Na rol fu den hei tirimakti

„A de a dinari fu Gado gi unu, fu na tanbun fu unu. Ma efu unu e du san ogri, frede dan.” — ROME SMA 13:4.

1, 2. Fa furu sma ini na krestenheid go moksi den srefi ini revo aktiviteit?

TU YARI psa kba wan konmakandra fu biskop na ini Londen ben meki taki wan atibron artikel ben kon ini a New York Post fu na anu fu den sma di e tyari en kon a doro. Na konmakandra ben de a Lambeth Conference, di moro leki 500 biskop fu na Anglicaans libimakandra ben fisiti. Na reide fu na atibron ben de wan resolutie di na konmakandra ben teki, pe den ben sori taki den e frustan den sma „di, bakadi den meki kobroiki fu ala tra fasi di de, e teki na pasi fu feti nanga wapen leki na wan enkri pasi fu kisi regtfardikifasi”.

² Na Post ben taki taki disi ben de, a srefi leki yu e feni na terrorisme bun. Ma den biskop ben waka soso baka wan gwenti di e gro. A fasi fu den no ben kenki fu na di fu na Katoliek pristri na ini Ghana di ben rikomanderi na guerrilla orloku leki na moro gaw, a moro seiker èn a moro veilig pasi fu meki Afrika kon fri; ofu fu na Afrikan Methodist biskop di ben sweri fu sa go doro „te na a moro bita kba nanga na feti fu kon fri”; ofu den furu zendeling fu na krestenheid di ben de na a sei fu den opruruman di e feti nanga den tiri di den ben de kba na ini Asia nanga Zuid-Amerika.

Tru kresten ’No e opo den srefi teige den tirimakti’

3, 4. (a) Sortu gronprakseri den so kari kresten di e hori baka gi revo e psa? (b) San wan sma ben kon si fu Yehovah Kotoigi?

³ Na ini na fosi yarihondro Yeises ben taki fu den bakaman fu en: „Den no de wan pisi fu grontapu, neleki fa mi no de wan pisi fu grontapu” (Yohanes 17:14). Ibri so kari kresten di e hori baka gi revo, de srefisrefi wan pisi fu grontapu. A no de wan bakaman fu Yeises; èn so srefi a no „e saka en srefi ondro den hei tirimakti” (Rome sma 13:1). A ben sa du bun fu gi yesi na a warskow fu na apostru Paulus taki ’na sma di e opo en srefi kontrari den tirimakti, e poti en srefi kontrari na seti fu Gado; den wan di poti den srefi kontrari en, sa tyari wan krutu kon gi den srefi”. — Rome sma 13:2.

⁴ Trafasi leki furu sma ini na krestenheid, dan Yehovah Kotoigi no e moksi den srefi ini tranga ogridu pe den e kobroiki wapen. Wan man na ini Europa ben kon si disi. A e skrifi: „Di mi si san relisi nanga politiek tyari kon, dan mi libimarki ben kon de fu trowe na maatschappelijk orde di ben poti steifi na gron. Mi ben go moksi mi srefi nanga wan grupu terrorist èn mi ben kisi skoro ini na kobroiki fu ala sortu fu wapen; mi ben teki prati na ini furu ròs fu sma, èn fufuru sani nanga yepi fu wapen. Doronomo mi libi ben de ini kofar. Baka wan pisiten a ben kon krin taki wi ben e feti wan lasi feti. Mi ben de wan sma di ben kon bruya, di wan firi fu no abi howpu kwetikweti ini na libi ben teki mi abra. Ne wan Kotoigi ben naki na wi doro. A uma ben fruteri mi fu Gado Kownukondre. Fu di mi ben abi na faste overtoigi taki mi ben tanapu e lasi mi ten, meki mi ben gi na rai fu mi wefi arki. Dati a ben du, èn den ben bigin wan osobeibristudi. Te fu kba mi ben agri fu de na a studi. Mi no abi wortu nofo fu fruteri fu na frulekti di mi ben firi di mi ben frustan san na a krakti di e pusu libisma fu du ogri. Na tumusi moi pramisi fu na Kownukondre gi mi wan howpu nanga wan marki ini na libi di e hori mi tanapu.”

