wantu fu den: „Hoygriman, nanga reti Yesaya ben taki a fesi fu unu, di a ben taki: ’Na pipri disi e gi grani nanga den mofobuba, ma den ati de fara fu mi. Na fu soso den e tan anbegi mi, bika den e leri kobòt fu libisma leki kerki leri’”
Wan sari kibritori
10. Na ini suma na ini na ten disi „na kibritori fu na kruktudu disi” e kon tru, èn sortu fowtu den meki?
10 Neleki fa Yeyses ben taki sondro fu frede teyge falsi kerki fesiman, na so wi e sari taki na ini na ten disi, taki wan kibritori de, di de abrasey fu na santa kibritori fu a gi di sma e gi den srefi na a dini fu Gado. Na ini 2 Tesalonika sma 2:7 Paulus ben kari en „na kibritori fu na kruktudu disi”. Na ini na fosi yarihondro fu G.T. a ben de wan kibritori fu di langa baka a dede fu den apostru a ben sa tyari kon a krin. Na ini wi ten a de den kerki fesiman fu na krestenhèyt di abi moro belangstelling na ini a politik leki na ini a meki bekenti fu na bun nyunsu fu Gado regtfardiki kownukondre. Hoygrifasi de psa marki a mindri den. Televisie domri fu anitri sekte fu na krestenhèyt de wan eksenpre di de krin fu si: bidrigiman di e koti a wwiri fu den ipi fu den, e bow bigi makti fu furu milyun dala, e de patna fu huru-uma, e krey bidrigi watra-ay te den bere e puru kon na doro èn e tan begi fu moro moni nomo. Na lomsu-katolik Vaticaan nanga a bumuy di a e bumuy nanga politik sondro fu abi konsensi fonfon, nanga en pranpran na dorosey èn en bidrigi bangi-afersi e sori wan srefi sortu fisti prenki.
11. San sa psa nanga den kerki fesiman fu na krestenhèyt nanga heri Babilon na Bigiwan?
11 A no wan fruwondru sani taki sma kan kon sabi na grupu fu kerki fesiman leki „na sma fu kruktudu”! (2 Tesalonika sma 2:3) Na pisi disi fu Babilon na Bigiwan di yu kan teki gersi nanga wan huru, makandra nanga ala tra fasi fu relisi bere sa puru krinkrin kon a doro èn sa kisi pori. So leki wi e leysi na ini Openbaring 18:9-17, dan politikman nanga bay nanga seriman (nanga den bangiman fu den) sa bari krey: „Ke pôti, ke pôti, yu bigi foto!’ Babilon na Bigiwan nanga ala en kibritori sa tyari kon na doro, èn disi o de krinkrin tra fasi leki ala sani san e poti glori na a santa kibritori fu a gi di wan sma e gi en srefi na ini a dini fu Gado.
12. A lobi fu Yeyses gi regtfardikifasi ben pusu en fu du san?
12 Yeyses lobi gi regtfardikifasi nanga a si di a no wani si kruktudu na ay ben pusu en fu gi en srefi krinkrin na a tru anbegi. Na a ten fu en fosi fisiti na Yerusalen leki na salfu Manpikin fu Gado, dan Krestes ben yagi den seriman nanga den sma di ben kenki moni puru fu na tenpri nanga den wortu: „Teki den sani disi puru fu dya! No meki na oso fu mi Tta moro langa leki wan oso fu bay sani!” (Yohanes 2:13-17) Na wan fisiti di a ben tyari bakaten go na a tenpri Yeyses ben taygi den dyu di ben gens en: „Unu komoto fu unu Tta Ddibri èn unu wani du den lostu fu unu Tta. En ben de wan kiriman di a ben bigin, èn a no ben tanapu fasti na ini a waarheid, bika no wan waarheid de na ini en. Te a e taki ley, dan a e taki akruderi en eygi fasi, bika en na wan leyman èn na Tta fu ley” (Yohanes 8:44). Fa Yeyses ben sori deki-ati di a ben taygi den kerkiman dati leti na ini den fesi taki den ben de leyman nanga pikin fu Ddibri!
13. (a) Pe spesrutu wi e si a si di Yeyses no wani si kruktudu na ay e kon na fesi? (b) Fu san-ede den kruktudu kerki fesiman de warti fu kisi so wan krutu leki di Yeyses ben taki gi den sabiman fu Buku nanga Fariseyman?
