Troe fri — Foe sortoe fonten?
„A no de na wan man di e koiri srefi foe poti en foetoe na pasi. Sori mi tapoe mi fowtoe, O Jehovah.” — JEREMIA 10:23, 24.
1, 2. Fa moro foeroe sma e si fri, ma na sortoe tra sani wi moesoe go loekoe?
DEGEDEGE no de taki joe e warderi troe fri. Joe wani foe de fri foe taki fa joe e si sani, fri foe bosroiti pe èn fa joe e libi. Joe wani foe teki a wroko di joe e doe, teki den njanjan, den pokoe, den mati foe joe. Foeroe sani joe lobi moro leki trawan, bigi sani èn pikin sani. No wan sma di de boen na en froestan wani foe de wan srafoe foe ogri-ati tiriman, nanga pikinso noso no wan fri foe teki san joe wani.
2 Ma joe no ben sa wani wan grontapoe toe pe trawan èn so srefi joe ben sa feni boen foe troe fri? Joe no ben sa wani wan grontapoe pe den ben sa kibri a fri foe ibriwan sma, so taki den ben man libi a libi foe den dorodoro? Èn efoe a ben man, joe no ben sa wani wan grontapoe toe di fri foe frede, ogridoe, angri, pôtifasi, a doti foe grontapoe, siki nanga orlokoe? Foe troe den sortoe fri disi na sani di sma wani srefisrefi.
3. San ede fri abi waarde gi wi?
3 San ede wi libisma abi so wan tranga firi foe de fri? Bijbel e taki: „Pe a jeje foe Jehovah de, drape fri de” (2 Korentesma 3:17). So boen, Jehovah na a Gado foe fri. Èn foe di a ben meki wi leki en ’prenki èn agersifasi’, a gi wi friwani, so taki wi ben kan warderi fri èn feni boen foe dati. — Genesis 1:26.
Den gebroiki fri na wan fowtoe fasi
4, 5. Fa den ben gebroiki fri na wan fowtoe fasi na ini historia?
4 Ini historia miljoenmiljoen sma ben tron srafoe, ben kisi hebi skin-ati noso den ben kiri den, foe di tra sma ben gebroiki a friwani na wan fowtoe fasi. Bijbel e froeteri taki so wan 3500 jari pasa „den Egiptisma ben dwengi den manpikin foe Israèl foe tron srafoe ondro ogri tiri. Èn den ben tan meki a libi foe den bita nanga hebi katibo” (Exodus 1:13, 14). The Encyclopedia Americana e taki, dati ini a di foe fo jarihondro bifo G.T., a nomroe foe srafoe di ben de na Athene èn na toe tra Griki foto ben pasa den nomroe foe a fri pipel nanga 4 srafoe gi 1 fri sma. A boekoe disi e taki toe: „Fositen wan srafoe na Rome no ben abi reti. Den ben kan kiri en gi a moro pikin fowtoe.” Compton’s Encyclopedia e taki: „Na Rome, srafoewroko ben de a fondamenti foe a kondre. . . . Na den pranigron den srafoe ben wroko foeroe tron, ala di den ben keti den. Na neti den ben tai den makandra èn ben tapoe den na ini bigi strafoe-oso, di den ben beri afoe ondro gron.” Foe di foeroe srafoe ben de fri wan ten, joe kan prakseri a bitafasi foe den libi dati di ben broko!
5 Hondrohondro jari a krestenhèit ben teki prati na wan srafoe bisnis di ben hori sma na ondro kwinsi. The World Book Encyclopedia e taki: „Foe den jari 1500 te go miti 1800, den sma foe Europa ben poti so wan 10 miljoen blaka srafoe foe Afrika na sipi, go na a Westsei Afoepisi foe grontapoe.” Ini a di foe twenti jarihondro disi, miljoenmiljoen sma ben moesoe wroko so tranga taki den ben dede noso sma ben kiri den ini den Nazi konsentrâsi kampoe leki wan fasi fa a lanti foe den e tiri kondre. Foeroe foe den sma di ben njan pina toe, ben de Kotoigi foe Jehovah di den ben poti na doengroe-oso foe di den ben weigri foe horibaka gi a Nazi tiri di ben kiri sma.
Katibo na falsi relisi
6. Fa falsi relisi ben meki sma tron srafoe na Kanan foe owroeten?
6 Ma wan tra fasi foe katibo de toe, di de a bakapisi foe di sma e tan hori na falsi relisi. Foe eksempel, na Kanan foe owroeten, den ben gi pikin-nengre leki ofrandi na Molèk. Sma e taki, dati wan onfoe ben bron inisei foe wan kefarlek bigi popki foe a falsi gado disi. Den ben trowe pikin di ben de na libi ete, na ini den anoe foe a popki, di ben langa go na fesi èn den pikin dati ben fadon go na ini a faja na ondrosei foe a popki. Srefi sonwan foe den Israèlsma ben doe a falsi anbegi disi. Gado e taki, dati den ben meki ’den manpikin nanga oemapikin foe den pasa ini a faja go na Molèk, wan sani di En no ben gi den komando foe doe èn a no ben kon ini En ati toe foe doe a tegoe sani disi’ (Jeremia 32:35). Sortoe boen Molèk ben tjari gi den anbegiman foe en? Pe den nâsi dati foe Kanan èn na anbegi foe Molèk de tide? No wan foe den de moro. Dati ben de falsi relisi, anbegi di no ben abi en gron tapoe troe sani, ma tapoe lei. — Jesaja 60:12.