5. Fu san-ede kresten e tan saka den srefi na wan vrede fasi na ondro den hei tirimakti, èn te oten dati sa de so?

⁵ Kresten sma na ambassadeur ofu sma di e teki presi gi Gado nanga Krestes (Yesaya 61:1, 2; 2 Korente sma 5:20; Efesia sma 6:19, 20). Na so wan fasi den e tan neutraal ini den kesekese fu na grontapu disi. Aladi son politiek seti na ekonomia sei gersi taki den abi moro bun bakapisi leki trawan èn sonwan e gi moro fri leki trawan, toku kresten sma no e gi yepi noso e teki a wan seti moro hei leki na trawan. Den sabi taki ala den seti de onvolmaakti. A de „a seti fu Gado” taki den e tan fu de teleki en kownukondre teki na makti abra (Danièl 2:44). Fu dati-ede kresten e tan saka den srefi na wan vrede fasi na ondro den hei tirimakti aladi den e gi yepi fu na têgo tanbun fu trawan go na fesi, fu di den e preiki na bun nyunsu fu na Kownukondre. — Mateyus 24:14; 1 Petrus 3:11, 12.

Gi yesi na a wet

6. Fu san-ede furu libisma wet bun, aladi „na heri grontapu didon ini na makti fu na gadolowsuwan”?

⁶ Den tiri fu den nâsi e poti seti fu wet, èn moro furu fu den wet disi bun. Wi musu fruwondru fu disi, te wi e si taki „na heri grontapu didon ini na makti fu na gadolowsuwan”? (1 Yohanes 5:19). Nono. Yehovah ben gi wi fosi tata, Adam, wan konsensi èn na frustan disi fu bun nanga ogri di sma gebore nanga en e de fu si na furu fasi na ini den wet fu libisma (Rome sma 2:13-16). Hammurabi, wan mekiman fu wet na ini Babilon fu owruten, ben skrifi na ini den bigin wortu fu en wetbuku: „Ini na ten dati [den] ben poti mi, Hammurabi, na vroom granman di e frede Gado, fu meki a tanbun fu na pipri go na fesi, fu meki retidu wini na ini na kondre, fu pori den gadolowsu sma nanga den ogridu man, so taki den trangawan no ben sa kwinsi den swakiwan.”

7. Suma abi na reti fu strafu wan sma di e psa na wet, èn fu san-ede?

⁷ Moro furu fu den tiri ben sa taki taki a marki fu den wet fu den na a srefi; fu meki na tanbun fu den borgru èn na bun orde na ini a libimakandra go na fesi. Fu dati-ede meki den e poti strafu gi sani di sma e du kontrari na libimakandra, so leki kiri èn fufuru, èn den e poti seti, so leki den skotu fu na esi-esi di wan sma mag rèi èn den wet fu pe yu mag poti yu oto. Ala sma di e psa den wet fu den fu espresi, e poti den srefi kontrari na tirimakti èn „sa tyari wan krutu kon gi den srefi”. Fu suma na krutu e kon? No fu Gado nomonomo. Na Griki wortu di poti abra dyaso nanga krutu, kan abi fu du nanga borgru krutubangi na presi fu krutu fu Yehovah. (Teki gersi 1 Korente sma 6:7.) Efu wan sma no e handri akruderi na wet, dan na hei tirimakti abi na reti fu strafu en.

8. Fa na gemeente o du wan sani efu wan memre fu en e du wan seryusu ogri?

⁸ Yehovah Kotoigi abi bun nen taki den no e opo den srefi teige den tirimakti fu libisma. Efu a ben sa psa taki wan sma na ini a gemeente psa na wet, dan a gemeente no sa yepi en fu lon komoto gi na strafu di na wet poti. Efu wan sma e fufuru, e kiri, e taki lei sani, e bidrigi fu no pai belasting, e didon na uma nanga tranga, e fufuru, e kobroiki drug di lanti wet no gi pasi fu dati ofu e opo en srefi na ini wan ofu tra fasi kontrari na tirimakti di wet poti, dan a sa kisi seryusu tranga-leri fu na gemeente — èn a no musu abi na firi taki den e frufolgu en te na tirimakti fu kondre e strafu en. — 1 Korente sma 5:12, 13; 1 Petrus 2:13-17, 20.