13 Na wani di Yeyses no wani si kruktudu na ay e kon na krin na no wan presi moro betre leki na ini en srapu publiki krutu fu den sabiman fu Buku nanga den Fariseyman di yu kan teki gersi nanga sneki pikin, so leki skrifi na ini Mateyus kapitri 23. Dyaso a e taki fu wan „helu” ini seybi pisi èn a e teki den gersi nanga ’grebi di karki weti, furu nanga ala sortu fisti sani, hoygrifasi nanga kruktudu’. Fa Yeyses ben angri fayafaya fu fri na pipri di ben kisi dwengi fu na kruktudu dati! „Yerusalen, Yerusalen,” na so Yeyses ben bari taki, „o furutron mi ben wani tyari yu pikin kon makandra, so leki wan mmafowru e tyari en pikin kon makandra na ondro en frey! Ma unu no ben wani. Luku! Unu oso den e libi leygi a baka” (vers 37, 38). Den kruktudu kerki fesiman na ini wi ten de warti fu kisi wan srefi sortu krutu, fu di fu taki en nanga den wortu na ini 2 Tesalonika sma 2:12, „den no ben bribi na waarheid, ma ben abi prisiri na ini onregtfardikifasi”. Na kruktudu fu den de precies a tra sey fu na loyaalfasi di Yeyses ben sori taki a e gi en srefi na ini a dini fu Gado di a ben de na grontapu.
Meki den krutu fu Gado bekenti
14. Na warderi gi na santa kibritori fu na gi di wan sma e gi en srefi na ini a dini fu Gado musu buweygi wi fu du san?
14 Na warderi fu wi gi na santa kibritori fu na gi di sma e gi den srefi na ini a dini fu Gado musu pusu wi ala ten fu waka soyfri na ini den futumarki fu Yeyses. Neleki en na so wi musu meki fayafaya bekenti san skrifi na ini Yesaya 61:2 leki „na yari fu bun wani fu na sey fu Yehovah èn a dey fu refrensi fu na sey fu wi Gado”. Èn meki wi du wi porsi fayafaya fu „trowstu ala den wan di e sari”. Neleki di Yeyses ben de na grontapu, na so a e aksi deki-ati tu na ini na ten disi fu meki Yehovah krutu bekenti, èn so srefi den krakti boskopu di na ini Waktitoren-artikel èn na ini a buku Na Openbaring — En moro bigi heymarki de krosibey!, di e taki sani fri èn sondro frede. Wi musu preyki nanga deki-ati èn nanga taktik, èn den taki fu wi musu ’moksi nanga sowtu’ fu meki den tesi switi gi den sma di e firi gi regtfardikifasi (Kolose sma 4:6). Meki wi, di kisi yepi nanga Yeyses eksenpre fu na fasi fa a ben gi en srefi na ini a dini fu Gado, man fu fruteri na a reti ten taki wi klari a wroko di Yehovah ben gi wi fu du. — Mateyus 24:14; Yohanes 17:4.
15. San psa sensi 1914 na ini na tori fu na santa kibritori fu Gado?
15 Fa Yeyses ben de wan tumusi moy eksenpre ini na ten di a ben sori en srefi ini libisma skin! O krin na santa kibritori fu na gi di wan sma e gi en srefi na ini a dini fu Gado ben kon tru na ini en! Fa sondro frede a ben gi glori na Yehovah nen! Èn fa Yeyses ben kisi wan tumusi moy payman fu en Tta fu a waka nanga libi fu en fu soyfri retifasi! Ma na a santa kibritori fu Gado moro de ete ini na tori. Fu sensi 1914 wi e libi na ini „na dey fu Masra” (Openbaring 1:10). So leki tanapu na ini Openbaring 10:7, dan na ten doro taki ’a santa kibritori fu Gado akruderi na bun nyunsu e tyari kon na wan kba’. Sten na ini heymel bariwroko now taki: „Na kownukondre fu grontapu tron now na kownukondre fu wi Masra [Yehovah] èn fu en Krestes, èn en a sa tiri leki kownu te ini ala têgo ten” (Openbaring 11:15). Yehovah poti Yeyses Krestes leki Mesiyas kownu tapu en glori troon fu tron a konpetiriman fu Gado!
16. Fa na Kownu, Yeyses Krestes di den ben poti na tapu na troon nyunyun ben meki sma si heri esi en faya fu na grani fu Gado na ini heymel?