7. Sortoe heiden doe ben de wan pisi foe na Asteka relisi?
7 Hondrohondro jari pasa, dan den Astekasma na Centraal Amerika ben de ini katibo foe falsi relisi. Sma ben abi den eigi persoonlijk gado, den ben anbegi krakti foe a natuur leki gado, difrenti sani ini na aladei libi ben abi ibri wan foe den a gado foe den, bon ben abi den gado foe den, srefi a kiri di wan sma ben kiri ensrefi ben abi wan gado. A boekoe The Ancient Sun Kingdoms of the Americas (Astekasma — na opo kon èn na fadon foe wan pipel foe fetiman), e froeteri: „Na Asteka tiri foe Meksikow ben orga dorodoro, foe kan horibaka gi èn nanga dati foe prisi den makti, di sma no man si, èn di abi someni ati foe libisma leki sma ben man foe gi den. Broedoe ben de a dringi foe den gado. Foe ben man kisi strafoeman di ben fiti leki wan ofrandi gi den gado, dan doronomo den ben feti pikinpikin orlokoe.” Di den ben pristeri wan bigi piramide tempel na wan foe den gado ini 1486, dan doesoendoesoen sma „ben moesoe tanapoe e wakti na ini rèi, foe den bradi den nanga anoe nanga foetoe tapoe wan ofrandi ston. Den ben koti den ati foe den poeroe èn ben hori en wan sjatoe pisi ten go na a son” foe prisi a songado. The World Book Encyclopedia e taki: „Sontron anbegiman ben njan pisi foe a skin foe wan strafoeman di den ben kiri .” Tokoe den doe disi no ben kibri na Asteka tiri noso a falsi relisi foe den.
8. San wan tjariman di ben tjari wan groepoe lontoe ben taki foe wan disi ten srakti foe sma di ben de moro bigi leki san ben pasa a mindri den Astekasma?
8 Wan leisi den ben tjari fisitiman lontoe ini wan museum pe wan grasikasi ben abi wan prenki na ini di ben sori fa den Asteka priester ben koti na ati foe wan jonkoeman poeroe. Di a tjariman foe a groepoe ben tjari kon a krin san a prenki ben wani taki, wan soktoe ben komoto foe wan toe sma ini a groepoe di a ben tjari lontoe. Ne na tjariman ben taki: „Mi e si taki a doe foe den Astekasma, foe òfer jonkoeman na den heiden gado, e troeboe joe. Tokoe na ini a di foe twenti jarihondro disi, den ben òfer miljoenmiljoen jonkoeman na a gado foe orlokoe. A sani dati de pikinso moro boen srefi?” A de troe taki ini orlokoe den relisi tiriman foe ala nâsi e begi foe wini èn den e blesi den legre, ala di sma di de foe a srefi relisi nofotron de na ala toe sei e kiri makandra. — 1 Johanes 3:10-12; 4:8, 20, 21; 5:3.
9. Sortoe doe e teki moro jongoe libi leki ibri tra doe ini a historia?
9 A kiri foe beibi, di no gebore ete nanga jepi foe a poeroe foe bere, sontron 40 noso 50 miljoen wan jari na a heri grontapoe, moro ogri leki na ofrandi foe den jongoewan gi Molèk, gi Asteka gado noso gi orlokoe. A nomroe foe den beibi di den poeroe a bere ini den dri jari di pasa, moro bigi leki den hondrohondro miljoen sma di den kiri ini ala den orlokoe foe a jarihondro disi. Ibri jari den e poeroe foeroe tron moro beibi a bere leki a nomroe foe sma di den kiri ini a 12 jari Nazi tiri. Ini den lasti tenti jari, hondrohondro tron moro beibi ben kiri nanga a poeroe foe bere, leki ala den sma di den ben òfer wan ten na Molèk noso na den Asteka gado. Tokoe foeroe foe den sma (efoe a no pikinmoro alamala) di ben poeroe bere noso di ben doe dati gi sma, abi wan relisi.
10. San na wan tra fasi fa sma de srafoe foe falsi relisi?
10 Falsi relisi e meki sma tron srafoe na tra fasi toe. Foe eksempel, foeroe sma e bribi taki den dedewan de a libi ini a jejekondre. Wan bakapisi foe so wan kroektoe bribi na a frede èn na anbegi foe dede afo, foe kisi, so leki fa den e bribi, winimarki foe den. Disi e meki sma tron srafoe foe bonoeman, medium foe ogri jeje, nanga kerki fesiman di sma e kari foe jepi den libiwan, so leki fa den e prakseri, foe prisi den dedewan. We, wi kan poti na aksi: Wan fasi de foe broko loesoe foe so wan katibo? — Deuteronomium 18:10-12; Preikiman 9:5, 10.
[Prenki na tapoe bladzijde 4, 5]
Na ini a historia son sma ben gebroiki a friwani foe den na wan fowtoe fasi foe meki sma tron srafoe