Wan sani fu frede

9. Pe kresten kan lon go nanga reti te elementi di de sondro wet e tapu skreki gi den?

⁹ Paulus e go moro fara nanga en takimakandra fu den hei tirimakti nanga den wortu: „Bikasi den di e tiri, de wan sani fu frede, no gi den du di bun, ma gi den du di ogri. Yu, no wani abi dan frede gi na tirimakti? Tan du san bun, èn yu sa kisi prèise fu en” (Rome sma 13:3). A no de den loyaal kresten di musu frede strafu fu na sei fu na tirimakti, ma ogriduman, den wan di e du ’takru sani’ ofu ogri du. Te den sortu elementi disi di de sondro wet e de wan kofar gi Yehovah Kotoigi, dan nanga reti den kan teki na yepi fu skowtu ofu srudati di na tirimakti e gi. — Tori fu den Apostru 23:12-22.

10. Fa Yehovah Kotoigi ’ben kisi prèise’ fu na tirimakti?

¹⁰ Gi den kresten di e hori den srefi na a wet fu na hei tirimakti, Paulus e taki: „Yu sa kisi prèise fu en.” Luku pikinso leki eksenpre fu disi wantu brifi di Yehovah Kotoigi na ini Brasion kondre ben kisi baka den distriktkongres fu den. Fu na edeman fu sport afersi: „Na vredefasi fu tyari unu srefi e frudini na moro hei prèise. Na ini na grontapu di e kisi kwinsi a de wan trowstu fu sabi taki so furu sma e bribi na ini Gado ete èn e anbegi en.” Fu na driktoro fu wan resort stadion: „Ala di wan aparti bigi nomru fu sma ben de drape, dan tangi fu na orga di ben de sondro fowtu, meki no wan enkri rapport ben gi fu sani di ben pori a fesa”. Fu na kantoro fu wan distriktkomsarsi: „Mi wani teki na okasi disi fu fristeri unu nanga na ordefasi fu unu èn na tumusi bun, tranga-leri di e kon fu en srefi, èn wi e winsi fu ala sani di unu o du na ini a ten di e kon waka bun.”

11. Fu san-ede na no wan enkri fasi sma kan taki taki na preiki fu na bun nyunsu na wan ogridu?

¹¹ Den wortu ’du di bun’ abi fu du nanga du fu gi yesi na den wet fu den hei tirimakti. Boiti fu dati, a preiki wroko fu wi, di Gado ben komanderi fu du èn no libisma, no de wan du di ogri, a de wan sani di politiek tirimakti musu erken. A de wan publiki diniwroko di e hei na moreel fasi fu den wan di e opo du bun na tapu dati. Wi e howpu taki den hei tirimakti sa kibri na reti di wi abi fu preiki gi trawan. Paulus ben kari a yepi fu den tirimakti fu meki na preiki fu na bun nyunsu poti steifi na lanti wet (Tori fu den Apostru 16:35-40; 25:8-12; Filipi sma 1:7). No so langa psa ete, Yehovah Kotoigi so srefi ben meki muiti èn ben man fu meki den erken na wroko fu den na wet na ini Owstu Doisri-kondre, Hongarije, Polen, Rumenia, Benin nanga Myanmar (Birma).

„A de a dinari fu Gado”

12-14. Fa den hei tirimakti dini leki Gado dinari (a) ini beibri ten? (b) ini na ten disi?

¹² Te Paulus e taki fu tirimakti fu a kondre, a e taki moro fara: „A de a dinari fu Gado gi unu, fu na bun fu unu. Ma efu unu e du san ogri, frede dan; bikasi a no fu soso a e tyari na feti-owru; bikasi a de Gado dinari, wan sma di e teki refrensi fu tyari na atibron kon na tapu den sma di e du san ogri.” — Rome sma 13:4.