16 Leki konpetiriman nanga Gado na ini na Kownukondre di ben opo nyunyun den e kari Yeyses so srefi Mikaèl, wan nen di wani taki: „Suma de leki Gado?” Nowan opruruman mag man oyti fu de leki Gado, èn na Kownu di poti nyun tapu Gado troon ben sori dati krin èn heri-esi, fu di a trowe na fosi Sneki, Satan nanga en engel go na grontapu (Openbaring 12:7-9) Iya, Yeyses e du wroko fayafaya na ini heymel gi na grani fu Gado, neleki fa a ben sori na grontapu taki a ben gi en srefi na ini a dini fu Gado. Na glori Yeyses Krestes no sa rostu bifo a rutu falsi relisi puru krinkrin nanga figi Satan organisâsi di yu kan si èn di yu no kan si puru.
17. San psa sensi 1914 leki wan kontru fu Mateyus 25:31-33?
17 Fu sensi 1914 na kon tru fu Yeyses profeytitori di a ben taki en srefi na ini Mateyus 25:31-33 trowe krin leti kon tapu na santa kibritori fu Gado. Dyaso Yeyses e meki bekenti: „Te na Manpikin fu libisma sa kon na ini en glori èn ala engel nanga en, dan a sa teki presi na tapu en glori troon. Dan ala nâsi sa tyari kon na en fesi, èn a sa prati den sma fu makandra, so leki wan herder e prati den skapu fu den bokoboko. Èn den skapu a sa poti na en reti-anusey, ma den bokoboko na en kruktu anusey.” Komoto fu na bun posisi fu en na ini heymel dan na glori Kownu, Krutuman nanga Fetiman fu a gi di wan sma e gi en srefi na ini a dini fu Gado sa teki refrensi, fosi tapu na sma fu kruktudu èn tra pisi fu Babilon na Bigiman èn baka dati tapu ala elementi di tan abra èn yepiman fu Satan ogri grontapu organisâsi di yu kan teki gersi nanga bokoboko. Baka dati den sa sroto Satan na ini na peti di no abi gron (Openbaring 20:1-3). Ma „regtfardikiwan” di yu kan teki gersi nanga skapu sa go na ini na têgo libi (Mateyus 25:46). Meki den muyti fu yu ini na sori taki yu e gi yu srefi na ini a dini fu Gado poti yu na ini na opregti grupu dati fu sma!
18. Sortu prisiri grani wi abi ini na tori fu na santa kibritori fu na gi di wan sma e gi en srefi na ini a dini fu Gado?
18 Openbaring 19:10 e gi deki-ati fu ’anbegi Gado’. Èn fu san-ede? Na tekst e taki morofara: „Bika a de na gi fu kotoygi di abi fu du nanga Yeyses di e gi tranga fu taki profeytitori.” Someni fu den profeytitori di taki ondro krakti fu santa yeye na ini owruten ben gi kotoygi fu Yeyses! Èn te den profeytitori disi e kon tru safrisafri, dan na santa kibritori fu Gado e kon moro krin. Wi breyti fu dati-ede fu sabi taki na santa kibritori fu na gi disi di wan sma e gi en srefi na ini a dini fu Gado kon de na ini Yeyses srefi. Wi abi wan wondru grani leki sakafasi dinari fu na kownukondre fu Gado fu mag waka na ini en futumarki — iya, wi e feni en wan bigi grani fu teki prati na ini na frustan di wi kon frustan sani, èn ini na meki bekenti fu na heri santa kibritori fu Gado akruderi na bun nyunsu!
San yu ben sa piki?
◻ San wi kan leri fu Yeyses eksenpre fu na gi di wan sma e gi en srefi na ini a dini fu Gado?
◻ Fa wi kan libi gi regtfardikifasi neleki Krestes?
◻ Sortu sari kibritori de krinkrin tra fasi leki na santa kibritori fu na gi di wan sma e gi en srefi na ini a dini fu Gado?
◻ Na warderi fu wi gi na santa kibritori musu pusu wi fu go du san?
[Prenki na tapoe bladzijde 16]
Leki fesiman fu na gi di wan sma e gi en srefi na ini a dini fu Gado èn leki wan faya preykiman fu na Kownukondre, Yeyses ben kan taygi Pilatus: „Na fu disi mi ben kon na grontapu, fu gi kotoygi fu na waarheid”
[Prenki na tapoe bladzijde 18]
Na gi di Yeyses ben gi en srefi na ini a dini fu Gado ben kon a fesi na ini na srapu krutu na publiki fu den sabiman fu Buku nanga Fariseyman