¹³ Sontron den tirimakti fu wan kondre ben dini leki Gado dinari na ini wan spesrutu fasi. Dati ben de so, di Cyrus ben kari den dyu fu drai komoto fu Babilon èn go bow na oso fu Gado baka (Esra 1:1-4; Yesaya 44:28). Artaxerxes ben de Gado dinari di a ben seni Esra go nanga wan bijdrage fu bow na oso dati baka, èn bakaten, di a ben gi Nehemia na komando fu bow den skotu fu Yerusalen baka (Esra 7:11-26; 8:25-30; Nehemia 2:1-8). Na hei tirimakti fu Rome ben dini na a fasi dati, di a ben fri Paulus fu den opruru sma na ini Yerusalen, ben kibri en na wan okasi pe a boto ben sungu èn ben sorgu taki a ben abi en eigi oso na ini Rome. — Tori fu den Apostru 21:31, 32; 28:7-10, 30, 31.

¹⁴ Na a srefi fasi a de so taki tirimakti fu kondre dini leki Gado dinari na ini a ten disi. Ini 1959 fu eksenpre, na Hei Krutu fu Canada ben teki na bosroiti taki wan Kotoigi fu Yehovah di den ben kragi na ini Quebec taki a ben tyari na publiki wan skrifi kon a doro di e sutu faya èn di e pori sma nen, no ben abi fowtu — so bun a ben de kontrari na krutu a fesi di na fosi minister fu na ten dati fu Quebec, Maurice Duplessis ben krutu sani a fesi.

15. Ini sortu algemeen fasi den tirimakti e dini leki Gado dinari, èn sortu reti dati e gi den?

¹⁵ Moro fara, den tiri fu den nâsi ini algemeen e dini leki Gado dinari fu di den e hori orde na publiki teleki Gado Kownukondre e teki na frantiwortu dati abra. So leki fa Paulus e taki dan disi na a reide fu san-ede na tirimakti ’e tyari na feti-owru’ leki sinbôl fu na reti fu en fu gi strafu. Leki fa a gwenti de dan disi abi fu du nanga a poti sma na ini dungru-oso ofu a pai fu wan butu. Na ini son kondre a kan abi na ini tu na dedestrafu.a Na a tra sei, furu nâsi frukisi fu no kobroiki na dedestrafu, èn so srefi dati na a reti fu den.

16. (a) San son futuboi fu Gado ben feni taki a yoisti fu den du, fu di na tirimakti na Gado dinari? (b) Sortu wroko wan kresten no sa wani teki, èn fu san-ede?

¹⁶ Fu di den hei tirimakti na Gado dinari, dan dati e fruklari fu san-ede Danièl, den dri Hebrew man, Nehemia, nanga Mordechai ben man fu teki frantiwortu posisi na ini den tiri fu Babilon nanga Persia. Na so wan fasi den ben kan kari a yepi fu na tirimakti fu lanti fu na tanbun fu Gado pipri (Nehemia 1:11; Ester 10:3; Danièl 2:48, 49; 6:1, 2). Na ini na ten disi son kresten e wroko tu gi lanti. Ma fu di den de aparti fu na grontapu, meki den no e moksi den srefi nanga den politiek partij, den no e suku politiek posisi èn den no e teki posisi ini politiek organisâsi pe den e teki posisi fu bepaal fa fu tiri.

A fanowdu fu bribi

17. Sortu situwâsi ben sa kan kori son sma di no de kresten fu kaka futu gi na tirimakti?

¹⁷ Ma san fu du efu na tirimakti e frudrage bidrigifasi èn srefi a kwinsi fu sma? Kresten musu pruberi fu puru na tirimakti èn poti wan trawan na en presi di gersi taki a moro bun? We, onregtfardikifasi nanga bidrigifasi na lanti a no wan nyun sani. Ini na fosi yarihondro na tirimakti fu Rome ben frudrage onregtfardiki sani so leki katibo. Den ben frudrage so srefi lantiman di ben de bidrigiman. Na beibri e taki fu belastingman di ben bidrigi sma, fu wan krutuman di no ben de regtfardiki èn fu wan granman fu wan kontren di ben suku fu kisi tyuku. — Lukas 3:12, 13; 18:2-5; Tori fu den Apostru 24:26, 27.

18, 19. (a) Fa kresten e du te hei lantiman e kobroiki den posisi na wan fowtu fasi ofu e handri kruktu? (b) Fa kresten meki na libi fu aparti sma kon moro bun, so leki wan historia skrifiman èn a fokanti na ondrosei e sori?

¹⁸ Na ini a ten dati kresten ben kan pruberi fu meki wan kba kon na den sortu fowtu sani dati, ma dati den no ben du. Paulus fu eksenpre no ben preiki taki wan kba ben musu kon na katibo, èn a no ben taigi kresten eiginari fu srafu taki den ben musu lusu den srafu fu den. Na presi fu dati, a ben gi den srafu nanga den eiginari fu srafu rai fu sori kresten lobifasi na ini a demakandra fu den (1 Korente sma 7:20-24; Efesia sma 6:1-9; Filemon 10-16; luku so srefi 1 Petrus 2:18). So srefi den kresten no ben moksi den srefi ini revo aktiviteit. Den ben abi tumusi furu fu du na ini a preiki fu na „bun nyunsu fu vrede” (Tori fu den Apostru 10:36). Ini 66 G. T. wan legre fu Rome ben lontu Yerusalen, èn dan den ben hari gwe baka. Den Hebrew kresten no ben tan na den opruru sma di ben opo feti gi na foto, ma fu di den ben gi yesi na a komando fu Yeises ’den ben lowe’ go ’na den bergi’ — Lukas 21:20, 21.

¹⁹ Den fosi kresten ben libi nanga den sani so leki den ben de èn den ben pruberi fu meki a libi fu aparti sma kon moro bun fu di den ben yepi den fu waka na baka den beibri gronprakseri. Na historiya skrifiman John Lord ben skrifi na ini en buku The Old Roman World: „Den tru fektori fu na krestendom ben de fu si na ini a meki kon tron bun sma fu den wan di ben erken den leri fu den, na presi fu e kenki na dorosei luku fu pôpi seti, ofu tiri, ofu wet.” Kresten na ini a ten disi musu handri pikinso tra fasi?

Te lanti no de klari fu gi yepi

20, 21. (a) Fa wán tirimakti fu kondre ben misi fu handri bun leki Gado dinari? (b) Fa Kotoigi fu Yehovah musu opo du wan sani te den e frufolgu den nanga yepi fu lanti?

²⁰ Na ini september 1972, dan na ini wan kondre ini Centraal-Afrika ogri-ati frufolgu ben lusu kon tapu Yehovah Kotoigi. Fu dusundusun fu den, den ben fufuru ala sani di den ben abi èn ben du tra ogri-ati sani nanga den, makandra nanga fonfon, hebi skin-ati èn kiri fu sma. Den hei tirimakti ben du den wroko fu yepi kibri den Kotoigi? Nono! Na presi fu dati, a ben gi deki-ati fu den du den ogridu èn den ben dwengi den kresten disi di no ben du noti fu lowe go na kondre na ini a birti fu kan de bun èn sondro kofar.

²¹ Yehovah Kotoigi no musu opo kon nanga atibron tapu den sortu man disi di e pina sma? Nono. Kresten musu frudrage nanga pasensi den sortu fasi disi di no de warti èn tyari den srefi na wan sakafasi ini a waka baka Yeises: „Te a ben pina a no ben tapu skreki gi sma, ma a ben tan frutrow en srefi na a sma di e krutu regtfardiki” (1 Petrus 2:23). Den e hori na prakseri taki, di den ben kisi Yeises na ini na dyari fu Getsemane, a ben piri-ai gi wan disipri di ben grabu wan feti-owru fu opo feti gi en, èn bakaten a ben taigi Pontius Pilatus: „Mi kownukondre no de wan pisi fu na grontapu disi. Efu mi kownukondre ben de wan pisi fu na grontapu disi, dan den dinari fu mi ben sa feti, so taki den no ben sa gi mi abra na den dyu. Ma so leki fa a de, mi kownukondre no de fu na fonten disi.” — Yohanes 18:36; Mateyus 26:52; Lukas 22:50, 51.

22. Sortu tumusi bun eksenpre wan heri ipi Kotoigi na ini Afrika ben gi di den ben frufolgu den hebi?

²² Nanga na eksenpre fu Yeises na ini prakseri, den Kotoigi dati fu Afrika ben abi na deki-ati fu waka baka Paulus rai: „No pai na no wan sma ogri fu ogri. Gi tumusi bun sani na fesi fu ala sma. Efu a kan, fu so fara a e anga fu yu, de ini vrede nanga ala sma. No teki refensi gi yu srefi, lobiwan, ma gi pasi na atibron; bika a skrifi na ini Buku taki: ’Refensi na fu mi; mi sa pai Yehovah e taki’” (Rome sma 12:17-19; teki gersi Hebrew sma 10:32-34). Fa wi Afrikan brada nanga sisa de wan eksenpre di e gi deki-ati na wi alamala na ini a ten disi! Srefi efu na tirimakti e weigri fu tyari en srefi na wan fasi di e gi en grani, toku tru kresten no e libi beibri gronprakseri a wan sei.

23. Fu sortu aksi wi musu taki fu den ete?

²³ Ma san den hei tirimakti kan fruwakti fu kresten? Èn skotu de gi den sani di den kan aksi nanga reti? Disi wi sa taki fu en na ini na tra artikel.

[Foetoewortoe]

Yu kan fruklari disi?

◻ San na wantu fasi fa wan sma ’ben sa kan poti en srefi kontrari’ den hei tirimakti?

◻ San na „a seti fu Gado” ini na tori fu tirimakti fu lanti?

◻ Na sortu fasi den tirimakti na „wan sani fu frede”

◻ Fa libisma tiri e dini leki „Gado dinari”?

[Faki na tapoe bladzijde 14]

Wan brifi fu wan skowtu komsarsi

NA KANTORO fu na Wachttorengenootschap na ini Brasionkondre ben kisi wan brifi nanga na insinge „Publiki wroko gi Distrikt Minas Gerais”. A brifi ben komoto fu wan skowtu komsarsi fu na foto Conquista. Wan sani no ben yoisti? Meki na brifi taki gi en srefi. Drape ben tanapu:

„Lespeki Meneer,

A de wan prisiri gi mi fu meki yu kon sabi mi nanga yepi fu na brifi disi. So wan dri yari now kba mi de skowtu komsarsi na ini a foto Conquista, Minas Gerais. Na mi wroko mi e pruberi fu handri alaten nanga wan bun konsensi, ma alaten mi ben abi problema fu kibri na vrede na ini a dungru-oso. Aladi den strafuman ben kisi skoro na ini bepaalde wroko, toku den ben de sondro rostu.

Wantu mun psa, meneer O — ben kon na a foto fu wi èn a ben pristeri en srefi leki wan Kotoigi fu Yehovah. A ben bigin preiki na beibri gi wan tu strafuman, ben leri den fu leisi nanga skrifi, èn ben gi den leri fu den fondamenti gronprakseri fu krinfasi nanga sociaal wroko, aladi a ben fruteri tu fu na beibri. A fasi fa na preikiman disi ben wroko, ben sori taki a ben gi en srefi, ben sori lobi èn ben sori taki a e òfer en srefi. Heri esi a fasi fa den strafuman ben tyari den srefi ben kenki kon moro bun srefisrefi, san ben tyari bigi fruwondru nanga warderi fu na sei fu den sma di ben si dati.

Nanga ini prakseri na sani san e psa na ini wi dungru-oso, mi wani tyari mi warderi kon na fesi na wan officieel fasi gi na Wachttoren-, Bijbel- en Traktaatgenootschap fu na tumusi moi wroko di na lespeki preikiman du na ini wi libimakandra.”

Fu tirimakti fu lanti na apostru Paulus ben taki: „Tan du san bun, èn yu sa kisi prèise fu en” (Rome sma 13:3). Ini na kofal fu tapusei seiker dati ben de tru. Fa dati de wan kotoigi gi na krakti fu Gado Wortu fu kan kenki sma di na bun nyunsu tyari kon na ini soso wantu mun san den dungru-oso wrokoman no ben kan tyari kon ini omeni yari! — Psalm 19:7-9.